1 Ishayo bo‘lajak shoh haqida bashorat qiladi. 8 Xudoning Isroilga bo‘lgan g‘azabi.
Ishayo 9 bob
1 Biroq kulfatli joyda endi azob bo‘lmaydi. Boshida Zabulun va Naftali yurti sharmanda bo‘lgan edi. Ammo kelajakda o‘sha dengiz bo‘yi, Iordanning narigi tomonidagi g‘ayriyahudiylar Jalilasi ulug‘lanadi.
2 Zulmatda yurgan xalq yorqin ziyoni ko‘rdi, O‘lim soya solgan yurt aholisi ustiga nur sochildi.
3 Bu xalqni Sen ko‘paytirgansan, Ularga ko‘p shodlik ato qilgansan. Hosil paytidagi mamnunlik kabi, O‘ljalarin bo‘lishib olgan paytdagi kabi, Ular huzuringda quvonchga to‘lgan.
4 Bu xalqning og‘ir bo‘yinturug‘ini, Yelkasidagi tayog‘ini Sen sindirib tashlagansan. Zolimlarning kaltagini Midiyon xalqi kabi Mag‘lub qilgansan.
5 Jangda kiyilgan etiklar, Qonga belangan hamma kiyim Olovga tashlanib, yoqilajak.
6 Mana biz uchun bola tug‘ildi, O‘g‘il bizga berildi. Hukmronlik Uning zimmasidadir, Nomi Ajoyib maslahatchi, Qudratli Xudo, Abadiy ota, Tinchlik shahzodasidir.
7 Dovudning taxtida Uning hukmronligi ortib boraveradi. Tinchlik to abad hukm suradi. Hozirdan boshlab, to abad Adolat va solihlik ila Shohligini mustahkamlab, barqaror qiladi. Sarvari Olam jon kuydirib, Buni bajo aylaydi.
8 Yoqub nasliga qarshi Rabbiy bir so‘z yubordi, Uning so‘zi Isroil xalqiga yetib keldi.
9 Efrayimda, Samariyada yashaydiganlar, Jamiki xalq bundan xabardor bo‘ldi. Ular dimog‘dorlik, kiborlik ila aytmoqda:
10 “G‘ishtin imoratlar vayron bo‘lsa, Yo‘nilgan toshlar bilan quramiz. Shikamora–anjir daraxtlari kesilgan bo‘lsa, Ularning o‘rniga sadr daraxtlari ekamiz.”
11 Ana, Oram shohi Ratanga qarshi Egam uning dushmanlarini qo‘zg‘atdi, G‘animlarini da’vat qildi.
12 Sharqdan Oramlar, g‘arbdan Filistlar Og‘izlarin katta ochib, Isroilni yutib yubordi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.
13 Bu xalq Sarvari Olamga yuz burmadi, Jazo berganga qaytmadi.
14 Shunda Egam bir kunda Isroildan boshini va quyrug‘ini, Xurmosini va foydasiz qamishini kesib oldi.
15 Oqsoqollar, amaldorlar boshdir, Soxta payg‘ambarlar quyruqdir.
16 Ular bu xalqni yo‘ldan adashtirgan, Ularga ergashganlar boshi berk ko‘chaga kirib qolgan.
17 Hammasi shakkok, qabihlik qilar, Barcha og‘izlardan ahmoqona so‘z chiqar. Rabbiy yoshlardan mamnun bo‘lmadi, Yetim, bevalarga shafqat ko‘rsatmadi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.
18 Fosiqlik olovga o‘xshab yonar, Yeb bitirar butazoru tikanzorlarni. O‘rmondagi changalzorlarni yondirib, Balandlarga tutunini o‘rlatadi.
19 Sarvari Olamning qahridan Yurt yonib bitar, Xalq olovga yonilg‘i bo‘lar, Odam o‘z yaqiniga shafqat qilmas.
20 O‘ng tarafga hamla qilar, Ammo och qolaverarlar. Ha, chap tarafda, yutaman, der, Ammo to‘ymaslar. O‘z qo‘lining go‘shtini yeydi insonlar.
21 Manashe qabilasi yeydi Efrayim qabilasini, Efrayim esa Manasheni, Ikkovi birlashib Yahudoga hujum qiladi. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.
