Нажот топганларнинг ҳамду саноси
Забур 106 bob
1 Худовандга шукр қилинглар! У олижанобдир, абадийдир инояти.
2 Бундай десин Худованд қутқарган, Душман қўлидан нажот топган халқ!
3 У бизни Шарқу Ғарбдан, Шимолу Жанубдан, Турли ўлкалардан тўплаб олди, деб юришсин!
4 Улар чўлу биёбонни кезиб адашардилар, Одам яшайдиган бирон шаҳар тополмасдан.
5 Оч ҳамда сувсиз қолган эдилар, Жону танлари ҳолдан кетар эди.
6 Машаққатларида Худовандга фарёд этишгач, У уларни қутқарди азоб-уқубатларидан.
7 Одам яшайдиган шаҳарни топсин дея, Уларни тўғри йўлга бошлади У.
8 Худовандга шукр қилсинлар берган инояти учун, Одам болаларига кўрсатган мўъжизалари учун!
9 Чунки У қондирди чанқоқ кўнгилни, Неъматлар билан тўйдирди очиққан жонни.
10 Зулматга, ўлим ваҳимасига келиб қолдилар, Темир кишанда ўтириб азоб чекардилар.
11 Чунки Тангри амрларига қаршилик қилдилар, Тангри Таоло иродасини менсимадилар.
12 У оғир иш билан уларнинг димоғини туширди, Улар қоқилди, ёрдамчилари йўқ эди.
13 Машаққатларида Худовандга фарёд этишгач, У уларни қутқарди азоб-уқубатларидан.
14 Зулмат ва ўлим ваҳмасидан уларни озод қилди, Занжир-кишанларини синдириб ташлади.
15 Худовандга шукр қилсинлар берган инояти учун, Одам болаларига кўрсатган мўъжизалари учун!
16 Мана Ўзи мис дарвозаларни пора-пора қилган, Темир тамбаларни чопиб парчалаб ташлаган.
17 Улар эса тентаклик қилиб исён кўтардилар, Қилган ёмонликлари эвазига жафо ҳам чекдилар.
18 Жонлари ҳар қандай озиқ-овқатни рад этар, Ўлим дарвозасига яқинлашган эдилар.
19 Машаққатларида Худовандга фарёд этишгач, У уларни қутқарди азоб-уқубатларидан.
20 Каломини юбориб уларга шифо берди, Уларни тушган чоҳларидан чиқариб олди.
21 Худовандга шукр қилсинлар берган инояти учун, Одам болаларига кўрсатган мўъжизалари учун!
22 Худовандга шукрона билан қурбонлик атасинлар, Унинг ишларини тантана ила тарғиб қилсинлар!
23 Кемаларида денгизда қатновчилар ҳам, Баҳрлар аро меҳнат қилувчилар ҳам
24 Худованднинг ишларига гувоҳ бўлдилар, Гирдобда кўрсатган мўъжизаларин кўрдилар.
25 У амр бериб, кучли бўрон келтирди, Денгиз тўлқинларин баланд кўтариб юборди.
26 Кемачилар кўкка ўрлаб, тубсизликка чўкди, Даҳшатдан уларнинг жони мумдек эриди.
27 Улар маст каби ўйноқлаб айланди, Ақли-ҳуши бошидан учди.
28 Машаққатларида Худовандга фарёд этишгач, У уларни чиқарди азоб-уқубатларидан.
29 Худованд бўронни тинчитиб қўйди, Сув тўлқинларини ҳам пасайтирди.
30 Сувларни тинчитиб, умматини севинтирди, Орзу қилган бекатларига етаклаб борди.
31 Худовандга шукр қилсинлар берган инояти учун, Одам болаларига кўрсатган мўъжизалари учун!
32 Халқ йиғинларида Уни кўкка кўтарсинлар, Оқсоқоллар мажлисида Унга ҳамд – сано айтсинлар.
33 Худованд дарёларни чўлга айлантиради, Булоқларни эса қуритиб юборади.
34 Аҳолисининг ёвузлиги сабабли Ҳосилдор тупроқни шўр ерга айлантиради.
35 Тағин саҳрода кўлларни пайдо қилиб, Бўз ерни чашмазорга айлантиради.
36 Оч-юпунларни ўша ерга жойлаштиради, Улар яшайдиган шаҳарни қурадилар.
37 Экин экиб, узумзор яратадилар, Даладан мўл-кўл ҳосил кўтарадилар.
38 Худованд уларга баракат беради, Уларнинг сони ошиб боради, Чорваси эса сира камаймайди.
39 Тағин улар сон жиҳатдан озайиб қолган, Жабр-жафо, бало-қазога йўлиқиб қадди букилган эди.
40 Саркардаларни шувут қилувчи Худованд Ўзи Йўлсиз саҳрода уларни саргардон қилди.
41 Лек бечораҳолларни тупроқдан юқори кўтарди, Оилаларини қўйлар подасидек кўпайтирди.
42 Тўғри кишилар буни кўриб севинур, Барча қаллоблар оғзи эса тўсилиб қолур.
43 Кимки оқил бўлса, буларни пайқар, Худованднинг меҳр-иноятини англар.
