Илоҳий Қонуннинг фазилатлари (Алеф)
Забур 118 bob
1 Қандай бахтлидир софдиллик йўлидан борувчи, Илоҳий Қонун билан юрувчи кишилар!
2 Бахтлидир Худованд шаҳодатин сақлаб, Чин қалбдан Худога интилувчилар!
3 Улар қонунсиз ишга оёғини бурмай, Худованднинг йўлларидан юрадилар.
4 Низом-қонунларингни Ўзинг буюргансан, Жиддийлик билан риоя қилинсин дея.
5 Қоидаларингга амал қилмоққа Кошки йўлларим ўнгса эди!
6 Шунда шарманда бўлмасман, Барча амрларингни кўз ўнгимга келтириб.
7 Соф кўнгилдан шукр қиларман, Сенинг одил ҳукмларингни ўрганиб.
8 Фармонларингни бажараман Сенинг, Мени бутунлай ташлаб кетмагин!
9 Йигит ўз йўлини қандай қилиб соф сақлар? Сенинг каломинг билан юрса бу бўлар.
10 Мен Сени чин кўнгилдан қидиряпман, Амрларингдан бош тортишимга йўл қўйма!
11 Сенга қарши гуноҳ қилмаслик учун, Каломингни юрагимда сақлайман.
12 Эй Худованд, мен Сени олқишлайман, Қонун-қоидаларингни менга ўргатгин!
13 Оғзингдан чиққан барча ҳукмларни Ўз ирним билан хабар қиламан.
14 Сенинг ваҳийларинг йўлида мен Катта бойлик топгандек хурсанд бўламан.
15 Буйруқларингни теран ўйлаб, Сенинг йўлларингга кўз тикаман.
16 Низом-қоидаларингдан завқ топаман, Унутмайман каломинг Сенинг.
17 Қулингга илтифот қилгин, Мен яшаб сўзингни тутайин!
18 Кўзларимни очиб юборгин, Қонунинг ажойиботларини кўрайин!
19 Мен бу дунёда мусофирман, Амрларингни мендан яширмагин!
20 Ҳукмларингни доимо орзу қиламан, Соғинчдан жоним адо бўлмоқда.
21 Бошбошдоқларнинг адабини Ўзинг берасан, Амрларингдан адашган ҳамма лаънатидир.
22 Шармандалик ва ҳақоратни мендан узоқлаштир, Мен Сенинг шаҳодатингга риоя қиламан-ку.
23 Ҳатто беклар ўтириб мени ғийбат қилмоқда, Қулинг эса низомларингни теран ўйламоқда.
24 Ҳа, Сенинг ваҳийларинг мен учун завқдир, Улар менинг маслаҳатчиларим ҳамдир.
25 Жоним тупроққа ёпишиб қолган, Ўз каломинг ила мени жонлантиргин!
26 Йўлларимни Сенга очганимда, мени эшитдинг; Қонун-қоидаларингни менга ўргатгин!
27 Буйруқларинг йўлини менга англатгин, Токи мўъжизаларингни теран ўйлаб олайин!
28 Жоним ғам-ғуссадан адо бўлмоқда, Каломинг билан мени мустаҳкамлагин!
29 Ёлғончилик йўлин мендан узоқлаштир, Қонунинг роҳини мен учун ўнглагин!
30 Мен садоқат йўлини танлаб, Ҳукм-фармонларингни олдимга қўйдим.
31 Ваҳийларингга қаттиқ ёпишдим, Мени шарманда қилма, ё Раббим!
32 Сен юрагимни кенг қилган сайин, Амрларинг йўлидан елиб борарман.
33 Эй Худованд, Қонун-қоидаларинг йўлини менга ўргатгин, Уларни охиригача тутиб амалга оширайин!
34 Менга ақл-идрок бергин, Токи Қонунингга риоя қилайин, Уни чин қалбдан сақлаб юрайин!
35 Мени амрларинг йўлидан юргизгин, Чунки ундан мен хушнуд бўлдим.
36 Юрагимни тамагирликка эмас, Ўз шаҳодатингга мойил қилгин!
37 Беҳуда иш-ҳаракатларга қаратма кўзим, Ўз йўлларингда мени тирик тутгин!
38 Сендан қўрққанларга берган сўзингни Ўз қулингга ҳам барқарор қилгин!
39 Мен қўрқадиган ҳақоратни мендан узоқлаштиргин! Фақат Сенинг ҳукмларинг олижанобдир.
40 Ҳа, Сенинг буйруқларингни ҳавас қилдим, Ўз адолатинг ҳақи жонлантиргин мени!
41 Берган ваъдангга кўра, эй Худованд, Иноятинг ва нажотинг менга келсин!
42 Шунда ҳақорат қилганларга жавоб берарман, Чунки Сенинг каломингга ишончим комил.
43 Оғзимдан ҳақиқат каломини бутунлай тортиб олма, Мен Сенинг ҳукмларингга умид боғлаганман.
44 Сенинг Қонунингни мен ҳамма вақт, Доимо ва абадий сақлайман.
45 Юрагим кенг бўлиб юравераман, Зеро буйруқларингга кўнглим мойил.
46 Шоҳлар қошида шаҳодат келтираман, Сени деб шарманда бўлмайин!
47 Мен амрларингни кўп севаман, Улардан ҳузур-ҳаловат топаман.
48 Меҳр билан қўл чўзаман амрингга, Фармонларингни чуқур ўйлаб ўрганаман.
49 Бандангга берган сўзингни эслагин, Ундан мени умидвор қилгансан-ку!
50 Мусибатим кунида тасаллим шу бўлур: Сенинг каломинг жонимга жон киритур.
51 Такаббурлар мени кўп масхара қилишди, Мен эса қайтмадим Қонунингдан.
52 Азалий ҳукмларингни эслаб Сенинг, Мен тасалли топмоқдаман, эй Худованд.
53 Қонунингни ташлаб кетган, Йўл-йўриғинг баҳридан кечган фосидлардан Мени ваҳима босиб кетди.
54 Шу ғурбатсаромда низому қоидаларинг Илҳом бўлди қўшиқларимга менинг.
55 Эй Худованд, тунда Сенинг исмингни эслаб, Қонунингга риоя қилишга азм қилдим.
56 Сенинг буйруқларингни сақлаганим учун, Бу бахт менга насиб бўлди.
57 Эй Худованд, – дедим мен, – Каломингни сақлашдир менинг бурчим.
58 Мен чин кўнгилдан Сенга ёлвордим, Ваъдангга кўра менга меҳрибонлик қилгин!
59 Мен йўлларимни ўйлаб кўрдиму, Оёқларимни қоидаларинг томон бурдим.
60 Амрларингни тутмоқ учун шошилдим, Шу йўлда мутлақо имилламадим.
61 Бетавфиқлар ўз домига тортди мени, Вале Сенинг Қонунингни унутмадим.
62 Одил ҳукмларинг учун шукр қилай деб, Мен ярим кечада ҳам тураман.
63 Мен барча Сендан қўрққанларнинг, Буйруқларингни тутганларнинг улфатиман.
64 Сенинг иноятинг билан тўладир ер юзи, Менга қоидаларингни ўргатгин, ё Раб!
65 Эй Худованд, Ўз каломингга мувофиқ Шу қулингга яхшилик қилгин!
66 Менга аъло дид ва фаросат бахш этгин, Буйруқларингга ишончим комил менинг.
67 Жафо тортмасдан олдин адашар эдим, Энди эса каломингни тутмоқдаман.
68 Сен яхшисан, яхшилик қилувчисан, Қонунларингни менга ўргатгин!
69 Такаббурлар орқамдан ғийбатимни қиладилар, Мен эса чин қалбдан амрларингни тутаман.
70 Уларнинг юраги чарви боғлаб семирган, Мен эса Сенинг Қонунингдан лаззат оламан.
71 Жафо тортганим менга яхши бўлибди, Чунки қонун-қоидаларингни ўрганиб олдим.
72 Минглаб олтину кумушдан афзал биламан Ўз оғзингдан чиққан Қонунинг Сенинг.
73 Сенинг қўлларинг мени яратган, барпо этган, Амрларингни ўрганишим учун менга идрок бергин!
74 Сендан қўрққанлар мени кўриб севинар, Чунки Сенинг сўзингга умид боғлаганман.
75 Эй Худованд, ҳукмларинг одил эканини биламан, Мени қийнаганингда ҳам вафодорлик қилдинг.
76 Қулингга берган ваъдангга кўра, Илтифотинг менга тасалли бўлсин!
77 Раҳм-шафқатинг менга келсин ва яшайман, Сенинг Қонунингдир менга ҳузур берадиган.
78 Мени ноҳақ ситам қилган шаккоклар уялсин, Мен Сенинг буйруғингни фикрлаб борайин.
79 Сендан қўрққан, шаҳодатингни билган Барча мен томон бурилиб келсин.
80 Мен шарманда бўлмаслигим учун, Қоидаларинг йўлида дилимни пок сақлайман.
81 Нажотингни кутиб жоним адо бўлмоқда, Каломингга мен умид боғлаганман.
82 Қачон менга тасалли берасан? – дея, Каломингга тикилиб кўзим сўниб бормоқда.
83 Тутунда бужмайиб қолган мешга ўхшайман, Лекин Сенинг фармонларингни унутмайман.
84 Шу қулингнинг умри ҳам қанча бўларди? Изимга тушганларни қачон ҳукм этарсан?
85 Қонунингни менсимайдиган шаккоклар Менга чоҳ-чуқур қазидилар.
86 Барча амрларинг ҳақдир Сенинг. Ноҳақ изимга тушганларга қарши туриб, Менга ёрдам юборгин!
87 Мени ер юзидан йўқ қилишларига оз қолди, Бироқ мен амрларингдан кўз юммадим.
88 Иноят қилиб мени барҳаёт сақлагин, Ўз оғзингдан чиққан шаҳодатни сақлаб юрайин!
89 Эй Худованд, Сенинг каломинг абадийдир, У фазода маҳкам ўрнатилгандир.
90 Садоқатинг наслдан-наслга ўтади, Сен ерни мустаҳкам қилиб яратгансан.
91 Қароринг ила бугунгача ҳаммаси мавжуд, Сенинг қулларингдир борлиқ мавжудот.
92 Қонунингдан тасалли тополмасайдим гар, Мен мусибатдан йўқ бўлиб кетардим.
93 Буйруқларингни ҳеч вақт унутмайман, Улар орқали менга ҳаёт бағишладинг.
94 Мен Сеникиман, халос қилгин мени, Сенинг амрингни ўзим талаб қилганман.
95 Бетавфиқлар мени йўқ этмоқни пойлади, Мен-чи шаҳодатингни дилимга тугиб олдим.
96 Ҳар қандай камолотнинг ҳаддини кўрдим, Сенинг амринг эса ҳадсиз-поёнсиздир.
97 Қонунингни мен қанчалик севаман, Кун бўйи у фикр-хаёлимда менинг.
98 Ёвларимдан ортиқ доно қилди мени амринг, То абад меники деб биламан фармонинг.
99 Барча устозларимдан ақллироқ бўлдим, Чунон хаёлимдан кетмас қонун- қоидаларинг.
100 Оқсоқоллардан ҳам ҳикматлироқ бўлдим, Зеро Сенинг буйруқларингни сақлаб келаман.
101 Сўзингга риоя қилай дея тийдим мен Оёқларимни барча ёмон йўлдан.
102 Сенинг ҳукмларингдан қайтмадим, Зеро Ўзинг менга таълим беряпсан.
103 Каломларинг томоғимга нечук лазиздир, Оғзимга улар болдан ҳам ширин татийди!
104 Буйруқларингдан ақл ўрганганим учун, Ҳар хил ёлғон йўлдан нафратланаман.
105 Сенинг каломинг қадамларим учун чироқдир, Йўлимга нур сочадиган ёруғликдир.
106 Ҳақ қарорларингни тутмоққа онт ичдиму, Қасамимга вафо ҳам қиламан.
107 Мен жуда кўп жафо чекдим, ё Раб, Каломинг ила менга жон бахш этгин!
108 Эй Худованд, тилимдаги ҳамду санони Кўнгил қурбонлиги каби қабул этгин, Ҳукму қарорларингни менга ўргатгин!
109 Жоним нуқул ҳовучимда бўлса ҳам, Лек Сенинг Қонунингни унутмадим.
110 Фосиқлар менга қопқон қўйган бўлса-да, Лек Сенинг амрларингдан бош тортмадим.
111 Ваҳийларингни абадий мерос қилиб олдим, Улар юрагимга шод-хуррамлик бағишлайди.
112 Низом-қоидаларингга риоя қилмоққа, Умрбод, қатъий қарор қилдим.
113 Иккиланувчилардан нафратланаман, Сенинг Қонунингни мен севаман.
114 Паноҳим ва қалқоним Сенсан, Сенинг сўзингга умид боғлаганман.
115 Эй бадкирдорлар, мендан узоқлашинг, Худойимнинг амрларини тутиб юрайин!
116 Ўз амринг бўйича маҳкам ушла қўлимдан, Яшайверайин, кўнглимни совитма умидимдан!
117 Менга мадад юборгин, халос бўлайин, Низомларингга синчиклаб қарайин мудом!
118 Қоидаларингдан чиққан барчани Сен рад қиласан, Мана беҳудадир уларнинг ҳийлаю найранги!
119 Ер юзидаги ҳамма бетавфиқларни Сен чиқитдай супуриб ташлайсан; Мен-ку Сенинг ваҳийларингни севаман.
120 Сендан қўрққанимдан вужудимни титроқ босди, Ҳукмларингдан мен жуда қўрқаман.
121 Мен инсоф ва ҳаққоният йўлида ҳаракат қилдим, Жабр қилувчилар қўлига топширма мени!
122 Ўз қулингдан дариғ тутма шафоатинг, Такаббурлар менга жабр-зулм қилмасин!
123 Сенинг нажотингга кўзим тўрт бўлди, Одил ҳукмингни кутиб кўзим нури тўкилди.
124 Қулингга иноят қилиб иш кўрсатгин, Амру фармонларингни ўргатгин менга!
125 Мен Сенинг қулингман-ку, Менга ақл-идрок бергин, Ваҳийларингни фаҳмлаб олайин!
126 Худованднинг иш қилиш вақт-соати келди, Мана, Сенинг Қонунингни бузиб юрибдилар!
127 Менга қолса, амрларингни олтиндан ҳам, Энг соф тилладан ҳам кўпроқ севаман.
128 Ҳамма буйруқларингни тўғри деб биламан, Ҳар қандай ёлғончиликдан нафратланаман.
129 Ваҳийларинг ажойибдир Сенинг, Шул боис уларга ёпишар жоним.
130 Каломинг очилиб қолганда зиё сочар, Ғофилларга ақл-идрок берар.
131 Оғзимни кенг очиб оҳ дейман, Амрларингга қанчалик зориқаман!
132 Исмингни севгучиларга қилганингдек, Менга ҳам қараб меҳрибонлик кўрсатгин!
133 Амринг ила қадамларимни тўғри қил, Ҳеч бир ёмонлик менга ҳукмрон бўлмасин!
134 Инсон жабридан мени қутқаргин, Буйруқларингни тутиб борайин!
135 Қулингга мунаввар юзингни кўрсатгин, Низом-қоидаларингни ўргатгин менга!
136 Қонунингни бузганлар сабабли Кўз ёшимни дарёдай тўкиб юраман.
137 Сен одилсан, эй Худованд, Ҳукмларинг эса тўғридир Сенинг.
138 Ваҳийларингни барҳақ қилиб буюргансан, Улар тамомила ишонарлидир.
139 Жаҳду ғайратим мени адо этмоқда, Каломингни эсдан чиқаряпти-ку ёвларим!
140 Сенинг каломинг жуда мусаффодир, Қулинг унга қанчалик меҳр қўйган!
141 Мен кичикман, хўрланганман, Лекин буйруқларингни унутмайман.
142 Сенинг адолатинг – мангу алолат, Қонунинг эса – ҳақиқатдир.
143 Мен азоб ва машаққатга йўлиқдим, Амрларинг-чи менга завқ бағишлар.
144 Ваҳийларинг абадий адолатдир, Менга идрок бергин ва яшайман.
145 Чин кўнгилдан ёлворяпман, Менга жавоб бергин, эй Худованд! Сенинг қонун-қоидаларингни сақлайман.
146 Сенга ёлворяпман, қутқаргин мени, Токи шаҳодатингга содиқ қолайин!
147 Саҳар чоғи туриб нолаю фиғон қиламан, Сенинг сўзингга умид боғлайман.
148 Каломингни фикр қилиб тунни тонгга улайман, Кўзларимга уйқу бермайман асло.
149 Иноят қилиб овозимни эшитгин, ё Раббим, Адолат қилиб менга жон бергин!
150 Фисқ-фасод пайидан бўлган бузуқ ниятлилар Қонунингдан узоқлашиб, менга яқинлашдилар.
151 Бироқ Сен жуда яқинсан, эй Худованд, Барча амрларинг эса ҳақиқатдир.
152 Ваҳийларингни азалий деб биламан, Сен уларни мангу барқарор қилгансан.
153 Тушкунлигимни кўру, мени қутқаргин, Чунки Сенинг Қонунингни унутмадим!
154 Даъвомга чора қил, мени ҳимоя этгин, Ваъдангга кўра мени жонлантиргин!
155 Бетавфиқлар қутулишдан узоқдир, Чунки улар низомингни изламайдилар.
156 Сен эса-чи кўп раҳмдилсан, эй Худованд, Ўз ҳукму қароринг ила жонимни киритгин!
157 Мени таъқиб қилаётган душманларим кўп, Бироқ Сенинг шаҳодатингдан мен чиқмадим.
158 Каломингга амал қилмайдиган хоинларни кўриб, Мен қаттиқ нафратландим.
159 Қара, Сенинг амрларингни мен қандай севаман! Эй Худованд, лутф қилиб мени жонлантиргин!
160 Сенинг каломинг асоси ҳақиқатдир, Ҳар бир адолатли ҳукминг абадийдир.
161 Беклар сабабсиз орқамдан тушдилар, Дилимга эса Сенинг каломинг қўрқув солар.
162 Мен Сенинг ваъдангни эшитиб, Катта ғанимат топгандай хурсанд бўлдим.
163 Ёлғончиликдан нафратланиб жирканаман, Лекин Сенинг Қонунингни севаман.
164 Мен адолатли ҳукмларингни куйлаб, Ҳар куни етти марта Сенга сано айтаман.
165 Қонунингни севганларга буюк хотиржамлик ёрдир, Уларнинг оёғи тўсиққа қоқилиб кетмас.
166 Нажотингга умид боғладим, эй Худованд, Сенинг амрларингни бажариб бораман.
167 Ваҳийларингни қалбимда сақлаб юраман, Уларни жон-дилим билан севаман.
168 Буйруқ ва низомларингни тутаман, Барча йўлларим Сенинг олдингда аёндир.
169 Фарёдим Сенга бориб етсин, эй Худованд, Каломинг билан менга фаҳм-идрок бергин!
170 Ёлвориб-ялинишим Сенга бориб етсин, Сўзингга яраша мени халос қилгин!
171 Низомларингни менга ўргатар экансан, Сенга мақтовлар тилимдан тушмасин!
172 Сенинг барча амрларинг адолатли экан, Ирним каломингни тараннум этсин!
173 Қўлинг менга ёрдам бермоққа шай бўлсин, Сен буюрган амрларни мен танлаганман.
174 Нажотингни ҳавас билан излайман, ё Раббим, Қонунинг эса завқу овунчоғим бўлди менинг.
175 Жоним яшасин, Сенга мақтовлар ўқисин, Ҳукмларинг менга ёрдам берсин!
176 Йўқолган қўй каби йўлдан адашдим; Сен шу қулингни ахтариб топгин, Чунки амрларингни унутмадим.
