Rimliklarga maktub 15 bob

7 Xushxabar barcha xalqlar uchundir. 14 Pavlus g‘ayriyahudiylarga xizmat qilishga da’vat etilgan. 22 Pavlusning Rimga borish niyati.

¹ Biz, imoni kuchlilar, o‘zimizni mamnun qilishni ko‘zlamasdan, imoni sust bo‘lgan birodarlarning ojizligiga sabr–bardosh qilishimiz kerak.

² Har birimiz o‘zganing manfaatini ko‘zlab, unga dalda berish niyatida uni mamnun qilish harakatida bo‘laylik.

³ Hattoki Masih ham O‘zini mamnun qilishni ko‘zlamagan, zero, Muqaddas Bitiklarda yozilganiday: “Seni haqoratlaganlar meni haqorat qilgan bo‘lar.”

⁴ Qadimgi Bitiklarda nimaiki yozilgan bo‘lsa, bizning ta’lim olishimiz uchun yozilgan. Biz bu Bitiklardan sabr va tasalli topib, umidimizda mahkam turishimiz lozim.

⁵ Sabr va tasalli manbayi bo‘lgan Xudoning O‘zi esa Iso Masihning shogirdlariga mos ravishda bir– biringiz bilan hamfikr bo‘lishni sizlarga ato qilsin.

⁶ Shunda sizlar yakdillik bilan, bir ovozda Rabbimiz Iso Masihning Otasi — Xudoni ulug‘laysizlar.

⁷ Masih sizlarni o‘z birodarlariday qabul qilgani kabi, sizlar ham bir–biringizni birodarlarday qabul qiling. Shunday qilish Xudoga shuhrat keltiradi.

⁸ Men sizlarga aytyapman: Xudoning ota– bobolarimizga bergan va’dalarini bajarib, Uning sodiqligini ko‘rsatish niyatida Iso Masih yahudiylarning xizmatkori bo‘lib keldi.

⁹ Masihning kelishidan yana bir maqsadi shu ediki, g‘ayriyahudiylar ham Xudoning mehr–shafqati uchun Uni ulug‘lasinlar. Muqaddas Bitiklarda yozilganiday: “Xalqlar ichra Senga hamdlar ayturman, Sening ismingni kuylab sano ayturman.”

¹⁰ Yana boshqa joyda shunday yozilgan: “Ey ellar, Uning xalqi bilan shodlaning.”

¹¹ Yana shunday deb ham yozilgan: “Ey barcha xalqlar, Egamizga hamdu sanolar bo‘lsin! Ey jamiki elatlar, Uni olqishlanglar!”

¹² Ishayo kitobida ham quyidagicha yozilgan: “Essay tomiridan bir Zot kelib chiqar, U xalqlar ustidan hukmronlik qilar, Xalqlar esa Unga umid bog‘laydilar.”

¹³ Imon yo‘lidan yurar ekansiz, umid manbayi bo‘lgan Xudo qalbingizni sevinch va tinchlikka to‘ldirsin, shunda sizlar Muqaddas Ruhning kuchi ila umidga boy bo‘lasizlar.

¹⁴ Ey birodarlarim, men aminmanki, sizlar ezgulikka va ilm–ma’rifatga boysizlar, bir– biringizga pand–nasihat qilishga qodirsizlar.

¹⁵ Shuning uchun, ba’zi bir narsalarni eslatay deb, sizlarga bu xatni yozishga jur’at qildim, chunki men Xudoning inoyati bilan

¹⁶ Iso Masihning xizmatkori etib tayinlanganman. Xudoning Xushxabarini aytib, ruhoniy sifatida g‘ayriyahudiylarga xizmat qilmoqdaman. Buning natijasida, g‘ayriyahudiylar Xudoga manzur bo‘ladigan, Muqaddas Ruh orqali tabarruk qilingan qurbonlikday Xudoga tortiq etilmoqdalar.

¹⁷ Shunday qilib, Iso Masih tufayli Xudoning yo‘lida qilgan ishlarim bilan maqtansam bo‘ladi.

¹⁸ Kuchli mo‘jizalaru alomatlar bilan, mening aytganlarim va qilganlarim orqali Masih g‘ayriyahudiylarni Xudoga itoat qilish yo‘liga boshladi. Ammo Iso Masihning men orqali qilgan ishlaridan boshqa narsalar haqida gapirishga jur’at etmayman, chunki bularning hammasi Xudo Ruhining qudrati ila sodir bo‘ldi.

¹⁹ Shunday qilib, men Quddusdan boshlab, to Illiriya hududiga qadar Masihning Xushxabarini yoyib, o‘z vazifamni bajardim.

²⁰ Shu bilan birga, men boshqalarning poydevori ustiga bino qurmayin, deb hali Masihning nomi ovoza qilinmagan yerlarda Xushxabarni yoyish uchun jon kuydiryapman.

²¹ Muqaddas Bitiklarda yozilganiday: “U haqda xabarsiz bo‘lganlar endi ko‘radilar, U haqda eshitmaganlar endi anglab yetadilar.”

²² Xushxabarni yoyish xizmatim tufayli anchadan beri sizlarning oldingizga bora olganim yo‘q.

²³ Endi esa bu joylarda menga boshqa ish qolmagan. Men ko‘p yillardan beri sizlarni ko‘rishni orzu qilaman.

²⁴ Shuning uchun Ispaniyaga borayotganimda, yo‘lda sizlarni ko‘rib o‘taman. Oz bo‘lsa–da, diydoringizga to‘yganimdan keyin, yo‘limda davom etishim uchun kerakli bo‘lgan muhtojliklarimni qondirarsizlar, degan umiddaman.

²⁵ Hozircha men Xudo azizlariga yordam bergani Quddusga ketyapman.

²⁶ Chunki Makedoniya va Axayadagi birodarlar mablag‘ yig‘ib, Quddusdagi kambag‘al birodarlarga yordam berishga qaror qildilar.

²⁷ Buni ham qarz, ham farz, deb bilganlari uchun, xursandchilik bilan shunday qildilar. Axir, g‘ayriyahudiylar yahudiylar tufayli ruhiy ne’matlarga sazovor bo‘ldilar–da, shuning uchun ular o‘z moddiy boyliklarini yahudiylar bilan baham ko‘rishni loyiq topdilar.

²⁸ Men bu ishni bajarib, to‘plangan mablag‘ni ularga topshirganimdan keyin, sizlarning oldingizda to‘xtab o‘taman. So‘ngra Ispaniyaga ketaman.

²⁹ Aminmanki, men sizlarni ko‘rishga borganimda, biz birgalikda Masih Xushxabari keltiradigan qut– barakalarni to‘liq baham ko‘ramiz.

³⁰ Ey, birodarlarim, Rabbimiz Iso Masih va Muqaddas Ruh ato qiladigan mehr–muhabbat haqi sizlarga yolvoraman: men uchun birgalikda Xudoga ibodat qilaylik.

³¹ Yahudiyadagi imonsizlarning qo‘lidan qutulushim uchun va Quddusdagi xizmatim u yerdagi Xudoning azizlariga ma’qul bo‘lishi uchun ibodat qilinglar.

³² Xudo xohlasa, men shod–xurramlik bilan sizlarning oldingizga boraman, sizlar bilan birga bo‘lganimdan qalbim orom topadi.

³³ Tinchlik manbayi bo‘lgan Xudo hammangizga yor bo‘lsin. Omin!