Сторми Омартиан. Ибодатгўй Аелнинг Қудрати (3 боб) Ўзбек тилида
МУНДАРИЖА
Ибодатнинг кучи
1 боб - Сиз Турмушга Чиќдингиз
2 боб - Унинг Ишлари
3 боб - Унинг Моддий Маблаѓлари
4 боб - Унинг Интим Хаёти
5 боб - Унинг Мехрибонлиги
6 боб - Унинг Васвасалари
7 боб - Унинг Шубхалари
8 боб - Унинг Ќўрќуви
9 боб - Унинг Маќсадлари
10 боб - Унинг Ќарорлари
11 боб - Унинг Соѓлиѓи
12 боб - Унинг Химояси
13 боб - Худонинг Синовлари
14 боб - Унинг Ахлоќий Принциплари
15 боб - Унинг Обрўйи
16 боб - Унинг Устиворликлари
17 боб - Унинг Ўзаро Муносабатлари
18 боб - Унинг Оталик Бурчи
19 боб - Унинг Ўтмиши
20 боб - Унинг Феъл-Атвори
21 боб - Унинг Оиласи
22 боб - Унинг Хиссиётлари
23 боб - Унинг Юриш-Туриши
24 боб - Унинг Гап - Сўзлари
25 боб - Унинг Тавба-Тазарруси
26 боб - Унинг Халос Бўлиши
27 боб - Унинг Итоаткорлиги
28 боб - Унинг Ўзи Тўѓрисидаги Фикри
29 боб - Унинг Ишончи
30 боб - Унинг Келажаги
3-БОБ УНИНГ МОДДИЙ МАБЛАҒЛАРИ
Эрингизнинг бутун ҳаётидаги муваффақият кўпроқ унинг пулга бўлган муносабатига боғлиқ. У сахийми ёки хасисми? У бошқаларнинг муваффақиятидан хурсанд бўладими ёки ҳасаддан куйиб-ёнадими? Пул у учун марҳаматми ёки лаънатланган нарсами? Моддий маблағларини у қандай сарфлайди — ақл биланми ёки тентакларчами? Моддий масалаларда икковингиз келиша оласизми ёки доимо уруш-жанжалми? Оиланинг зиммасида пулни ёки пул етишмаслиги деб ёхуд катта қарзларни деб жанжал қилиш сингари оғир юкдан бошқа ҳеч нарса ётмайди. Фақат эгаллаган нарсамизни Худонинг хоҳиши билан қўлга киритганимизни англаганимиздан кейингина, бор нарсамиз устидан Унга, Хўжайин бўл, деб таклиф қилганимиздан кейингина, пул билан ёки пул йўқлиги билан боғлиқ муаммолардан қоча оламиз.
Гарчи эрим ҳар доим яхши пул топган бўлса ҳам, пул миқдори нуқтаи назаридан унинг иши доимо «гоҳ ундай, гоҳ бундай» тамойилига асосан қурилган эди. Бир пайтлар кризис бир йил давом этди, буни ҳаммамиз сезиб турардик. Биздан қарздор бўлган компания нақд пул йўқлиги сабабли бир тийин ҳам тўлай олмай қолди. Оғир вақтлар бўлган эди ўшанда. Агарда биз Худодан умид қилмаганимизда ва ҳамма молиявий муаммоларимизни Унга ишониб топширмаганимизда, бундан баттар бўлиши мумкин эди. Худога итоат этиб, жамоатга ушр берганимиз бизга тасалли берарди. «Сарвари Олам шундай дейди: Маъбадимда озиқа бўлиши учун, ушрни беками-кўст қилиб олиб келинглар. Шу йўл билан Мени синаб кўринглар. Мен осмон эшикларини очиб, сизларга марҳаматимни сероб қилиб ёғдирмайманми?!» (Мал. 3:10). Камбағалларга ва ҳожатмандларга назр бериш тўғрисидаги амрга ҳам биз содиқ эдик: «Бахтлидир бечорага жон куйдирганлар, кулфатда қолганларида Эгам уларни қутқарар» (Забур 40:20). Биз доимо Муқаддас Китоб ваъдаларини ёдимизда тутардик: «...асло муҳтожлик кўрмас Эгамга юз бурганлар» (Забур 33:11). Биз Худони чинакамига излардик. «Биз Худога ҳаёт манбаи деб ишониб ва Унинг амрларига риоя қилиб, Унинг марҳаматига сазовор бўламиз», деб ишонардик. Биз муҳтож бўлган нарсаларни У бизга беради. Худди шундай ҳам бўлди.
Агар молиявий муаммоларингизни Худонинг ҳомийлигига топширсангиз ва бу масалада Унинг хоҳиш-иродасини бажарсангиз, кўплаб молиявий муаммолар ечилиши мумкин. Демак, У бер, деб амр берганда, бериш лозим. Худо Ўз хоҳишини ижро этувчиларга нажот, ҳимоя, марҳамат ва янги ҳаёт ваъда қилади. Акс ҳолда бизга қашшоқлик олиб келадиган ҳақоратни татиб кўришимизга тўғри келади: «Камбағалнинг йиғисига ким қулоқ солмаса, ўзи йиғлаганда ҳам ҳеч ким жавоб бермайди» (Ҳикмат. 21:13). Хасислик бор нарсангдан ҳам қувонишдан маҳрум қилади, бу эса кўплаб ҳаётий муаммоларга олиб келади.
Маълумки, бойлар бор, аммо уларнинг баъзилари назр қилиш деган тушунчани асло тасаввур ҳам қила олмайдилар. Аммо уларнинг ҳаётига диққат билан назар ташласак, улар Худонинг кўп марҳаматини — ички барқарорликни, ҳимояни, севгини, руҳий хотиржамликни, соғлиқ ва мукаммал ҳаётни кўрмайдилар, ўзлари ҳам бунинг сабабини тушунмайдилар. Улар бойликларини асрайдилар, аммо ундан шодланиш қобилиятини йўқотадилар. Буларнинг сабаби — ҳақиқий ҳаётга калит Худони билиш ва Унинг йўлларидан юриш эканини билмасликларидадир. Бу эса ўз вақтини, қувватини, севгисини, истеъдоди ва маблағини Худонинг ихтиёрига тўлиқ ишонч билан тақдим қилишни билдиради.
Эрингиз ҳаётга бу калитни топиб, ўзининг маблағларига нисбатан Худонинг хоҳиш-иродасини тушуниши учун ибодат қилинг. Эрингиз сахий қалб эгаси, бошқалар билан бўлиша оладиган, борига қаноат қилиб, ортиқчасини истамаслиги учун ибодат қилинг. Мен, кўп пул топиш ақлсизлик, деб айтмоқчи эмасман, аксинча. Эркак киши ўз иши учун лозим даражадаги мукофотни олиши, хотини эса бунинг учун ибодат қилиши керак. Бир хилдаги оғир, силлани қуритадиган ва оқибатда қашшоқликка абадий йўлдош бўлган алам, жиззакилик, хасталик ва ҳасадгўйликка олиб келадиган меҳнат одамни ҳурматга сазовор қилмайди. Ҳар қандай ҳолатда ҳам ибодат қилинг, токи марҳамат ёмғири Худонинг қўлидан эрингизнинг устига ёғилсин. «Эгамизнинг марҳамати бойлик келтиради, бойликка ғам-ташвиш қўшмайди» (Ҳикмат. 10:22).
Аниқроғи, ҳамма молиявий муаммоларимиз ҳам ибодат орқали ҳал бўлмайди, чунки баъзан Худо молиявий қийинчиликлардан эътиборимизни нимагадир тортиш учун ёки ниманидир ўргатиш учун фойдаланади. Аммо ҳеч хавотирланманг — сизнинг ибодатларингиз эрингизни кераксиз курашлардан ва зарбалардан муҳофаза этади. Худо итоаткор, миннатдор, сахий қалбларга марҳамат қилишни истайди, бу қалблар ўзларининг хазинасини Худода кўрадилар. «Хазинангиз қаерда бўлса, юрагингиз ҳам ўша ерда бўлур» (Матто 6:21). Худо шуни истайдики, эрингиз ўз хазинасини пули орқали топмасин, балки У орқали топсин.
Ибодат
Эй Худойим, мен барча молиявий маблағлари мизни Сенга ишониб топширяпман. Маблағларимизнинг Хўжайини Сен бўлгин, булардан Ўз мақсадинг учун фойдалангин. Икковимизни ҳам Сенинг инъомингни тўғри идора қилишга ўргатгин. Пул сарфлаш масалаларида бизни келишувчиликка ўргатгин. Биз қарзнинг оғир юкидан халос бўлайлик, деб ибодат қиламан. Бизга қаерда ва қачон нотўғри иш қилганимизни кўрсатгин, бизни доноликка ўргатгин. Бузилган нарсаларни тиклагин, бизга Ўзингнинг раҳнамолигингни ато қилгин. Бойлигимизни кўпайтиришда донолик билан иштирок этишни менга ўргатгин. Бизнинг бор нарсамиз Сеники эканини доимо эслайлик, бунинг учун биз доимо Сенга шукрона айтайлик.
Сен Ўз каломингда бизга амр қилганингдай, эрим (исмини айтинг) Сенга ва бошқаларга кўнгилдан чиқариб назр қилишни ўрганиши учун ибодат қиламан. У пулни бошқариши учун унга донолик ато қилгин, пулни донолик билан сарф қилишни, ўз келажагини доноларча режалаштиришни ўргатгин. Сендан сўрайман: пулни тентакларча совуриш билан хасислик ўртасидаги беғалва томонини топишига ёрдам бер. У иши учун доимо яхши ҳақ олсин, унинг пуллари ҳеч зарар кўрмасин, ўғирланмасин, беҳудага совурилмасин. Пулларини кўпайтиргин, пулининг асоси доимо ишончли бўлсин. Эрим ҳеч қачон молиявий муаммолар билан қийналмасин, балки барча зарур нарсалар ўзига бориб тақалишини билиб, биринчи навбатда, Сенинг Шоҳлигингни изласин (қаранг: Лука 12:31).
Муқаддас Китобдан сизнинг ибодатларингизни таъсирчан қиладиган оятлар
Нима еймиз, нима ичамиз, деб қайғуриб юриб безовта бўлманглар. Дунё халқлари ҳадеб бу нарсаларнинг пайида юрадилар. Лекин сизларнинг Отангиз буларга муҳтож эканингизни билади-ку! Сизлар яхшиси Худо Шоҳлиги пайида бўлинглар ва қолгани сизга насиб этади.
Лука 12:29-31
Бундай инсон ҳаёти ҳақида қайғурмайди ҳам, чунки Худо унинг қалбини завқланиш билан банд қилади.
Воиз 5:19
Камбағалга берган одам кам бўлмайди, кўриб кўрмасликка олган эса кўп лаънатга учрайди.
Ҳикмат. 28:27
Мен ҳам ёш эдим, энди кексайдим, Кўрмадим солиҳнинг тарк этилганини, Уларнинг зурриёти нонга зор бўлганини.
Забур 36:25
Эгамнинг Ўзи сизларнинг ҳар қандай эҳтиёжингизни Исо Масиҳ орқали, Ўзининг улуғвор бойлиги билан қондиради.
Флп. 4:19
Книга на узбекском языке: Сила молящейся жены (Сторми Омартиан)
Книга, которую вы держите сейчас в руках, расскажет вам о великой силе молитвы. Если ваш брак переживает трудные времена, возможно, вы найдете здесь советы, которые помогут вам по-новому взглянуть на сложившуюся ситуацию в вашей семье и подскажут верное решение ваших проблем. Вы узнаете, в чем состоит истинное призвание жены. Научитесь лучше понимать своего мужа. Сторми Омартиан на примерах из жизни показывает, насколько эффективной может быть ваша молитва. Ведь часто только она одна может все исправить.
