Сторми Омартиан. Ибодатгўй Аелнинг Қудрати (18 боб) Ўзбек тилида
МУНДАРИЖА
Ибодатнинг кучи
1 боб - Сиз Турмушга Чиќдингиз
2 боб - Унинг Ишлари
3 боб - Унинг Моддий Маблаѓлари
4 боб - Унинг Интим Хаёти
5 боб - Унинг Мехрибонлиги
6 боб - Унинг Васвасалари
7 боб - Унинг Шубхалари
8 боб - Унинг Ќўрќуви
9 боб - Унинг Маќсадлари
10 боб - Унинг Ќарорлари
11 боб - Унинг Соѓлиѓи
12 боб - Унинг Химояси
13 боб - Худонинг Синовлари
14 боб - Унинг Ахлоќий Принциплари
15 боб - Унинг Обрўйи
16 боб - Унинг Устиворликлари
17 боб - Унинг Ўзаро Муносабатлари
18 боб - Унинг Оталик Бурчи
19 боб - Унинг Ўтмиши
20 боб - Унинг Феъл-Атвори
21 боб - Унинг Оиласи
22 боб - Унинг Хиссиётлари
23 боб - Унинг Юриш-Туриши
24 боб - Унинг Гап - Сўзлари
25 боб - Унинг Тавба-Тазарруси
26 боб - Унинг Халос Бўлиши
27 боб - Унинг Итоаткорлиги
28 боб - Унинг Ўзи Тўѓрисидаги Фикри
29 боб - Унинг Ишончи
30 боб - Унинг Келажаги
18-БОБ УНИНГ ОТАЛИК БУРЧИ
Мен Майклдан: «Энг кўп нимадан қўрқасан?» деб сўраганимда, «Бошқа нарсалар билан бир қаторда, мен оталик бурчимни уддалай олмасликдан жуда қўрқаман», деб тан олган эди. «Менимча, бу қўрқув кўп эркакларни таъқиб қилади, — деди у. — Биз иш билан шунчалик бандмизки, болалар олдида айбимизни ҳис қиламиз. Биз оталик бурчини уддалай олмаяпмиз ёки ёмон бажаряпмиз, деб қўрқамиз. Айниқса ўсмирлар билан мулоқот қилиш янада мураккаб: биз улар билан умумий тил топиша олмаймиз, деб қўрқамиз, чунки уларнинг кўзига вақтида қарай олмаймиз».
Эримнинг эътирофи менга қаттиқ таъсир қилди. Энди эрим яхши ота бўлсин, деб ибодат қилишга қарор қилдим. Менинг ибодатларим сабабли у қанчалик ўзгарганини, болалар билан мулоқот қилганда сабр-тоқатли, оталик ролида янада қатъийроқ бўлиб қолганини кўрдим. У болалар даврасида ўзини тамомила эркин ҳис қилишни, улар билан мулоқот қилганда хурсанд бўлишни ўрганди. Олдингидай интизомдан сабоқ берганда ёки доноларча ўгит берганда талаб қилинадиган лаҳзалардаги жаҳлдан ҳолсизланиш ҳиссиёти йўқолди. Болалардаги камчилик ҳар доим ҳам, уларнинг оталарида бўлган нуқсонларнинг натижаси эмаслигини бугунги кунда Майкл яхши тушунади.
Бу ролга нолойиқ ва яроқсизлик тўғрисидаги фикр кўп оталарни «таслим бўлиш»га, болалар билан алоқаларни яхшилашга ҳаракат қилишни тўхтатишга мажбур қилади, улар сустлашиб, ўзларининг болалари ҳаётида энг аҳамиятсиз бўлиб қоладилар. Бу айниқса, ҳаётларида зарбага учраган эркаклар учун жуда оғир. Баъзан аёлларда ҳам она ролига нолойиқлик ҳислари пайдо бўлади, аммо уларнинг биронтасш ҳам болаларини унутмайди ҳам, ташлаб ҳам кетмайди, чорасиз ҳолатлар бундан мустасно. Бунинг сабаби шуки, ҳомиладорлик пайтидан бошлаб биз болаларимизнинг ҳаёти билан узлуксиз боғланганмиз: уларни қорнимизда кўтариб юрамиз, гўдаклигида парвариш қиламиз, ҳаётга тайёрлаб борамиз, тарбия қиламиз, шунчалик кучли севамизки, улар билан бирлашиш туйғуси бизга бир умр ҳамроҳ бўлиб боради. Оталар бундай имкониятдан маҳрумдирлар, шунинг учун кўпинча оталарнинг ҳаётига кириб боришга ва уларники бўлишга ҳақли бўлган болаларга ўзларини бегона ҳис қиладилар. Агар эркаклар бундан ташқари эртадан-кечгача ўз ишлари ва лавозимга интилиш билан банд бўлсалар, уларнинг ота сифатидаги роли асло сезилмайди. Бу пайтда уларга бизнинг ибодатларимиз ёрдамга келиши мумкин.
Кимларнингдир ибодатидан кейин бирдан кўзингиз очилганми? Сиз тўғри қарор қабул қилганмисиз, яъни сиз жуда муҳтож бўлган нарса амалга ошганми? Мен билан бундай воқеа жуда кўп марта бўлган. Агар биз эрларимизнинг оталик роли учун ибодат қилсак, улар билан ҳам шундай воқеа юз беришига ишонаман. Бизнинг ибодатларимиз уларга шубҳаларни енгишларига, масъулият оғирлигини кўтаришларига, оталик ролини аниқ тушунишларига, ота-оналик бурчига оид қийинчиликларни бартараф қилишни ўргатадиган Муқаддас Руҳга қалбларини очишларига ёрдам бериши мумкин.
Менинг ибодатларим эримга фаолиятнинг аниқ усулини кўрсатганда, у доимо бир воқеани эслайди. 7 ёшли ўғлимиз Крис ёлғон гапирди. Биз унга, ёлғон гапирганингни эътироф этиб, чин дилдан тавба қил, деб мажбур қилмоқчи бўлдик, аммо буни қандай қилишни билмасдик. Майкл унинг адабини бериб қўймоқчи бўлди ва мендан ибодат қилишни сўради. Мен ибодат қилганимдан кейин, эрим қандай қилиши лозимлигини аниқ кўрди. У ўғлимизнинг кўзи олдида учбурчакни, иблиснинг тасвирини, Худонинг тасвирини ва Криснинг суратини олиб, буларни учбурчакнинг учта бурчагига жойлаштирди. Сўнгра Майкл иблиснинг нияти билан Худонинг ниятини тасвирлади. Крис танлаган ёлғон йўли у учун жуда хавфли эканини Майкл батафсил кўрсатди, чунки бу йўл иблисга олиб боради, демак, Худодан тобора узоқлаштиради. Бу манзара болага шунчалик қаттиқ таъсир қилдики, у йиғлаб, чин юракдан тавба қилиб, ёлғон гапирганини тан олди. Майкл шундай деди: «Худо ато қилган хатти-ҳаракатларимни аниқ тушунмасдан туриб, мен ўғлимнинг юраги тубини ҳеч ҳам билмаган бўлардим».
Яхши ота бўлишни истовчи эркаклар учун энг яхши сабоқ Самовий Ота намунасидир. Эркаклар Раббийнинг ўхшашига айланиб, кўпроқ вақтни У билан мулоқотда ўтказса, ўзларининг болаларига самаралироқ таъсир ўтказади. Улар ота қалбига эга бўладилар, чунки Отанинг қалбини кўрадилар. Агарда эрингиз заминий отаси билан яхши муносабатда бўлмаган бўлса, бу осон бўлмайди. Эркакларнинг ўз оталари билан ўзаро муносабатлари кўпинча уларнинг Раббий билан муносабатларида аксини қолдиради. Агар қачонлардир уни отаси ташлаб кетган бўлса, Худо ҳам мени ташлаб кетади, деган қўрқув унда яшайди. Агар отаси унга бефарқ бўлган бўлса ва ғамхўрлик қилмаган бўлса, Худо ҳам менга бефарқ бўлади, деб шубҳаланиши мумкин. Агар у заминий отасининг севгисига шубҳа билан қараган бўлса, Самовий Отанинг севгисига ҳам шубҳа билан қарайди. Агар у заминий отасидан ғазабланган бўлса, Худога нисбатан ҳам хушкўрмаслик ҳисларини бошдан кечириши мумкин. Ота билан боғлиқ ўтмиш ҳаёт воқеалари Худога ва Унинг севгисига борадиган йўлда қаршилик бўлиши мумкин. Бу эса отанинг болалари билан бўладиган муносабатларига таъсир этмай қолмайди.
Эрим Самовий Отанинг севгисини билсин, ақлини, қалбини банд қилган ҳамма гумроҳлик ва нотўғри тасаввурлардан эрим халос бўлсин, деб ибодат қилинг. Эримнинг отаси унда пайдо қилган яраларга ва унинг қалбида Худога нисбатан пайдо қилган ранж-аламларга Худо шифо берсин, деб ибодат қилинг. Муқаддас Китоб шундай деб айтади: «Кимки ота-онасини ғийбат қилса, унинг чироғи зулматда ўчиб қолади» (Ҳикмат. 20:20). У отасини чин юракдан кечирмагунча, яхши ота бўла олмайди. Унинг отаси тирикми, йўқми — бу муҳим эмас, унинг қалбида нималар кечаётгани муҳимдир. Самовий Ота билан муносабатлари ривожига ҳеч нарса ҳалақит бермаслиги учун эрим заминий отасига муносабатини ўзгартирсин, деб ибодат қилинг.
Эркаклар кўпинча болалари ҳаётида ўзларининг роли ниҳоятда муҳимлигини тушунмайдилар, ўзларини болаларининг моддий фаровонлиги манбаи деб қарайдилар, холос. Аммо отанинг ўз болалари ҳаётига таъсири бебаҳодир. Болалар яхши йўлни танлайдиларми ёки ёмон йўлни танлайдиларми — бу Отанинг ўз болаларига муносабатига боғлиқ. Ўзининг ҳаёти ҳам шунга боғлиқ: ахир, агарда у оталик ролини уддалай олмаса, ундаги ноқобиллик ҳиссиёти муттасил равишда ўзини таъқиб қилади. Агар у яхши ота бўлса, бу хусусияти унинг ҳаётий муваффақиятининг муҳим мезони бўлади.
Ибодат
Эй Раббим, эримга яхши ота бўлишни ўргат. Ундаги Сенинг хоҳиш-иродангга мос келмайдиган ҳамма нарсани тўғри қилгин. Ундаги руҳий оғриқларга шифо бер, отасини кечиришига ёрдам бер. Унга Ўзингнинг ваҳийингни ато қилгин, Сени ўзининг Самовий Отаси сифатида билиши учун унинг қалбига чанқоқлик олиб киргин. Уни Ўзингга жалб қилгин, токи у кўпроқ вақтини Сен билан мулоқот қилиб ўтказсин, Сенга ўхшасин, ўзига нисбатан шафқат ва севги билан тўлган Отанинг қалбини Сенда кўрсин. Унинг юраги болаларига нисбатан ҳам шундай севги билан тўлсин. Унга раҳм-шафқатни намоён қилишни, идрокли ҳакам бўлишни, Сен қилганингдай, болаларига ҳақиқат йўлини насиҳат қилишни ўргатгин. Унга Сендан намуна олишни ўргатгин: болалардан итоаткор бўлишни талаб қилсин, ҳар доим мурувватли бўлсин, агар болалар айб иш қилсалар, уларни жазолашни билсин. Ўз ўғлини севадиган ота боласига адолатли жазо бериши тўғрисидаги ҳақиқатни унга намоён қил (Ҳикмат. 13:24). У «болаларни ғазаблантирмасдан, балки уларни Раббийнинг таълимоти орқали тарбиялаш» (қаранг: Эфес. 6:4) қоидасини тушунсин. Эрим билан менинг болаларга талабларимиз ҳар доим бир хил бўлсин, болаларни тарбиялаш масаласида икковимизнинг ўртамизда келишмовчиликлар бўлмасин, деб ибодат қиламан.
Уни болалар билан мулоқот қилишга ўргат, токи у ҳеч қачон шафқатсиз, совуқ, қўпол, тунд, фаолиятсиз, нимадандир норози, лоқайд ота бўлмасин. У меҳрибон, шафқатли, кўнгилчан, кучли, давлатманд, умидвор, дилкаш, тушунадиган, сабрли ота бўлиши учун ёрдам бер. Болалар унга ота сифатида ҳурмат, эҳтиром кўрсатишларини унинг қиёфаси кўрсатиб турсин, токи болалар узоқ, марҳаматга тўла умр кўрсин.
Эй Раббим, болалар бизнинг руҳий бойлигимизни мерос қилиб олишларини биламан, унинг мероси Ўзининг Муқаддас Руҳи тўлиқлиги билан бойисин. Сенинг амрларингга итоат этиш намунасини кўрсатишига ёрдам бер, у ўз болаларидан хурсанд бўлсин, болаларини Сенинг йўлларингда мустаҳкамлашга интилсин. У яхши ота бўлмоқчи, Сен бу истакни унинг юрагида ижро этишингни илтижо қиламан.
Муқаддас Китобдан сизнинг ибодатларингизни таъсирчан қиладиган оятлар
Набиралар — кексаларнинг тожу тахти, ўғилларнинг шон-шуҳрати — оталаридир.
Ҳикмат. 17:6
Ота яхши кўрган ўғлини жазолагандек, Худо ҳам севганини жазолайди.
Ҳикмат. 3:12
Солиҳ отасининг бошини кўкка етказади, доно фарзанд уни хурсанд қилади.
Ҳикмат. 23:24
Ўғлингга тарбия бер: у сенга ором беради, қалбингни шодликка тўлдиради.
Ҳикмат. 29:17
Мен сизларга Ота бўлурман, Сизлар эса Менга ўғилу қиз бўлурсиз, — дейди Худованд, Сарвари коинот.
2 Кор. 6:18
Книга на узбекском языке: Сила молящейся жены (Сторми Омартиан)
Книга, которую вы держите сейчас в руках, расскажет вам о великой силе молитвы. Если ваш брак переживает трудные времена, возможно, вы найдете здесь советы, которые помогут вам по-новому взглянуть на сложившуюся ситуацию в вашей семье и подскажут верное решение ваших проблем. Вы узнаете, в чем состоит истинное призвание жены. Научитесь лучше понимать своего мужа. Сторми Омартиан на примерах из жизни показывает, насколько эффективной может быть ваша молитва. Ведь часто только она одна может все исправить.
