Сторми Омартиан. Ўсмир ибодатининг кучи - (5-боб) Китоб Ўзбек тилида
O‘smir ibodatining kuchi (Stormi Omartian) O‘zbek tilida Audiokitob
МУНДАРИЖА
Ибодатнинг кучи нимада? Нима учун мен ибодатга муҳтожман?
1-боб. Эй Худойим, Сени билишим учун менга ёрдам бер
2-боб. Эй Худойим, олдинги хатоларимдан халос бўлишимга ёрдам бер
3-боб. Эй Худойим, бошқаларни кечиришни менга ўргат
4-боб. Эй Худойим, солиҳларча иш тутишга мени ўргат
5-боб. Эй Худойим, аҳмоқона таъсирларга қарши туришим учун менга ёрдам бер.
6-боб. Эй Худойим, ўз фикрларимни бошқаришга мени ўргат
7-боб. Худойим, Сенинг Каломингни тушунишга мени ўргат
8-боб. Эй Худойим, тенгдошларим таъсиридан халос бўлишимга ёрдам бер
9-боб. Эй Худойим, одамлар билан яхши муносабатлар ўрнатишни менга ўргат
10-боб. Эй Худойим, ҳаётим давомида Сенга ҳамду сано айтишга мени ўргат
11-боб. Эй Худойим, ҳаётимда Сенинг мақсадингни тушунишимга ёрдам бер
12-боб. Эй Худойим, тўғри танлов қилишим учун мени доноликка ўргат
13-боб. Эй Худойим, салбий эмоциялардан қутулишимга ёрдам бер
14-боб. Эй Худойим, ҳаётимда васвасалар билан курашувимга ёрдам бер
15-боб. Эй Худойим, ҳаётимнинг қийин лаҳзаларида кучли бўлишимга ёрдам бер.
16-боб. Эй Худойим, ўзимни бехатар ҳис қилишим учун ёрдам бер
17-боб. Эй Худойим, ҳаётбахш сўзларни гапиришга мени ўргат
18-боб. Эй Худойим, имконсиз нарсага ишонишни менга ўргат
19-боб. Эй Худойим, ҳаётим учун Сенинг хоҳиш-иродангни билишимга ёрдам бер
20-боб. Эй Худойим, Сен мен учун тайёрлаган меросни қўлга киритишимга ёрдам бер
5-боб. Эй Худойим, аҳмоқона таъсирларга қарши туришим учун менга ёрдам бер.
Эҳтимол, ер юзида ёмонлик мавжуд бўлмаган бирон жой бўлмаса керак. Ёмонлик, ҳақиқатан, ҳамма жойда бор. Шу сабабдан сиз ҳаётингизнинг бирон даврида ёмонликнинг бадбашара қиёфасига дуч келгандирсиз. Шунинг учун ёмонлик билан учрашувга доим тайёр туришингиз керак.
Сиз муҳим бир нарсани албатта билиб қўйишингиз шарт: Ким ўз ҳаётини Худога бағишлаган бўлса, у ёмонлик ўқларига нишон бўлади. Негаки, сизнинг душманингиз бор. Худони севадиган ва Унинг йўлларидан юрадиган ҳар кимда ўша душман бор. Бу душманнинг табиати Худога мутлақо зиддир, у доим Худонинг ниятларига қаршилик кўрсатади ва Унга ишонадиганларга зарар келтиришга ҳаракат қилади. Душман ҳар доим сизни ҳалок қилишга урингани сабабли, сиз ҳам у билан рўпарама–рўпара келишга тайёр бўлишингиз керак.
Бу душманнинг номи — иблис. Худо уни яхшилик учун яратган эди, аммо у кибрланиб, Худога қарши исён кўтарди. У Худо бўлишни истаб қолди ва ҳамма яратилган нарсалар менга сажда қилсин, деган ниятда уларни ўзига итоат эттирмоқчи бўлди. Оқибатда иблис Худонинг ҳузуридан қувилди ва ерга қулаб тушди. У ер юзида изғиб юради, одамларни ҳалок қилиш учун тўхтовсиз уларни қидиради.
Аммо бу ёмон янгиликнинг яхши томони ҳам бор. Бу яхши хабар қуйидагича: Худони биладиган ҳар қандай одам иблис устидан ҳокимиятга эга. Бизнинг душманимиз ҳамма нарсани билиш, ҳамма жойда ҳозир бўлиш ва бизнинг фикрларимизни ўқиш хусусиятига эга эмас. Иблис мағлуб бўлган душмандир. Агар биз бу ҳақиқатни билмасак, унда у бизни доимо хафа қилишга чоғланади. Бунинг учун у Худони билмайдиган бошқа одамлардан фойдаланади. Бундай одамлар бизни Худодан ва У биз учун тайёрлаб қўйган истиқболдан узоқлаштирмоқчи бўлишади.
Исо хочдаги ўлими ва тирилиши билан буюк бир ишни бажарди: ҳаётимизни бошқарган иблис ҳокимиятини У барбод қилди. Исо Ўзига ишонганларга қуйидаги сўзлар билан ҳокимият берди: «Мен сизларга илону чаёнларни босиб эзиш ҳокимиятини ва шайтоннинг бутун куч–қудратини оёқ ости қилиш ҳокимиятини берганман. Ҳеч нарса сизларга зарар етказмайди» (Луқо 10:19).
Ҳаммамиз ҳам охиригача яксон қилинмаган душман билан муттасил руҳий жангнинг иштирокчилари ҳисобланамиз. Муқаддас Китоб бизга шундай деб таълим беради: «Бизнинг курашимиз инсонларга қарши эмас, балки самовий оламдаги ёвуз руҳий кучларга, руҳий ҳокимият ва ҳукмронликка ҳамда бу қоронғи дунёни бошқараётган руҳий ҳукмронларга қаршидир» (Эфесликларга 6:12). Биронта одам бизга зарар етказганда ҳам, ҳақиқий душманимиз ким эканлигини доимо эсимизда тутишимиз керак. Шундагина сиз душманга ва у сизга таъсир кўрсатиш учун ишлатган одамларга самарали қаршилик кўрсата оласиз.
Худо сизнинг ҳаётингиз учун Ўз режасига эга бўлгани сингари, иблис ҳам сизни ҳалок қилиш учун ўз режасини амалга оширмоқчи бўлади. «Ўғри фақат ўғирлаш, бўғизлаш, барбод қилиш учун келади. Мен эса уларга ҳаёт, фаровон ҳаёт бериш учун келганман» (Юҳанно 10:10). Иблис мутассил тарзда ҳаётингизни барбод қилишга ҳаракат қилаверади. Шу боис сиз ташқи зарарли таъсирларга ниҳоятда диққатли бўлишингиз керак. Муқаддас Китоб бизга шундай уқтиради: «Ҳушёр ва бедор бўлинглар! Душманингиз бўлган иблис шердай бўкириб, бировни ютиб юбориш учун изғиб юрибди» (1Бутрус 5:8).
Душманнинг ҳужумларини билиб олиш кўп ҳолларда қийин эмас. Масалан, агар кимдир сизга алкоголни ёки легал наркотикни таклиф қилса, бу ёмон иш эканини, сўзсиз, биласиз ва дарров “йўқ” дея бу одамдан нари кетасиз. Наркотиклар ва алкогол одамнинг ақлини, руҳиятини ва танасини ишдан чиқаради. Наркотик ёки алкоголдан ўлаётган одамдан, буларга ружу қўйганингиздан афсусдамисиз, деб сўрасангиз, у ўзини ўзи алдаб келганидан чуқур афсусда эканини сизга айтади. У қуйидагича мулоҳаза юритади: Мен ўйлардимки, оз-оздан татиб кўрсам, зарар қилмайди деб. Бу ерда ёлғон яшириниб ётибди, душман бизни ҳалок қилиш мақсадида алдайди. Ҳақиқат шундаки, ҳар қандай мутелик аста–секин, қадамма–қадам, то одам ўзини тўхтата олмайдиган даражага етгунча ривожланиб боради. Иблис сизни наркотиклар ёки алкогол қармоғига илинтириш илинжида юради, чунки шу орқали ҳаётингизни барбод қила олади.
Таъсир этишнинг бошқа хавфли бир қуроли порнографиядир. Кўпчилик одамлар порнографиянинг ҳалокатли таъсирини сезадилар ва ўша уятли расмларни кўришлари биланоқ кўзларини олиб қочадилар. Аммо баъзи одамлар, порнография суратларига бир оз қарасам, ҳеч нарса қилмайди, деб ўйлайдилар. Аслида эса порнографиянинг хавфлилигини билмайдиган одам унинг таъсирига тушиб қолади. Порнография бундай одамнинг қалбига “қармоқ” ташлаб, ўзига тобора қаттиқроқ тортади. Инсон ҳаётини вайрон қиладиган мутелик шундан келиб чиқади. Порнография — ҳалокат воситасидир.
МЕН ҚУЙИДАГИ ВАЗИЯТЛАРДА ИБОДАТ ҚИЛИШГА ҚИЙНАЛАМАН:
- Ибодат пайтида узоқ вақт тик туришга тўғри келганида;
- Нима ҳақида ибодат қилишни билмаганимда;
- Ибодатим таъсир қилмайди, деб ўйлаганимда;
- Худо мени эшитмаяпти, деб хавотирланганимда;
- Қалбимдаги муаммоларни самимий айта олмаганимда (13–15 ёш).
ИБОДАТ ҚИЛИШНИ ЖУДА ИСТАЙМАН:
- бирон нарсадан қўрққанимда;
- ўзимни айбдор ҳис қилганимда;
- Муқаддас Китобни ўқиганимда;
- ёлғиз ўзим қолганимда; нужно добавить
- доимо (16–19 ёшда).
Худонинг таъсирига тушиш
Имонга келгунимга қадар мен наркотик ва алкоголга ружу қўйиб, буларнинг қурбони бўлган эдим. Мен муаммоларга дуч келганимда, тушкунликка тушганимда қутулиш воситасини ана шуларда кўрардим. Аммо булар менга ёрдам бермади. Маълум вақт енгил тортардим, кейин янада баттар бўлардим, мен ўзимга ва ҳаётимга нисбатан ҳушёрликни йўқотардим. Бир неча марта ўзимни ўлдиришимга оз қолди. Бир куни наркотикни ортиқча дозада қабул қилиб, Худога илтижо қилдим. Ўшанда мен ҳали Худони билмасдим. Мен Худога, агар мени ўлимдан қутқариб қолсанг, қайтиб наркотикка қўлимни ҳам тегизмайман, дедим. Худо мени ўлимдан қутқариб қолди, аммо мен ўз ваъдаларимни бажармадим.
Бир куни наркотик таъсири остида рулга ўтирдим. Йўлда авто ҳалокатга учрашимга бир бахя қолди. Ўша куни эрталаб мен биринчи рейс самолётга улгуришим керак эди, шунинг учун аэропортга кетаётган эдим, кеча кечқурун қабул қилган наркотик ҳали таъсирини йўқотмаганини тушуниб етмаган эдим. Мен вақтни адаштириб қўйган эканман: мен кеча кечқурун деб ўйлаган вақтдан сўнг бир кеча эмас, балки бир неча соат ўтган экан, холос. Менинг катта хатоим аслида шу эди. Мен ухлаб қолиб, кечикканим сабабли, машинани катта тезликда ҳайдаб бораётган эдим. Тепаликка чиқиб, қарасам, менинг қарши томонимда катта тезлик билан тез ёрдам машинаси келаётган эди. Машина менинг тепамга келиб то босиб кетадиган ҳолатга етмагунча, машинанинг ўзини ҳам, сирена овозини ҳам эшитмадим. Аммо бу лаҳзада тез ёрдам рулни чапга бурди, мен эса ўнгга бурдим. Орамизда бир неча сантиметр масофа қолганда, ажралиб қолдик. Бизни торгина масофа ажратиб тургани учун, менинг машинам қаттиқ силкинди. Ўша лаҳзада мен ўлимдан зўрға қочиб қутулганимни, оғир жисмоний жароҳатдан омон қолганимни тушундим.
Ўша воқеа кўп жиҳатдан мени ҳушёр торттирди. Мен наркотик модда кайфи остида қолганимни ваҳима ичра эсладим, аммо ўша воқеа юз берганда наркотик таъсирида бўлганимни ўзим асло тушунмаган эдим. Агар ҳаёт тарзимни ўзгартирмасам, ҳалок бўлишимни тушундим. Бир неча йил илгари наркотикни татиб кўриш таклифидан бошланган ҳаётим мени жар ёқасига олиб келиб қўйган эди. Ёмонликнинг таъсирига тушиб қолиб, Раббий билан учрашгунимга қадар ўзимни тўхтатишга куч топа олмаган эдим.
Ёмонлик кучлари баъзан очиқчасига, баъзан яширин фаолият кўрсатади. Улар одамни иллат ботқоғига етаклайди, одамзод ҳатто бунинг хавфлилигини англамайди, ёмонлик қалбимизга нозик равишда ёндашади. Буларнинг мақсади битта: охир–оқибатда сизни Худодан узоқлаштириш, ёмон йўлга бошлаб, ҳаётингизни барбод қилишдир. Бундай таъсирнинг яна битта манзараси жинсий алоқада пала–партишликдир. Телевизор экранларида ва кинода бунақа манзаранинг оқими устимизга ёпирилиб келадики, муаммо моҳиятини йўқотади, биз бунда бирон ёмонлик аломатларини кўрмаймиз: ахир, “ҳамма шундай қилади-ку”, деб айтамиз. Аммо бу ёлғон. Бу жуда муҳим масала. Ҳамма шундай қилмайди. Никоҳсиз жинсий алоқа муаммоси ожизлик лаҳзаларида келиб чиқиши мумкин, бунда сиз ҳушёрликни йўқотган бўласиз. Сиз Худо қўйган чегараларни заррача бўлса ҳам бузишга йўл қўймаслигингиз учун, одамлар билан муносабатларда ҳушёр бўлишингиз даркор. Биз бўлғуси умр йўлдошимиз учун ўзимизни пок сақлашимиз керак. Бу мажбуриятни Худонинг Ўзи бизга юклаган. Одам Худонинг хоҳишига қарши жинсий алоқага киришганда, унинг ички олами таназзулга учрай бошлайди, бундай одамнинг ҳаёти учун илоҳий касб–кори кучдан маҳрум бўлади.
Фақат Худонинг ҳузурига кирганимиздагина бунақанги ҳар томонлама салбий таъсирлардан қутула оламиз. Худога ибодат қилиб, Ундан одамларга таъсир қилаётган кучларнинг фарқига бора олиш иқтидорини сўранг. Сиз Худога яқинлашсангиз ва Унинг Каломи билан қуроллансангиз, душман қандай иш юритишини, ҳаётингиздаги энг хавфли зона қаерда эканини У сизга кўрсатади. Худо сизга яхшилик ва ёмонликни фарқлашни, ҳақиқатни билишни ўргатади.
Агар сиз ёмонлик кучлари таъсири остида бўлсангиз, Худо сизга уларни тўхтатиш учун куч ато қилади. У бизга шундай дейди: “Иблисга қаршилик кўрсатинглар, шунда у сизлардан қочади” (Ёқуб 4:7).
МЕН ҚУЙИДАГИ ҲОЛАТЛАРДА ИБОДАТ ҚИЛИШНИ ХОҲЛАЙМАН:
- мени қўрқув босганда;
- ўзимни айбдор ҳис қилганимда;
- Муқаддас Китобни ўқиганимдан кейин;
- ёлғиз қолганимда;
- доимо (16 – 19 ёшда)
МЕН, АСОСАН, ҚУЙИДАГИЛАР УЧУН ИБОДАТ ҚИЛАМАН:
- Ҳаётимда Худонинг хоҳиш–иродасини билишим учун;
- Ўгай онам билан муносабатларим яхшиланиши учун;
- Отам нажот топиши учун;
- Худо мени ёмонликдан асраши учун;
- Мен ва оилам соғ-саломат бўлишимиз учун (13–15 ёш).
МЕН ИБОДАТ ҚИЛДИМ, ХУДО ЖАВОБ БЕРДИ: отам инфаркт бўлганда, тирик қолиши учун 25 фоиз имконият қолган эди, холос. Мен ва амакиваччам муттасил ибодат қилдик. Операция муваффақиятли ўтди, отам тирик қолди. Мен Худодан жуда миннатдорман, чунки отам жуда яхши одам, мен уни яхши кўраман ва ниҳоятда ҳурмат қиламан (13 ёш).
Душманга қарши қуролнинг бешта тури
Биз душманга қарши тура олишимиз учун Худо бизга кўплаб қуролларни берган. Улардан бештасини санаб ўтамиз:
1. Худонинг каломи — душманга қарши қудратли қурол. Муқаддас Руҳ Исони саҳрога олиб кетганда, иблис Уни васавасага сола бошлаган эди. Шунда Исо иблисга қарши айнан шу қуролдан фойдаланган (Матто 4:1). Исо Худонинг Ўғли бўла туриб саҳрога умуман бормаса бўларди, иблиснинг васвасаси тўғрисида оғиз очишнинг эса асло ҳожати йўқ, деб ўйлашимиз мумкин. Аммо Муқаддас Китобда ёзилишича, “иблис келиб, Исони васвасага солмоқчи бўлди” (3–оят). Шу сингари, иблис ҳар биримизга келади, аммо Исо душманнинг ҳужумларини қайтариш учун, Худонинг Каломидан фойдаланди. У шундай деди: «Инсон фақат нон билан эмас, балки Худонинг оғзидан чиққан ҳар бир сўз билан яшайди» (4–оят).
Иблис сизнинг ҳаётингизга келганда, ҳар сафар Худонинг каломини айтинг. Сизни васвасалар жалб қила бошлаганини сезганингизда, Худонинг Каломига мурожаат этиб, ундан иқтибослар келтиринг. Масалан, шундай деб айтинг: «Менга куч–қувват берадиган Исо Масиҳнинг мадади билан ҳар нарсани қила оламан» (Филиппиликларга 4:13). Иблис бу сўзларни кўтара олмайди ва сизни тинч қўяди.
2. Худога ҳамду сано — душманга қарши қудратли қурол. Худо шаънига айтилган ҳамду санога ҳам иблис тоқат қила олмайди. Иблис одамларни ўзига қаратиб олмоқчи бўлади, ҳамду санога нафратининг негизи ҳам шундадир. Худога айтилган мадҳиядан иблис шунчалар нафратланадики, бу сўзларни эшитишни асло истамайди. Биз Худога ҳамду сано айтганимизда, Унинг ҳузури бизни қамраб олади. Шунда иблис қочиб қолади.
3. Худога итоаткорлик — душманга қарши қудратли қурол. Агар биз гуноҳга қўл урсак ёки Худога бирон нарсада итоатсизлик қилсак, иблисга ҳаётимиздан ўрин берган бўламиз, оқибатда у ичимизда ўз қалъасини ўрнатади. Ичимизда яшайдиган гуноҳ душманга йўл очиб беради ва ҳаётимизда астойдил ўрнашиб олишига имкон яратади. Барча қийинчиликларимиз ана шундан бошланади. Аслида иблис устингиздан ҳеч қандай қонуний ҳокимиятга эга эмас, аммо илоҳий амрларга итоатсизлик қилганингиз у учун йўл очиб беради. Аммо сиз гуноҳингизни тан олиб, Худо олдида тавба қилсангиз, иблиснинг юзига эшикни қаттиқ ёпасиз.
4. Ишонч — душманга қарши қудратли қурол. Шуни ёдингизда тутингки, душман ҳар доим йўлингизда кўринмас тузоқлар қўяди. Улардан биронтасига йиқилиб тушмаслигингиз учун, сиз Худога яқинроқ юришингиз керак. Шунда Худонинг Ўзи қадамларингизни тўғрилайди. Худо бизга “Иблисга мустаҳкам имон билан қарши туринглар. Шуни билингларки, бутун дунёдаги имонли биродарларингиз сизлар каби азобларга дучор бўлмоқдалар”, (1Бутрус 5:9) деб таълим беради. Бу шуни англатадики, биз иблисга қарши туришимиз, имон орқали эса Худога боғланишимиз зарур. Агар биз Худонинг Каломи соясида юрсак, илоҳий ҳимояга эга бўламиз ва душманнинг барча тузоқларидан омон қоламиз.
5. Ибодат — душманга қарши қудратли қурол. Иблис бизнинг Худо билан мулқотимизга тоқат қила олмайди, чунки Худо бизнинг ибодатларимизни эшитади ва бизга жавоблар юборади. Душман бизни заифлаштириш мақсадида қалбимизга шубҳа уруғини сепади: “Худо ибодатларингни эшитмайди”, деб бизни ишонтирмоқчи бўлади. Қалбингизда бундай шубҳа пайдо бўлганда Худога илтижо қилиб айтинг: «Эй Худойим, душманга ва ёмонликка қарши тура олишим учун менга ёрдам бер». Шу каби оддийгина ибодат душманингизнинг белини чиқариб юборади, уни мағлуб қилади, бундан ҳеч шубҳа қилмасангиз ҳам бўлади.
Агар мен солиҳ одам бўлсам, нимага душман менга ҳужум қилади?
Нима учун яхши одамлар душман ҳужумидан азоб чекадилар? Жавоб саволнинг ўзида бор: душман сизга ҳужум қилади, чунки сиз яхши одамсиз. Иблис ҳар қандай одамни ҳалок қилишни истайди, айниқса, Худони севадиган ва Унинг йўлларидан юрадиган одамни ҳалок қилиш унга жуда ёқади. Айнан шу сабабдан у сизнинг душманингиздир. Бу душмандан қутулишнинг ягона йўли — иблис томон бўлиш, унинг қиёфасига киришдир.
Шуни ёдингизда тутингки, сиз Худога қанчалик бағишланган бўлсангиз, иблис сизни шунчалик тез жиловлаб олишга ҳаракат қилади. У сизни иккилантириш учун, йўлдан чалғитиш учун, бошингизни айлантириш учун, айбдорлик ҳиссини сизга сингдириш учун, мағлубиятга, тушкунликка ёки васвасага солиш учун бор имкониятини ишга солади. Гарчи у куч–қудратда Худо билан ўзини тенглаштира олмаса ҳам, у бу ёлғонларни сизга уқтиришда давом этаверади. У ҳаётингиз устидан ўз назоратини ўрнатиш учун, ҳаётингизга киришга ҳаракат қилади. Ҳақиқатни кўра олмаслигингиз учун, кўзларингизни кўр қилишга уринади, сизни Худодан узоқлаштиришга тиришади. Аммо унинг ёлғонларига ишонманг. У ғалаба қозонганига сизни ишонтирмоқчи бўлади, аммо ҳақиқат шундаки, у аллақачон мағлуб бўлган. Сиз ўз ҳаётингизни Худога ишониб топширганингиздаёқ, у ютқизган эди.
Ўз ҳаётингизни сизни кўп Севадиган Зотга ишониб топширинг
Сизни Худодан кўпроқ ҳеч ким яхши кўра олмайди, бундан асло шубҳа қилманг. Дарҳақиқат, Худо сизни севади, сиз ҳақингизда доимо ғамхўрлик қилади, сиз ўз ҳаётингизни бошқа бировга эмас, балки айнан Унга ишониб топширишингизни У хоҳлайди. Гап шундаки, бусиз сиз Худонинг марҳаматига сазовор бўла олмайсиз. Сиз қуйидаги сўзларни айтишингиз керак бўлади: «Эй Худойим, Сен хоҳлаган ҳамма нарсани мен бажараман. Менга Сен таклиф қилган ҳамма нарсага рози бўламан. Сенинг ҳар қандай амрингни адо этаман. Сени мамнун қилишни хоҳлайман, Сен мен учун тайёрлаган ҳаётни яшасам бўлди».
Худога ишониш демак – Уни биринчи ўринга қўйиш ва ҳамма нарсада Унга итоат этиш демакдир. Шунда сизнинг ҳаётингиз ўзгара бошлайди. Сиз Исони Раббим деб тан олганингизда, сизни тана эмас, Руҳ бошқараётганини тасдиқлайсиз. Зотан, Муқаддас Китобда шундай ёзилган: «Худонинг Руҳидан илҳом олаётган ҳеч ким Исони лаънатламайди, шунингдек, ҳеч ким Муқаддас Руҳнинг илҳомисиз Исони Раббим, деб айта олмайди» (1Коринфликларга 12:3). Биз тана нафсига бўйсунмай, Руҳ бошчилигида кун кечирсак, душман ҳужумларини осонликча қайтара оламиз.
Нима учун баъзан «Эй Худойим! Мендан сўраганларингнинг ҳаммасини, Сен истаганларингнинг ҳаммасини бажараман» деб айтиш қийин кечади? Чунки биз ўз нафсимизни қондиришни истаймиз, Худо биздан қимматли бўлган нарсадан воз кечишни сўраб қолади, деб қўрқамиз. Бизга зарар келтирадиган нарсани талаб қилиб қолади, деб ўйлаймиз. Аммо аслида бундай эмас. Агар Худога ҳаётимизни бошқаришига йўл қўйиб берсак, У биз орқали буюк ишлар қилади, биз ўйлаганимиздан ҳам кўра кўпроқ нарсани беради. Худодан, Сенга истаган нарсангни беришимга ёрдам бер, деб илтимос қилинг. Душманга эса истаган нарсасини ҳеч қачон берманг.
МЕНИНГ ХУДОГА ИБОДАТИМ: эй Худойим, бугунги кун учун Сенга шукрона айтаман. Алкоголга, наркотик моддаларга ва жинсий алоқага тўғри муносабатда бўла олайин. Бу дунёнинг васвасаларига қарши туриш жуда қийин. Мактабдош дўстларимга ҳам ёрдам бер (13 ёш).
Ибодатнинг кучи
Эй Раббим, Сен менинг душманларим устидан ғалаба қозонишим учун хочда ўлиб, ўликдан тирилдинг. Иблис устидан ҳокимиятни менга берганинг учун Сенга шукрона айтаман (Луқо 10:19). Мен Муқаддас Руҳнинг кучи билан иблис найрангларига қарши тура оламан, берган ҳокимиятинг билан уни қочиртираман. Шунинг учун сенга шукрлар айтаман, эй Худойим (Ёқуб 4:7).
Душман менга (қайси соҳада зарарли таъсир ҳис қилаётган бўлсангиз ўша соҳани айтинг) томондан қаттиқ ҳужум қилаётганини ҳис қиляпман. Унинг бу ҳужумига қарши тура олишим учун менга куч ато қил, унинг таъсиридан чиқишим учун нима қилишим лозимлигини менга кўрсат. Агар бу муаммо ҳақида биронта одам билан гаплашишим керак бўлса, менга ишончли, яхши маслаҳат бера оладиган одамни Ўзинг кўрсат. Мен ўз ҳаётимни Сенга топширяпман, Сендан сўрайман: менинг фикрларимни, руҳим ва жонимни Ўзинг бошқар. Ҳаётимнинг Соҳиби Ўзингсан. Менга тана нафси бўйича эмас, балки Руҳ бўйича яшашни ўргат, токи мен иллатларим таъсиридан халос бўлайин.
Худойим, биламан, душмандан қўрқишим керак эмас (Қонунлар 20:3). Душман менга ўз хоҳиш–иродасини бажартиришга уринса ҳам, унга қарши туришга Сен менга куч ато қиляпсан. Душман тузоғига тушиб қолишимга йўл қўймаяпсан (2Тимўтий 2:26). Бунинг учун Сенга шукрлар айтаман. Мени иблисдан халос қилганинг учун ҳам Сенга шукр айтаман (Забур 17:18). Душман мени барбод қила олмагани учун, Сенда қатъий турганим учун, Сенга ҳамду санолар айтаман. Исо номи билан ибодат қиламан.
- Сўзнинг қудрати
«Раббимиз Исо садоқатлидир. У сизларни кучга тўлдириб, ёвуз шайтондан ҳимоя қилади» (2Салоникаликларга 3:3).
«Тақводорлар ёлворади, Эгамиз эшитади,
Барча балолардан уларни Эгамиз қутқаради» (Забур 33:18).
«Шу сабабдан Худонинг қурол–аслаҳалари билан қуролланинг, деб айтяпман. Шунда ёвузликка тўла кунларда маҳкам тура оласиз, қуролланиб тайёр турган бўласиз. Жангга тайёрланинглар. Белингизга ҳақиқат камарини тақинглар, кўксингизга солиҳлик совутини кийинглар, тинчлик Хушхабарини ёйиш учун оёғингизга илдамлик пойабзалини кийинглар. Буларга қўшиб, имон қалқонини қўлга олинглар. Шу қалқон билан ёвуз шайтоннинг ҳамма алангали ўқларини кучдан қолдирасизлар. Шунингдек, нажот дубулғасини кийинглар, Руҳ берадиган, Худонинг каломи бўлган қилични кўтаринглар. Ҳар қандай шароитда Муқаддас Руҳга таяниб дуо–ибодат қилинглар. Ибодатда ҳушёр ва саботли бўлиб, Худонинг барча азизлари учун илтижо қилинглар» (Эфесликларга 6:13–18).
Ибодат мавзусида бундан кейинги ўйлар
1. Дунёнинг қайси салбий ҳодисалари сизга кўпроқ таъсир қилади? Сиз улардан қандай қутула оласиз?
2. Ҳозирги пайтда, ўзингизнинг фикрингизча, дунёнинг қайси салбий таъсирларга дучор бўлгансиз? Ибодат қилиб, Худодан: “Бу таъсирларга қарши тура олишим учун менга куч бер”, деб сўранг, Ибодат матнини ёзинг (масалан: «Эй Худойим, мен интернетга кирганимда ёмон саҳифаларни кўргим келади. Менга донолик бер, ёмон жойларни ва ёмон одамларни фарқлашимга ўргат, уларга эргашмайин. Ўзинг мени асрагин»).
3. Агар сиз душманнинг тузоғига тушиб қолган бўлсангиз, ибодат қилинг. Худодан, мени бу тузоқдан тамомила халос қилгин, деб сўранг. Ибодатингиз матнини ёзинг. Агар сиз бундай тузоққа тушмаган бўлсангиз, Худодан, мени Ўз паноҳингда асра, васвасалардан узоқ туришимга ёрдам бер, деб сўранг.
Книга на Узбекском языке: - Сила молящегося подростка (Сторми Омартиан)
Познай силу молитвы. Измени свою жизнь. Изменяй мир.
Ты сомневаюсь в том, что Бог слышит твои молитвы? Тебе кажется, что они растворяются в воздухе, не достигая небес? Ты думаешь, что твои молитвы вряд ли способны что-то изменить?
Автор этой книги убеждает в том, что молитва способна изменить не только обстоятельства, но и жизнь в целом. В двадцати главах книги рассказывается о том, как...
- научиться ходить Божьими путями;
- избавиться от негативных эмоций;
- строить добрые отношения с людьми;
- освободиться от давления сверстников;
- стать светом для окружающих.