Ўсмир ибодатининг кучи (Сторми Омартиан) 4 bob

Сторми Омартиан. Ўсмир ибодатининг кучи - (4-боб) Китоб Ўзбек тилида

O‘smir ibodatining kuchi (Stormi Omartian) O‘zbek tilida Audiokitob

МУНДАРИЖА

Ибодатнинг кучи нимада? Нима учун мен ибодатга муҳтожман?

1-боб. Эй Худойим, Сени билишим учун менга ёрдам бер

2-боб. Эй Худойим, олдинги хатоларимдан халос бўлишимга ёрдам бер

3-боб. Эй Худойим, бошқаларни кечиришни менга ўргат

4-боб. Эй Худойим, солиҳларча иш тутишга мени ўргат

5-боб. Эй Худойим, аҳмоқона таъсирларга қарши туришим учун менга ёрдам бер.

6-боб. Эй Худойим, ўз фикрларимни бошқаришга мени ўргат

7-боб. Худойим, Сенинг Каломингни тушунишга мени ўргат

8-боб. Эй Худойим, тенгдошларим таъсиридан халос бўлишимга ёрдам бер

9-боб. Эй Худойим, одамлар билан яхши муносабатлар ўрнатишни менга ўргат

10-боб. Эй Худойим, ҳаётим давомида Сенга ҳамду сано айтишга мени ўргат

11-боб. Эй Худойим, ҳаётимда Сенинг мақсадингни тушунишимга ёрдам бер

12-боб. Эй Худойим, тўғри танлов қилишим учун мени доноликка ўргат

13-боб. Эй Худойим, салбий эмоциялардан қутулишимга ёрдам бер

14-боб. Эй Худойим, ҳаётимда васвасалар билан курашувимга ёрдам бер

15-боб. Эй Худойим, ҳаётимнинг қийин лаҳзаларида кучли бўлишимга ёрдам бер.

16-боб. Эй Худойим, ўзимни бехатар ҳис қилишим учун ёрдам бер

17-боб. Эй Худойим, ҳаётбахш сўзларни гапиришга мени ўргат

18-боб. Эй Худойим, имконсиз нарсага ишонишни менга ўргат

19-боб. Эй Худойим, ҳаётим учун Сенинг хоҳиш-иродангни билишимга ёрдам бер

20-боб. Эй Худойим, Сен мен учун тайёрлаган меросни қўлга киритишимга ёрдам бер

4-боб. Эй Худойим, солиҳларча иш тутишга мени ўргат

Калифорниядаги ўрта мактабда ўқиб юрганимда, бир семестр давомида сузиш синфига бордим. Бу дарсни кўрарга кўзим йўқ эди, чунки бу дарс ҳар куни эрталаб 7.30 да бошланар, соч турмагим кун бўйи бузилган ҳолда юрарди. Сузиш дарси эрталабки ҳар қандай об-ҳаво шароитида – ёмғирли кун бўладими ёки қуёшли, ё туман, совуқ бўладими – ўтказиларди. Бунақа об-ҳаво Калифорнияда тез-тез бўлиб туради. Ўлимдан бошқа ҳеч нарса бу дарсдан озод қила олмасди, ўлганда ҳам врачдан тасдиқловчи ҳужжат талаб этиларди.

Ҳамма кўнгилсизликларга қарамай, сузиш менга ёқарди, ҳатто мен сузишда муваффақиятга эриша бошладим. Тушундимки, агар мен танамни тик тутсам ва тренернинг кўрсатмалари бўйича тўғри ҳаракатлар қилсам, сувда анча тез ҳаракат қила оларканман. Ҳаракатларим силлиқ ва тез бўла бошлади, бунинг натижасида катта бассейннинг нариги четига тез етиб боришни ўргандим. Бунда менга ҳатто икки томонимдаги бошқа сузувчиларнинг ҳосил қилган тўлқинлари ҳам ҳалақит бера олмасди.

Бу принцип сизнинг ва менинг ҳаётимда таъсир кўрсатади. Агар биз ҳаётимиз уммонидаги тўлқинлар бўйлаб ҳаракат қилишни истасак, биз тўғри ҳаётий позицияга риоя қилишимиз ва тўғри қадамлар ташлашимиз керак. Акс ҳолда, гирдобга рўпара келиб, ундан сузиб чиқа олмаймиз, чўкиб кетмаслик учун бир жойда питирлаб тураверамиз. Биз ҳеч қачон олға ҳаракат қила олмаймиз. Бироқ Исо ҳимояси остида бўлсак ва У биздан талаб қилганларни бажаришга ҳаракат қилсак, Муқаддас Руҳ оқими бизни керакли томонга олиб кетади.

Тўғри ҳаракатлар

Худонинг хоҳиш-иродасини биз Муқаддас Китобни ўқиб билиб оламиз. Агар биз Муқаддас Китобни билмасак, тўғри ҳаракат қила олмаймиз. Аммо бу — бошланиши. Биз қанчалик ўрганмайлик, қилишимиз керак бўлганларни қанчалик билиб олмайлик, буни амалда қилиш заруратидан халос бўлолмаймиз. Сузиш бўйича тренер қандай сузиш кераклигини бизга қанчалик тушунтирмасин, барибир, қачонлардир ўзимизни сувга ташлашимизга тўғри келади. Рухсат этилган ва таъқиқланган нарсалар рўйхатини қилиш — бир томон бўлса, Худонинг йўлларини излаш ва чин дилдан у йўллар бўйлиб юришни исташ — иккинчи томондир. Ҳаёт ҳақида ўқиш — бир томон бўлса, реал ҳаётда яшаш — тамомила бошқа томондир.

Итоаткорлик — бу сизнинг амалдаги хатти–ҳаракатларингиздир; бу сизнинг Худога итоат этиш ва Унинг амрларига мувофиқ яшаш истагингиздир. Сиз айнан шулар ҳақида ибодат қиласиз. Тўғри нарсани билиш осон, аммо ўшани амалда бажариш осон эмас. Шунинг учун Худога ибодат қилишимиз керак, биздан талаб қилинган нарсаларни амалда қўллай олишимиз учун, ички интизомни ўзимизда тарбиялай олишимиз учун Худодан ёрдам сўрашимиз лозим.

Менга келсак, мен интизомли одамман. Аммо ҳар доим ҳам шундай бўлаверган эмас: шундай вақтлар бўлганки, мен умуман бошқача одам бўлганман. Мен кўп тушкунликка тушардим, ўз ҳаётимни тўғри қура олмаганман. Инсон ўзини билмаса ва ўз қадрига етмаса, ўз фойдасини кўзлай олмайди, тўғри қарорлар чиқара олмайди. Мен илгарилари навбатдаги кунни ўтказиш учун бор кучимни сарф қилардим, бироқ шунда ҳам олға силжий олмасдим.

Мен ибодат қилишни ўргана бошлаганимда, Худодан, менда талабчанликни тарбияла, деб ҳар куни ибодат қилардим. Мен ҳар куни Ҳудонинг Каломини ўқишга ва ибодат қилишга ҳаракат қилардим. Мен Худодан, Ўз хоҳиш-иродангни аён қил, ҳаётимда нима кўришни исташингни менга кўрсат, менга тўғри яшашни ўргат, деб сўрардим. Худо ибодатларимга жавоб берди, бугунги кунда мен анчагина интизомли рисоладагидай одамман. Мен Худога ҳар томонлама итоат қилишга ҳаракат қиламан, менимча, Унинг ёрдамисиз бирон ишнинг уддасидан чиқмаган бўлардим. Аммо буларнинг биронтаси бирданига юз бермаган. Булар аста–секинлик билан амалга ошди, мен булар учун кўп ибодат қилганимдан кейин, Худо ибодатларимга жавоб берди.

Ҳамма ишингиз бирдай муваффақиятли бўлмаса, хафа бўлаверманг. Қолаверса, бу дунёда ҳамма иши бароридан келган одамнинг ўзи йўқ. Шунинг учун биз Худога муҳтожмиз. Худонинг йўлларидан юришни ўрганишимиз учун бутун умримиз кетса керак. Биз муттасил равишда қандайдир янги нарсани билишимиз ва доимо ўқиб–ўрганишимиз керак, биз ўз кучимизга ишонганимизда, панд еб қоламиз, чунки Худога таянмай қўямиз. Шу билан бир қаторда Худога итоаткорлигимиз билан ҳам мағрурланиб кетмаслигимиз учун, эҳтиёт бўлишимиз лозим, чунки биз Унинг йўлларини охиригача била олмаймиз, У доим бизга Ўз йўлларини ўргатади. Биз бу ҳақда Ундан сўраганимизда, У Ўз йўлларидан юришимизга ёрдам беради. Биздан талаб қилинадиган нарса қуйидаги сўзлардир: «Эй Худойим, мени итоаткорликка ўргат, токи мен Сенга маъқул бўлай. Сен мени қандай яратган бўлсанг, ўшандай одам бўлай». Муқаддас Китобдаги қуйидаги ўгитларни ёдда тутиш ҳам фойдалидир: «Яхшилик қилишдан чарчамайлик. Агар ҳолдан тойиб қолмасак, ўз вақтида бунинг ҳосилини ўриб оламиз» (Галатияликларга 6:9).

МЕН ҚУЙИДАГИ АСОСИЙ МУАММОЛАР УЧУН ИБОДАТ ҚИЛАМАН:

Худонинг менга қилган яхшиликлари учун, Унга нисбатан олижаноб қалб эгаси бўлишим учун;
Мактабим бехатар бўлиши учун, ўқитувчиларим ва синфдошларим нажот топиши учун;
Кундалик муаммоларим ва ташвишларим учун;
Худо менга керакли куч ва қудрат ато қилиши учун;
Худо борлиги учун Унга ҳар куни ҳамду сано айтаман (16–19 ёш).

МЕН ИБОДАТГА ИШОНАМАН, ЧУНКИ:

Ибодат таъсир кўрсатаётганини биламан;
Худо мени эшитаётганига ишонаман;
Бошқаларнинг ибодатига жавобларни кўряпман;
Ибодат орқали Худо билан мулоқот қиламан;
Муқаддас Китоб бизга ибодат қилишни амр этади (16–19 ёш).

Худо шахсан сиздан нимани истайди

Биз ҳаммамиз итоаткор бўлишимиш шарт, аммо шу билан бирга Худо ҳар биримизнинг ҳаётимизда аниқ ишларнинг бажарилишини талаб қилади. Худонинг ҳар биримиз учун маълум мақсади бор. Биз ўша мақсадга кўра хатти–ҳаракат қилишимиз керак. Бу мақсад ҳар биримизда ўзига хослик касб этади. Масалан, Худо сизнинг дўстларингиздан талаб қилмайдиган кўникмаларни ва лаёқатни эгаллашга сизни даъват қилади. Эҳтимол, сиз бирон курсга қатнашингиз учун сизга туртки беради, бирон ишга киришишингизни ёки бирон машғулотдан воз кечишингизни, бирон жамоатга боришингизни ёҳуд ўзингизга одат бўлиб қолган ҳаёт тарзингизни ўзгартиришингизни исташи мумкин. Худо сиздан нимани талаб қилмасин, шуни билингки, У ҳар доим буларни сизнинг энг юқори манфаатингиз учун, ҳаётингизда энг буюк марҳаматлар учун қилади. Шунинг учун қуйидагича ибодат қилиш жуда муҳим: “Худойим, нима қилишим кераклигини менга кўрсат”. Агар сиз сўрамасангиз, буни ҳеч қачон била олмайсиз.

Исталмаган ишни қилиш керак

Кўпинча, ўзимизга ёқмайдиган ишларни қилишимизга тўғри келади. Ҳатто энг ажойиб курсларда ва энг ажойиб ишда ҳам кўнглингизга хуш келмайдиган иш учрайди. Аммо ҳаётда муваффақиятга эришишнинг зарур шарти ҳар доим ўз истагингизга қарши ниманидир қила олишдир. Биз ўзимизга хуш келадиган ишни эмас, балки бурч ва зарурат ҳиссига итоат этиб иш қилганимизда, интизомга ўрганамиз. Бизнинг ичимизда Худонинг ишончига лойиқ раҳнамо шакллана бошлайди. Биз бурч ҳиссига итоат этмасдан, ўз инжиқликларимизга кўра ҳаракат қилганимизда, биз ҳар доим маълум тўловни тўлашимизга тўғри келади.

Таҳсинга лойиқ бирон нарсага эришиш учун ниманидир қурбон қилишимиз керак. Агар сиздан талаб қилинган нарсани қилишга қийналсангиз, Муқаддас Руҳдан ёрдам сўрашингиз мумкин. Аммо биринчи қадамни барибир ўзингиз ташлашингиз керак. Биринчи қадамни ташлашингиз биланоқ, Муқаддас Руҳ сизга бошқа ҳамма йўлларингизда ёрдам бера бошлайди.

МЕН ҚУЙИДАГИ ҲОЛАТЛАРДА БОШҚАЛАР УЧУН ИБОДАТ ҚИЛАМАН:

уларнинг оиласида муаммолар бор бўлганда;
уларнинг бошига кулфат тушганда;
улар нажот топмаганда ва мададга муҳтож бўлганларида;
улар қийин аҳволга тушиб қолганларида (13–15 ёш).

Худога итоаткор бўлишнинг жиддий ўнта сабаби

Худонинг амрларига итоат этишнинг кўп сабаблари бор, аммо бирламчи сабаб бу — Худо буни амр этганидир. Ҳатто бошқа сабаблар бўлмаганда ҳам, шу биттагина сабабнинг ўзи тамомила етарли. Сиз ота–онангиздан, нима учун айнан шундай қилишим керак, деб сўраганмисиз? Улар эса сизга: “Айтганимни қил, тамом вассалом”, дея жавоб берганларми? Бу шуни англатадики, ота–онангиз сизнинг итоаткорлигингизни кўришни истайдилар ва ўзларининг ҳақ эканликларига ишонадилар. Улар сизни ўзларининг талабларини бажаришга ўргатиш учун ҳаракат қиладилар. Худо ҳам сиздан худди шуни истайди.

Худога итоат этишнинг сабаблари жуда кўп. Улардан энг асосий ўнтасини қуйида келтираман:

1. Худога итоат этганимда, У менинг ибодатларимни эшитади. «Юрагимда гуноҳим бўлса эди, Мени асло эшитмас эди Раббий. Худо мени тинглади, ибодат қилганимда, овозимни эшитди» (Забур 65:18–19).

2. Мен Худога итоат этганимда, менинг ҳаётимда Унинг иштирокини янада яхшироқ ҳис қиламан. «Ким Мени севса, Менинг сўзимга амал қилади. Отам ҳам уни севади. Биз унинг олдига келиб, у билан бирга яшаймиз» (Юҳанно 14:23).

3. Мен Худога итоат этганимда, мен доно бўлиб бораман. «У тўғри одам учун нажот сақлайди, тўғри юрадиганга Ўзи қалқон бўлади» (Ҳикматлар 2:7).

4. Мен Худога итоат этганимда, Унинг дўсти эканимни исботлайман. «Агар сизлар амрларимни бажо келтирсангизлар, Менинг дўстларим бўласизлар» (Юҳанно 15:14).

5. Мен Худога итоат этганимда, ўзимни бехатар ҳис қиламан. «Қонун–қоидаларимни битта қолдирмай бажаринг, шунда юртингизда тинч яшайсизлар» (Левилар 25:18).

6. Мен Худога итоат этганимда, менда севги янада кўпаяди. «Худонинг каломига итоат қилган одамда эса Худонинг севгиси ўз мукаммал ифодасини топган.» (1 Юҳанно 2:5).

7. Мен Худога итоат этганимда, ҳаётимда яхши нарсалар юз беради. «Бугун мен сизларга марҳаматни ва лаънатни таклиф қиляпман: бугун Мен сизларга бераётган Эгангиз Худонинг амрларига риоя қилсангизлар сизларга марҳаматни бераман» (Қонунлар 11:26–27).

8. Мен Худога итоат этганимда, ўзимни бахтиёр ҳис қиламан. «Худонинг қонунига амал қилган бахтлидир» (Ҳикматлар 29:18).

9. Мен Худога итоат этганимда, қалбимда тинчлик ҳукм суради, хотиржам бўламан. «Айбсизга эътибор бер, софдилни кузат, тинчликпарварнинг истиқболи ёрқин» (Забур 36:37).

10. Мен Худога итоат этганимда, умрим узаяди. «Ўғлим, сўзларимни унутма, амрларимни юрагингда сақла. Улар умрингга умр қўшади, ҳаётинг тинч бўлади» (Ҳикматлар 3:2–1).

МЕН ИБОДАТ ҚИЛДИМ, ХУДО МЕНГА ЖАВОБ БЕРДИ: Мен Худодан, мени интернетга боғланиб қолганлигимдан халос қилгин, деб сўраган эдим, шундан кейин интернетга қизиқишим сўнди. Интернет мен учун зерикарли бўлиб қолди. Менда пианино чалиш истаги пайдо бўлди, мен ҳамду сано айтиб Худони улуғламоқчиман. Кейинроқ бу менинг ибодатларимга жавоб эканини англаб етдим (13 ёш).

Худо мен учун тайёрлаб қўйган ҳаётга киришим керак

Сиз учун Худонинг буюк режалари бор. Худо сиз учун муҳим ишларни тайёрлаб қўйган, сиз ўша ишларни қилишга даъват этилгансиз. Бу ишни тугатишга Худо сизни ҳозирданоқ тайёрлайди. Аммо бу ажойиб мамлакатга кириш учун сиз итоаткорликни ўрганишингиз зарур. Сиз Унга ишонишингиз керак, чунки сиз учун нима яхши эканини, сизнинг ҳаётингизга нима фойда келтиришини У билади. Худонинг бирорта қоидаси сизга зарар етказмайди, сизни бахтсиз қилмайди. Аксинча, Унинг хоҳиш-иродаси ҳар доим сизнинг фаровонлигингизга қаратилган. Сиз Унинг йўлларидан юрганингизда, ҳаётингизда ҳамма нарса жойида бўлади. Уни рад этганингизда эса, ҳаётингиз барбод бўлади.

Худога итоаткорлик билан севги ўртасида бевосита алоқа мавжуд. Исо айтган эди: «Менинг амрларимни билиб, уларга амал қилган киши Мени севади. Ким Мени севса, Отам ҳам уни севади. Мен ҳам уни севаман ва Ўзимни унга аён қиламан» (Юҳанно 14:21). Бундан маълум бўладики, бизнинг Худога бўлган севгимиз Унинг амрларига амал қилишимиз орқали намоён бўлади. Борди–ю, биз Худонинг амрларини бажармасак, Унинг бизга бўлган шартсиз севгисини тўлиқлигича ҳис қила олмаймиз.

Итоаткорлик билан ибодатларимизга жавоб олиш ўртасида бевосита алоқа мавжуд (1Юҳанно 3:22). Ибодатларим жавобсиз қолмоқда, деб хафа бўладиган бўлсангиз, Худодан, бунга менинг итоатсизлигим сабаб бўлмаяптими, деб сўранг. Ибодат қилиб, шундай айтинг: “Эй Худойим, агар Сенга итоатсизлик қилган бўлсам, менга кўрсат.” Худо сиздан нимани кутаётганига қизиқмасингиздан олдин, ўз истакларингиз ҳақида гапиришга шошилманг.

Худо сузиш машғулотларимдан кутилмаган тарзда фойдаланди. Мен сузиш бўйича тренеримнинг ҳамма насиҳатларини ёдимда тутганим учун ва бир неча йил давомида сузишни ўзлаштириб борганим учун ҳаётим сақланиб қолди. Бир куни мен пляжда дўстим билан бирга чўмилаётган эдим. Тўсатдан кўтарилган кучли тўлқин бизни очиқ океанга улоқтириб юборди. Қирғоққача сузиб боришга кўзимиз етмасди, шунинг учун қутқарувчилар етиб келгунча, сув кўтарилгандагина сузишдан бошқа чорамиз қолмади. Агар мактабда ўқиган давримда тренеримнинг маслаҳатларини қулоғимга олмаганимда ва ҳамма тўғри ҳаракатларни ёд олмаганимда эди, билмадим, бу воқеа нима билан тугарди. Шу сингари Худога итоаткорлик ҳам бизни турли вазиятларда, кўп маротаба қутқаради.

Худо белгилаган муҳим вазият ҳаётимизда қачон рўй беришини билмаймиз. Аммо келажак ҳаётингизда бундай лаҳзалар кўп бўлади. Худо ҳар куни сизни буюк ва муҳим ишлар учун тайёрлайди. Лекин сиз ўз Устозингизга эътиборли бўлишингиз керак. «Мусобақада қатнашган киши қоидага риоя қилмаса, ғалаба тожини киймайди» (2Тимўтий 2:5). Агар сиз тўғри ҳаракатлар комплексини ўзлаштириб олмасангиз, муаммоларнинг шиддатли оқимидан чиқа олмайсиз. Фақат амалда ўрганган кўникмалар сизга қийин вазиятда ёрдам бера олади. Шундагина сиз чуқур сувлар гирдобидан чиқа оласиз.

МЕНИНГ ХУДОГА ИБОДАТИМ: Эй Худойим, Сенга эргаша олишим учун менга куч бер. Ҳатто тенгдошларим устимдан кулишганда ҳам, қатъиятли бўлиб қолишим учун менга жасорат ато қил (13 ёшда).

Ибодатнинг кучи

Эй Худойим, Сенинг Каломингда айтилганки, Сенинг қонунларингни севадиганлар буюк тинчликка эга бўладилар, ҳеч нарса уларга тўсиқ бўла олмайди, деб (Забур 118:165). Мен Сенинг қонунларингни севаман, чунки Сенинг қонунларинг мен учун яхшилик эканини биламан. Сенга доим итоаткор бўла олишим учун менга ёрдам бер. Токи мен қоқилмайин, йиқилиб тушмайин. Итоаткорлик йўлида аниқ қандай қадамлар ташлашим кераклигини менга кўрсат; ҳақиқатни кўришим учун кўзларимни оч ва тўғри қадамлар ташлашимга ёрдам бер. Сенсиз тўғри иш қила олмаслигимни биламан, шунинг учун Сендан сўрайман: Сенинг амрларингдан бўйин товламаслигимга ёрдам бер (Забур 118:10).

Сенинг Каломингда айтилган: «Агар гуноҳимиз йўқ десак, ўзимизни ўзимиз алдаган бўламиз ва бизда ҳақиқат бўлмайди» (1Юҳанно 1:8). Ҳаётимда Сен қўйган мақсадлардан четга чиқишни, ўз хатоларимни Сенсиз, мустақил равишда ўзим кўришга уриниб, алданиб қолишни истамайман. Мен қилишим керак бўлганлардан нимани қилмаганимни менга кўрсат. Сенинг ўргатганларингни эшитишим учун қулоқларимни оч. Нима яхши, нима ёмон эканини тушунишим учун Ўз Каломинг орқали менга гапир. Мен ҳеч Муқаддас Руҳни хафа қилишни истамайман (Эфесликларга 4:30). Сен мен учун тайёрлаб қўйган марҳаматга сазовор бўлишим учун Ўзинг мени бошқаргин, менга Ўз йўлларингни ўргатгин. Исо номи билан ибодат қиламан.

Сўзнинг қудрати

«Ундан нима сўрасак, У беради. Чунки биз Унинг амрларини бажариб, Унга манзур бўлган ишларни қиляпмиз» (1 Юҳанно 3:22)

«Эй Парвардигор Эгам, қуёш, қалқонсан,

Сен бизга меҳрибонлик кўрсатиб, шон–шуҳрат ато этасан.

Эй Эгам, тўғри юрганлардан

Неъматингни дариғ тутмайсан» (Забур 83:12).

«Худонинг каломини тинглаб, унга риоя қиладиганлар бахтлироқдир» (Луқо 11:28).

Ибодат мавзусида бундан кейинги ўйлар

1. Худонинг қайси амрини бажаришга қийналасиз?

Ибодат қилиб, Худодан ўша амрни бажара олишингиз учун ёрдам сўранг. Ибодат матнини ёзинг.

2. Юқоридаги “Худога итоаткор бўлишнинг жиддий ўнта сабаби” саҳифасидан сиз учун энг муҳим учтасини танлаб олинг

3. Ҳаётингизнинг қайси соҳасида сиз янада интизомли бўлишни хоҳлайсиз?

Ибодат қилиб, Худога, менда жиддий интизомни ва мазкур соҳада итоаткорликни тарбиялашга ёрдам бер, деб илтимос қилинг. Ибодат матнини ёзинг.

Книга на Узбекском языке: - Сила молящегося подростка (Сторми Омартиан)

Познай силу молитвы. Измени свою жизнь. Изменяй мир.
Ты сомневаюсь в том, что Бог слышит твои молитвы? Тебе кажется, что они растворяются в воздухе, не достигая небес? Ты думаешь, что твои молитвы вряд ли способны что-то изменить?
Автор этой книги убеждает в том, что молитва способна изменить не только обстоятельства, но и жизнь в целом. В двадцати главах книги рассказывается о том, как...
- научиться ходить Божьими путями;
- избавиться от негативных эмоций;
- строить добрые отношения с людьми;
- освободиться от давления сверстников;
- стать светом для окружающих.