Сторми Омартиан. Ўсмир ибодатининг кучи - (18-боб) Китоб Ўзбек тилида
O‘smir ibodatining kuchi (Stormi Omartian) O‘zbek tilida Audiokitob
МУНДАРИЖА
Ибодатнинг кучи нимада? Нима учун мен ибодатга муҳтожман?
1-боб. Эй Худойим, Сени билишим учун менга ёрдам бер
2-боб. Эй Худойим, олдинги хатоларимдан халос бўлишимга ёрдам бер
3-боб. Эй Худойим, бошқаларни кечиришни менга ўргат
4-боб. Эй Худойим, солиҳларча иш тутишга мени ўргат
5-боб. Эй Худойим, аҳмоқона таъсирларга қарши туришим учун менга ёрдам бер.
6-боб. Эй Худойим, ўз фикрларимни бошқаришга мени ўргат
7-боб. Худойим, Сенинг Каломингни тушунишга мени ўргат
8-боб. Эй Худойим, тенгдошларим таъсиридан халос бўлишимга ёрдам бер
9-боб. Эй Худойим, одамлар билан яхши муносабатлар ўрнатишни менга ўргат
10-боб. Эй Худойим, ҳаётим давомида Сенга ҳамду сано айтишга мени ўргат
11-боб. Эй Худойим, ҳаётимда Сенинг мақсадингни тушунишимга ёрдам бер
12-боб. Эй Худойим, тўғри танлов қилишим учун мени доноликка ўргат
13-боб. Эй Худойим, салбий эмоциялардан қутулишимга ёрдам бер
14-боб. Эй Худойим, ҳаётимда васвасалар билан курашувимга ёрдам бер
15-боб. Эй Худойим, ҳаётимнинг қийин лаҳзаларида кучли бўлишимга ёрдам бер.
16-боб. Эй Худойим, ўзимни бехатар ҳис қилишим учун ёрдам бер
17-боб. Эй Худойим, ҳаётбахш сўзларни гапиришга мени ўргат
18-боб. Эй Худойим, имконсиз нарсага ишонишни менга ўргат
19-боб. Эй Худойим, ҳаётим учун Сенинг хоҳиш-иродангни билишимга ёрдам бер
20-боб. Эй Худойим, Сен мен учун тайёрлаган меросни қўлга киритишимга ёрдам бер
18-боб. Эй Худойим, имконсиз нарсага ишонишни менга ўргат
Мен бошланғич синфда ўқиб юрганимда, кимдир менга кичкина шиша шарни совға қилган эди; бу шар менга олтин занжирга осилиб турган катта мармар шарни эслатарди. Шарнинг ичида майда донлар бор эди. Хантал уруғи, деб ўйлаган эдим ўшанда. Лекин нимага шунчалик майда, аранг кўринадиган дончаларни шар ичига солиб қўйдилар экан? Чамаси, ўша пайтда ўша сюжетнинг ҳақиқий маъносини тушунмаган эканман.
Фақат бир неча йил ўтгандан кейин ўша майда донларнинг моҳиятини англаб олдим. Исо айтган эди: «Етарли имонингиз йўқлиги учун шундай бўлди. Сизларга чинини айтайин: агар зиғирдай имонингиз бўлиб, шу тоққа: “Бу ердан у ерга кўч”, — деб айтсангиз, тоғ кўчади. Сизлар учун имконсиз нарса бўлмайди"» (Матто 17:20). Ўшандан буён мен бу дон ҳақида ўйлайман. Мен шундай фикрлардим: агар тоғни силжитиш учун зиғирчалик имон етарли бўлса, эҳтимол, бундай имон билан ҳаётимдаги тоғни силжитишим мумкин экан.
Қаранг, ажойиб-а, зиғирдай имонимиздан Худо каттароқ нарсани ўстириб чиқара олар экан, албатта, агар биз имон билан йўл тутсак. Муқаддас Китобнинг тушунтиришича, ҳар бир одамга Худо маълум “имон ўлчови”ни берган (Рим. 12:3). Бу дегани – ҳар бир одам дастлаб кичкина имонга эга бўлади. Биз ўз томонимиздан бу имонга мувофиқ равишда нимадир қила бошласак, шунда Худо ўша имонни ўстира бошлайди.
Англаймизми, йўқми – биз ҳар куни имон бўйича яшаймиз. Врачга мурожаат этар эканмиз, у бизни ўлдирмаслигига ишонамиз; аптекада дори буюрар эканмиз, фармацевт репепт бўйича ҳамма дорини беришига ишонамиз. Ресторанга келганимизда, шунга ишонч ҳосил қиламизки, бу ердаги ишчилар ва ходимлар бизни заҳарламайди. Худога биз қандай қилиб ишонишимиз керак?
Буюк ишлар қандай амалга оширилади
Биз Худонинг даъватларига жавоб бериб, ишонч қадамларини ташлаганимизда, У биз орқали буюк ишлар қилишини ҳатто тасаввур ҳам қила олмаймиз. Айнан шунинг учун ҳам ўзимизни заиф ва ожиз ҳис қилган пайтимизда, У бизнинг ҳаётимизга қийинчиликлар кириб келишига йўл қўйиб беради. Биз Унга юз буришимиз ва бутун эътиборимизни Унга қаратишимиз учун У бизнинг ҳаётимизда маълум ҳодисалар пайдо бўлишига йўл қўйиб беради. Айнан шундай ҳолатларда биз одатда кўпроқ, қизғин ишонч билан ибодат қилишга истакни ҳис қиламиз, ишончимиз бундай лаҳзаларда тез ўсади. Исо айтган эди: «Сизларнинг ишончингизга яраша бўлсин» (Матто 9:29). Бундай ваъдадан бироз қўрқув пайдо бўлади: бу дегани – бизнинг бутун ҳаётимиз ишончимизга боғлиқ бўлади деганими? Аммо гап шундаки, ишончимиз ўсишига ёрдам бериш мумкин, бунинг учун биз маълум қадамлар ташлашимиз керак.
Худонинг каломини ўқиш — мустаҳкам имонга биринчи қадам. Муқаддас Китобга мувофиқ, “имон тинглашдан, яъни Масиҳ ҳақидаги Хушхабарни эшитишдан келади” (Рим. 10:17). Ҳар сафар Худонинг Каломидаги буюк ваъдаларни ва ҳақиқатни эълон қилганингизда ишончингиз ўсиб бораётганини ҳис қиласиз. Сиз Худонинг Каломидан ҳақиқатни олганингизда ва ҳақиқатга тўлиқ ишончингизни изҳор қилганингизда, ишончингиз доимо ўсиб боради.
Ибодат — мустаҳкам имонга иккинчи қадам. Худди шундай, чунки ибодат ишонч қадамидир; бу восита ёрдамида сиз Худога яқинлашасиз ва Унинг ҳузурига кирасиз. Аёл Раббийга қўлини чўзиб, ўзига ўзи деди: «Агар Унинг кийимига қўлимни тегизсам, соғайиб кетаман» (Матто 9:20–23). Биз Худога қўлларимизни чўзиб, Унга интилганимизда, ҳаётимиз маълум ўлчовда шифо олади, имонимиз ҳам ўсади.
Биз кундан-кунга ишончга кўпроқ эҳтиёжманд бўла борамиз. Шундай кун келадики, биз муваффақият ва муваффақиятсизлик, ғалаба ва мағлубият, ҳаёт ва ўлим ўртасидаги фарқларни очиб берадиган ишончга эҳтиёж сезамиз. Шунинг учун ишончимиз ўсиб бориши учун доимо ибодат қилишимиз лозим. Сизнинг ишончингиз қанчалик оз бўлмасин, Худо уни кўпайтира олади. Майли, ишончингиз заиф бўлсин, барибир, тоғларга: “Қўзғал!”, деб буйруқ бера оласиз, Худо эса имконсиз нарсани ҳам амалга ошира олади. Сиз ҳаётингизнинг хаста жиҳатлари шифо топиши учун ибодат қилишингиз ва Худодан, хаста томонларимни тиклагин, деб сўрашингиз мумкин. Сиз Худодан, ишончимни мустаҳкамлагин, ишонч қадамларини ташлашимга жасорат бағишлагин, деб сўранг ва албатта, Худо сизга жавоб беради.
Худонинг қайси ваъдасини сиз ҳозир эълон қилишни истаган бўлардингиз? Худога қайси ибодатни айтган бўлардингиз: жасорат ва ишонч биланми ва уларнинг жавобини кўришни хоҳлармидингиз? Сиз ўз ҳаётингизда ва бошқа одамларнинг ҳаётида қандай ўзгаришларни кўришни истаган бўлардингиз? Буларнинг ҳаммаси учун катта ишонч билан қилинадиган ибодат талаб этилган бўларди. Худодан, мендаги ишонч уруғини ўстиргин, уни катта ишонч дарахтига айлантиргин, деб сўранг, токи имоннинг бу буюк ишлари амалда бажо бўлсин.
ИБОДАТДА МЕН УЧУН ЭНГ ҚИЙИНИ:
- Худо белгилаган вақт келишини кутиш;
- Бошқа одамлар олдида овоз чиқариб ибодат қилиш;
- Дўстларим қилган ёмон хатти-ҳаракатлар учун ибодат қилиш;
- Худодан бошқаларни жазолаш ҳақида сўрамаслик;
- Ибодатларимга қачон жавоб олишимни билмаслигим (16– 19 ёш).
МЕН ХУДОНИ КИМ ДЕБ ТАСАВВУР ҚИЛАМАН:
- 80 ёшли ғайритабиий бобо;
- Таъминловчи;
- Гуноҳ ювувчи;
- Муқаддас раҳнамо;
- Барча жонзот устидан мутлақ ҳокимиятга эга бўлган худо (13–15 ёш).
Ишонинг, Худо сизни озод қилади
Худо мени кўп нарсадан, жумладан, алкоголдан, гиёҳвандликдан, қўрқувдан, тушкунликдан, хавотирликдан ва шафқатсизликдан озод қилган. Аммо бу ҳали ҳаммаси эмас. Худо мени бир лаҳзада озод қилгани эсимда, аммо озод қилиш процесси узоқ чўзилган ҳолатларни ҳам эслайман. Бу қанча вақтни эгаллаган бўлмасин, энг муҳими натижаси эди. Аммо булар менинг ва бошқаларнинг ибодатларисиз юз бермаган бўларди.
Ҳар биримиз у ёки бу вақтда бирон иллатдан халос бўлишга эҳтиёж сезамиз. Бу шу билан изоҳланадики, биз “тақводорлигимиз”га қарамай, одатдаги одамлар бўлиб қолаверамиз. Ҳаётимизни қанчалик мукаммал қилишга ҳаракат этмайлик, илгаригидай, душманимиз ҳамон бор; душманимиз ҳаётимизда ёвузлик қалъаларини кўтаришдан ҳеч чарчамайди. Худо эса бизни Ўзидан ажратадиган ҳамма нарсадан бизни халос қилишни истайди. Исо шундай ибодат қилишни ўргатган эди: «Бизни...ёвуз шайтондан халос қилгин» (Матто 6:13). Агар биз озод бўлишга муҳтож бўлмаганимизда эди, У шундай деб айтмаган бўларди. Аммо кўпинча биз бу ибодатни айтмаймиз, чунки Худонинг сўзларига ишонмаймиз. Исо бизнинг озодлигимиз учун катта тўлов тўлаганига гўё ишонмагандай яшайверамиз. Муқаддас Китоб айтади: «Исо Масиҳ бизни ҳозирги ёвуз замондан қутқарай, деб бизнинг гуноҳларимиз учун Ўзини фидо қилди. У шу йўсин Отамиз Худонинг иродасини адо этди» (Гал. 1:4).
Сиз ҳозирги пайтда нима билан шуғулланаётганингиздан қатъий назар, Худодан ажралиб қолганингизни ҳис қиляпсизми? Баъзан ибодатингизни ҳеч ким эшгитмаётгандай ва ибодатларингизга жавоб бермаётгандай бўлиб туюладими? Худо ато қилаётган шодлик устидан умидсизлик устунлик қиляптими? Сиз ўзингизнинг эски муаммоларингизга, олдинги одатларингизга, ишларингизга ва фикрларингизга қайтаётганингизни сезяпсизми? Агар бу саволларнинг ҳаммасига “ҳа” деб жавоб берганингизда ҳам, умидсизланманг. Худо сизни озод қилишни истайди. У буни қила олишига ва шуни исташига ишонишингиз керак. Сиз ишонч ибодати билан илтижо қилишингиз керак.
Кўпинча, биз ҳаётда шайтоннинг режалари бўйича яшаймиз, ҳатто бу аҳволга қарши чиқишимиз кераклигини ҳам билмаймиз. Исо бизни ҳалок қилмоқчи бўлган душман устидан юксалтирмоқчи. Биз Унга Нажоткоримиз деб умид боғлашимиз керак, У ҳаётимиздаги барча ортиқча нарсалардан бизни халос қила олишига ишонишимиз керак. Муқаддас Китоб шундай дейди: «Агар Ўғил сизларни озод қилса, ҳақиқатан озод бўласизлар» (Юҳ. 8:36). Бундан шундай хулоса келиб чиқадики, сиз кураш олиб бораётган гуноҳ қаршилиги қанчалик кучли бўлмасин, Худонинг халоскорлик кучи унданда чексиз кўплигига ишонишингиз керак.
Худога сажда қилиш — буюк ишончнинг ифодасидир. Сиз Худони олқишлаганингизда, руҳий оламда нимадир юз беради, бундан ёвузлик қалъалари қулайди. Сиз Худонинг ҳузурига кирганингиз учун булар юз беради, зеро У бор жойда эркинлик ва нажот бор. «Эгамиз деганда, Муқаддас Руҳни назарда тутяпман. Эгамизнинг Руҳи қаерда бўлса, ўша ерда эркинлик бор» (2 Кор. 3:17). Душман, сен ҳеч қачон озод бўлмайсан, деб сизни ишонтира бошлаши билан, Худога ҳамду санолар айтинг, душманни имон гирдобида кўмиб ташланг. Худо – сизнинг Қутқарувчингиздир, Унга сажда қилинг. Сиз сажда қилаётган лаҳзаларда У сизни ёвузликдан халос қила олгани учун Унга шукрона айтинг. Муқаддас Китоб шундай дейди: «Эгамиздан қўрққанларнинг атрофида Эгамизнинг фариштаси қароргоҳ қуриб, Уларга нажот бахш этади» (Забур 33:8).
Агар халос бўлган эски гуноҳларингизга қайта-қайта юз бураётганингиздай туюлса, беҳудага хафа бўлманг. Шуни ёдда тутингки, озодлик Худодан келади ва кўпинча узоқ давом этадиган жараённи талаб қилади. Худо ҳар доим бошлаган ишини охирига етказади. Шунинг учун иш сиз истагандай тезда бошланавермаса, умидсизликка тушманг. «Худо сизларнинг ҳаётингизда бошлаган эзгу ишини Исо Масиҳ келадиган кунгача битиришига аминман» (Флп. 1:6) деган оятга ишонинг.
МЕН АСОСАН ҚУЙИДАГИЛАР УЧУН ИБОДАТ ҚИЛАМАН:
- Худо мен учун тайёрлаб қўйган одамга турмушга чиқишни истайман;
- Имонли дўстларим бўлишини истайман;
- Мен умид билан яшашни истайман, тушкунликка тушишни хоҳламайман;
- Худо шубҳаларимни олиб ташлашини истайман;
- Худони яхши билишни хоҳлайман (16 – 19 ёш).
МЕН ИБОДАТ ҚИЛДИМ, ХУДО ЖАВОБ БЕРДИ: мен ўз мактабим учун ибодат қилдим. Чунки мактабимизда ўқувчилар сони жуда кам эди. Ўтган пайшанба куни мактабимизда йиғилиш бўлди, энди кўп болалар келгуси йил ўқишга бизнинг мактабга келишади (13 ёш).
Ишонинг, Худо учун имконсиз нарса йўқ
Худо — буюк имкониятлар Худоси. Мен бунга кўп марта ишонч ҳосил қилганман. Вақти-вақти билан вазият шунчалик даҳшатли бўлардики, гўё бу вазиятдан чиқиш имкони йўқдай туюларди. Аммо мен, Худо ибодатимни эшитади, ибодатларимга жавоб беради, деган ишонч билан ибодат қилардим. Эртасига эрталаб ҳақиқатан ҳам, вазиятда кескин ўзгаришлар юз берарди. Худо кутилмаган ва ақл бовар қилмайдиган нимадир қила бошларди: У қийин ҳолатим орқали менга йўл тайёрларди ёки мени қийин вазиятдан олиб чиқарди.
Агар вазият сизга мутлақо умидсиз бўлиб кўринса, умидсизликка тушиб, хафа бўлманг. Тўғридан-тўғри Худога ибодат билан боринг. Унга ўзингизнинг муаммоларингиз ҳақида гапиринг, кейин Унга, Сен учун имконсиз нарса йўқлиги учун шукр айтаман, деб миннатдорчилик билдиринг. Ундан, менга мустаҳкам ишонч бергин, ҳар қандай ҳолатда ҳам, оғир синовлар олдида ҳам имоним тебранмас бўлсин, деб сўранг. Ана шунда ишонч уруғлари сизда қандай ўсишини ҳайрат билан томоша қиласиз, ишончингиз шундай бўладики, ҳаётингиздаги тоғни силжитиш қудратига эга бўлади.
МЕНИНГ ХУДОГА ИБОДАТИМ: Худойим, Ўз Каломингда, сенинг ҳаётинг учун – сенинг келажакда гуллаб-яшнашинг ва муваффақиятларинг учун режам бор, деб айтган эдинг, бунинг учун Сенга шукр айтаман. Мен яна шунинг учун ибодат қиламанки, Сенинг хоҳиш-ироданг ҳаётимда бажо бўлсин, мен ҳаётимда ўз қадриятларимга эмас, Сенинг қадриятларингга асосланайин. Ҳамма ишларимда Сен Ўзинг мени бошқаргин (16 ёш).
Ибодатнинг кучи
Худойим, ишончимни ўстиргин, менга ўргат, мен кўринадиган нарсаларга эмас, балки имонимга таяниб ҳаёт кечира олайин (2 Кор. 5:7)). Сенинг ваъдаларингда мустаҳкам туришим учун ва Сенинг сўзларингга ишонишим учун менга куч бергин. «Ишонч эшитишдан, эшитиш эса Худонинг Каломидан» (Рим. 10:17) эканини биламан. Ҳар сафар “имон орқали нажот топган” ва нажот Сенинг инъоминг эканини (Эфес. 2:8) эшитганимда, ишончимни мустаҳкамлагин. Менга шундай мустаҳкам ишонч бергинки, мен куч-қудрат билан ибодат қилайин. Ибодат қилганимда хасталар шифо топаётганига менга ишонч ато қилгин. Мен муҳтож одамларни кўрганимда ва улар учун ибодат қилганимда, вазияти менинг ибодатим туфайли ўзгаришига ишонайин.
Худойим, Сенинг Каломингда шундай айтилган: «...имон билан сўранг. Иккиланманг, чунки Худога сидқидилдан ишонмаган киши гўё денгиз тўлқинига ўхшайди, шамол қайси томонга эсса, тўлқин ўша томонга қараб йўналади» (Ёқуб 1:6–7). «Ишонч бўйича бўлмаган ҳамма нарса гуноҳ» (Рим. 14:23) эканини биламан. Сенинг олдингда ҳар қандай шубҳа гуноҳ эканини тан оламан, мени кечиришингни илтимос қиламан. Шубҳаларим менинг ҳаётимдаги Сенинг режаларингга ва ниятларингга қарши бўлишини истамайман. Ишончимни ҳар куни шундай мустаҳкам қилгинки, Сенинг шуҳратинг учун ҳар куни тоғни қўзғатадиган бўлайин. Исо номи билан ибодат қиламан.
Куч-қудрат сўзи
«Агар одам ишонса, ҳамма нарсанинг имкони бор» (Марк 9:23).
«Ишонмаган одам ҳеч қачон Худони мамнун қила олмайди. Ахир, Худога сажда қилаётган ҳар ким Худонинг борлигига ишониши керак, Худога юз бурганларга Худонинг Ўзи мукофот беришига у амин бўлиши керак» (Ибр. 11:6).
«Шунинг учун хурсанд бўлинглар! Ҳозир турли синовлар туфайли қисқа вақт қийналаётган бўлсангиз ҳам, қувонинглар. Чунки синовлар имонингизнинг самимий эканлигини исботлаш учун керакдир. Ҳатто йўқ бўлиб кетадиган олтин ҳам оловда тобланиб, синалади. Сизнинг имонингиз эса олтиндан минг баробар қадрлироқдир. Синовдан ўтган имонингиз Исо Масиҳ охиратда келганда сизларга мақтов ва шон–шараф келтиради» (1 Бут. 1:6–7)
Ибодат мавзусида кейинги ўйлар
1. Ишонч шу топда сизга нима учун керак? Сиз ҳаётингиздаги қайси тоғни қўзғатмоқчисиз?
2. Келажак ҳаётингизда сиз қандай ўзгаришларни кўришни истар эдингиз? Сиздан катта ишончни талаб қиладиган муҳим ўзгаришлар назарда тутилган. Худога шундай ибодат матнини ёзиб, Ундан, менинг ишончимни шундай ўстиргинки, мен шундай ўзгаришларга ишонайин, деб сўранг.
3. Бошқа одамларнинг ва атрофингиздаги олам ҳаётидаги қандай буюк ўзгаришлар учун ибодат қилишни истайсиз?
Книга на Узбекском языке: - Сила молящегося подростка (Сторми Омартиан)
Познай силу молитвы. Измени свою жизнь. Изменяй мир.
Ты сомневаюсь в том, что Бог слышит твои молитвы? Тебе кажется, что они растворяются в воздухе, не достигая небес? Ты думаешь, что твои молитвы вряд ли способны что-то изменить?
Автор этой книги убеждает в том, что молитва способна изменить не только обстоятельства, но и жизнь в целом. В двадцати главах книги рассказывается о том, как...
- научиться ходить Божьими путями;
- избавиться от негативных эмоций;
- строить добрые отношения с людьми;
- освободиться от давления сверстников;
- стать светом для окружающих.