Ўзбек тилидаги

САЛОНИКАЛИКЛАРГА 2-МАКТУБ

Кириш

Салоникадаги жамоатда Масиҳнинг келиши ҳақидаги мавзу ҳали ҳам нотинчликлар келиб чиқараётган эди. Павлус Салоникаликларга ёзган бу иккинчи мактубида, Масиҳнинг келадиган куни етиб келди, деган гапларни муҳокама қилади. Бу фикрни тўғирлаб, Павлус, Масиҳ келишидан олдин, сирли бир “қабиҳ одам”, деб аталган киши келиши кераклигини айтади. Исо Масиҳга қарши чиқадиган мана шу одам келганда, унинг бошчилигида ёвузлик ва фосиқлик учига чиқади.

Павлус Салоникалик имонлиларни қийинчилик ва азоб–уқубатларга қарамай, имонда маҳкам туришга ундайди. Павлуснинг ўзига ҳамда унинг ҳамкорларига ўхшаб ишлашга, яхшилик қилишда давом этишга далда беради.

Павлус мактубни қуйидаги дуо билан якунлайди: “Тинчлик манбаи бўлган Раббимиз Исонинг Ўзи сизларга ҳар доим ва ҳар йўсинда тинчлик берсин. Раббимиз ҳаммангизга ёр бўлсин.” (3:16)

1–БОБ - САЛОНИКАЛИКЛАРГА ИККИНЧИ МАКТУБ

Дуойи салом

¹Отамиз Худо ва Раббимиз Исо Масиҳнинг Салоника шаҳридаги имонлилар жамоатига Павлус, Сила ва Тимўтийдан салом! ²Отамиз Худо ва Раббимиз Исо Масиҳ сизларга иноят ва тинчлик ато қилсин.

Исо Масиҳ келганда бўладиган ҳукм

³Биродарлар, биз доим сизлар учун Худога шукр қилишимиз керак. Шундай қилишимиз жуда ўринли, чунки сизларнинг имонингиз кундан кунга ўсиб боряпти, бир–бирингизга ва бошқа ҳаммага меҳр–муҳаббатингиз ошяпти. ⁴Шунинг учун биз Худонинг жамоатлари олдида сизлар билан фахрланамиз. Ахир, сизлар қувғинлару азоб–уқубатларга сабр–тоқат ва имон билан бардош беряпсиз. ⁵Мана шуларнинг ҳаммаси Худонинг ҳукми одил эканлигидан далолатдир. Чунки сизлар Худонинг Шоҳлигига лойиқ, деб топиласиз. Ҳозир мана шу Шоҳлик учун азоб чекяпсиз. ⁶Худо одилдир, сизларни азоблаганларга У азоб беради. ^7-8Азоб чекаётган сизларга эса биз билан бирга тинчлигини ато қилади. Буларнинг ҳаммаси Раббимиз Исо Ўзининг қудратли фаришталари билан, ловуллаб турган аланга ичида, кўкдан зоҳир бўлганда рўй беради. Худони рад этганларни ва Ўзининг Хушхабарга қулоқ солмаганларни Исо Масиҳ жазолайди. ⁹Ўша одамлар Раббимиз Исонинг ҳузури ва қудратли улуғворлигидан айрилиб, абадий ҳалокат жазосини оладилар. ¹⁰Ўша куни Раббимизни Унинг муқаддас халқи улуғлайди. Унга ишонган ҳамма одамлар Уни мадҳ қилади. Сизлар ҳам ўша инсонларнинг қаторига кирасиз, чунки биз айтган хабарга сизлар ишондингиз. ¹¹Шунинг учун, Худойимиз сизни Ўз чақириғига лойиқ деб топсин, Ўз қудрати билан сизларнинг барча яхши ниятларингизни рўёбга чиқарсин, имон билан қилган ишларингизни амалга оширсин, деб биз доим сизлар учун ибодат қиламиз. ¹²Раббимиз Исонинг номи орангизда улуғлансин, сизлар эса Худойимиз ва Раббимиз Исо Масиҳ инояти билан У орқали улуғланинглар, дея ибодат қиламиз.

2–БОБ - САЛОНИКАЛИКЛАРГА ИККИНЧИ МАКТУБ

Қабиҳ одам

¹Раббимиз Исо Масиҳнинг келиши ва бизнинг У билан бирга бўладиган кунимиз ҳақида қуйидагиларни айтсак. Биродарлар, сизлардан ўтиниб сўраймиз, ²Раббимиз келибди, деган гаплар бошингизни айлантирмасин, сизларни хавотирга солмасин. Бундай гаплар башорат орқали, бирор хабар ёки худди биз ёзган хатга ўхшаш бир хат орқали келиб чиққандир. ³Ҳеч ким сизларни ҳеч қандай усул билан алдамасин. Кўпчилик Худога қарши бош кўтармагунча ва қабиҳ одам келмагунча ўша кун келмайди. Ўша одам ҳалокатга маҳкум қилинган. ⁴У ҳар қандай “худо” деб аталган ва сажда қилинган нарсага қарши чиқиб, ўзини улардан устун қўяди. Ҳаттоки, Худонинг Маъбадида ўтириб олиб, ўзини худо, деб атайди.

⁵Сизлар билан бўлганимда шуларни айтганим эсингизда йўқми? ⁶Ўша қабиҳ одамни ҳозир нима тутиб турганини ўзингиз биласиз. Бу одам белгиланган ўз вақтида зоҳир бўлади. ⁷Ҳа, қабиҳликнинг яширин кучи аллақачон ишга тушган. Бироқ бир зот бу кучни тийиб турибди. Ўша зот олиб ташлангандан кейин ⁸қабиҳ одам ошкор қилинади. Уни Раббимиз Исо бир нафас билан ҳалок қилади. Раббимиз келганда, Ўз улуғворлигининг ёрқинлиги биланоқ уни йўқ қилиб ташлайди. ⁹Ўша қабиҳ одам шайтоннинг кучи билан келади. Қудратини кўрсатиб, ҳар хил мўъжизаю ажойиботлар қилади. ¹⁰Ҳалок бўлаётганларни ҳар хил ҳийла–макрлар билан алдайди. Улар нажот берадиган ҳақиқатни яхши кўришни рад қилганлари учун ҳалок бўляптилар. ¹¹Мана шунинг учун Худо уларни адаштирадиган бир кучга топшириб қўяди. Шунда улар ёлғонларга ишониб юраверадилар. ¹²Натижада, ҳақиқатга ишонмай, ёвузликдан завқ топганларнинг ҳаммаси ҳукм қилинади.

Имонингиз қатъий бўлсин

¹³Эй Эгамиз севган биродарлар! Сизлар учун ҳар доим шукр қилишимиз керак. Ахир, Муқаддас Руҳ кучи билан поклансин ва ҳақиқатга ишонсин, деб Худо сизларни бошиданоқ нажот учун танлаган эди. ¹⁴Раббимиз Исо Масиҳнинг улуғворлигидан баҳраманд бўлишингиз учун биз айтган Хушхабар орқали Худо сизларни чақирди. ¹⁵Шунинг учун, эй биродарлар, имонингиз қатъий бўлсин. Биз гапларимиз ва хатларимиз орқали сизларга ўргатган ҳақиқатларни маҳкам тутинглар.

¹⁶Bизни севадиган, Ўз инояти билан бизга тенгсиз жасорат ва барқарор умид берган Отамиз Худо ва Раббимиз Исо Масиҳнинг Ўзи ¹⁷сизларга далда берсин, ҳар бир қилган яхши ишингиз ва сўзингизда сизларга куч ато қилсин.

3–БОБ - САЛОНИКАЛИКЛАРГА ИККИНЧИ МАКТУБ

Биз учун ибодат қилинглар

¹Эй биродарлар, хатимиз ҳам ниҳоясига етиб қолди. Биз учун ибодат қилинглар, худди сизларнинг орангизда бўлгани каби Раббимиз Исо ҳақидаги Хушхабар тарқалаверсин ва иззат–ҳурмат билан қабул қилинсин. ²Худо бизни ёвуз ва ёмон одамлардан қутқариши учун ҳам ибодат қилинглар, чунки ҳамма ҳам имонли эмас. ³Аммо Раббимиз Исо садоқатлидир. У сизларни кучга тўлдириб, ёвуз шайтондан ҳимоя қилади. ⁴Сиз ҳақингизда Раббимиз бизда ишонч ҳосил қилди. Биз аминмизки, буюрганларимизни бажаряпсизлар ва бажаришда давом этасизлар. ⁵Раббимиз Исо Масиҳ юракларингизни Унга содиқ бўлишга ва Худони севишга йўналтирсин.

Ишлаган тишлайди

⁶Биродарлар, Раббимиз Исо Масиҳ номи билан сизларга буюрамиз: дангасалик қилаётган, биз берган таълимотларга кўра яшамаётган биродарлардан узоқроқ юринг. ⁷Биздан қандай ўрнак олишингиз кераклигини ўзингиз биласиз. Сизларнинг орангизда бўлганимизда дангасалик қилмадик. ⁸Бировнинг нонини бекорга емадик. Аксинча бошқаларга оғирлигимиз тушмасин деб, кечаю кундуз ишладик. Машаққат билан меҳнат қилдик. ⁹Албатта, сизлардан бирор нарса талаб қилишга ҳақимиз йўқлиги учун эмас, балки сизларга намуна бўлиш учун шундай қилдик. ¹⁰Ахир, сизлар билан бўлганимизда: “Ишламаган тишламайди!” деб айтгандик–ку!

¹¹Эшитишимизча, баъзи бирларингиз ялқовлик қилаётган экансиз. Бошқаларнинг ишларига аралашишдан бошқа нарсани билмас эмишсиз. ¹²Мана шундай одамларга Исо Масиҳ номи билан буюриб айтамизки, тинчгина ўз ишларингиз билан машғул бўлинг, нонни пешана терингиз билан топиб енг. ¹³Сизлар эса, биродарлар, ҳеч қачон яхшилик қилишдан чарчаманглар.

¹⁴Ушбу хатимиздаги йўл–йўриқларга қулоқ солмаганларни кўз остингизга олинг. Бундай одамни уялтириш учун у билан алоқада бўлманг. ¹⁵Уни душман ҳисобламанг, балки биродар сифатида огоҳлантиринг.

Хотима

¹⁶Тинчлик манбаи бўлган Раббимиз Исонинг Ўзи сизларга ҳар доим ва ҳар йўсинда тинчлик берсин. Раббимиз ҳаммангизга ёр бўлсин. ¹⁷Мен, Павлус мана шу саломни ўз қўлим билан ёзяпман. Ҳар бир ёзган мактубимнинг ўзига хос белгиси шудир. ¹⁸Раббимиз Исо Масиҳнинг инояти ҳаммангизга ёр бўлсин!