James Paker Dolzarb Savollarga Javoblar (Audiokitob) Kitob O'zbek tilida
Жаймс Пакер Долзарб Саволларга Жавоблар (Аудиокитоб) Китоб Ўзбек тилида
Мундарижа
Мукадима
Кириш
1. Йулнинг тугриланиши
2. Муқаддас Китобни англаш
3. Худога яқинлашиб
4. Ҳозирги оламдаги ҳаёт
5. Айрим қийин саволларга жавоблар
Жеймс Пакернинг янги китоби тажрибали қавмбоши билан масиҳий ёшлар ўртасидаги мулоқотлар асосига қурилган. Саволлар илоҳиётнинг чуқур масалаларини ҳамда кундалик, маиший масалаларни ҳам қамраб олади. Доктор Пакернинг жавоблари кутилмаган ва зид фикрларга бой, аммо барқарор тафаккур ва ҳаётсеварлик руҳи билан суғорилган. Китоб доктор Пакернинг шахсияти ва ҳаёт йўли тўғрисидаги очерк билан тугайди, очерк муаллифи журналист аёл Уэнди Зоба
МУҚАДДИМА
Хотиним икковимизнинг битта машинамиз бор, шунинг учун доимо ишдан автобусга уйга қайтишимга тўғри келади. Мана, ҳозир Риджент коллежи қаршисидаги автобус бекатида турибман. Бир неча йилдирки, бу бекатнинг ичкарисидаги деворда кўк ранглар билан ”Ёрдам беринглар!” деган бўялган ёзувга кўзим тушади. Бу сўзларни ким ва нима учун ёзгани мен учун доимо қизиқ. Бекатда кўпинча шу яқинда жойлашган университетнинг ва Риджент коллежининг талабаларини, шунингдек, университет шифохонасидан уйга қайтаётган одамларни кўриш мумкин. Улардан қайси бири шу тариқа ўзига эътиборни тортишга ҳаракат қилди экан? Балки, ёрдам сўраб мурожаат қилаётган одам гиёҳвандлик, ичкиликбозликдан халос бўлиш учун ёрдам сўраётгандир ёки худди кимсасиз фазода йўқолиб қолган кишидек ёлғизликдан, тушкунликдан азоб чекаётгандир? Балки, у номаълум келажак олдидаги қўрқувдан карахт бўлгандир? Ўзини эътибордан четда қолган, деб ҳис қилаётгандир? Ёки унинг бутун ҳаётини заҳарлаган беҳудалик ҳолдан тойдиргандир?
Бу ёзувнинг муаллифини мен ҳеч қачон билмайман, ёрдам беришга ожизман, бу эса менда оғриқ ҳиссини пайдо қилади. Ахир, мен масиҳийман, менинг унвоним биринчи навбатда муҳтожларга ёрдам беришдан иборат.
Баъзида турли ижтимоий ёрдамни, масалан, ўқишга таклиф қиладиган эълонларга кўзим тушади. Аммо бу эълонлардан биронтаси ҳам автобус бекати деворига умидсиз аҳволда бўёқ билан ёзган одамнинг эътиборини тортганига ишонмайман. Унинг илтижоси менга шуни эслатадики, бу оламда яшаётганларнинг ҳар бири ёрдамга муҳтож, улар ёрдамни Худо билан нажотга олиб борадиган муносабатлар орқалигина олишлари мумкин. Бу эса менда одамларга ёрдам бериш истагини, ҳар қандай усул билан Исо Масиҳ тўғрисидаги Хушхабарни уларга етказиш истагини мустаҳкамлайди.
Китобнинг номидан кўриниб турибдики, у бир неча одамларнинг фаолияти маҳсулидир. Уэнди Мюррей Зоба касби бўйича журналист, мен эса илоҳиётчиман. Икковимиз ҳам одамларга ёрдам беришни орзу қиламиз, Худо ато этган қобилият эса шу мақсад йўлида бизни бирлаштирган. Бизнинг ҳамкорликдаги ишимиз Уэнди ўз ўғли Бэн ва масиҳий дўстлари билан суҳбатлашиш учун мени уйига таклиф қилган кундан бошланган. Ўшанда Уэнди ҳамма саволларни ва менинг жавобларимни ёзиб олганди (буларнинг ҳаммаси у ёки бу кўринишда китобдан жой олган), кейин эса уларни нашр қилишни таклиф этди. “Tyndale” нашриёти бу ғояни қўллаб–қувватлади. Шунингдек, нашриёт китобхонларни кўпроқ қизиқтирадиган қўшимча материалларни ҳам китобга киритишга қарор қилди. Энди китобхонлар менинг ким эканлигим тўғрисида яхшироқ тасаввур қилишлари мумкин. Уэнди мен тўғримда мақола ёзди.
Ушбу китоб дастлаб Бен Зобанинг дўстлари, яъни мендан эллик ёш кичик бўлган ўқувчилар учун мўлжалланган бўлса ҳам, аммо бу Худо ҳақида кўпроқ билиш истагидаги барча ёшдаги одамларга қандайдир ёрдам беришига умид қиламан. Қўлёзмани нашрга тайёрлаш ишларининг катта қисмини Уэнди бажарди, шу боис китобхонларни бу аёлнинг меҳнати учун чин юракдан билдирган миннатдорчилигимга қўшилишлари учун даъват қиламан.
Агар мен кимгадир ёрдам бера олсам, ҳаётим беҳуда ўтмаган бўлади.
Агар бизнинг китобимиз кимнингдир ҳаётига аниқлик киритишда ва масиҳийликка ишончида янада кучлироқ бўлишида ёрдам берса, биз – муаллифлар учун бу катта мукофот бўлади, деб ҳисоблаймиз.
КИРИШ
Мен Жеймс Пакер билан 1994 йили меҳмонхона ресторанида танишган эдим. Нонушта пайтида эрим икковимиз у ўтирган столдан жой олдик. Пакер официантдан, қовурилган тухум учун аччиқ соус олиб келсангиз, деб илтимос қилди. Иккинчи марта илтимос қилгандан кейингина официант эътибор бериб, соус солинган қизил шиша идишни олиб келди. Аммо тухум совиб бўлган эди. Доктор Пакер британияликларга хос зўрма–зўраки кулганида юз қиёфаси ўзгариб кетди, аммо у чақнаб турган нигоҳини кўтариб: “Бу ерда ҳамма нарса оддий, уйдагидай, ана шуниси менга ёқади-да”, деди. Шу заҳоти мен бу одамдан нимани ўрганиш кераклигини тушундим.
Доктор Пакер менинг ёзувчилик касбимни қутқариб қолди, деб айтсам, муболаға бўлмайди. “Замонавий масиҳийлик” журнали учун ёзган очерким – биринчи уринишим барбод бўлди. Иккинчи уринишим ҳам муваффақиятсизликка учради. Пакер ўз ишлари билан журнал таҳририятига яна ташриф буюрганида, мен унинг олдига келиб муваффақиятсизликларим ҳақида гапириб бердим. У эса шундай жавоб берди: “Аввал сенинг чап юзингга урибдилар, кейин яна ўнг юзингга туширишибди”. (Бу гап британияча талқинда “Сенинг оёғингга урибдилар” маъносини англатади.)
Мен ўша суҳбат жараёнида мақола нашр қилишга доир маслаҳатлардан ҳам кўра кўпроқ нарсани билиб олдим. Доктор Пакер мен ёзган матннинг ҳаммасини кўриб чиқди, матннинг тузилишини, унинг алоҳида элементлари мувофиқлигини синчиклаб ўрганди, барча мазмуний фарқланишини ва диний руҳини тадқиқ этди, яъни мақолани солиҳларча туйғу билан таҳлил этди. Ундаги бу туйғу борлиги учун ҳам официантнинг ношудлигини “жайдари соддалик” дея таърифлаб, яхши қовурилган, аммо совиб қотиб қолган тухумни хотиржамлик билан тановул қилган эди.
Эндиликда эса ҳар бир мақоламни ёзишдан олдин доктор Пакер билан маслаҳатлашиб олишни ўзимга одат қилганман. Менга у келажакни кўришимга ёрдам бераяпти. У менга тўғри йўлни кўрсатмоқда. Мен боришим керак бўлган жойнинг режасини у менга чизиб бераяпти.
Доктор Пакер мени мустаҳкамлаяпти. Бу унинг истеъдоди. Ҳамкорликдаги фаолиятимизда у истеъдодини мен билан сахийларча баҳам кўраяпти. Мазкур китобнинг доктор Пакерга бағишланган бобида шуни ёзган эдим: унинг илоҳий лаёқати айнан шундан иборатки, у одамларга келажакни, тўғри йўналишни кўрсатади, унинг саёҳатлари учун харитасини чизиб беради. 1950-60 йилларда Англияни биз ҳеч қачон эшитмаган “тафаккурга асосланган” Инжилни тарғиб қилиш ғояси эгаллаб олганда, у тўғри йўлни кўрсатганди. 1970-80 йилларда Америкада Инжил масиҳийлари учун катта куч билан Муқаддас Китобнинг “гуноҳсизлиги”ни тасдиқлаш ҳаракатлари бўлганида, у йўл кўрсатди. У ҳозиргача бизга йўл кўрсатишда давом этмоқда.
Шуни айтишим керакки, доктор Пакер менинг ўн етти ёшли ўғлим Беннинг беқиёс севгисига сазовор бўлди. Ўғлим уни баъзан “зўр Пакер” деб айтади. Ўсмир фарзандлари бор ҳар қандай ота–она, “зўр” сўзи “эркак” сўзи каби, ижобий маънога эга, деб айтади. Бу сўз ўғлимнинг сўз бойлигидан бўлиб, Пакерни мақтайдиган яна бир сўзни пайдо қилди. Мен ўғлимнинг Пакерга севгисини шунинг учун айтаяпманки, айнан шу севги, шунингдек, Пакернинг дилкаш суҳбатдош экани бу китобнинг ёзилишига туртки бўлди.
1994 йилги учрашувимиздан бошлаб кўп йиллар давомида Жеймс Пакерни уйимизга бир неча марта тушлик учун таклиф қилишга муяссар бўлдик. Шундай оқшомлардан бирида ўғлим Бен товуқни иштаҳа билан еяр экан, Пакердан: “Сиз калвинистмисиз?” деб сўради. Пакер шундай жавоб берди: “Бен, агар сен “калвинист” сўзи остида, Худо Ўзи яратган оламни бошқаради, Ўзи ижод қилган ҳамма нарсалар тўғрисида меҳрибонлик билан ғамхўрлик қилади, деб ишонадиган одамни назарда тутган бўлсанг, мени калвинист деб ҳисоблайвер”. Бу суҳбат авлодларнинг муносабатларида янги нуқтани бошлаб бериб, биринчидан, ёш авлод Худо тўғрисидаги савол учун бамаъни жавобларга қаттиқ чанқоқ эканини, иккинчидан, доктор Пакер ана шу ташналикни ақллилик ва руҳий заковат билан қондираётганини кўрсатди.
Бен коллежнинг биринчи курсида кичик гуруҳнинг йўлбошчиси бўлди. Бир куни Жеймс Пакер бизникига тушликка таклиф қилинганини билиб Бен мендан сўради: “Нима дейсиз, ойи, доктор Пакер биз билан учрашиб, суҳбатлаша олармикан?” Мен: “Доктор Пакердан сўраб кўраман”, деб жавоб бердим.
Пакер таклифни қабул қилди. Ўша куни бизнинг хонамиз ёшлар билан тўлиб кетди. Улар Пакернинг ҳар бир сўзига ташналик билан қулоқ солар, унинг ҳазилларига ўзларини тўхтатолмай кулиб жавоб берардилар.
Шу учрашувлардан кейин менда бу китобни ёзиш ғояси туғилди. Аста–секин китоб тўғрисидаги тасаввурларимиз кенгайди, китобни бошқа суҳбатлардан оятлар билан ва доктор Пакернинг мулоҳазалари билан тўлдиришга қарор қилдик.
Умид қиламизки, китоб изланувчан китобхонга ёрдамчи бўлади, яъни чап юзига урилиб, кейин ўнг юзига урилган одамларга, ҳаётда келажакни ва тўғри йўлни топишга зарурат сезганларга, кимдир бориши керак бўлган жойга етиб олишга чизилган харита бўйича юришга ёрдам беради. Бу жой Худонинг хоҳиш–иродаси ва ниятлари орқали белгиланган. Ишонаманки, Жеймс Пакернинг донолиги шу йўлда сизларга ёрдам беради. Уэнди Мюррей Зоба
Бен Зобнинг қисқагина сўзи
Мен доктор Пакер ҳақида ўйларканман, Коринфликларга биринчи мактубни эслайман. Бу мактубда ҳаворий Павлус: “Мен Масиҳга қандай эргашсам, сизлар ҳам менга шундай эргашинглар” деб айтади (1Коринфликларга 11:1). Доктор Пакер ҳақиқатан Худонинг одами. Мен у биз билан тушлик қилиб, ўзи билан гаплашиш учун имконият берган ўша кунни қадрлайман. Муқаддас Китобдаги Ҳикматлар китобининг 5:11-да шундай ёзилган: “Умринг охирида, вужудингу танангдан асар қолмагач, фарёд қиласан”. Шунинг учун Пакернинг шаҳримизга келишини эшитганимда, мен онамдан: “У бизнинг ҳузуримизга келиб, дўстларим билан масиҳий бўлиш нима эканлиги тўғрисида суҳбатлаша олармикан”, деб сўрадим.
Исо айтади: “…Орангизда ким катта бўлишни истаса, бошқаларга хизмат қилсин” (Матто 20:26). Доктор Пакер Масиҳнинг хоҳиш–иродасини бажариб, тиғиз вақтидан дўстларим билан муҳим масалаларни муҳокама қилиш учун ажратди. Ёшимиздаги катта фарқларга қарамай, биз Исо Масиҳни севамиз, бу ҳолат бир–биримизга очиқ бўлишимизга имкон беради. Биз ҳамма нарса хусусида, яъни ёшлар учун муҳим масалалар, қизлар қандай учрашишларидан тортиб қайси коллежга ўқишга кириш ва бунда Худонинг хоҳиш–иродасига қарши бормасликкача бўлган масалалар тўғрисида суҳбатлашдик. Пакер бизга шундай маслаҳат берди: “Мулоҳазасиз қизларга уйланманглар”, “Шармандали одатларни кўпайтирманглар”. У яна бизга Раббийни қандай билиш тўғрисида гапирди, мақсадга етишиш йўлида ярим йўлда тўхтаб қолмасдан Масиҳга доимо интилиш тўғрисида таълим берди.
Доктор Пакер мен сингари ёш йигит бўлганда, Худо унга ягона, яшашга арзийдиган йўлни – Масиҳни кўрсатган экан. Бугунги кунда у менга бобом тенги. Узоқ умри давомида солиҳ ҳаёти учун фақат Худодан миннатдор бўлган одамни кўрганимда, бу мени жасоратга ундайди. Доктор Пакер заковати, ҳаётий тажрибаси билан Раббийдан донолик олди.
Книга на Узбекском языке: - Отвечает на актуальные вопросы (Жеймс Пакер)
Новая книга Дж. Пакера построена в форме диалога опытного пастора с христианской молодежью, которая ставит перед ним как глубокие богословские вопросы, так и вопросы повседневные, житейские. Ответы доктора Пакера порой неожиданны и парадоксальны, но всегда полны мудрости и жизнелюбия. Завершается книга очерком о личности и жизненном пути доктора Пакера, принадлежащим перу журналистки У. Зоба.
