---

Har bir qizning vasvasasi (kitobi SKACHAT LOTIN) .PDF

Ҳар бир қизнинг васвасаси (китоби SKACHAT) .PDF

- ayollar hayoti va ichki kurashi haqida kitob

---

Mundarija

Djosh Makdauelldan soʻzboshi
Bagʻishlovlar va minnatdorchiliklar
Ota-onalarga
Kirish soʻzi (Stiven Arterbern)

I-qism: Vasvasangizni tushunish
1. Oʻzimizga haqiqatni aytishga jazm etamiz
2. Boshida aytilgan rejaga qaytib
3. Iffatli va oriyatli hayot
4. Vasvasalarimizni kuchaytiruvchi afsonalar

II-qism: Oʻz-oʻzini halok qilishdan saqlanish
5. Jinsiy aloqaga nisbatan istagimizni kuchaytirganimizda
6. Koʻzgu doʻstimizga aylanganida
7. Haqiqatga taqqoslanib
8. Buzuq doirani uzish

III-qism: Boshqalarni vasvasaga tushirmaslik
9. Hukmronlik qilishga tashna boʻlganimizda
10. Taassurot uygʻotish uchun kiyinamizmi?
11. Noz-karashma qilish yoki qilmaslik?

IV-qism: Oʻz ongingizni himoya qilish
12. Ong jangida gʻolib chiqish
13. Davolovchi ochlik
14. OAV va u bilan qanday kurashish kerak

V-qism: Oʻz qalbingizni himoya qilish
15. His-tuygʻular bilan kurashda gʻolib chiqish
16. Ketish mumkin!
17. Ehtiyotkorlik bilan harakatlanish
18. Qayerda toʻxtashni bilish!

VI-qism: Oʻz tanangizni himoya qilish
19. Oʻz tanangiz ustidan gʻolib kelish
20. «Texnik» bokiralik
21. “Tormozsiz” jinsiy aloqa
22. «Axir bir-birimizni sevamiz!»

VII-qism: Muhabbatni kerakli joydan izlang
23. Sizga kerak boʻlgan Zot
24. Unga kerak boʻlgan qiz boʻlish
25. Isoga oshiq boʻlish 

Xotima 

---

7-BOB

Haqiqatga taqqoslab

 

Aksincha,​ sirli va uyatli ishlar qilishdan,​ makr–hiyla ishlatishdan bosh tortib,​ Xudoning kalomini buzmay gapiramiz.​ Haqiqatni ochiq–oydin aytib,​ Xudoning huzurida oʻzimizni boshqa odamlarning hukmiga topshiramiz.

2 Korinfliklar 4:2

 

2002 yil 22 mayda Nyu-York Tayms jurnalisti Kori Kilganon shunday deb yozgan edi:

 

Kunduzi u Kristina Long, mehrobda xizmat qiluvchi oʻn uch yoshli qizaloq va Denverdagi Avliyo Pyotr Rim-katolik maktabining muxlislar jamoasi sardorlaridan biri edi. Direktor uni "namunali xulq-atvorli yaxshi oʻquvchi" deb tariflaydi.

Ammo kechqurunlari, tergov paytida malum boʻlishicha, u Internetga "qaynoqqina qizaloq" nomi bilan va "Hamma narsa, hech boʻlmaganda bir marta" shiori ostida chiqqan. Uning yotoqxonasida kompyuter turardi; u muntazam ravishda turli xil chatlarga kirar va katta yoshli erkaklar bilan tanishib, keyinchalik ular bilan jinsiy aloqaga kirishgandi. "Oilaviy ahvoli" boʻlimida u shunday yozgan edi: "Balki yolgʻizdir, balki yolgʻiz emasdir."

Dushanba kuni ertalab Kristinaning jasadi Grinvichga olib boradigan qishloq yoʻlidan tashqaridagi chuqur jarlikdan topildi. Malum boʻlishicha, qizaloq chatlardan birida tanishgan yigirma besh yoshli grinvichlik erkak tomonidan boʻgʻib oʻldirilgan.

Sol Dos Reys Kristina bilan bir necha marta jinsiy aloqada boʻlgan, juma kuni tunda esa uni oʻldirib, jasadini jarga tashlab yuborgan."

Agar siz: "Men bilan bunday boʻlishi mumkin emas!" deb oʻylasangiz, unda oʻylab koʻring: "Nega bunday boʻlishi mumkin emas?" Agar siz Internetda notanish odamlar bilan muloqot qilsangiz, unda biror yomon voqeaga duch kelmasligingizga kafolat bormi? Yoqimli suhbatdoshingiz haqiqatan ham sizga faqat yaxshilik tilaydi, degan fikrni qayerdan oldingiz? Siz uning haqiqatan ham oʻzini kim deb tanishtirayotganini qayerdan bilasiz? Nima uchun bu odam sizning ozgina etiboringizga, ayniqsa, vaqtingiz va hissiy quvvatingizni qurbon qilishga arziydi, deb oʻylaysiz? Siz qayerdan bilasiz - u ommaviy qotil, ommaviy zoʻravon yoki bolalar pornografiyasini tarqatuvchi boʻlib chiqishi mumkinmi?

 

Haqiqiy emas

Internet orqali tanishuv koʻpchilik uchun xavfsiz koʻngilxushlik boʻlib tuyuladi. Aslida, bu unchalik toʻgʻri emas. Kibernetik munosabatlar koʻpincha siz bolaligingizda oʻqigan sehrli ertaklar kabi real hayotdan uzoq boʻladi. Albatta, Zolushka yoki Oppogʻoyga oʻxshagan goʻzal shahzodani sevib qolish, unga turmushga chiqib, u bilan uzoq va baxtli yashash ajoyib boʻlardi. Ammo aslida hammasi boshqacha boʻladi va bu tasodifiy emas.

Zolushka bilan Oppogʻoy oʻz shahzodalariga tegishga rozilik berayotganlarida (albatta, ularning goʻzal va maftunkor ekanliklaridan tashqari) shahzodalari haqida nimalarni bilishardi? Umuman hech narsa. Nol. Agar oʻshanda siz, kichkina qizaloq uchun bu narsa maftunkor tuyulgan boʻlsa, endi siz etarlicha ulgʻayib, aqlli boʻlib qoldingizki, bunday ertaklar gʻirt xomxayol ekanligini, ularni haqiqatga aylantirishga urinishlar esa buyuk muhabbat tarixidan koʻra koʻproq fojiaga aylanishini tushunib etdingiz.

Internetda real vaqt rejimida yozishmalar qanchalik mashhurligini bizsiz ham bilasiz. Siz buni bilishingiz kerak, chunki agar oʻzingiz hech qachon tanish qidirib internetga kirmagan boʻlsangiz ham, bu bilan shugʻullanadigan tanishlaringiz bor. Ehtimol, siz yoki tanishlaringiz bu oʻyin-kulgi bilan shu qadar chuqur shugʻullangansizki, hatto "kiberseks," yani Internet orqali jinsiy aloqa mavzusida suhbatlar olib borgandirsiz.

Jon Eldrij oʻzining "Istak yoʻli" kitobida kibermakonga boʻlgan bu ommaviy qiziqish haqida shunday yozadi:

"Kibernetik munosabatlar ideal erkak yoki ayolni izlashni yangi bosqichga olib chiqdi, chunki ular jozibali sirlilikni uzoqroq saqlab qolish imkonini beradi. Elektron oʻynashning ogʻzidan hech qachon hid kelmaydi, terminaldan tanosil kasalligi yuqmaydi, bundan tashqari, bu aloqangiz haqida hech kim hech qachon bilmaydi."

 

Buning nimasi jozibali?

Nega odamlar romanlarni "jahon oʻrgimchak toʻri"dan qidirishadi? Virtual munosabatlar nima uchun bu qadar jozibali?

Internet orqali tanishuv haqida eshitgan turli fikrlarimizni keltirib oʻtamiz va ularga izoh beramiz.

• Notanish odam bilan yaqinlashish juda qiziqarli! Roziman - yangi tanishlar orttirish qiziqarli boʻlishi mumkin, lekin oʻzingizni aldamang. Qachondan beri klaviatura oldida oʻtirib, bosma xabarlar almashish "yaqinlashish" deb ataladigan boʻlib qoldi? Hozirgina tanishgan odamingiz haqida yangi malumot olish yaqinlashishni anglatmaydi: bu shunchaki yangilik. Yaqinlashish boshqa odamning ichki dunyosini bilishni nazarda tutadi, bu faqat uzoq va yaqin muloqotda mumkin boʻladi. Siz yigit bilan tanishasiz va u bilan kompyuter orqali soatlab suhbatlashasiz - bu haqiqatan ham qiziqarli va yoqimli boʻlishi mumkin. Ammo ehtiyot boʻling: qizgʻin muloqotni intim muloqot deb qabul qilmang. Yangilik oʻtib ketishi bilan intensivlik pasayadi; intimlik esa insonni qancha uzoqroq bilsang, shuncha gullab-yashnaydi.
• Onlayn rejimda men oʻzim xohlaganimdek boʻlishim mumkin. Bu javob oʻzini etarli darajada hurmat qilmaslikni koʻrsatadi. Siz oʻzingizning haqiqiy "men"ingiz hech kimni qiziqtirmasligidan qoʻrqasiz, shuning uchun oʻzingizni aslingizdan koʻra boshqacha, jozibaliroq yoki kulgiliroq qilib koʻrsatasiz. Ammo siz oʻzingiz boʻlmasangiz, oʻzligingizni yashirsangiz yoki oʻzingizga xos boʻlmagan rolni oʻynasangiz, yigitning his-tuygʻularidan nima zavq olasiz? Axir u sizni tanimaydi-ku. Darvoqe, shuni unutmangki, u ham oʻzini istagan odam qilib koʻrsatishi mumkin!
• Koʻrinishim qanday boʻlishidan qati nazar, men bilan qiziqishlarini yoqtiraman. Faqat u hech qachon sizning tashqi koʻrinishingizga qiziqmaydi, deb oʻylamang! Erkaklarning tabiati shunaqa - ular sizning tashqi koʻrinishingizga qiziqishadi. Unda nima qilasiz? Bunday voqealarga aralashib nima qilasiz? Qarmoqqa ilinib qolmang!
• Men shunchaki yigit bilan suhbatlashishni yoqtiraman, jismoniy yaqinlikni uzoqdan nishonga olmayman. Avvaliga siz u bilan jismoniy yaqinlik haqida oʻylamasligingiz mumkin, lekin unga qalbingizni toʻkib solib, u sizga bergan har bir satrdan zavqlanib, siz, albatta, sof hissiy muloqot chegarasidan chiqishni xohlaysiz. Unga qalbingiz bilan bogʻlanib, u bilan uchrashish, uning quchogʻida boʻlish, lablarining tamini his qilish ehtiyojini his qilasiz, u yerda esa tobora tezroq pastga, jinsiy kelishuvga tushib borasiz.

Bizningcha, ayollarni internet orqali tanishishga nafaqat oʻzini past baholash, balki yana ikkita holat ham undashi mumkin:

• ʻizlik hissi. Agar sizda yaqin doʻstlar umuman yoʻqdek tuyulsa va yosh yigitga ega boʻlish umidi kam boʻlsa, siz oʻzingizning kichkina dunyongizdan tashqarida, ulkan "butunjahon oʻrgimchak toʻri"da oʻz baxtingizni sinab koʻrishni xohlaysiz. Ammo internet aloqalari koʻpincha haqiqiy munosabatlar uchun moʻljallangan quvvatni tortib olgani sababli, siz toʻldirmoqchi boʻlgan chelakda teshik ochasiz va yanada mazmunli doʻstlik oʻrnatish imkoniyatini qoʻldan boy berasiz.

 

• Poda tuygʻusi. "Hamma shunday qiladi" degani bu toʻgʻri yoki xavfsiz degani emas. Agar dugonalaringiz yigitlar bilan internetda tanishib qolishsa, ularga ushbu kitobni oʻqishga imkon bering va ayniqsa, mana bu bobni oʻqishni maslahat bering. Doʻstlaringizning yomon yoʻlga kirib ketishiga yoʻl qoʻyishdan koʻra, ularga sogʻlom munosabatlarga olib boradigan toʻgʻri yoʻlni topishga yordam bering.

 

 

Bir umrlik saboqlar

Biz, albatta, kibermakonda oʻrnatilgan barcha tanishuvlar yomonlik bilan tugaydi, demoqchi emasmiz, ammo virtual munosabatlar haqiqiy munosabatlarga qaraganda koʻproq boshi berk koʻchaga olib kiradi. Ushbu kitob ustida ishlash jarayonida biz 120 nafar yosh ayol bilan soʻrovnoma oʻtkazib, ularning internetdagi muloqot tufayli nosogʻlom munosabatlarga tortilgan-tortilmaganligini aniqladik. Biz ulardan oʻz tajribalari bilan oʻrtoqlashishni soʻradik va koʻpi bilan toʻrt-beshta javob olamiz deb oʻylagan edik. Oʻn baravar koʻproq javoblar olgach esa juda hayratda qoldik! Albatta, biz olingan barcha javoblarni bu yerga sigʻdira olmadik, ammo Amber, Eymi va Tiffani hikoyalarida ham koʻplab tengdoshlaringizning dildan doʻst izlab internetni kezib yurgan achinarli tajribasi bir tomchi suvdek aks etgan.

Oʻn uch yoshida Amber ruhiy tushkunlikni boshdan kechirdi, ammo tez orada internet orqali najot topdi. U shunday deydi: "Men oʻz qiyofamni oʻzim oʻylab topishim va yaratishim mumkinligini angladim va hech kim mening oʻtmishimni ham, qandayligimni ham bilmaydi." Yigitlar bilan suhbatlashar ekan, Amber soatlab kompyuter oldida oʻtirardi, shuning uchun ota-onasi hatto xavotirga tusha boshlashdi. Amber ularga yolgʻon gapirib, ulardan yashirincha onlayn rejimga chiqa boshladi.

"Bir kuni, shanba kuni, ota-onam uyda yoʻqligida, men internetda ketma-ket sakkiz soat oʻtirdim! Men tobora koʻproq odamlar bilan muloqotga kirishdim, bazilari bilan hatto telefon orqali gaplashdim. Vaqt oʻtishi bilan haqiqiy odamlar meni unchalik qiziqtirmay qoʻydi va men faqat bir narsani - internetdagi doʻstlarim bilan muloqot qilishni xohlardim. Ular menga qiziqarliroq tuyuldi, oʻzimni mendan boshqacharoq qilib koʻrsatish oʻzimga ham quvonchliroq tuyuldi. Internetda tanishgan bir yigitga shunchalik qiziqib qoldimki, u bilan uchrashishga qaror qildim. Men Kaliforniyaga qarindoshlarimni koʻrgani bordim, u yaqin atrofda yashagani uchun uchrashuv joyi va vaqtini kelishib oldik. Men amakivachcham bilan keldim, uni uzoq kutdik, lekin u kelmadi. Xudo menga rahm qildi, deb oʻylayman, chunki bu yigit qotil yoki zoʻravon boʻlishi mumkin edi. Axir men uning oʻzi haqida ham, fel-atvorining oʻziga xos xususiyatlari haqida ham hech qanday tasavvurga ega emasdim-ku."

 

Oʻzini aslidan boshqacha koʻrsatib, notanish odam bilan uchrashishga rozilik berib, qanday xavfli oʻyin boshlaganini Amber endi tushunib etdi. Uning aytishicha, bu xayoliy muloqot u toʻlagan narxga arzimagan va vaqt behuda sarflangan.

Eymi ham Zak bilan boʻydoqlar va turmushga chiqmaganlar uchun moʻljallangan masihiy chatda tanishgan. Avvaliga u qizga Xudoni astoydil izlayotgan ajoyib yigit boʻlib tuyuldi. Ammo voqelik unga hushyor torttiruvchi tasir koʻrsatdi. Eymi shunday deb hikoya qiladi:

"Biz Zak bilan tobora uzoqroq muloqot qila boshladik, keyin esa bir necha soat ketma-ket suhbatlashib oʻtirdik. Bir necha haftadan soʻng u menikiga mehmonga kelishga qaror qildi. Men uni koʻrganimda, u menda kutganimdek taassurot qoldirmadi. Agar koʻchada uchratib qolsam, unga qayrilib ham qaramasdim. Ammo u mening mehmonim boʻlgani uchun men unga shaharni koʻrsatdim va oʻz jamoatimga olib bordim. Men oʻylardim: "Nega u bu yerda? Men endigina oʻn sakkizga kirdim va hali bunday jiddiy munosabatlarga tayyor emasman!" Bu tashvishli fikrlarga, hatto doʻstlarim va qarindoshlarimning ogohlantirishlariga qaramay, men u bilan yaqinlashdim va hatto ancha uzoqqa borishiga yoʻl qoʻydim. Toʻgʻri, oʻshanda oʻzimni juda yolgʻiz his qilardim, shuning uchun kimdir menga etibor berayotganini koʻrish yoqimli edi. Biz u bilan haqiqatan ham jinsiy aloqa qilmagan boʻlsak-da, yaqinlashib qolgan edik. Uchrashganimda butunlay jozibasiz boʻlib koʻringan odamga oʻzimni topshirib qoʻyishimga sal qoldi, degan oʻylardan ham qoʻrqaman.

 

 

Eymi bundan buyon ham cheksiz fantaziya qoʻyadigan chigalliklarga tushib qolmaslik uchun haqiqiy munosabatlarni saqlab qolishga qaror qildi.

Tiffani Ueys bilan virtual muloqot qilish uchun ikki yil vaqt sarfladi, shundan soʻng bu munosabatlar u kutgan yaqin doʻstlikka aylanmaganini tan olishga majbur boʻldi. Boʻsh vaqtining asosiy qismini oilasi va doʻstlari bilan oʻtkazish oʻrniga Ues bilan muloqot qilish uchun kompyuter oldida oʻtkazganligi sababli, ular bilan munosabatlar ham boshi berk koʻchaga kirib qoldi. Tiffani quyidagilarni tan oladi:

 

"Ues meni maqtovlarga koʻmib tashladi va bu yigitdan bunday gaplarni eshitish menga juda yoqdi, ayniqsa, otam mening xatti-harakatlarimdan norozi boʻlib, meni qoʻpol va asabiy deb hisoblagan bir vaqtda bu juda yoqardi. Ammo Ues hech qachon mening qoʻpolligimdan shikoyat qilmagan, chunki u hech qachon bunday holatga duch kelmagan. Asta-sekin men barcha doʻstlarimdan ajralib ketdim, chunki men butun vaqtimni internetda oʻtkazadigan boʻldim va faqat Ues bilan muloqot qilardim. Oʻqishni butunlay tashlab qoʻyganim uchun baholarim ham yomonlashdi.

Bir necha oy oʻtgach, Ues menga boʻlgan qiziqishini yoʻqotishidan qoʻrqa boshladim, chunki u uchratgan boshqa qizlar haqida gapira boshladi. Men unga oʻzimga boʻlgan qiziqishini qoʻllab-quvvatlash uchun qayerga borishim va nima qilishim haqida gapira boshladim. Shunday boʻlsa-da, u oʻziga "haqiqiy" qiz kerak degan qarorga kelgach, muloqotimiz asta-sekin barbod boʻldi.

Yozishmalarimiz toʻxtaganida, ichimda dahshatli boʻshliqni his qildim, chunki men u bilan turmush quramiz deb oʻylashga odatlanib qolgan edim. Oʻzimni juda yomon his qildim. Bundan tashqari, oilamdagi buzilgan munosabatlarni deyarli bir yil davomida tiklashga toʻgʻri keldi, Uesga ishqiboz boʻlgan vaqtimda doʻstlarimni ham yoʻqotgandim."

Ehtimol, koʻpchiligingiz Amber, Eymi va Tiffani kechinmalarini yaxshi tushunarsiz, chunki ular sizning Internet orqali yoshlar bilan muloqot qilish tajribangizga mos keladi. Agar shunday boʻlsa, biz sizga yordam berishni istardik...

                    "Oʻrgimchak toʻri"dan qutulmoq

                    Agar siz allaqachon nosogʻlom virtual munosabatlarga bogʻlanib qolgan boʻlsangiz yoki bu siz bilan sodir boʻlishi mumkinligini his qilayotgan boʻlsangiz, "jahon oʻrgimchak toʻri"dan qanday qutulish boʻyicha bir nechta yaxshi maslahatlarni qabul qiling.

• Maxfiy va hech kimga koʻrinmaydigan elektron pochta qutisini yaratmang. Siz, albatta, begonalar sizning virtual olamdagi hayotingiz va tarmoqdagi muloqotlaringizdan xabardor boʻlishga haqli emas, deb oʻylashingiz mumkin, lekin unutmang: sirlar yoʻq joyda yolgʻonga ham oʻrin yoʻq. Kristina (kompyuterdagi sherigi tomonidan oʻldirilgan qiz) kabi ikki tomonlama hayot kechirish vasvasasiga berilmang. Oʻzining sirlari uchun u nihoyatda qimmatga tushdi.
• Hech qachon shaxsan uchrashmagan odamlar bilan kompyuterda muloqot qilmang. Ularning shaxsiyati va xatti-harakatlari haqida toʻliqroq tasavvurga ega boʻlish uchun haqiqiy odamlar bilan haqiqiy munosabatlarni saqlab qoling.
• Agar siz muloqotni toʻxtatgan odam muloqot vositasi yoki elektron pochta orqali virtual makoningizga bostirib kirishda davom etsa, "blok qilish" tugmasini bosing. Javob berishga majbur emasligingizni unutmang. Sizning sobiq suhbatdoshingiz vaqt oʻtishi bilan shamani tushunadi yoki darhol sizga boʻlgan qiziqishini yoʻqotadi. Bu qoʻpollik emas, balki shunchaki oʻzingizni himoya qilish usuli.

 

Haqiqiy yaqinlikka intiling

Ehtimol, siz virtual munosabatlar haqiqiy munosabatlardan ancha yaxshi ekanligini bir necha bor eshitgan boʻlsangiz kerak, lekin bu toʻgʻrimi? Yoʻq, unday emas. Ehtimol, xayoliy munosabatlarga intilgan odamlar hech qachon haqiqiy, jonli muloqot quvonchini his qilmaganlar.

Kimdir sizning butun ikir-chikirlaringiz bilan tanish boʻlsa, siz haqingizda bilishi kerak boʻlgan hamma narsani bilsa-yu, baribir sizga nisbatan sevgidan aqlini yoʻqotgan boʻlsa - bu juda ajoyib.

 

 

Bunday yaqinlik - haqiqiy yaqinlik! - sizni oʻz koʻzingiz bilan koʻtaradi, hayotingizni boyitadi, chinakamiga baxtli qiladi.

Bilasizmi, yana nima? Kimdir sizni yaxshi biladi va juda yaxshi koʻradi. U sizni tugʻilishingizdan oldin ham bilgan. U siz yoʻl qoʻyadigan har bir xatoni, har bir isyonkor fikrni, har bir gunohni oldindan bilardi, shunday boʻlsa-da, sizni shu qadar sevardiki, siz uchun oʻlimga ham bordi.

Masih Oʻzining xochdagi oʻlimi bilan sizning barcha gunohlaringiz uun toʻlov toʻladi. Shunday qilib, sizlar endi Xudodan ajralmas boʻlibgina qolmay, balki Muqaddas Ruh orqali kecha-yu kunduz Xudoga yaqinlasha olasizlar. Xabaringizni qabul qilish uchun U kompyuterini yoqishini kutishingiz shart emas.

Undan xat bor yoki yoʻqligini tekshirish uchun elektron pochtangizga har daqiqada qarashingiz shart emas, chunki Uning koʻplab xabarlari allaqachon Muqaddas Kitobda sizni kutmoqda.

Haftada yetti kun va bir kecha-kunduzda yigirma toʻrt soat ibodat qilish - Xudoga cheksiz yaqinlashish imkonini beradi. Shunday qilib, agar siz yaqinlik va ruhiy aloqaga intilsangiz,

virtuallikka emas, reallikka murojaat qiling!

“Mening toat–ibodatlarim quyidagichadir:​ Xudo Oʻzining ulugʻvor boyligi bilan sizlarga kuch–qudrat berib,​ Oʻz Ruhi bilan ichki borligʻingizni baquvvat qilsin. Imoningiz orqali Masih yuragingizdan joy olsin. Sizlar ildizi chuqur daraxtday boʻling,​ Xudoning sevgisi sizlarni barqaror qilsin.​ Xudoning barcha azizlari bilan birga,​ Masihning aql bovar qilmas sevgisi qanchalik keng,​ qanchalik cheksiz,​ qanchalik yuksak va teran ekanligini​ toʻla anglab, bilib olinglar.​ Shunda hayotingiz Xudoning kamolotiga toʻlib–toshadi” (Efesliklar 3:16-19).