Митч Глейзер. Ишаё 53 Шарҳлар - (12-боб) Ўзбек тилида
Ishayo 53 sharxlar (Mitch Gleyzer) O‘zbek tilida Audiokitob
Битта боб ҳаётингизни бутунлай ўзгартириб юбориши мумкин
МУНДАРИЖА
Муқаддима
Кириш
1-боб. Мен яҳудийман... хўш, нима бўпти?
2-боб. Яҳудийлар битиклари – шунчаки тарихий китоб эмас
3-боб. Муқаддас Китоб башорати: келажак очилади
4-боб. Ишаё пайғамбар, унинг башоратлари ва даври
5-боб. Раббийнинг қули
6-боб. Қулнининг қурбонлиги
7-боб. Ишаё пайғамбар китобининг 53-боби ва гуноҳни ювиш
8-боб. Янги Аҳднинг ишончлилиги
9-боб. Исо Ишаё пайғамбар китоби 53-бобининг башоратларини бажардими?
10-боб. Яҳудийлар эътирозларининг сабаби бор
11-боб. Ишаё пайғамбар китобининг 53-боби - ва сиз
12-боб. Сиз ёлғиз эмассиз
Шахсий постскриптум
12-БОБ
СИЗ ЁЛҒИЗ ЭМАССИЗ!
Дунёда Ишаё пайғамбар китоби 53-бобидаги башоратни Исо амалга оширганига ишонадиган бошқа кўплаб яҳудийлар борлигини билиш сиз учун жуда муҳим бўлса керак. Биз ёлғиз эмаслигимизга ишонч куч ва жасорат беради. Бу ерда Ишаё башорати ҳақиқат ва Исода амалга ошган деган хулосага келган яҳудийларнинг бир нечта ҳикояларини келтирамиз!
Алан Шор
Катта ҳаётга қадам қўяр эканман, мен ўзим таниган барча яҳудийларга ўхшаб қолгандим: Исонинг исми менда мураккаб туйғуларни, асосан, ўнғайсизлик ва хижолат туйғуларини уйғотарди.
Мени ҳар қадамда учрайдиган жамоатлар, хочлар, ҳайкаллар, расмлар ва кўча воизларининг кўплиги чалкаштирар эди. Мен буни тушунолмасдим. Бунга менинг қон-қонимга сингиб кетган масиҳийлик ҳақидаги шубҳали қарашларни қўшинг ва шунда Исони билиш мен учун умуман ёқимли эмаслиги сизни ажаблантирмайди.
Бундан ташқари, Унинг ўлимининг менга қандай алоқаси бор? У хочга михланганми? Хўш, нима бўлибди? Бунинг менга нима алоқаси бор? Бу қайғули, аммо жуда қадимий тарих. Йигирма аср муқаддам юз берган бировнинг ўлими бугун мен учун ниманидир англатиши мумкинми?
Мен ўзимга шу каби саволларни берганимда, менга биринчи марта Ишаё пайғамбар китобининг 53-бобини кўрсатишди. Бу оятлар том маънода менинг ичимга «сакраб» кирди. Халқим тарихига хос бўлган рад этиш, қайғу, хўрлик ва изтироб юкини бошдан кечиришга мажбур бўлган бу ночор жабрдийдадан ҳайратда қолдим. Бу тасвир мен билган ҳамма нарсага қўшилиб кетди ва бу ерда Исо ҳақида гап бораётганлигини аниқ кўра олдим.
Ишаё пайғамбар китобининг 53-боби менга иккита муҳим нарсани тушунишга ёрдам берди. Биринчидан, Қайғу Одамининг изтироблари ҳар биримиз учун алоҳида маънога эга эканлиги – ва нафақат мавҳум, балки жуда аниқ маънода, ўзимизни ва шароитимизни тушунишга ёрдам беради. Исонинг азоблари биз учун ҳақиқийга айланса, бизнинг азобларимизни енгишга ёрдам беради. Буни тушунганимдан сўнг, мен Исони яҳудийларнинг ҳаётига бегона шахс сифатида қабул қила олмасдим. Аксинча, У менга ҳамма вақтлар учун яҳудий тажрибасининг тимсоли – бу дунёда азоб чекишга маҳкум, лекин охир-оқибат – Худо томонидан оқланган бўлиб туюлди.
Исроил Коэн
Ота-онамдан узоқдалигимда, ҳарбий денгиз флотида, мен илгари қила олмаган нарсаларни қилиш имкониятига эга бўлдим – ва менинг “ишларим” ҳар доим ҳам “уйдаги назорат”да эмас эди. Бир куни тушдан кейин каютамда ёлғиз ўтирганимда, ёш денгизчи ёнимга келиб, яҳудийманми йўқми деб сўради. Мен унга шундай эканлигини айтганимда, у мендан яҳудий бўлиш нимани англатишини ўргатишимни сўради (унинг ўзи яҳудий эмаслиги аниқ эди). Мен унга гапира бошладим, лекин у гапимни бўлди:
– Буни менга Муқаддас Китобдан ўргата оласанми?
Менда ивритча Муқаддас Китоб бор эди, лекин қаердан бошлашни билмасдим. Шундан кейин у мендан Ишаё пайғамбар китобининг 53-бобини очишимни сўради.
– Овоз чиқариб ўқи, – деди у.
Аввалига қўлимда нотўғри Муқаддас Китоб бор экан деб ўйладим. Балки бу денгизчи менга ҳазил қилгандир? Бу ҳолат менинг масиҳий дўстларим Исо ҳақида айтганларига жуда ўхшаш эди!
Янги дўстим менга Исонинг яҳудий эканлигини тушунтирди. Бундан ташқари, Янги Аҳд ҳам яҳудийлар томонидан ёзилган ва унда ёзилган ҳаммасида яҳудий Масиҳ ҳақида гап боради. Умримда ҳеч қачон бунчалик саросимага тушмагандим!
Бироқ, уч соат давомида суҳбатимиздан ва Муқаддас Китобни, айниқса, Ишаё пайғамбар китобининг 53-бобини ўқиганимиздан сўнг, мендаги чалкашлик йўқола бошлади. Мен яҳудий Исо Масиҳ томонидан кечиримга муҳтож эканлигимни англадим. Лекин шу билан бирга, мен яҳудий эканлигимни хотирамда сақлашда давом этдим, яҳудийлар эса Исога ишонмайдилар!
Ўзимни шунчалар хароб ҳис қилдимки, кейинги уйқусиз тунни бошқалар мени эшитмаслиги учун бошимга адёл ёпган ҳолда йиғлаб ўтказдим. Аммо қаршилик кўрсатиш учун бошқа кучим қолмади; нима қилишим кераклигини билардим. Худога ибодат қилиб, мен Унга Исонинг ҳақиқатан ҳам яҳудий Масиҳ эканлигига ишонишимни айтдим, ҳаётимда Унинг кутганларига мос келмаган ҳамма нарса учун кечирим сўрадим. Бир неча дақиқадан сўнг мен тинчгина ухлаб қолдим - ва бутунлай янги ҳаёт учун уйғондим.
Паула Михелсон
Укам Рон бар-мицвасига тайёрланаётганда мен 14 ёшда эдим. Бу вақтни яхши эслайман. Албатта, иврит тили дарсларида у ҳафтарани ўқиши керак эди – лекин менимча, у қайсидир лаҳзада ундан зерикиб қолган ва у Муқаддас Китобнинг бошқа китобларини кўриб чиқишга қарор қилганди.
У Ишаё пайғамбар китобида илгари ҳеч қачон эшитмаган бобни топиб, бироз ҳайрон бўлди. Рон 53-бобни ўқий бошлади ва биринчи сўзиданоқ унинг бутун вужудини эгаллаб олди. Қайтиб келгач, ота-онам уйда йўқлигини текшириб кўрди, кейин мени хонасига чақирди. Рон менга Муқаддас Китобни берди ва ўтиришимни сўради, ўзи эса бориб эшикни ёпиб келди. Бу жуда ноодатий эди, чунки бизнинг уйимизда темир қоида бор эди: кундузи болалар хонасининг эшиклари очиқ бўлиши керак, фақат кимдир касал бўлиб қолган ҳоллардан ташқари. У Муқаддас Китобни очди ва мен ўқий бошладим.
Худди кечагидек, биринчи сўзларни аниқ эслайман:
“Бизнинг хабаримизга ким ишонди?
Эгамизнинг қудратли кучи кимга аён бўлди?” (Ишаё 53:1).
Бобни тўлиқ ўқиб чиққанимдан сўнг, укам гўё қўрқа-писа жавобни айтишимни сўради: “Сизнингча, Ишаё ким ҳақида гапиряпти?”
Ўша пайтда мен жавобни аллақачон билар эдим. Лекин шунга қарамай, ўша пайтда айтган сўзларим жуда хавфли эди: "Ўйлашимча, Исо ҳақида".
Ажабланарлиси шундаки, у ҳам бунга кўнди. «Энди нима қиламиз?» – деб сўради у.
Ота-онамиз бизни уйдан ҳайдаб юборишларидан қўрқиб, буни ҳозирча сир сақлашга қарор қилдик.
Йиллар ўтиб, укам ва мен Иешуа – Исо – ҳақиқатан ҳам Исроилнинг Масиҳи эканлигига амин бўлдик. Мен ўсмирлик чоғимда ҳозир билганларимни аввалроқ билмаганимдан афсусдаман: Масиҳни тан олиш яҳудийлик билан узилишни англатмайди. Аксинча, бу бизга Худо ният қилгандек бўлишимизга имкон беради – Масиҳда бирлашган содиқ яҳудийлар.
Доктор Дан Голдберг
Кўп йиллар олдин оиламиз Лос-Анжелесда, ягона яҳудийлар биз бўлган маҳаллаларнинг бирида яшаган эди. Биз доимо қўшниларимиз орасида алоҳида ажралиб, ҳамманинг кўз ўнгида эдик. Бир куни мактабдан қайтганимда (бу ўрта мактабда эди), менга ғайриоддий илтимос қилишди. Яҳудий бўлмаган қўшни аёл, мендан унинг олдига келишимни илтимос қилди. Мен нима мақсадда эканлигини билмасдим. Унинг олдига келганимда, у: «Ўтир, мен сенга бир нарса ўқиб бермоқчиман», деди. Бу Ишаё пайғамбар китобининг 53-боби бўлиб, мен Муқаддас Китобдан эшитган биринчи парча эди.
Мендан саккиз ёш катта бўлган акам Луи Масиҳга имон келтирди ва ота-онамга имонли бўлганини айтди. Ота-онамнинг бундан жаҳллари чиқди – ўзи шундоқ ҳам яҳудийлар таъқиб қилинаётган Польшани тарк этиб, Америкага келишган. Аммо Луининг имонли бўлгани менга қаттиқ таъсир қилди. Маҳалламиздаги бир аёл менга “Гедеон” жамияти томонидан нашр этилган Муқаддас Китобни совға қилди. Юҳанно баён этган Хушхабар билан танишганимда, акамдан ўрнак олдим. 1948 йилда 18 ёшимда Исога имон келтирдим.
Менга биринчи марта Ишаё пайғамбар китобининг 53-бобини кўрсатган қўшни аёлнинг исмини ҳатто эслай олмайман. Фақат яҳудий пайғамбари ёзган матнда Исо ҳақида гапираётганини қандайдир тарзда Худо менинг миямга муҳрлаб қўйганини эслайман. Бу тушунча мен билан умрбод қолди. Ўша пайтда мен Исо ҳақида жуда оз нарса, фақатгина У бизнинг гуноҳларимиз учун ўлган деб айтишганини билардим. Бу менга ўша куни ўқиб берилган Муқаддас Китоб матнига жуда мос туюлди. Муқаддас Китоб ҳақида кўпроқ билганим сайин, Ишаё пайғамбар китобининг 53-бобидаги матни мен учун янада мазмунлироқ бўлиб борарди. Менга кўп йиллар олдин совға қилишган Гедеон Муқаддас Китобини эса эҳтиёткорлик билан сақлаб келаман.
Жефф Кран
Фаол руҳий изланиш ҳолатида бўлиб, мен яҳудийлик эътиқодим билан жиддий қизиқиб қолдим ва жуда чуқур саволлар бера бошладим. Ота-онам дунёвий одамлар бўлишса-да, мен бир муддат биз билан бирга яшаган ва тез-тез ўзи билан бирга ибодатхонага олиб борадиган бобомнинг қаттиқ таъсири остида эдим. Менимча, жуда оддий ҳаёт кечирдим, лекин мени Левилар китобининг 17-бобида тасвирланганидек, қон ва қурбонлик орқали қутқарилиш зарурати безовта қилар эди. Тадқиқотларим мени Ишаё пайғамбар китобининг 53-бобини диққат билан кўриб чиқишга ундади ва менда саволлар пайдо бўла бошлади. Бу ерда ким ҳақида гап кетяпти? Бу ерда ёзилганлар Масиҳга тегишлими? Эҳтимол, бу иккиланишимнинг ечимидир?
Мен бу матн ким ҳақида эканлигини аниқлашга кўп вақт сарфладим. Оилавий Муқаддас Китобимизни ва ундаги шарҳларни ўқиганимни эслайман. Шарҳларда Ишаё пайғамбар китобининг 53-бобида Исроил ҳақида гапирилаётгани таъкидланарди, лекин мен бу талқинни матнда кўрганим билан бириктира олмадим. У ерда эса, албатта, бутун бир халқ ҳақида эмас, балки алоҳида шахс ҳақида гап бораётган эди. «Бу ерда Исроилнинг ўзи учун эмас, балки биз учун азоб чекаётган кимдир тасвирланган» деб ўйлаганимни эслайман. Шундай қилиб, мен аста-секин Худо бизга Масиҳ орқали кечирим берганини тушунишга ҳаракат қила бошладим. Хаёлимда қутқарилиш ва Масиҳ тушунчалари бирлашди ва бу, ўз навбатида, мени Янги Аҳдни ўрганишга олиб келди.
Асосий саволим қуйидагича эди: Ишаё пайғамбар китобининг 53-боби Исо ҳақида гапиряптими? Янги Аҳднинг биринчи китоби бўлган Матто баён этган Хушхабарни ўқишни бошлаганимда, Яҳудий Битикларидаги у мурожаат қилган барча башоратларни текширишга қарор қилдим. Мен шундай қилган сайин, Исо Худо бизни кечириш учун олдиндан режа қилган қурбонликнинг башоратли таърифига тўлиқ мос келиши янада аниқ бўла бошлади. Мен бу қанчалик муҳимлигини тушундим, чунки мен Левилар китобининг 17-бобида биринчи марта дуч келган қутқарилиш зарурлигини аллақачон билардим. Ишаё пайғамбар китобининг 53-боби Худо Исони нима учун бу дунёга юборганини тушунишим учун калит бўлди.
Лоренс Хирш
Менинг акам Алан ҳар доим ҳақиқат изловчи бўлган. Дам олиш кунларининг бирида у рюкзагида Муқаддас Китоб ва бошқа диний китоблар билан армиядан қайтиб келганида, камида оиламни жиддий хафа қилганди. Мен ўшанда ўн тўрт ёшда эдим, лекин ота-онам уни кутиб олган шовқин-сурон ва кўз ёшлари ҳали ҳамон эсимда.
Бир куни Алан Муқаддас Китобни очиб, Битиклардан қисқача матн ўқиб берайми-йўқми деб мендан сўради. Мен рози бўлдим. У менга айнан қайси парчани ўқиб беришини айтмади ва Ишаё пайғамбар китобининг 53-бобини ўқий бошлади. У гапини тугатгандан сўнг, мен сўрадим: «Лекин буларнинг ҳаммаси Исо ҳақида эди, шундай эмасми? Сиз менга Янги Аҳдни ўқиб берган бўлсангиз керак?»
Акам менга яҳудий пайғамбари Ишаёнинг китобидан бир бобни ўқиб берганини айтганида, ҳайрон бўлиб қолдим. Шунингдек, у менга Ишаё бу сўзларни Исо туғилишидан 700 йил олдин ёзиб кетганини айтиб берди – лекин бу парчада айнан У ҳақида гапирилаётгани менга жуда аниқ туюлди!
Бир муддат бу менга қандай таъсир қилганини кўрсатмадим. Айниқса, учинчи оятдаги сўзлар мени ҳайратда қолдирди:
«Одамлар Ундан нафратландилар, Уни рад этдилар.
У қайғу, азоб-уқубат нималигини биларди.
Ҳамма Ундан юз ўгирди, Ундан ҳазар қилди.
Биз Уни одам қаторида санамадик».
Наҳотки бизлар, яҳудий халқи, Масиҳимизни рад қилдик? Бу қандай содир бўлиши мумкин?
Бу оятлар ва уларнинг ҳаётим учун аҳамиятини тушуниш учун бир неча ой керак бўлди. Мен Исога имон келтириш яҳудий сифатида олган тарбиямга қарши чиқишни англатишини ва оилам ҳамда халқимнинг ғазаби ва рад этилишига дуч келишимни билардим. Бироқ, Ишаё пайғамбар китобининг 53-бобида ўқиганларимнинг ҳақиқатини энди инкор эта олмасдим ва мен ҳам Исони ўзимнинг Масиҳим сифатида қабул қилдим!
Книга на Узбекском языке: - Исаия 53 комментарии (Митч Глейзер)
Возможно, настало время обратиться к источникам и переосмыслить заново систему взаимоотношении с Творцом? Книга Исайя 53 комментарии поможет вам в странствовании по вопросам и ответам и раскроет по-новому главу из Танаха, которая может изменить всю вашу жизнь!
«Исайя 53. Комментарии» представляет сюжет Танаха понятным и простым языком, на практике поясняя как установить контакт с Богом. Эта книга предоставляет удивительный ключ, открывающий перед нами безграничные возможности личных взаимосвязей с Творцом.