Сторми Омартиан. Ибодатгўй Аелнинг Кучи (30-боб) Ўзбек тилида 
МУНДАРИЖА
Ибодатнинг кучи
1-боб. Раббий, мени Ўзингга жалб эт, йўлларингдан юришни ўргат
2-боб. Раббий, мени покла, менда имонли юракни ярат
3-боб. Раббий, менга кечиришни ўргат
4-боб. Раббий, доимо Сенга итоатли бўлишимни ўргат
5-боб. Раббий, шайтон билан курашувимда иродамни мустаҳкамла
6-боб. Раббий, фикрларимни назорат қилишни ўргат
7-боб. Раббий, ҳаётимнинг барча жабҳаларида менга йўл кўрсат
8-боб. Раббий, Сенинг Каломингни чуқурроқ англашда менга ёрдам бер
9-боб. Раббий, ҳаётимда тартиб ўрнатишимга ёрдам бер
10-боб. Раббий, Сенинг ҳақиқий сажда қилувчинг бўлишимга ёрдам бер
11-боб. Раббий, меҳнатимни марҳаматла
12-боб. Раббий, Сенинг Руҳинг ҳосилини келтиришимга ёрдам бер
13-боб. Раббий, мени покликда ва ҳалолликда сақла
14-боб. Раббий, Ўзинг мени даъват қилган ишларга муносиб айла
15-боб. Раббий, одамлар билан тўғри мулоқот қилишимга ёрдам бер
16-боб. Раббий, доим Сени эшитишимга, Сенинг истагингни бажари шимга ёрдам бер
17-боб. Раббий, мени ва мен учун ардоқли бўлган нарсаларни сақла
18-боб. Раббий, тўғри йўл танлашда менга донолик ато эт
19-боб. Раббий, турли ёвузликлардан мени халос қил
20-боб. Раббий, мени салбий қарашлардан халос қил
21-боб. Раббий, ғам-ташвиш лаҳзаларида мени юпат
22-боб. Раббий, гуноҳга қарши туришим учун ёрдам бер
23-боб. Раббий, менга шифо бер, баданимни озода сақлашни ўргат
24-боб. Раббий, мени сохта қўрқувдан қутқар
25-боб. Раббий, Сенга қилган хизматим орқали одамларнинг меҳрини уйғотишимга ёрдам бер
26-боб. Раббий, менинг оғзимдан фақат ҳаётбахш сўзлар чиқсин
27-боб. Раббий, ишончим тоғларни суриб юборадиган аёл бўлишимга ёрдам бер
28-боб. Раббий, Масиҳга ўхшашим учун менга ёрдам бер
29-боб. Раббий, ўтмишимдан мени озод қил
30-боб. Раббий, ўзим учун тайёрлаган келажакка мени бошла
30-боб Раббий, ўзим учун тайёрлаган келажакка мени бошла
Ҳурматли масиҳий синглим, бу бобни сизга атаб нома сифатида йўллаяпман. Агар сиз ўз келажагингиз тўғрисида қайғураётган бўлсангиз, мен сизни қўллаб-қувватлайман. Бу номани умид билан ўқинг, сиз билан гаплашаётган Худонинг овозини эшитинг. Ҳаммамиз учун мўлжалланган бу нома аслида Уникидир.
Ҳурматли (илтимос, бу ерга ўз исмингизни ёзиб қўйинг), бу хатни сизга ёзишимдан мақсад шуки, Худо сиз учун улкан келажак тайёрлаб қўйганини эслатиб қўймоқчиман. Бунга менинг ишинчим комил, чунки У шундай деган. Худо сиз кўрмаган ва эшитмаган, ақлингиз бовар қилмайдиган нарсаларни Уни севганларга муҳайё қилган (қаранг: 1 Кор. 2:9). Сизнинг келажагингиз нақадар ажойиблигини ўзингиз тасаввур ҳам қилолмайсиз. Худо айтадики, агар сиз буни тушуна олганингизда эди, «бизга зоҳир бўлажак улуғворлик олдида шу он азоб-уқубатларини айтиб ўтиш ҳам арзимаслигини» ўзингизда ҳис этардингиз (Рим. 8:18). Бу ўз ҳаётингиз тўғрисидаги ҳозирги тасаввурингиз ниҳоятда чекланганлигидан дарак беради.
Худо сизга умид ва марҳаматга тўла келажакни ваъда қилгани билан, келажак ўз-ўзидан келмайди. Бунинг учун ҳам бирор нималар қилиш керак. Биринчидан, келажак ҳақида ибодат қилиш керак (қаранг: Ерм. 29:11-12), иккинчидан, Худованднинг хоҳиш-иродасини бажариш лозим. Ташвишланишнинг ҳеч кераги йўқ; агар сиз Унга мурожаат қилсангиз, биринчи топшириқни ҳам, иккинчисини ҳам бажаришингизга Худо ёрдам беради. Муқаддас Руҳ — самовий меросимизнинг гаровидир. Ўз олдингизга қўйилган вазифани бажаришингизда, самовий меросдан баҳраманд бўлишингизда Раббий ёрдам беради (қаранг: Ефес. 1:13-14). Ҳар гал сиз ибодат қилаётганингизда, Унга итоат этганингизда, ўз келажагингизга ҳисса қўшган бўласиз.
Бизнинг ҳаётимиз ўзгарувчанлигига, беқарорлигига ва истиқболнинг ноаниқлигига қарамасдан, Худо ўзгармай қолаверади. Агар сиз хавфсизликнинг ёлғон ҳиссини йўқотган бўлсангиз, бу яхши. Аммо фақат Худо сизнинг ҳақиқий бехавотирлигингизни таъминлаётганини сиз тушунишингизни У истайди. Ўз келажагингиз тафсилотларини ўзингиз аниқ билмайсиз, менинг гапларимга ишонинг, уларни Худо билади. У албатта сизни керак бўлган жойга олиб боради. Аслида ваъда қилинган меросга эга бўлишнинг ягона йўли бу — бугун Раббий билан ёнма-ён юришдан иборатдир.
Қадрли Масиҳий синглим, эсингизда тутинг: Худо олдида юришингиз йўлингизда учрайдиган тўсиқлардан сизни халос қилмайди. Тўсиқлар — бу иблиснинг найранги. Худованднинг режаси ажойиб бўлса, иблиснинг режаси жирканч. Агар сиз Раббий йўлидан юрсангиз, имонли бўлиб Унинг насиҳатларига қулоқ тутсангиз, Унга итоат қилсангиз, Унинг Каломида бўлиб доимо ибодат қилсангиз, шайтоннинг режаси барбод бўлади. Шунинг учун оғир дақиқаларда чекинманг, адолат билан иш кўринг, васвасага қарши чиқинг. Доно йўл тутиш учун Худодан куч ва сабр сўранг.
Газеталарда ўқиганларингиз ёки дўстларингиздан эшитганларингиз бўйича ўз келажагингиз тўғрисида фикр юритманг. Сизнинг ҳаётингиз Худонинг қўлларида. Шунинг учун сизнинг келажагингиз тўғрисида фақат Унинг айтганларига қулоқ солинг. Келажак тўғрисида ташвишланишингизни Худо хоҳламайди. Сизнинг фикру ҳаёлингиз Худо билан бўлишини У истайди, чунки У — сизнинг келажагингиз.
Ёдингда тутинг: сиз Худонинг қизисиз, У сени севади. Унинг йўлидан юриб, сиз ҳар куни У сингари бўласиз (қаранг: 1 Юҳ. 3:1-3). Унга қараб «улуғворликдан улуғворликка ўтганинг сари, Раббийнинг сурати томон ўзгарасан, бу эса Муқаддас Руҳ орқали содир бўлади» (2 Кор. 3:18). Агар сиз Унинг васиятларини бажарсангиз, У сизни такомиллаштириб боради. Гарчи «зоҳирий вужудинг кундан-кунга янгиланяпти» (2 Кор. 4:16).
Агар сизнинг ҳаётингиздаги ўзгаришлар сиз хоҳлаганингиздай тезлик билан амалга ошмаса, умидсизликка тушманг. Худо сизни сабр-тоқатга ўргатмоқчи. Бу дунё ўткинчи, Раббий эса абадий. Шунинг учун ноумид бўлманг, агар ўз ибодатларингизга кутилган жавобни ололмасангиз. Сиз албатта жавоб оласиз. Агар сиз Худовандга интилсангиз, Унинг насиҳатларига қулоқ тутсангиз, Унга руҳ ва ҳақиқат билан итоат этсангиз, агар сиз Худонинг Каломини ишонч билан айтиб, Унга ибодат қилсангиз, унда Эгамнинг марҳамати мўл-кўл бўлиб сизга ёғилади.
Баъзида ўзимиз кутгандай жавоб ололмаймиз. Менинг ишончим комилки, бу, Худо кутаётгандай, Унга сидқидилдан ибодат қилмаганимиздан. Худо бизнинг ҳаётимизда улкан ўзгаришларни режалаштирган, у фақат бизнинг ибодатларимизга жавобан рўёбга чиқади. Эсингизда борми, Ханнанинг Худога минг бор илтижо қилиб фарзанд сўрагани? (қаранг: 1 Шоҳ. 1:1-28). Худо унинг илтижоларига жавоб қилди: Ханна ўғил кўрди. У жуда ажойиб бола эди. Шомуил катта пайғамбарлардан бири, Исроил тарихида машҳур хакам бўлиб донг таратди. Агар Ханна сидқидилдан ва тинмай ибодат қилмаганда эди, бу мўъжиза рўй бермаган бўларди. Агар сиз доим ибодатда бўлмасангиз, сизнинг ҳаётингизда ҳам ҳеч нарса рўй бермайди.
Агар сиз кундалик ташвишлар билан банд бўлиб қолсангиз, агар сизнинг ҳаётингиз ҳеч ўзгармаслигини гумон қилсангиз, илтимос, бундай эмаслигини ёдингизда тутинг. Айнан ҳафсалангиз пир бўлганда, Худо сиз учун келажакда ҳозирлаб қўйган инъомларга етишолмайман, деб ноумид бўлганингизда — айнан шу паллада келажакка Худо сизни тайёрлаётган бўлади. Вақти-соати келганда эса У тез ҳаракат қилади. Ўз олдингизга мақсад қўйганингизда, жуда олдинга қараб илгарилаб кетманг. Яхшиси, Раббийга қаранг. Ёдингизда тутинг: «Худовандга мурожаат қиладиган, чин қалбдан мурожаат қиладиган ҳар бир инсонга У яқиндир. Художўйларнинг тилагини У қондирар, уларнинг фарёдини эшитиб, нажот берар» (Забур 144:18-19).
Вақти келиб сиз Раббий билан Арши аълода бирга бўласиз. Ана ўшанда сизнинг кўзларингиздаги ҳар бир ёшни У артиб олур, «…энди ўлим сира бўлмас, ҳузун ҳам, фарёд ҳам, оғриқ ҳам бўлмас; зеро аввалгилар ўтиб кетди» (Ваҳий 21:4). Сизнинг мақсадингиз ўз ҳаёт йўлингизни охирига етиб бориб шундай дейишингиздадир: «Улуғ жангда астойдил курашдим, умр довонини ошиб бўлдим, имонни сақладим. Бундан кейин солиҳлик тожи мен учун тайёр турибди. Одил ҳукм қилувчи Раббим Исо кўкдан тушиб зоҳир бўладиган кунда у тожни менга беради ва фақат менга эмас, балки у кунни муштоқлик билан кутаётганларнинг ҳаммасига ҳам беради» (2 Тим. 4:7-8). Исо шогирдларига деди: «Юрагингиз ғаш бўлмасин; Худога ишонинг, Менга ҳам ишонингиз! Отамнинг уйида маскан кўп. Шундай бўлмаса эди, Мен сизларга жой тайёрлагани кетяпман, деб айтармидим? Мана, Мен бориб сизларга жой тайёрлайману, яна келиб, Мен бўлган жойда бўлишингиз учун сизларни олиб кетаман» (Юҳ. 14:1-3). Агар сиз Раббийни севсангиз, У сизга Самовий Шоҳликда абадий ҳаётни ҳадя этишни ваъда беради.
Сиз Раббий учун зарур бирор нима қилишни хоҳлайсиз. Унинг Шоҳлиги шуҳрати учун хизмат қилишингизга ишончим комил. Худо ўз ҳаётларини Унга бағишлайдиган, Унинг йўлларидан юрадиган, У қўйган мақсадга интилиб эришадиган аёлларни изламоқда. У ўз жонларини Унинг Шоҳлиги учун аямайдиган аёлларни ахтармоқда, токи улар шундай дейишсин: «Бизнинг хоҳиш-истагимиз эмас, Сенинг ироданг амалга ошсин». Сиз ана шундай аёллардан бирисиз. Сиз мукаммал равишда шайланиб, У: «Вақти келди», — деганда ва эшикларини сизга очганда, ишга киришишга тайёр туришингиз учун ибодат қиламан. Фақат ҳақиқат билан иш кўринг, вақти-соати келиб айнан сиз кутмаганингизда, Худонинг даъватини эшитасиз. У сизнинг олдингизга қандай мақсад қўйганини тушунасиз.
Ибодат
Эй, Раббий, мен ўз келажагимни сенинг қўлларингга топшираман, у тўғрида энди бошқа қайғурмайман. Ўз режаларимга асосланиб келажакда бирор нималарга эришишга ҳаракат қилишни хоҳламайман. Лекин мен Сенинг ўйлаган ниятингда роль ўйнашни истайман, чунки Сен менга ғамхўрлик қилишингни мен биламан. Чидашга ва таслим бўлмасликка менга куч ато этишингни Сендан ўтиниб сўрайман. Сен: «…охиригача чидаган қутулади», — деб айтгансан (Матто 10:22). Мен ҳаёт йўлимни шундай босиб ўтишимга ёрдам бер, токи чарчамай манзилга етиб борганимда Сен мен учун ҳозирлаб қўйган мукофотни олайин (қаранг: 1 Кор. 9:24). Доимо ақл билан иш тутишни, ибодат қилиш учун хушёр туришни менга ўргат, чунки менинг йўлим қачон тугашидан мен бехабарман (қаранг: 1 Бут. 4:7).
Сен менга тинчлик, келажак ва умид бермоқчи эканлигингни биламан (қаранг: Ерм. 29:11). Сен мени қутқарганингни ва муқаддас бир даъват билан менинг савоб ишларим туфайли эмас, «Ўз хоҳишим билан менга иноят қилишга қарор қилганингни» мен биламан (қаранг: 2 Тим. 1:9). Эй Муқаддас Руҳ, Сен доим мен билан бирга бўлганинг учун, адаштирмай, йўлларда мени бошқариб боришинг учун Сенга шукроналар айтаман.
Эй Раббий, Сенга самарали хизмат қилишимга ёрдам бер, токи кўплаб одамлар Сенга мурожаат этишсин, Сени талаб қилишсин. Эй Раббий, ўз вақтида мени юксалтиргин, деб Сенинг қудратли қўлинг остида ўзимни камтар тутаман. Бутун ғамларимни Сенга ташлайман, чунки Сенинг Ўзинг менга ғамхўрлик қиласан, менинг йиқилишимга йўл қўймайсан (қаранг: 1 Бут. 5:6-7). Сен мен учун тайёрлаб қўйган келажак сари Сен билан бирга бориш учун айнан бугун Сенинг қўлингни қаттиқ тутаман.
МУҚАДДАС КИТОБДАН
сизнинг ибодатларингизни таъсирчан қиладиган оятлар
Чунки сизлар учун тузган режаларимни аниқ биламан. Ушбу режаларим сизларга ёмонлик эмас, яхшилик олиб келади, ёруғ келажагу умид беради. Ўша дамлар Менга қилган илтижою ибодатларингиз ижобат бўлади. Мени бутун қалбингиз билан изласангиз топасизлар.
Ерм. 29:11-13
Эгамизнинг уйига ўтқазилган улар, Худойимизнинг ҳовлисида улар яшнайдилар. Кексаликда ҳам ҳамон ҳосил берарлар, Ям-яшил, навқирон бўлиб турарлар.
Забур 91:14-15
Мен аминманки, на ўлим ва на ҳаёт, на фаришталар ва на жин-ажиналар, на ҳозирги ва на келгуси ҳодисалар, на баландликлар ва на чуқурликлар ҳамда на яратилган бошқа бирон мавжудот Раббимиз Исо Масиҳ шахсидаги Худо севгисидан бизни жудо қилишга қодир эмас.
Рим. 8:38-39
Солиҳнинг йўли тонгга ўхшайди, тонг кун чиққунча ёришаверади.
Ҳикмат. 4:18
Қалқинг, нур сочинг, нурингиз келди, Эгамнинг шуҳрати устингизга келди. Ана ер юзини зулмат қоплади, Халқларнинг устини қуюқ зулмат босди: Аммо Эгам устингизга келади, Унинг шуҳрати устингизда кўринади.
Ишаё 60:1-2
Книга на узбекском языке: Сила молящейся женщины (Сторми Омартиан)
