Сторми Омартиан. Ибодатгўй Аелнинг Кучи (12-боб) Ўзбек тилида 

МУНДАРИЖА

Ибодатнинг кучи
1-боб. Раббий, мени Ўзингга жалб эт, йўлларингдан юришни ўргат
2-боб. Раббий, мени покла, менда имонли юракни ярат 
3-боб. Раббий, менга кечиришни ўргат
4-боб. Раббий, доимо Сенга итоатли бўлишимни ўргат
5-боб. Раббий, шайтон билан курашувимда иродамни мустаҳкамла
6-боб. Раббий, фикрларимни назорат қилишни ўргат
7-боб. Раббий, ҳаётимнинг барча жабҳаларида менга йўл кўрсат
8-боб. Раббий, Сенинг Каломингни чуқурроқ англашда менга ёрдам бер
9-боб. Раббий, ҳаётимда тартиб ўрнатишимга ёрдам бер 
10-боб. Раббий, Сенинг ҳақиқий сажда қилувчинг бўлишимга ёрдам бер
11-боб. Раббий, меҳнатимни марҳаматла
12-боб. Раббий, Сенинг Руҳинг ҳосилини келтиришимга ёрдам бер
13-боб. Раббий, мени покликда ва ҳалолликда сақла
14-боб. Раббий, Ўзинг мени даъват қилган ишларга муносиб айла
15-боб. Раббий, одамлар билан тўғри мулоқот қилишимга ёрдам бер
16-боб. Раббий, доим Сени эшитишимга, Сенинг истагингни бажари шимга ёрдам бер
17-боб. Раббий, мени ва мен учун ардоқли бўлган нарсаларни сақла
18-боб. Раббий, тўғри йўл танлашда менга донолик ато эт
19-боб. Раббий, турли ёвузликлардан мени халос қил
20-боб. Раббий, мени салбий қарашлардан халос қил
21-боб. Раббий, ғам-ташвиш лаҳзаларида мени юпат
22-боб. Раббий, гуноҳга қарши туришим учун ёрдам бер
23-боб. Раббий, менга шифо бер, баданимни озода сақлашни ўргат
24-боб. Раббий, мени сохта қўрқувдан қутқар
25-боб. Раббий, Сенга қилган хизматим орқали одамларнинг меҳрини уйғотишимга ёрдам бер
26-боб. Раббий, менинг оғзимдан фақат ҳаётбахш сўзлар чиқсин
27-боб. Раббий, ишончим тоғларни суриб юборадиган аёл бўлишимга ёрдам бер
28-боб. Раббий, Масиҳга ўхшашим учун менга ёрдам бер
29-боб. Раббий, ўтмишимдан мени озод қил
30-боб. Раббий, ўзим учун тайёрлаган келажакка мени бошла

12-боб Раббий, Сенинг Руҳинг ҳосилини келтиришимга ёрдам бер

Менинг отам умрининг кўп вақтини фермерлик билан ўтказган. У экиш-тикишни яхши билар, шунинг учун катта хосил йиғиб оларди. Ҳаётимнинг ўша даврида энг муҳим ўрганган ҳунарим — бу мева ва сабзавотларни ўстириш эди. Ўша пайтда кетмон ва белкуракдан бошқа махсус иш қуроллари йўқ эди. Уйимизда ҳатто водопровод суви ҳам йўқ эди, ўсимликларни автоматик равишда суғориш қурилмалари тўғрисида гап ҳам бўлиши мумкин эмас эди. Ер ости сувлари юзага кўтарилиб, қазиб қўйилган кичкина ариқчалар бўйлаб икки томондан жўякларга сув ўтишини биз кутардик. Шу усул билан кўчатларнинг илдизлари сувга тўярди, кўчатларнинг ўзини эса сув ювиб кетмасди.

Уруғни экиб суғорганимиздан кейин, ўғитлаб тупроқни юмшатар эдик, шундагина кўчатлар бемалол ўсиши мумкин эди. Биз кўчатларимизни дўл, довул ва аёздан асрардик. Ҳосил поядан, поя эса томирдан узилиб кетмаслигини кузатиб турардик. Қаттиқ уриниб ҳаракат қилсак жуда яхши ҳосил йиғардик. Бундан отам доим мағрурланарди.

Биз билиб ёки билмай ҳар куни ҳаётимизга бир нималарнинг уруғини сочамиз. Вақт ўтгач, олдин экканларимизнинг ҳосилини йиғиб оламиз. Ҳозирги ҳаётимизнинг сифати олдин қандай уруғ сочиб, қандай парвариш қилганимиз билан ўлчанади. Уруғ сочганимиздан кейин узоқ йиллар давомида яхши ҳосилми, ёмонми, йиғиб келаверамиз. Шунинг учун сепилаётган уруғ сифатли бўлиб уларни ҳозирданоқ яхшилаб парваришлаш лозим. Исо шундай деган: «Мен — ток, сизлар — новдасизлар» (қаранг: 15:5). Агар биз У билан алоқада бўлсак, кўп ҳосил оламиз. «Алоқада бўлсак» дегани бу — «доимо бирга бўлсак» деган маънони англатади. Бошқача килиб айтганда, агарда биз доимо Унда, У эса бизда яшаса, бизлар Илоҳий Руҳнинг ҳосилини йиға бошлаймиз (қаранг: Гал. 5:22-23). Бизлар бунга жуда муҳтожмиз.

Айтишларича, биз кўпинча кимлар билан бирга яшаб келсак, мулоқотда бўлсак, ўша одамларга ўхшаб кетар эканмиз. Агар ўз ҳаётимизни Исога бағишласак, Унинг шаклига кириб қоламиз. Агар биз У билан бирлашсак, Унинг Руҳи ҳосилини йиға бошлаймиз.

Мўл-кўл ҳосил етиштиришнинг асосий тўққиз усули

1. Муҳаббат уруғини сочмоқ. Сенинг қалбингга серҳосил муҳаббат уруғини сочишни Худодан сўра, токи сен бу уруғларнинг тўлақонли униб-ўсаётганини англаб етгин. Раббийдан яна Унинг муҳаббати сен орқали бошқаларга ўтишини ҳам сўра. Исо шундай деган: «Мен Отамнинг амрларига амал қилиб, Унинг муҳаббатига содиқ қолганман. Худди шу сингари сизлар ҳам, Агар Менинг амрларимга амал қилсангизлар, муҳаббатимга содиқ қоласизлар» (Юҳ. 15:10). Худога шунчалар итоатли бўлишни ўргатишини Ундан сўра, токи Унинг муҳаббати сенинг қалбингда доимо уфуриб турсин.

2. Шодлик уруғини сочмоқ. Раббийдан келаётган шодлик сизнинг ҳаётингиздаги ҳолатга ҳеч қандай алоқаси йўқ. Сизнинг ҳаётингизда учраб дилингизни оғритиб турадиган муаммоларга қарамай, сен шодланишингиз мумкин. Чунки шодлик сизнинг Раббий билан қилган мулоқотингиздан пайдо бўлади. Кимки ўзини Худодан олиб қочса ёки Унинг ваъдаларига ишонмаса, бундай одамга шодлик берилмайди. «Менинг шодлигим сизларга ўтсин ва кўнглингиз қувончларга тўлсин деб, Мен бу сўзларни сизларга айтдим» (Юҳ. 15:11). Ҳаётингизда Раббийнинг шодлиги иштирок этар экан, демак, сизнинг тақдирингизда Раббий мўъжиза содир этади, деган умид бор. Парвардигорнинг шодлик уруғи сизнинг қалбингизга сочилишига, сиз ушбу шодликни атрофдагиларга инъом эта олишингиз учун ибодат қилинг.

3. Тинчлик уруғини сочмоқ. Сизнинг ҳаётингизда Парвардигор бўлиши учун, қалбингизга тинчлик ва осойишталик солиши учун, ҳеч нарсага қарамай сизнинг юрагингизда тинчлик ҳукм суриши учун Худодан сўраб ибодат қилинг. «Инсон ҳаёлига сиғмайдиган, Худо берган тинчлик сизнинг кўнглингиз ва фикр-хаёлингизни хотиржам қилади» (Флп. 4:7). Парвардигорнинг тинчлиги бизда бўлиши учун бир шарт бор: агар Худо билан бизнинг ўртамиздаги муносабат чамбарчас боғлиқ бўлса, Худодан ёрдам ва нажот сўра, зеро сиз Уни яқиндан билинг, атрофдаги одамларга тинчлик ва осойишталик булоғи бўлсин.

4. Сабр-уруғини сочмоқ. Сиз нима деб ўйлайсиз, нима учун бизлар сабр мевасини йиғишимизни Худо хоҳлайди? Менимча, балки Худонинг ҳамма нарса учун вақти-соати бўлса керак. У доимо биз кўриб тургандан ортиқроқ беради. Шунинг учун Худо у ёки бу иш бажарилишига маълум бир вақт белгилаганда, биз Унга тўлақонли ишонамиз. Бизга нисбатан Ўз ғояларини амалга оширишдан олдин, Худо бизни такомиллаштиради, поклайди. Бу эса маълум бир вақтни талаб қилади. «…Эринманглар, имон ва сабр-тоқат билан илоҳий ваъдаларга эришганлардан ўрнак олинглар» (Ибр. 6:12). «Сабр-тоқат тўла самарасини кўрсатсин, токи сизлар ҳеч бир нарсадан камчиликсиз, комил ва нуқсонсиз одамлар бўлинглар» (Ёқуб. 1:4). «Сабр-бардош билан жонингизни сақлаб қолинг» (Лука 21:19). Фақат синовларда сабр-бардошли бўлиш мумкин. «Сен кўпни бошингдан кечирдинг ва сабрлисан…» (Ваҳий 2:3). Мана шу оят ҳаммасини айтиб турибди. Ҳар қандай синовларда сабр-тоқатингиз мустаҳкамланиши ва ҳар қандай синовлар бу сабр-бардошни сизнинг қалбингиздан таг-томири билан суғуриб ташламаслиги учун ибодат қилинг.

5. Эзгулик уруғини сочмоқ. Ўз боғингизга қандай уруғ сочишингиз учун сизда танлаш имконияти бор. Сиз керак бўлган уруғларни олиб ерга сочасиз, Худо бўлса уларни ўстиради. Биринчи навбатда сиз эзгулик уруғини экишингиз керак. Бошқача қилиб айтганда, сиз эзгуликни танлайсиз, зеб-зийнатни яхши кўрганлар каби эзгуликни тақиб оласиз (қаранг: Кол. 3:12). Эзгуликнинг энг яққол намунаси — бу Масиҳнинг хочга тортилиши. У биз учун Ўз ҳаётини берди. Унинг эзгулик уруғи сизнинг юрагингизда кўкариши учун, ҳақиқий эзгулик тимсоли бўлган ўз манфаатингиздан кечишга сизни тайёрлаши учун сўраб Худога ибодат қилинг.

6. Яхшилик уруғини сочмоқ. Исонинг яхшилик хислати сизнинг қалбингизда ҳукм сурганда, сизда эзгу ишлар бажариш иштиёқи туғилади. «Яхши одам юрагининг яхшилик хазинасидан яхшилик чиқарур. Ёмон одам юрагининг ёмонлик хазинасидан ёмонлик чиқарур» (Матто 12:35). «Ҳар бир яхши дарахт яхши мева берар, ёмон дарахт эса ёмон мева берар. Яхши дарахт ёмон мева беролмас, ёмон дарахт ҳам яхши мева беролмас» (Матто 7:17-18). Худода бўлишингиз учун, Унинг яхшилик хислати сизда ўсиши учун ёрдам беришини Ундан ибодат қилиб сўранг. Яхшилик хислати сизнинг юрагингизда томир отишига қараб, сиз атрофдагиларга янада кўпроқ яхшилик қиласиз.

7. Садоқат уруғини сочмоқ. Агар биз ишонч ва эътиқодимизда мустаҳкам, оғишмай турсак, агар биз Унга тобеълигимизни ўзимиз билсак, агар биз ишончга лойиқ ва садоқатли бўлсак, садоқатимизни Раббийга намоён қиламиз. «Кичик ишда садоқатли бўлган буюк ишда ҳам садоқатлидир. Кичик ишда садоқатсиз бўлган буюк ишда ҳам садоқатсиздир» (Лука 16:10). Доимо Худога садоқатли бўлиш учун ибодат қилинг. Ибодатда Раббийга садоқатингизни сақлаган ҳолда, сиз мулоқот қилаётган атрофингиздаги одамларга ибрат ва намуна бўлишни сўранг.

8. Хайрихоҳлик уруғини сочмоқ. Агар биз ўзимизга бино қўйиб қўполлик қилсак, бу одамларнинг дилини оғритади ва улар биздан узоқлашади. Хайрихоҳ бўлиш — бу атрофдагилар билан тинч-тотув ва ёқимли бўлиш, хушмуомала бўлиш деганидир. Муқаддас Китобда шундай дейилган: «Худонинг қули жанжалкаш бўлмаслиги керак. Аксинча, у ҳамма билан мулойим, ўргатишга тайёр, сабр-тоқатли бўлсин» (2 Тим. 2:24). «Лекин юқоридан тушган донолик эса, биринчидан, покдир. Иккинчидан эса муросали, мулойим, бўйсунувчан, тўла меҳр-шафқатли, яхши самаралар билан тўлиб-тошган, беғараз ва риёсиздир» (Ёқуб. 3:17). Бошқа одамларнинг ҳис-туйғуларига ва эҳтиёжларига эътибор беришингиз, улар билан хушмуомалада бўлишингиз Муқаддас Руҳга итоат этишингиздан далолат беради. Қачонлардир сизнинг қалбингизга сочилган эзгулик уруғлари мана энди ўсиб чиқди. Сизнинг табиатингизда Исонинг мулойимлиги ва муруввати акс этиб туришини ибодатингизда сўранг (қаранг: 2 Кор. 10:1).

9. Дадиллик уруғини сочмоқ. Дадиллик бизга нозик навниҳолни эмас, балки бақувват олма дарахтининг танасини эслатади. Фақат Худо сизнинг қалбингизга муносиб ҳосил берадиган шундай бақувват, кучли мева дарахтини ўтқазиши мумкин. Ўзини тутишни билмайдиган одамгина охирини ўйламай хоҳлаган ишини қилади. Сизни васвасага солаётган турлича иллатларга қарши туриш учун Худодан куч, ирода сўранг. «Имонингизни бут қилишга жон куйдиринглар. Имонингиз устига фазл-камолотга эга бўлинглар. Фазл-камолотингиз устига онг-билимга эга бўлинглар. Онг-билимингиз устига нафсни тийишни ўрганинглар. Нафсни тийиш устига сабр-тоқатли бўлинглар. Сабр-тоқатингиз устига диёнатга эга бўлинглар» (2 Бут. 1:5-6). Қалбингизга эсанкирамаслик, дадиллик уруғини сочиши учун Худодан сўранг, токи мустаҳкам ва бақувват, серҳосил мевали, эзгу ниятли дарахт ўсиб чиқсин. Ўз Руҳига бўйсундириб сизнинг истак ва ҳис-туйғуларингизни бошқаришни Худованддан сўранг. Раббий албатта ўзингизни тута билишингизни сизга ўргатади.

Агар сиз Муқаддас Руҳ истаган самарани келтиришини ҳеч эплолмасангиз, унда сизнинг қалбингизга эзгулик уруғларини сочишини, унда ўсиб чиқаётган турли бегона ўтларни юлиб ташлашини ибодат қилиб Худодан сўранг. Серунум тупроқ ҳисобланган юрагингизни Парвардигорнинг Каломи билан озиқлантиринг, юрагингизни ҳар куни Раббийнинг суви билан тўйдириб суғоришини Муқаддас Руҳдан сўранг. Агар сиз Раббийга содиқ ва ҳақиқий Токда ўсаётган бўлсангиз, унда албатта сизнинг қалбингиздаги руҳий мева пишиб етилади. Бундай ҳосилдан Самовий Отамиз мамнун бўлади.

Ибодат

Эй, Раббий, менинг юрагимга боқ, бирор ёмон, ёвуз уруғлар мавжудлигини кўрсанг, менга айт. Қалбимдаги барча ёмон иллатларни таг-томири билан суғуриб ташла. Менинг қалбимга уруғингни соч, шундай қилгинки, бу уруғ униб-ўсиб кўп ҳосил берсин (қаранг: Марк 4:8). Эй Раббим Исо, Сенда яшашим учун, эзгулик ҳосилини келтиришим учун менга ёрдам бер. Эй Муқаддас Руҳ, мени хушбўй севгинг билан тўлдир, токи мен орқали бу муҳаббат бошқа одамларга ҳам ёғилсин.

Раббим, Сен Ўз Каломингда шундай деб айтгансан: «Масиҳ ато қилган тинчлик дилингизда ҳоким бўлсин. Сизлар бир баданнинг аъзолари каби тинч-тотув бўлишга даъват этилгансизлар» (Кол. 3:15). Раббий, Сенинг осойишталигингга менинг юрагим ва ўй-фикрларим итоат этишини, менинг атрофимдаги одамлар уни ҳис этишларини Сендан ўтиниб сўрайман. «Ўзаро тинч-тотув яшашга, бир-биримизни руҳан чиниқтириш учун жон куйдиришга» менга ёрдам бер (Рим. 14:19).

Фақат Сени билган тақдирдагина ҳис этиш мумкин бўлган шодликни менга ато қилгин. Одамлар билан мулоқот қилганимда сабр-тоқатли бўлишни менга ўргат, чунки мен уларга Сенинг феъл-атворингни намоён қилмоқчиман. Имконият туғилганда одамларга яхшилик қилишга менга ёрдам бер. Майли, Сенинг саховатинг мен орқали бошқаларга шодлик келтирсин. Мени садоқатли бўлишга ўргат, токи мен ҳамма нарсада доимо садоқатга лойиқ эканлигимни англаб турай. «Масиҳнинг мулойимлигини ва мурувватини» ҳис этишимга ёрдам бер, токи Сенинг мулойимлигинг менда намоён бўлсин (қаранг: 2 Кор. 10:1). Ўз ўй-фикрларимни ва сўзларимни назорат қилишни менга ўргат.

Агарда яхши ҳосил олиш учун ортиқча новдаларни кесишга тўғри келса, шунга мени муҳтож деб билсанг, амалга оширишингни Сендан ўтиниб сўрайман. Сенсиз ҳеч нарса қилолмаслигимни мен биламан. Сен — токсан, мен эса — новда. Яхши ҳосил келтиришим учун Сенда бўлишим керак. Менга бунда ёрдам бер. Мен Сенинг қуйидаги берган ваъдангга шукроналар айтаман: агар Сен билан алоқада бўлиб сўзларингни қалбимга жо қилсам, истаганимни сўрашим мумкин, буларга мен эришаман (қаранг: Юҳ. 15:7). Агар мен Сенинг номингдан Отадан бирон нарса сўрасам, шунга эришиш мумкин эканлиги учун Сенга шукр қиламан (қаранг: Юҳ. 16:24). Майли, Сенинг тирик сувларинг оқимида ўтқазилган дарахт каби ўз вақтида эзгулик ҳосилини келтирайин, баргларим эса сўлмайдиган дарахт кабидир (қаранг: Забур 1:3). Исо Масиҳ номидан Сенга илтижо қиламан: Руҳинг мевасини менда етиштир, токи атрофдагилар бу мевани кўриб Сени мадҳ этишсин.

МУҚАДДАС КИТОБДАН
сизнинг ибодатларингизни таъсирчан қиладиган оятлар

Илоҳий Руҳнинг самараси эса — муҳаббат, севинч, хотиржамлик, сабр-тоқат, лутфкорлик, хайрихоҳлик, садоқат, мулойимлик ва ибодир. Бу хислатларга қарши бирор қонун йўқ.

Гал. 5:22-23

Мен ҳақиқий токман, Отам эса Боғбондир. Мендаги ҳосил бермайдиган ҳар бир новдани У кесиб ташлайди. Ҳосил берадиган ҳар бир новдани эса, яна кўпроқ ҳосил берсин деб, хомток қилиб тозалайди. Менинг сизга айтган сўзим орқали сизлар ҳозирдан тозасизлар. Мен билан алоқада бўлинглар, шунда Мен сизлар билан алоқада бўламан. Токда қолмаган новда ўз-ўзидан ҳосил беролмайди; шу сингари агар сизлар Мен билан алоқада қолмасангизлар, ҳосил беролмайсизлар. Мен — ток, сизлар — новдасизлар. Ким Мен билан алоқада бўлиб, Мен у билан алоқада бўлсам, у кўп ҳосил беради. Менсиз ҳеч нарса қилолмайсизлар. Ким Мен билан алоқани узса, новда каби ташлаб юборилади ва қурийди. Бундай новдаларни эса териб, ўтга улоқтириб ёндиришади. Агар сиз Мен билан алоқада бўлиб, сўзларимни қалбингизга жо қилсангизлар, истаганингизни сўранглар, эришасизлар. Сизлар кўп ҳосил берсангиз, Отам улуғланади, сизлар эса Менинг шогирдларим бўласизлар

Юҳ. 15:1-8

Книга на узбекском языке: Сила молящейся женщины  (Сторми Омартиан)