Джош Макдауэлл, Эд Стюарт. Жинсий зўрланиш - (2 қисм) Китоб Ўзбек тилида
«Психологик биринчи тез ёрдам» туркумидан
Jinsiy zo‘rlanish (Djosh Makdauell, Ed Styuart) O‘zbek tilida Audiokitob
MUNDARIJA
Minnatdorchilik
Enn hikoyasi 1-qism
O'ylab ko'rish uchun vaqt
Enn hikoyasi 2-qism
O'ylab ko'rish uchun vaqt
Enn hikoyasi 3-qism
O'ylab ko'rish uchun vaqt
Mualliflar haqida
ENN HIKOYASI. 2–QISM
– Enn, kechagi uchrashuvimizdan keyin o‘zingni qanday his qilding? – Jenni Shou Enn va Xizerning qarshisidagi to‘shakda o‘tirib ular bilan suhbatlashardi. Dala hovlida ular bilan birga yashaydigan qizlar o‘sha paytda ko‘lda suv chang‘isida uchishayotgandilar.
– Bu turli xil tuyg‘ularning aralashmasi edi, – deb javob berdi Enn. – Bir necha marta o‘tmishdagi yoqimsiz xotiralar to‘satdan esimga tushib ketdi va ular bilan birga – o‘sha his–tuyg‘ular, bilasizmi – axloqsizlik, qo‘rquv, uyat. Ammo, boshqa tomondan, men kechagi suhbatimizni esladim va kimdir mening boshimdan o‘tganlarni bilganidan xursand bo‘ldim. Men o‘zimni g‘amgin fikrlardan chalg‘itishga va diqqatimni yoqimli narsaga qaratishga harakat qildim. Bir–ikki marta yig‘lagim kelganida, yaxshi narsalarni o‘ylashga harakat qildim.
– Senga og‘riq keltirgan narsadan imkon qadar tezroq qutulishga urinma, – dedi Jenni muloyimlik bilan. – Hozir qila oladigan eng yomoni shuki – bu senga nima bo‘lganini inkor etish, yoki unutishga urinish, yoki shunchaki his–tuyg‘ularni bostirishdir. Va eng yaxshisi – dalillarni tan olish, his–tuyg‘ularingni tan olish va ifoda etish hamda boshqalardan yordamni qabul qilishdir. O‘ylaymanki, agar ota–onang bunga qarshi bo‘lmasa, masihiy maslahatchisi bilan gaplashish senga foyda keltirishi mumkin...
Enn o‘zini, uni elektr toki urgan insonga o‘xshatdi.
– Ota–onam?! Bu haqda ota–onamga aytmaysiz–ku, to‘g‘rimi?
Jenni uning qo‘lini mehr bilan ushlab oldi.
– Bu sen uchun qiyin bo‘lishi mumkin, lekin ota–onangga nima bo‘lganini aytib berishing kerak. Bu shifolanishing uchun muhimdir.
– Ammo onam bilan nima bo‘lishini tasavvur ham qila olmaysiz? Axir, bobom uning otasi–ku.
– U ham tasalli, qo‘llab–quvvatlash va daldaga muhtoj bo‘lishi mumkin, – deb tushuntirdi Jenni. – Ammo u seni yaxshi ko‘radi va ishonchim komilki, u senga, hatto o‘ziga og‘ir bo‘lsa ham, og‘riqni yengishda yordam berishni xohlaydi.
Enn kuchli hayajonni his qildi.
– Bu haqda ota–onamga qanday aytaman?
– Shanba kuni uyga ketishdan oldin buni muhokama qilishimiz mumkin, – dedi Jenni. – Va ota–onang bilan suhbat davomida men sen bilan bo‘lishim mumkin, albatta agar xohlasang.
– Men ham, – dedi Xizer. – Agar senga yordam kerak bo‘lsa.
Ennining tashvishi yo‘qolmadi, lekin u sezilarli darajada kamaydi.
– Haqiqatan ham sizlar ushbu suhbatda ishtirok etishni istaysizmi?
– Men senga yordam berishdan xursand bo‘laman, – dedi Jenni.
– Bunday qiyin damlarda yolg‘iz qolishingni xohlamayman, – deya qo‘shimcha qildi Xizer. – Agar sen bilan bo‘lishimni xohlasang, men yoningda bo‘laman.
Ennining ko‘zlari yoshlandi.
– Buni qilish men uchun juda qiyin bo‘ladi, – dedi u. – Har qanday yordamni qabul qilaman.
Xizer dugonasini mahkam quchoqladi.
Jenni keyin dedi:
– Enn, har qanday vaziyatda ham, eng muhim yordam manbasiga murojaat qilishing kerak. Bu manba Xudoning O‘zi. U seni, sen jinsiy zo‘ravonlikka uchraganing uchun noloyiq deb hisoblamasligini bilishingni istayman. Bu sening aybing emasligini U biladi. U sendan, sen bobong bilan qilgang muomalang uchun g‘azablanmaydi, yoki sendan ko‘ngli qolmaydi. Xudo senga qanday munosabatda bo‘lishini bilishingni xohlayman. Qani, Muqaddas Kitobingizni olingchi, – dedi u ikkala qizga.
Enn va Xizer Muqaddas Kitoblarini chiqarishdi va Jenni ularning har biridan bittadan oyat o‘qishni so‘radi.
– Enn, sening oyatingda Xudo sening dardingga qanday munosabatda bo‘lishi haqida gapiradi. Iltimos, Ishayo kitobining oltmish uchinchi bobidagi to‘qqizinchi oyatni o‘qi.
Enn ovoz chiqarib o‘qidi:
– Ular qiynalganlarida, U ham azob chekdi, Egamizning farishtasi ularni qutqardi. Sevgisi, shafqati tufayli Uning O‘zi ularni qutqardi. Egamiz ularni ko‘tarib, azaldan opichlab yurardi.
– Farzandlari qiynalganlarida Xudo nima qiladi? – deb so‘radi Jenni.
– U ham azob chekadi – deb javob berdi Enn.
– Xo‘sh, qanday his–tuyg‘ularni boshdan kechirayotganingni bilib, U senga qanday munosabatda bo‘ladi, Enn?
– Men g‘amgin va qayg‘udaman, menimcha, U ham g‘amgin va qayg‘uda.
Jenni Ennga yaqinlashib egildi.
– Va bunga qanday munosabatdasan?
Enn o‘yladi.
– Agar U men buni boshimdan kechirayotganim uchun qayg‘urayotgan bo‘lsa, men Uning uchun muhimligimni his qilyapman. Bu U haqiqatan ham men bilan nima sodir bo‘layotganini bilishini va meni sevishini anglatadi.
– To‘g‘ri, Enn. U sen haqingda hamma narsani biladi. Yillar davomida bobong seni qanchalar azoblaganini biladi. Va bu senga og‘riq keltirgani uchun Unga ham og‘riq keltiradi. Bu oyat buni eslab qolishingga yordam beradi.
– Mening oyatim ham juda dalda beruvchidir, – dedi Xizer.
Jenni bosh irg‘adi.
– Iltimos, bizga Matto Xushxabarining o‘n birinchi bobidan yigirma sakkizinchi oyatni o‘qib bergin.
“Ey holdan toyganlar, og‘ir yuk ostida qolganlar, hammalaringiz Mening oldimga kelinglar! Men sizlarga orom beraman”.
Jenni Ennga qaradi.
– Shu yillar davomida o‘zing bilan olib yurgan o‘sha dahshatli “sir” tufayli o‘zingni “holdan toygan va og‘ir yuk ostida qolgandek" his qilyapsanmi?
– Ha, men o‘zimni aynan shunday his qilyapman.
– Iso sen kabi odamlarga nima taklif qiladi?
Enn Xizerning Muqaddas Kitobiga qaradi, keyin Jenniga qaradi.
– "Men sizlarga orom beraman", – deb javob qildi u zo‘rg‘a sezilarli tabassum bilan.
– Men sening e’tiboringni qaratmoqchi bo‘lgan yana bir joy bor, Enn. Bu Ibroniylarga to‘rtinchi bob, o‘n beshinchi va o‘n oltinchi oyatlar.
Xizer ixtiyoriy ravishda ovoz chiqarib o‘qishni boshladi va Enn uning Muqaddas Kalomdan o‘qishiga ergashdi.
“U ojizliklarimizga hamdard bo‘la oladi. Axir, U biz kabi har tomonlama sinalgan, lekin bizga o‘xshab gunoh qilmagan. Kelinglar, inoyatli Xudoyimizning taxtiga jasorat bilan yaqinlashaylik. Shunda U bizga marhamat ko‘rsatadi, Uning inoyati zarur vaqtda bizga yordam beradi”.
– Xudo nafaqat mening dardimni his qiladi va tasalli beradi, balki U menga yordam berishi mumkin, – dedi Enn.
– Buni tushunish juda muhim, Enn, – dedi Jenni. – Xudo senga ushbu qiyin davrni yengishingga yordam berishni istaydi. Shuning uchun, his–tuyg‘ularingni yengish uchun qila oladigan eng yaxshisi shuki – Xudo bilan chuqurroq munosabatlarni rivojlantirish va Unga tayanish, Undan kuch va yordam olishdir.
Enn boshini quyi soldi.
– Men bu borada hamma narsadan yiroqman. Men ibodat qilish va Muqaddas Kalomni o‘qishga ko‘proq vaqt ajratishim kerakligini his qilyapman.
– To‘g‘ri, Enn, – dedi Jenni. – Bu juda ko‘p yordam beradi.
Keyin uchalovi Enn ota–onasiga o‘z boshidan kechirganlari haqida qanday va qachon aytib berishini muhokama qilishdi. Jenni va Xizer unga hamrohlik qilishga va’da berishdi. Bu Ennini biroz tinchlantirdi, lekin u hali ham ota–onasi, ayniqsa onasi bu dahshatli xabarga qanday munosabatda bo‘lishidan xavotirda edi.
Enn hammasi shu yerda tugashini xohlardi. U nihoyat o‘zining dahshatli sirini mehribon do‘stlari bilan baham ko‘rdi va ulardan tasalli olganidan keyin o‘zini ancha yaxshi his qildi. Nega endi u hozirning o‘zida shifo topa olmaydi, dardidan qutula olmaydi? Jenni unga bu uzoq jarayon bo‘lishini aytdi va Enn uning haqligini bilar edi. Axir, sinish yoki jarrohlikdan davolanish uchun vaqt kerak bo‘lsa, qalb jarohatidan shifo topish uchun ham vaqt kerak albatta… Yaxshi xabar shunda ediki, u bu shifo topish yo‘lida yolg‘iz o‘zi yurishi shart emas edi. Va buning uchun u Jenni va Xizerdan shubhasiz uzoq vaqt davomida minnatdor bo‘ladi.
Книга на Узбекском языке: Сексуальное насилие (Джош Макдауэлл, Эд Стюарт)
Эта книга о сексуальном насилии.
Четырнадцатилетняя Энн Кэссиди больше не может хранить свою страшную тайну. Кошмары, воспоминания, чувство вины... Ему нужно с кем-то поделиться этим. Признание того, что она подверглась сексуальному насилию, приносит облегчение, но не облегчает причиненную боль. Что ему делать?
