Ийшая 20 bob
1 Ассирия бас сәркәрдасы Ассирия патшасы Саргонның буйрығы менен Ашдодқа ҳүжим жасап, қаланы қолға киргизген жылы,
2 Жаратқан Ийе Амос улы Ийшая арқалы сөйледи. Ол Ийшаяға: «Барып, үстиңдеги аза кийимин ҳәм аяғыңдағы сандалды шешип тасла», – деди. Ол солай ислеп, жалаңаш ҳәм жалаң аяқ жүрди.
3 Сонда Жаратқан Ийе былай деди: «Қулым Ийшаяның үш жыл жалаңаш ҳәм жалаң аяқ жүргени Мысыр ҳәм Куш ушын белги ҳәм нышан болады.
4 Мысырды шерменде қылыў ушын Ассирия патшасы Мысыр тутқынларын, Куштан сүргин болғанларды, олардың жасын ҳәм ғаррысын жалаңаш, жалаң аяқ, уятлы жерлери ашық ҳалда айдап кетеди.
5 Кушқа үмит байлап, Мысыр менен мақтанғанлар қорқып, уятқа қалады.
6 Сол күни бул теңиз жағасының турғынлары былай дейди: „Қара, Ассирия патшасынан қутылыў ушын жәрдем күтип, үмит байлағанымыз не болды?! Енди бизлер қалай қашып қутыламыз?“»
