Ester 7 bob
1 Solay etip, patsha Haman menen birge xanbiyke Esterdin' zıyapatına keldi.
2 Ekinshi zıyapat ku'ni de olar sharap iship otırg'anda, patsha Esterge ja'ne: – Ester, qanday tilegin' bar? Tilegin' orınlanadı. Qanday o'tinishin' bar? Patshalıqtın' yarımın sorasan' da beriledi, – dedi.
3 Sonda xanbiyke Ester juwap berip bılay dedi: – Taqsırım! Eger mag'an kewlin'iz tolg'an bolsa ha'm durıs dep tapsan'ız, menin' janımdı saqlap qalıwın'ızdı tileymen ha'm menin' xalqıma da o'mir bag'ıshlawın'ızdı o'tinemen.
4 Sebebi men ha'm menin' xalqım o'ltirilip joq etiliw ha'm qırıp taslanıw ushın satılg'anbız. Eger bizler qul ha'm shorı etip satılg'anımızda, men u'ndemegen bolar edim. O'ytkeni bul is sebepli patshamızdın' tınıshın alıw maqul bolmas edi, – dedi.
5 Sonda patsha Axashwerosh xanbiyke Esterden: – Bunday isti islewge kimnin' batılı bardı, sol adam qay jerde? – dep soradı.
6 Ester: – Dushpanımız ha'm jawımız – bul jawız Haman, – dedi. Sonda patshanın' ha'm onın' hayalının' aldında Hamannın' hu'reyi ushıp, qorqıp ketti.
7 Patsha g'a'zeplenip, ornınan turdı da, saray bag'ına qaray ketti. Al Haman xanbiyke Esterden o'z janın qutqarıwın o'tinip soraw ushın ishte qaldı. O'ytkeni ol patshanın' o'zin qatan' jazalawdı qarar etkenin tu'singen edi.
8 Patsha saray bag'ınan zıyapat bolıp atırg'an jerge qaytqanda, Ester jambaslap otırg'an orınlıqta Hamannın' et-betinen jıg'ılıp atırg'anın ko'rdi de: «Bul adam sarayda, ha'tteki, menin' ko'z aldımda hayalıma zorlıq qılmaqshı ma?» – dep baqırdı. Patsha usı so'zlerdi aytıp bolar bolmastan, olar Hamannın' betin japtı.
9 Son'ınan patshag'a xızmet etetug'ın aqtalardın' biri Xarbona bılay dedi: – Hamannın' u'yinin' aldında biyikligi eliw shıg'anaq keletug'ın dar turıptı. Bul dar patshamızdı eskertip, onın' o'mirin saqlap qalg'an Mordoxaydı asıw ushın qurılg'an, – dedi. Sonda patsha: – Sol darg'a onın' o'zin asın'lar! – dep buyrıq berdi.
10 Solay etip, Hamannın' Mordoxaydı asıw ushın qurdırg'an darına onın' o'zin astı. Sonnan keyin g'ana patshanın' ashıwı basıldı.
