Ayan 8 bob
1 Qozı bekitilgen jetinshi mo'rdi buzıp ashqanda, aspanda yarım saattay u'nsizlik ornadı.
2 Sonda men Qudaydın' aldında turg'an jeti perishteni ko'rdim. Olarg'a jeti ka'rnay berildi.
3 Son'ınan basqa bir perishte kelip, qurbanlıq shalınatug'ın orında turdı. Onın' qolında xosh iyisli zatlardı tu'tetiwge arnalg'an altın ıdıs bar edi. Og'an pu'tkil muxaddeslerdin' duwalarına qosıp, taxtın' aldındag'ı altınnan islengen qurbanlıq shalınatug'ın orıng'a bag'ıshlaw ushın, ko'p mug'darda xosh iyisli zatlar berildi.
4 Sonda muxaddeslerdin' duwaları menen birge xosh iyisli zatlardın' tu'tini perishtenin' qolınan ko'terilip, Qudaydın' aldına jetip bardı.
5 Perishte xosh iyisli zatlar salıng'an ıdıstı alıp, onı qurbanlıq shalınatug'ın orınnın' janıp turg'an shog'ına toltırdı da, jerge ılaqtırıp jiberdi. Sonda gu'ldirmama gu'rkirep, gu'rsildegen dawıslar esitildi ha'm shaqmaq shag'ıp, jer silkindi.
6 Jeti perishte qollarındag'ı jeti ka'rnaydı shertiwge tayarlandı.
7 Birinshi perishte ka'rnayın shertti. Sonda qang'a aralasqan burshaq ha'm ot jerge jawdı. Jer betinin' u'shten biri, tereklerdin' u'shten biri ha'm jasıl sho'plerdin' ha'mmesi janıp ketti.
8 Ekinshi perishte ka'rnayın shertti. Lawlap jang'an taw sıyaqlı u'lken bir na'rse ten'izge ılaqtırıldı. Ten'izdin' u'shten biri qang'a aylandı.
9 Ten'izdegi janıwarlardın' u'shten biri o'ldi ha'm kemelerdin' u'shten biri qıyralıp qaldı.
10 U'shinshi perishte ka'rnayın shertti. Sonda aspannan shom sıyaqlı jalınlap jang'an bir u'lken juldız da'ryalardın' u'shten bir bo'legine ha'm suw bulaqlarının' u'stine tu'sti.
11 Bul juldızdın' atı – juwsan. Suwlardın' u'shten bir bo'legi juwsan sıyaqlı ashshı boldı. Suw ashshı bolg'anlıqtan, ishken adamlardın' ko'bisi o'lip qaldı.
12 To'rtinshi perishte ka'rnayın shertti. Quyashtın' u'shten biri, aydın' u'shten biri ha'm juldızlardın' u'shten biri zaqımlandı. Olardın' u'shten biri qaran'g'ılanıp, ku'ndiz ha'm tu'nnin' u'shten bir bo'legi jaqtısız qaldı.
13 Men son'ınan qarap, aspannın' ortasında ushıp ju'rgen bir bu'rkittin' ba'lent dawıs penen bılay degenin esittim: «Ha'siret, ha'siret! Jer ju'zinde jasawshılar ha'siret shegedi! Sebebi ka'rnayların shertetug'ın qalg'an u'sh perishte ka'rnay shertiwge tayar tur!»
