Eremiya 19 bob
1 Jaratqan İye bılay dedi: – Barıp, gu'lalshıdan ılaydan islengen gu'ze satıp al. Janın'a xalıq aqsaqallarınan ha'm ruwxaniylerdin' jası u'lkenlerinen alıp,
2 Gu'zenin' sınıg'ı da'rwazası arqalı shıg'ıp, Ben-Hinnom oypatlıg'ına bar. Sag'an aytpaqshı bolg'an so'zlerimdi sol jerde ja'riyala.
3 Olarg'a bılay de: «Ha'y Yahuda patshaları menen Erusalim turg'ınları, Jaratqan İyenin' so'zin tın'lan'! İzraildın' Qudayı, A'lemnin' Jaratqan İyesi bılay deydi: Men bul jerge sonday apatshılıq alıp kelemen, ol tuwralı esitken adamnın' qulaqları shuwıldaydı.
4 Sebebi bul xalıq Meni ta'rk etip, bul jerdi haramladı. Olar bul jerde o'zleri de, ata-babaları da, Yahuda patshaları da bilmegen basqa qudaylarg'a qurbanlıq jandırıp, bul jerdi biygu'na adamlardın' qanına toltırdı.
5 Olar Baalg'a arnap sıyınıw orınların qurdı ha'm o'z balaların otqa jag'ıp, Baalg'a jandırılatug'ın qurbanlıq qılıp berdi. Men olarg'a bulay islewdi buyırg'an da, aytqan da joqpan, bunday na'rse qıyalıma da kelmegen.
6 Mine, sonday waqıtlar keledi, – deydi Jaratqan İye, – bul jer artıq Tofet yaki Ben-Hinnom oypatlıg'ı dep emes, al Bawızlaw oypatlıg'ı dep ataladı.
7 Usı jerde Yahuda menen Erusalimnin' niyetlerin pushqa shıg'araman. Olardı dushpanlardın' qılıshına, olarda qastı barlardın' qolına tapsıraman. Denelerin ko'ktegi quslarg'a ha'm jerdegi jırtqısh haywanlarg'a jem qılaman.
8 Men bul qalanı qarabaqanag'a aylandırıp, ku'lkige qaldıraman. Ol jerden o'tken ha'r bir adamnın' ju'regi suwlap, basınan o'tken na'rseleri sebepli onı tabalaydı.
9 Men bul qalanın' turg'ınların o'z ul-qızlarının' etin jewge ma'jbu'r qılaman. Janın alıwdı qa'legen dushpanlar olardı qamalg'a alg'anda, olar mu'ta'jlikten birbirinin' etin jeydi».
10 Sen o'zin' menen kelgenlerdin' ko'z aldında gu'zeni sındırıp,
11 olarg'a ayt: «A'lemnin' Jaratqan İyesi bılay deydi: Gu'lalshının' gu'zesinin' sınıp, onın' qayta du'zetilmeytug'ını sıyaqlı, Men de bul xalıqtı ha'm bul qalanı solay sındıraman. Tofette jerlewge orın qalmag'ansha, o'liler jerlenedi.
12 Men bul jerge de, onın' turg'ınlarına da solay qılaman, – deydi Jaratqan İye. Bul qalanı da Tofettey qılaman.
13 Erusalimnin' u'yleri de, Yahuda patshalarının' sarayları da Tofet degen orın sıyaqlı haram sanaladı. Sebebi barlıq u'ylerdin' to'belerinde aspan denelerine arnap xosh iyisli tu'tetkiler tu'tetildi ha'm basqa qudaylarg'a arnap ishimlik sadaqaları quyıldı».
14 Keyin Eremiya Jaratqan İye payg'ambarshılıq qılıw ushın jibergen jerinen, Tofetten qaytıp keldi. Ol Jaratqan İyenin' İbadatxanasının' ha'wlisinde turıp, pu'tkil xalıqqa bılay dedi:
15 «İzraildın' Qudayı A'lemnin' Jaratqan İyesi bılay deydi: Olar qaysarlıq etip, so'zimdi tın'lawdan bas tartqanı ushın, Men bul qalag'a ha'm onın' a'tirapındag'ı qalalarg'a O'zim aytqan ba'lelerdin' ha'mmesin jiberemen».
