Ester 9 bob

Yahudiylerdin' jen'isi(1-19),Purim bayramı(10-32),

¹ Patshanın' buyrıg'ı ha'm pa'rmanı orınlanatug'ın on ekinshi ay bolg'an Adar ayının' on u'shinshi ku'ni de keldi. Yahudiylerdin' dushpanları bul ku'ni yahudiyler u'stinen hu'kimdarlıqtı ornatıwdı u'mit penen ku'tken edi. Biraq kerisinshe bolıp shıqtı. Yahudiyler o'zlerin jek ko'rgenlerden u'stem keldi.

² Olar o'zlerine ja'bir etpekshi bolg'anlarg'a qarsı hu'jim jasaw ushın, patsha Axashweroshtın' qolı astındag'ı barlıq wa'layatlardag'ı o'zleri jasaytug'ın qalalarda bir jerge jıynaldı. Hesh kim yahudiylerge qarsı shıg'a almadı, sebebi barlıq xalıqlardı olardan qorqıw tuyg'ısı biylep alg'an edi.

³ Wa'layat basshıları, nayıplar, ha'kimler ha'm patsha islerin ju'rgiziwshiler Mordoxaydan qorqqanlıqtan, yahudiylerdi qollap-quwatladı.

⁴ O'ytkeni Mordoxay sarayda ullı adam boldı. Onın' dan'qı barlıq wa'layatlarg'a taradı ha'm ku'shi ku'nnen-ku'nge artıp bardı.

⁵ Yahudiyler dushpanlarının' ha'mmesin qılıshtan o'tkerdi, o'ltirdi ha'm joq qıldı. Olar o'zlerin jek ko'rgenlerge qa'legen na'rsesin isledi.

⁶ Yahudiyler Suza qalasında bes ju'z adamdı o'ltirip, joq qıldı.

⁷ Ja'ne de, olar Parshandata, Dalfon, Aspata, 8Porata, Adalya, Aridata,

⁸ Porata, Adalya, Aridata,

⁹ Parmashta, Arisay, Ariday ha'm Wayzatanı o'ltirdi.

¹⁰ Bul o'ltirilgenler yahudiylerdin' dushpanı Hammedata ulı Hamannın' on ulı edi. Biraq yahudiyler olardın' mal-mu'lkine qol tiygizbedi.

¹¹ Sol ku'ni-aq Suza qalasında o'ltirilgenlerdin' sanı patshag'a bildirildi.

¹² Patsha xanbiyke Esterge: – Yahudiyler Suza qalasında bes ju'z adamdı ha'm Hamannın' on ulın o'ltirip, joq qılıptı. Kim biledi, basqa wa'layatlarda olar ne isledi eken? Ne tileysen'? Ol qanaatlandırıladı. Ja'ne ne soraysan'? Ol orınlanadı, – dedi.

¹³ Sonda Ester: – Eger patshamız maqul ko'rse, Suzadag'ı yahudiyler bu'gingi pa'rmanın'ızdı erten' de orınlasın. Al Hamannın' on ulının' deneleri darg'a asılsın, – dedi.

¹⁴ Patsha bul o'tinishti orınlawdı buyırdı ha'm pa'rman Suzada ja'riyalanıp, Hamannın' on ulının' denesi darg'a asıldı.

¹⁵ Suzadag'ı yahudiyler Adar ayının' on to'rtinshi ku'ni de bir jerge jıynalıp, qalada u'sh ju'z adamdı o'ltirdi. Biraq olardın' mal-mu'lkine qol tiygizbedi.

¹⁶ Patshalıqtın' wa'layatlarında jasaytug'ın basqa yahudiyler de jan saqlaw ha'm dushpanlarınan qorg'anıw ushın bir jerge jıynaldı. Olar o'zlerin jek ko'rgenlerden jetpis bes mın' adamdı o'ltirdi, biraq olardın' mal-mu'lkine qol tiygizbedi.

¹⁷ Bul waqıya Adar ayının' on u'shinshi ku'ni ju'z bergen edi. Al aydın' on to'rtinshi ku'ni olar tınıshlanıp, bul ku'ndi zıyapat ha'm quwanısh ku'ni dep belgiledi.

¹⁸ Suzadag'ı yahudiyler bolsa, sol aydın' on u'shinshi ha'm on to'rtinshi ku'nleri bir jerge jıynaldı, al on besinshi ku'ni tınıshlandı. Sol ku'ndi zıyapat ha'm quwanısh ku'ni dep belgiledi.

¹⁹ Sonlıqtan awıl-aymaqlarda jasaytug'ın yahudiyler Adar ayının' on to'rtinshi ku'nin zıyapat ha'm quwanısh ku'ni retinde belgileydi ha'm bir-birine tag'amlar beredi.

²⁰ Mordoxay bul waqıyalardı jazıp qoydı. Son'ınan ol patsha Axashweroshtın' qolı astındag'ı uzaq ha'm jaqın jerdegi wa'layatlarda jasaytug'ın yahudiylerge xatlar jiberdi.

²¹ Xatta ha'r jılı Adar ayının' on to'rtinshi ha'm on besinshi ku'nlerin bayramlaw buyırılg'an edi.

²² Sebebi bul ku'nler yahudiylerdin' o'z dushpanlarınan qutılg'an ku'nleri bolıp, qayg'ısı quwanıshqa, azası bayramg'a aylang'an ayı edi. Mordoxay sol ku'nlerdi zıyapat ha'm quwanısh ku'nleri dep belgilep, bir-birine tag'amlar u'lestiriwdi ha'm ka'mbag'allarg'a sadaqalar beriwdi buyırdı.

²³ Solay etip, yahudiyler Mordoxaydın' buyrıg'ın qabıl etti ha'm ha'r jılı sol ku'nlerdi bayramlawdı a'detke aylandırdı.

²⁴ Pu'tkil yahudiylerdin' dushpanı Agag a'wladınan bolg'an Hammedata ulı Haman yahudiylerdi qırıp taslawdı niyet etip, olardı ezip joq qılıw ushın pur, yag'nıy shek taslag'an edi.

²⁵ Biraq bul xabar patshag'a jetkende, patsha xatı arqalı: «Hamannın' yahudiylerge qarsı oylag'an jawız niyeti o'zinin' basına jetsin. Haman ha'm onın' ulları darg'a asılsın», – dep buyrıq bergen edi.

²⁶ Pur so'zi sebepli, bul ku'nlerge Purim* dep at berilgen edi. Solay etip, yahudiyler Mordoxaydın' bul xatında jazılg'anlardı, ko'rgen-bilgenlerin ha'm baslarınan keshirgenlerin eslerinde saqlaw ushın,

²⁷ yahudiyler, olardın' a'wladları ha'm olarg'a qosılg'anlardın' ha'mmesi xatta jazılg'anınday, belgilengen waqıtta bul eki ku'ndi ha'r jılı so'zsiz bayramlawg'a qarar etti.

²⁸ Solay etip, bul ku'nler ha'r bir wa'layatta, ha'r bir qalada ha'm ha'r bir tiyrede a'wladtan-a'wladqa eske alınadı ha'm bayramlanadı. Usı Purim ku'nlerin yahudiyler ta'repinen bayramlaw hesh qashan toqtatılmaydı ha'm bul ku'nler a'wladlar boyı este saqlanadı.

²⁹ Abixayıl qızı xanbiyke Ester ha'm yahudiy Mordoxay Purimge baylanıslı bul ekinshi xattı pu'tkil biylik penen jazıp tastıyıqladı.

³⁰ Mordoxay Axashweroshtın' qol astındag'ı bir ju'z jigirma jeti wa'layatta jasaytug'ın ha'mme yahudiylerge tınıshlıq ha'm amanlıq tileklerine tolı xatlardı jiberdi.

³¹ Xatta yahudiy Mordoxay xanbiyke Ester menen birlikte aldın ala qarar etkenindey, yahudiylerge usı Purim ku'nlerin belgilengen waqıtta nıshanlawdı qatan' saqlawdı buyırdı. Burın yahudiylerdin' o'zleri ha'm urpaqları oraza tutıw ha'm azalaw boyınsha belgilengen qag'ıydalarg'a boysıng'anı sıyaqlı, bul bayramg'a da boysınıwı belgilengen edi.

³² Solay etip, Esterdin' buyrıg'ı boyınsha Purimge tiyisli usı qag'ıydalar tastıyıqlanıp, kitapqa jazıp qoyıldı.