4 Patshalar 7 bob

Qamal etiwdin' toqtawı (3-20).

¹ Elisha bug'an bılay dep juwap berdi: – Jaratqan İyenin' so'zin tın'lan'lar! Jaratqan İye bılay deydi: «Erten' usı waqıtta Samariya da'rwazasındag'ı bazarda bir sea sapalı un da, eki sea arpa da bir shekelge satıladı».

² Sonda patsha su'yenip ju'retug'ın a'skerbası Qudaydın' adamına: – Eger Jaratqan İye aspan qaqpaqların ashsa da, bulay bola qoymas, – dedi. Elisha og'an: – Sen ha'mmesin o'z ko'zin' menen ko'resen', biraq onnan jew sag'an nesip etpeydi, – dedi.

³ Qala da'rwazasının' sırtında jaman teri keselligine shalıng'an to'rt adam bar edi. Olar bir-birine: «O'limimizdi ku'tip bul jerde otıra berip ne qılamız?

⁴ Qalag'a kireyik desek, ol jerde ashlıq bolıp atır, ashlıqtan o'lemiz. Al bul jerde otıra bersek te, o'lemiz. Jaqsısı, aramlılardın' ordasına barayıq. Eger o'ltirmese, tiri qalarmız, o'ltirse o'lip ketermiz», – dedi.

⁵ Olar aramlılardın' ordasına barıw ushın tan' qaran'g'ısında turıp, ordanın' shetine kelse, ol jerde birde bir adam joq eken.

⁶ Sebebi İyemiz Aram ordasına sawash arbalarının' taqır-tuqırlısın, atlardın' kisnewin ha'm ko'p a'skerlerdin' shawqım-su'renin esittirgen edi. Sonda aramlılar bir-birine: «İzrail patshası bizlerge hu'jim jasaw ushın Xett ha'm Mısır patshaların jallap alg'an qusaydı», – desti.

⁷ Olar tan' qaran'g'ısında shatırların, atların, esheklerin yag'nıy pu'tkil ordasın taslap, bas sawg'alap qashıp ketken edi.

⁸ Jaman teri keselligi bolg'an adamlar ordanın' shetine kelip, bir shatırg'a kirdi ha'm iship-jedi. Ol jerden gu'mis, altın ha'm kiyimler alıp, olardı jasırıp qayttı. Keyin qaytıp kelip, basqa shatırg'a kirdi ha'm ol jerden alg'anların da aparıp jasırıp qoydı.

⁹ Son'ınan bir-birine: «Bizlerdin' bul isimiz durıs emes. Bu'gin quwanıshlı xabarlar ku'ni. Eger bizler aytıwg'a asıqpay, erten' ku'n shıqqang'a deyin ku'tsek, onda jazag'a tartılamız. Ju'rin', patsha sarayına barıp, xabar bereyik», – dedi.

¹⁰ Solay etip, olar kelip, qala da'rwazasının' qarawılların shaqırıp, olarg'a bılay dedi: «Bizler aramlılardın' ordasına barıp edik. Ol jerde bir de bir adam joq, adamnın' dawısı da esitilmeydi. Tek baylang'an atlar menen eshekler ha'm qalay bolg'an bolsa solay qalg'an shatırlar bar eken».

¹¹ Da'rwaza qarawılları jar salıp, xabardı patsha sarayına jetkizdi.

¹² Patsha tu'n ortasında to'seginen turıp, xızmetshilerine: – Aramlılardın' qanday joba du'zip atırg'anın sizlerge aytıp qoyayın: olar bizlerdin' asharshılıqtı bastan keshirip atırg'anımızdı biledi. Olar: «İzraillılar qaladan shıqqanda, olardı tiriley qolg'a tu'sirip, qalag'a kirip alamız», – dep oylap, atızlarg'a jasırınıw ushın, shatırların taslap ketken, – dedi.

¹³ Sonda xızmetshilerinen biri patshag'a: – Qalada qalg'an bes attı alıp, jag'daydı bilip keliw ushın bir neshe adam jibereyik. Ol jerge barg'anlar da, qalada qalg'anlar da ba'ri bir o'ledi, – dedi.

¹⁴ Olar ha'r birine jup attan jegilgen eki sawash arbasın aldı. Patsha: «Barıp, ko'rin'ler», – dep olardı aram a'skerlerinin' izinen jiberdi.

¹⁵ Olar aramlılardın' izi menen İordan da'ryasına deyin bardı. Pu'tkil jol boyı aramlılardın' asıg'ıp qashıp baratırıp ılaqtırıp ketken kiyim ha'm zatlarına tolı edi. Jiberilgen adamlar qaytıp kelip, jag'daydı patshag'a jetkizdi.

¹⁶ Sonda xalıq qaladan shıg'ıp, Aram ordasın talan-taraj qıldı. Jaratqan İyenin' so'zi boyınsha, bir sea sapalı un da, eki sea arpa da bir shekelge satıldı.

¹⁷ Patsha o'zi su'yenip ju'retug'ın a'skerbasını da'rwaza awzına qoyg'an edi. Ol da'rwazanın' aldında adamlardın' ayag'ının' astında qalıp, o'ldi. Patsha Qudaydın' adamının' aldına barg'anda, ol patshag'a usılay bolatug'ının aytqan edi.

¹⁸ Ha'mmesi Qudaydın' adamının' patshag'a aytqanınday boldı. Ol patshag'a: «Erten' usı waqıtlarda Samariya da'rwazasındag'ı bazardın' aldında eki sea arpa da, bir sea sapalı un da bir shekelge satıladı», – degende,

¹⁹ usı a'skerbası Qudaydın' adamına: «Jaratqan İye aspan qaqpaqların ashsa da, bunday bola qoymas», – dep juwap bergen edi. Sonda Elisha og'an: «Sen bunı o'z ko'zlerin' menen ko'resen', biraq onnan jew sag'an nesip etpeydi», – degen edi.

²⁰ Solay boldı da. Ol da'rwazanın' aldında adamlardın' ayag'ının' astında qalıp, o'ldi.