4 Patshalar 17 bob

İzraildın' son'g'ı patshası Hoshea(1-4),Samariyanın' qulawı(5-23),Samariyag'a qonıs basqanlar(24-41).

¹ Yahuda patshası Axazdın' patshalıg'ının' on ekinshi jılında, Ela ulı Hoshea Samariyada İzrailg'a patsha bolıp, tog'ız jıl patshalıq etti.

² Ol Jaratqan İyenin' na'zerinde jaman bolg'an islerdi isledi. Biraq o'zinen aldıng'ı İzrail patshalarınan ta'wirirek edi.

³ Assiriya patshası Shalmanasar Hosheag'a qarsı sawash ashtı. Hoshea ta'slim bolıp, og'an salıq to'ley basladı.

⁴ Biraq Assiriya patshası Hosheanın' satqınlıq etkenin bilip qaldı. Sebebi Hoshea Mısır patshası Sog'a xabarshılar jibergen edi ha'm Assiriya patshasına ha'r jılı to'leytug'ın salıg'ın to'lemey qoyg'an edi. Sonlıqtan Assiriya patshası onı tutıp alıp, zindang'a tasladı.

⁵ Assiriya patshası pu'tkil İzrail jerlerine hu'jim qılıp, Samariyanı u'sh jıl qamal etip turdı.

⁶ Hosheanın' patshalıg'ının' tog'ızınshı jılında, Assiriya patshası Samariyanı qolg'a kirgizip, İzrail xalqın Assiriyag'a su'rgin etti. Olardı Xalaxqa, Gozan da'ryası boyındag'ı Xaborg'a ha'm Midiya qalalarına ornalastırdı.

⁷ Bulardın' ha'mmesi izraillılardın' o'zlerin Mısır patshası faraonnın' qol astınan, Mısır jerinen alıp shıqqan Qudayı Jaratqan İyege qarsı gu'na islegeni sebepli ju'z berdi. Olar basqa qudaylarg'a tabına basladı.

⁸ Olar o'zlerinin' aldınan Jaratqan İye quwıp shıg'arg'an xalıqlardın' da'stu'rleri ha'm İzrail patshalarının' shıg'arg'an da'stu'rleri boyınsha jasadı.

⁹ İzraillılar o'zlerinin' Qudayı Jaratqan İyege unamaytug'ın bul islerdi jasırın isleytug'ın edi. Olar awıllardan baslap, qorg'anlı qalalarg'a shekem ha'mme jerde o'zleri ushın sıyınıw orınların qurdı.

¹⁰ Ha'r bir biyiklikke ha'm qoyıw japıraqlı terektin' astına kiyeli taslar ha'm kiyeli ag'ashların ornattı.

¹¹ Olar Jaratqan İyenin' o'zlerinin' aldınan quwıp shıg'arg'an xalıqları sıyaqlı, barlıq sıyınıw orınlarında tu'tetkiler tu'tetti ha'm islegen jaman isleri menen Jaratqan İyeni g'a'zeplendirdi.

¹² Jaratqan İyenin' o'zlerine: «Bulay islemen'ler», – degenine qaramastan, olar butlarg'a tabındı.

¹³ Sonda Jaratqan İye O'zinin' barlıq payg'ambarları ha'm wa'liyleri arqalı İzrail ha'm Yahudag'a bılay dep eskertti: «Jaman jolın'ızdan qaytın'lar. Ata-babaların'ızg'a buyırg'an ha'm qullarım bolg'an payg'ambarlarım arqalı sizlerge jibergen Nızamdag'ı barlıq buyrıqlarıma ha'm qag'ıydalarıma boysının'lar».

¹⁴ Biraq olar qulaq salmay, Qudayı Jaratqan İyege isenbegen ata-babalarına uqsap qaysarlıq qıldı.

¹⁵ Olar Onın' qag'ıydalarınan, ata-babaları menen du'zgen kelisiminen ha'm o'zlerine berilgen eskertiwlerinen ju'z burıp, ma'nissiz butlarg'a tabındı ha'm o'zleri de ma'nissiz o'mir su'rdi. Jaratqan İye: «A'tirapın'ızdag'ı xalıqlarg'a uqsap jasaman'lar», – dep buyırsa da, olar sol xalıqlardın' a'detlerine go're jasay berdi.

¹⁶ Olar o'zlerinin' Qudayı Jaratqan İyenin' barlıq buyrıqlarınan ju'z burıp, tananın' eki mu'sini menen kiyeli ag'ashın isledi ha'm pu'tkil aspan denelerine tabınıp, Baalg'a xızmet etti.

¹⁷ Ulların ha'm qızların otta qurbanlıqqa berdi, palkerlik etti ha'm belgilerdi jorıdı. Jaratqan İyenin' na'zerinde jaman bolg'an islerdi islewge berilip ketip, Onın' g'a'zebin keltirdi.

¹⁸ Sonlıqtan Jaratqan İyenin' izraillılarg'a qattı g'a'zebi keldi ha'm Yahuda urıwınan basqasının' ha'mmesin O'z da'rgayınan quwdı.

¹⁹ Biraq Yahuda da O'z Qudayı Jaratqan İyenin' buyrıqlarına boysınbay, olar da izraillılar islegen da'stu'rlerdi isledi.

²⁰ Aqıbette, Jaratqan İye pu'tkil İzrail urpaqlarınan ju'z burıp, olardı jazaladı ha'm basqınshılardın' qolına ta'slim etip, ha'mmesin O'z da'rgayınan shıg'arıp jiberdi.

²¹ Burın Jaratqan İye izraillılardı Dawıttın' urpag'ının' qolınan tartıp alg'annan son', izraillılar Nabat ulı Yarobamdı patsha etip qoyg'an edi. Yarobam olardı Jaratqan İyenin' jolınan shıg'arıp, ullı gu'nag'a basladı.

²² İzrail urpaqları Yarobam islegen barlıq gu'nalarg'a qosıldı, bul gu'nalardan bas tartpadı.

²³ Aqırında, Jaratqan İye O'z qulları bolg'an payg'ambarlar arqalı aytqanı sıyaqlı, izraillılardı O'z da'rgayınan quwıp jiberdi. Olar o'z jerinen Assiriyag'a su'rgin etildi. Bu'gin de olar sol jerde jasaydı.

²⁴ Assiriya patshası Babilon, Kuta, Awwa, Xamat ha'm Sefarwayım qalalarınan adamlardı ko'shirip a'kelip, izraillılardın' ornına Samariya jerine qonıslandırdı. Olar Samariyanı iyelep, onın' qalalarında jasay basladı.

²⁵ Olar sol jerde jasay baslag'an waqıtları Jaratqan İyege sıyınbadı. Sonlıqtan Jaratqan İye olarg'a arıslanlardı jiberdi, arıslanlar olardın' ayırımların o'ltire basladı.

²⁶ Sonda Assiriya patshasına mınaday xabar jetti: «Siz Samariya qalalarına ko'shirip a'kelip qonıslandırg'an xalıqlar sol jerdin' qudayına qalay sıyınıwdı bilmeydi. Xalıq u'lke qudayının' nızamların bilmegeni ushın, u'lke qudayı u'lkege arıslanlar jiberip atır, arıslanlar da adamlardı o'ltirip atır».

²⁷ Assiriya patshası: «Samariyadan su'rgin etip a'kelingen ruwxaniylerden birin izge qaytarın'. Ol barıp, sol jerde jasasın ha'm olarg'a sol jerdin' qudayının' nızamların u'yretsin», – dep buyırdı.

²⁸ Samariyadan su'rgin etilgen ruwxaniylerden biri kelip, Beyt-Elde jasadı ha'm Jaratqan İyege qalay sıyınıwdı olarg'a u'yretti.

²⁹ Degen menen, Samariya qalalarına qonıs basqan ha'r bir xalıq o'z qudaylarının' mu'sinlerin isledi. Olardı izraillılar Samariyada jasag'an waqtında qurg'an sıyınıw orınlarına qoydı.

³⁰ Babilonnan kelgenler SukkotBenot degen, Kuttan kelgenler Nergal degen, Xamattan kelgenler Ashima degen,

³¹ Awwadan kelgenler Nibxaz ha'm Tartaq degen butlardı isledi. Al Sefarwayımnan kelgenler Sefarwayım qudayları Adrammelex penen Anammelexke arnap ulların otta jandırdı.

³² Bir ta'repten olar Jaratqan İyege sıyınsa, ekinshi ta'repten sıyınıw orınlarındag'ı butxanalarda xızmet etiw ushın, aralarınan ruwxaniyler saylap qoydı.

³³ Sol jerge ko'ship kelgen ha'r bir xalıq Jaratqan İyege sıyınıw menen birge, o'z xalıqlarının' da'stu'rleri boyınsha o'z qudaylarına da tabındı.

³⁴ Ha'zir de olar sol eski da'stu'rleri boyınsha jasap keledi. Olar Jaratqan İyeden qorqpaydı, Jaratqan İye İzrail dep at bergen Yaqıptın' balalarına buyırg'an qag'ıydalarg'a, pa'rmanlarg'a, nızamlarg'a ha'm buyrıqlarg'a boysınbayd.

³⁵ aratqan İye Yaqıptın' urpag'ı menen kelisim du'zip, olarg'a bılay dep buyırg'an edi: «Basqa qudaylardan qorqıp, olarg'a tabınban'lar ha'm olarg'a xızmet etip, qurbanlıq bermen'ler.

³⁶ Tek ullı qu'direti menen qol sozıp, sizlerdi Mısır jerinen alıp shıqqan Jaratqan İyeden qorqın'lar, Og'an sıyınıp, qurbanlıq berin'ler.

³⁷ Sizler ushın jazg'an qag'ıydaların, pa'rmanların, nızamların ha'm buyrıqların ba'rha muqıyatlı tu'rde orınlan'lar ha'm basqa qudaylardan qorqpan'lar.

³⁸ Menin' sizler menen du'zgen kelisimimdi umıtpan'lar, basqa qudaylardan qorqpan'lar.

³⁹ Tek Qudayın'ız Jaratqan İyeden qorqın'lar. Ol sizlerdi barlıq dushpanların'ızdın' qolınan qutqaradı».

⁴⁰ Biraq Samariyag'a qonıs basqan xalıqlar bul so'zlerge qulaq aspay, o'zlerinin' burıng'ı a'detleri boyınsha jasay berdi.

⁴¹ Sol xalıqlar ha'm Jaratqan İyege, ha'm o'zleri jondırıp isletken mu'sinlerge sıyındı. Olardın' balaları da, balalarının' balaları da o'zlerinin' ata-babaları islegen isti bu'ginge deyin dawam etpekte.