Rut 4 bob
1 Boaz qala da'rwazasının' janına barıp otırdı. Qarasa, o'zi aytqan a'mengeri qasınan o'tip baratır eken. Boaz onı shaqırıp: «Tuwısqanım, berman kelip, mına jerge otır», – dedi. Sol adam kelip otırdı.
2 2Son'ınan Boaz qala aqsaqallarınan on adamdı jıynap alıp, olarg'a: «Kelin'ler, sizler de usı jerde otırın'lar!» – dedi. Olar kelip otırdı.
3 Sonda Boaz sol a'mengerge bılay dedi: – Moab elinen qaytıp kelgen Nag'ıyma ag'ayinimiz Elimelexke tiyisli jer u'lesin satpaqshı
4 Men sag'an mınanı ma'lim etpekshimen: usı jerde otırg'anlar ha'm xalqımnın' aqsaqalları aldında sen sol jerdi satıp al. Eger sen a'mengerlik wazıypasın orınlamaqshı bolsan', orınla. Eger de orınlawdı qa'lemesen', onda mag'an ayt, men bileyin. Sebebi bul wazıypanı orınlaw birinshi gezekte senin' moynın'da. Al sennen keyingi na'wbet meniki. Sol adam: – Men a'mengerlik wazıypamdı orınlayman, – dedi
5 Boaz og'an: – Eger sen Nag'ıymadan jerdi satıp alatug'ın bolsan', onda marhumnın' mu'lkin o'z atında qaldırıw ushın, onın' moablı jesir hayalı Ruttı da hayallıqqa alıwın' kerek, – dedi
6 Sol a'mengeri Boazg'a: – Olay bolsa, men a'mengerlik wazıypamdı orınlay almayman. Sebebi o'z mu'lkimdi jog'altıp alıwım mu'mkin. Jaqsısı, bul wazıypanı sen orınla, o'ytkeni men orınlay almayman, – dedi.
7 A'yyemgi İzrailda mınaday da'stu'r bar edi: eger birew a'mengerlik wazıypasın orınlaytug'ın yamasa mal-mu'liklerin alıs-beris qılatug'ın bolsa, onda bunın' da'lili sıpatında birewi ayaq kiyimin sheship, ekinshisine beretug'ın edi. Mine, bul İzrailda tastıyıqlang'an gu'walıqtın' ornın basatug'ın edi.
8 Solay etip, sol a'menger Boazg'a: – O'zin' satıp ala ber, – dedi de, ayaq kiyimin sheship, og'an berdi.
9 Boaz aqsaqallarg'a ha'm barlıq xalıqqa qarap bılay dedi: – Bu'gin sizler mınag'an gu'wasızlar: men Nag'ıymadan marhum Elimelex, Kilyon ha'm de Maxlonnın' barlıq mu'lkin satıp alıp atırman.
10 Ja'ne de, men marhumnın' mu'lkin o'z atında qaldırıw ushın, Maxlonnın' jesiri, moablı Ruttı hayallıqqa alaman. Marhumnın' tuwısqanları arasında ha'm o'zi jasag'an qalada atı o'shpesin. Bu'gin sizler usıg'an gu'wasızlar.
11 Da'rwaza janında bolg'an pu'tkil xalıq ha'm aqsaqallar: – Bizler gu'wamız. Senin' u'yin'e kiretug'ın hayaldı Jaratqan İye İzrail xalqının' eki tu'pki anası Rahila ha'm Leaday qılg'ay. Efratada baylıqlar iyesi bolg'aysan', Beytlehemde atın' ullı bolg'ay.
12 Jaratqan İyenin' usı jas hayaldan sag'an beretug'ın balaları arqalı senin' urpag'ın' Tamaranın' Yahudag'a tuwıp bergen ulı Perestin' urpag'ınday bolg'ay, – dedi.
13 Solay etip, Boaz Ruttı hayallıqqa alıp, og'an u'ylendi. Boaz Rut penen qosıldı ha'm Jaratqan İye Ruttın' qursag'ına bala berip, ol ul tuwdı.
14 Hayallar Nag'ıymag'a: «Jaratqan İyege alg'ıslar bolsın! Ol bu'gin seni a'mengersiz qaldırmadı. Balanın' atı İzrailda dan'q-ataqqa iye bolsın!
15 Ol senin' o'mirin'di jan'artadı, qartayg'anda bag'ıwshın' boladı. Sebebi onı seni jaqsı ko'retug'ın kelinin' tuwıp berdi. Usı kelinin' senin' ushın jeti uldan da artıg'ıraq», – dedi.
16 Nag'ıyma balanı qolına alıp, bawırına bastı ha'm o'zi bag'ıp ta'rbiyaladı.
17 7Qon'sı hayallar: «Nag'ıyma ullı boldı», – dep, balag'a at qoyıp, onı Obid dep atadı. Obid İshaydın' a'kesi, İshay Dawıttın' a'kesi boldı.
18 Perestin' shejiresi mınaday: Peresten Xesron tuwıldı,
19 Xesronnan Ram tuwıldı, Ramnan Amminadab tuwıldı,
20 Amminadabtan Naxshon tuwıldı, Naxshonnan Salmon tuwıldı,
21 Salmonnan Boaz tuwıldı, Boazdan Obid tuwıldı,
22 Obidten İshay tuwıldı, İshaydan Dawıt tuwıldı.
