Biyler 5 bob
1 Debora menen Abinoam ulı Baraq sol ku'ni bılay jırladı:
2 «İzrail ko'semleri basshılıq qılg'anda, Xalıq pida'kerlik penen atlang'anda, Jaratqan İyeni alg'ıslan'lar!
3 Tın'lan'lar, sizler, ha'y patshalar! Ha'y to'reler, qulaq salın'lar! Jaratqan İyeni jırlayman, İzraildın' Qudayı Jaratqan İyeni saz shertip alg'ıslayman.
4 Seirden shıqqanın'da, Jaratqan İye, Edom jerinen ju'ris qılg'anın'da, Jer silkindi, aspannan jawın quydı. Awa, bultlar jawın quydırdı.
5 Tawlar Jaratqan İyenin' aldında titiredi, Ha'tteki, titiredi Sinay tawı, İzraildın' Qudayı Jaratqan İyenin' aldında.
6 Anat ulı Shamgardın' da'wirinde, Yaeldin' zamanında ka'rwanlar ju'rmey qaldı, Jolawshılar aylanba joldan ju'retug'ın boldı.
7 Men İzrailda ana bolıp, ortag'a shıqpag'anımsha, Men, Debora ortag'a shıqqang'a deyin, İzrail awılları bosap qaldı.
8 İzraillılar jan'a qudaylardı tan'lag'anda, Urıs qalanın' da'rwazasına tireldi, İzraildın' qırıq mın' a'skerinin' qolında, Qalqan da, nayza da ko'rinbedi.
9 Ju'regim İzraildın' basshıları menen, Ha'm xalıq arasındag'ı pida'kerler menen birge, Jaratqan İyeni alg'ıslan'lar!
10 Ha'y, aq eshek mingenler, Ha'y, gilem u'stinde otırg'anlar, Ha'y, jolda jayaw ju'riwshiler, tın'lan'lar!
11 Qudıqlardın' basındag'ı alaman dawısı, Jaratqan İyenin' jen'islerin, İzrail a'skerlerinin' jen'islerin an'latar: „Sonda Jaratqan İyenin' xalqı, Qala da'rwazalarına qaray ju'ris qıldı.
12 Oyan, Debora, oyan, Oyan, jırın'dı ayt, oyan! Ha'y, Abinoam ulı Baraq, Ornın'nan tur, alıp ju'r tutqınların'dı“.
13 Aman qalg'anlar sa'rka'rdalarının' janına keldi, Jaratqan İyenin' xalqı batırları menen mag'an keldi.
14 Amalek jerindegi Efrayımnan keldi, Benyaminliler de sag'an erdi. Maxir a'wladınan keldi basshılar, Zebulonnan keldi sa'rka'rdalıq hasasın uslag'anlar.
15 Birge edi İssaxar basshıları Debora menen, İssaxar urıwı da Baraqtın' izinen, Oypatlıqqa tu'sti asıg'ıslıq penen. Biraq Ruben urıwının' tiyreleri, Ku'shli ekileniwshilik ishinde qaldı.
16 Ne ushın qaldın'ız su'riwler arasında? Shopanlardın' qoylardı shaqırg'anın esitiw ushın ba? Biraq Ruben urıwının' tiyreleri, Ku'shli ekileniwshilik ishinde qaldı.
17 Giladlılar İordan da'ryasının' arg'ı jag'ında qaldı, Ne ushın Dan urıwı kemeler janında qaldı? Asher urıwı ten'iz jag'asında qaldı, O'z jag'ıslarına ma'kan bastı.
18 Biraq Zebulon ha'm Naftaliy xalqı, Janların o'limge tikti maydannın' biyik jerlerinde.
19 Sonda patshalar kelip urıstı, Taanaxta ha'm Megiddo suwları jag'asında, Kenaan patshaları urıstı, Biraq gu'mis te, olja da almadı.
20 Sawashqa tu'sti juldızlar aspannan, Siserag'a qarsı urıstı, ju'rip olar aspandag'ı o'z jolınan.
21 Kishon da'ryası, ha'y, eski da'rya, Ag'ısıp ketti olardı, Ha'y janım, ku'sh-quwatqa tolıp, alg'a bas.
22 Keldi sonda atlar du'sirlep, Ku'shli atlardın' tuyaqları, Qaldırdı izlerin jerde.
23 Jaratqan İyenin' perishtesi bılay dedi: „Na'letlen'ler, Meroz qalasın, Na'letler aytın', onın' xalqına. Ja'rdemge kelmegeni ushın Jaratqan İyege, Batırlarg'a qarsı urısıw ushın“.
24 Ken tiyresinen bolg'an Xeberdin' hayalı Yael, Hayallar arasında mol-mol etip jarılqansın, Shatırlarda jasaytug'ın hayallar arasında, Mol-mol etip jarılqansın.
25 Suw sorag'anda su't berdi, Hasıl kesede qatıq usındı.
26 Aldı shep qolına shatır qazıg'ın, On' qolına jumısshının' balg'asın. Urdı Siseranı, ezdi basın, Shekesine qaqtı qazıqtı, Qazıq ta tesip o'tti onın' basın.
27 Jıg'ıldı Sisera onın' ayaqları astına, Qulap, jerde sozılıp jattı. Ol jıg'ılıp, Yaeldin' ayaqları astına, Jıg'ılg'an jerinde jansız qaldı.
28 Siseranın' anası tereze artınan, Zarlandı bılay dep, pa'njireden qarap: „Ulımnın' sawash arbası, Keshikti nege bunshelli? Esitilmeydi nege elege deyin, Sawash arbalarının' sesleri?“
29 Juwap berer og'an janındag'ı dana hayalları. Anası da o'zin jubatıp bılay der:
30 „Mu'mkin, olar oljanı bo'lisip atırg'an shıg'ar, Ha'r jigittin' payına bir-eki qızdan. Siserag'a oljadan ren'li kiyimler, Awa, oljadan tu'sken ra'n'ba'ra'n' kiyimler, Olja alg'annın' ha'r birine, Eki ra'n'ba'ra'n' etip kestelengen kiyimler tiyisken shıg'ar“.
31 Jaratqan İye! Barlıq dushpanların' usılay joq bolsın. Seni su'ygenler bolsa, Pu'tkil qu'direti menen shıqqan quyash yan'lı bolsın!» Sonnan keyin, el qırıq jıl paraxatshılıqta jasadı.
