2 Korinfliler 7 bob
1 Solay etip, su'yikli tuwısqanlarım, usınday wa'delerge iye bolg'anımız sebepli, denemizdi ha'm ruwxımızdı iplaslaytug'ın ha'r bir na'rseden o'zlerimizdi tazalayıq. Qudaydan qorqıp jasap, minsiz muxaddeslikke jetilisip barayıq.
2 Bizlerge ju'reklerin'izdi ken' ashın'lar. Bizler hesh kimge jamanlıq islemedik, hesh kimdi joldan azg'ırmadıq, hesh kimdi aldap, haqısın jemedik.
3 Bunı sizlerdi ayıplaw ushın aytıp atırg'an joqpan. O'ytkeni burın aytqanımday, sizler bizlerdin' ju'regimizdesiz. Sizler menen birge o'liwge de, jasawg'a da qayılmız.
4 Menin' sizlerge degen isenimim ku'shli ha'm men sizler menen ko'p maqtanaman. Qıyınshılıqlarımız ko'p bolsa da, men sizler sebepli sheksiz quwanısh alıp, jubanıshqa bo'lendim.
5 Bizler Makedoniyag'a kelgenimizden keyin de denemiz hesh tınısh tappay, ha'r ta'repleme qıyınshılıq ko'rdik: sırtta ja'njel, ju'regimizde qorqınısh bar edi.
6 Biraq, ruwxı tu'sken adamlarg'a jubanısh beriwshi Quday Titustın' sizler betten qaytıp kelgeni arqalı bizlerge jubanısh berdi.
7 Bizler tek onın' qaytıp kelgeni arqalı emes, al sizlerdin' og'an bergen jubanıshın'ız arqalı da jubanısh aldıq. Titus bizlerge sizlerdin' meni qanshelli sag'ıng'anın'ızdı, qılg'an is-ha'reketlerin'iz sebepli o'kinip atırg'anın'ızdı ha'm meni jaqlawg'a urınıp atırg'anın'ızdı aytıp bergende, men onnan beter quwanıp kettim.
8 Men jazg'an xatım menen sizlerdi qapa qılg'an bolsam da, o'kinbeymen. Sol xatımnın' sizlerdi az-maz waqıtqa qapa qılg'anın bilgenimde, men o'kingen edim.
9 Biraq, endi quwanıp atırman. Men sizlerdin' qapa bolg'anın'ızg'a emes, al bul qapashılıqtın' sizlerdi ta'wbege a'kelgenine quwanıp atırman. Bul qapashılıq Qudaydın' qa'lewi boyınsha bolg'anlıqtan, sizler bizler sebepli hesh qanday zıyan ko'rmedin'ler.
10 Sebebi Qudaydın' qa'lewi menen berilgen qapashılıq adamdı ta'wbege alıp keledi ha'm adam bul arqalı qutqarılıw aladı. Bunday qapashılıq o'kiniw alıp kelmeydi. Biraq, du'nyanın' qapashılıg'ı o'limge alıp baradı.
11 Qaran'lar, Qudaydın' qa'lewi menen bolg'an bul qapashılıq sizlerde qanshelli inta, o'z pa'kligin'izdi da'lillewge qattı umtılıw, nahaqlıqqa degen ku'shli g'a'zep, qanshelli qorqınısh, mag'an degen sonshelli sag'ınısh, qanshelli talpınıw ha'm ayıpker adamdı jazalawg'a ku'shli tilek oyattı. Sizler sol iste o'zlerin'izdin' ha'r ta'repleme pa'k ekenin'izdi ko'rsettin'iz.
12 Sizlerge bunnan aldın'g'ı xattı jazg'anımda, nahaqlıq islegen adam yamasa nahaqlıqtan ja'bir ko'rgen adam sebepli jazg'an joqpan. Al, sizlerdin' bizlerge degen ıqlasın'ızdın' Quday aldında ayan bolıwı ushın jazg'an edim.
13 Bizler bulardın' ha'mmesi arqalı jubanısh taptıq. Jubanıshımızg'a qosımsha Titustın' quwanıshı bizlerdi onnan da ko'birek quwandırdı. O'ytkeni sizlerdin' ha'mmen'iz onın' ruwxın ko'teripsiz.
14 Men sizlerdi onın' aldında maqtag'an edim, sizler meni uyatqa qaldırmadın'lar. Sizlerge aytqan ha'r bir so'zimiz haqıyqat bolg'anı sıyaqlı, sizlerdi Titusqa aytıp maqtag'an so'zlerimiz de haqıyqat bolıp shıqtı.
15 Ol ha'mmen'izdin' so'zge boysınatug'ının'ızdı, o'zin hu'rmet ha'm izzet penen qabıl alg'anın'ızdı eske alıp, onın' sizlerge degen su'yispenshiligi ja'ne de artıp atır.
16 olay etip, men sizlerge ha'r bir iste isene alatug'ınım sebepli quwanaman.
