Mark 5 bob
1 Olar ten'izdin' arg'ı jag'asındag'ı Gadara u'lkesine keldi.
2 İysa qayıqtan tu'skende, da'rriw Onın' qarsı aldınan qa'birlerdin' arası menen kiyatırg'an jawız ruwxqa shalıng'an adam shıqtı.
3 Bul adam qa'birler arasında jasap, onı hesh kim shınjır menen de baylap taslay almag'an edi.
4 Neshe ret shınjırlasa da, kisenlese de, ol ha'r qashan shınjırlardı u'zip, kisenlerdi sındırıp taslaytug'ın edi. Onı boysındırıwg'a hesh kimnin' ku'shi jetpeytug'ın edi.
5 Ol ku'ni-tu'ni qa'birler arasında ha'm tawdın' eteklerinde baqırıp, o'zin taslar menen jaraqatlaytug'ın edi.
6 Uzaqtan İysanı ko'rgen ol juwırıp keldi de, ayag'ına jıg'ılıp:
7 – Qu'diretli Qudaydın' Ulı – İysa! Menin' menen ne jumısın' bar? Quday ushın o'tinemen, meni qıynama! – dep qattı baqırdı.
8 O'ytkeni İysa: «Ha'y, jawız ruwx, bul adamnan shıg'ıp ket!» – degen edi.
9 Sonda İysa onnan: – Atın' kim? – dep soradı. Ol: – Menin' atım u'lken topar, sebebi bizler ko'ppiz, – dedi
10 ha'm o'zlerin bul jerden basqa jaqqa jibermewin o'tinip, Og'an qattı jalındı.
11 Sol jerdegi tawdın' eteginde u'lken shoshqa padası jayılıp ju'rgen edi.
12 Jawız ruwxlar İysag'a jalınıp: – Bizlerdi sol shoshqalarg'a jiber, olarg'a kireyik, – dedi.
13 İysa olarg'a ruxsat etti. Sonda jawız ruwxlar sol adamnan shıg'ıp, shoshqalarg'a kirdi ha'm eki mın'g'a shamalas shoshqa padası juwırısıp, tik jardan ten'izge tu'sti de, batıp ketti.
14 Shoshqa bag'ıwshılar qashıp ketip, qala ha'm awıllarg'a bardı da, bolg'an waqıyanı aytıp berdi. Adamlar ne bolg'anın ko'riw ushın keldi.
15 Olar İysanın' qasına barıp, burın u'lken jin toparı urg'an adamnın' aqılesi kirip, kiyinip otırg'anın ko'rgende qorqıp qalıstı.
16 Bolg'an waqıyanı ko'rgenler jin urg'an adamg'a ha'm shoshqalarg'a ne bolg'anın olarg'a aytıp berdi.
17 Sonda adamlar İysadan olardın' u'lkesinen ketiwin o'tine basladı.
18 İysa qayıqqa mingende, jinnen azat bolg'an adam Og'an: – Senin' menen birge barayın, – dep jalındı.
19 Biraq İysa og'an ruxsat etpey: – U'yin'e, jaqınların'nın' qasına qayt, İyemizdin' sag'an ne islegenin ha'm Onın' sag'an qanday miyrim-sha'pa'a't ko'rsetkenin olarg'a aytıp ber, – dedi.
20 Ol adam sol jerden ketip, İysanın' og'an ne islegenin Dekapoliske barıp ja'riyalay basladı. Esitkenlerdin' ha'mmesi tan' qalıstı.
21 İysa qayıq penen ja'ne arg'ı jag'ag'a o'tkende, a'tirapına ko'p adam jıynaldı. Ol jag'ada turg'anda,
22 Yair atlı ma'jilisxana basshılarının' biri keldi. Ol İysanı ko'rip, ayag'ına jıg'ıldı da:
23 – Kishkene qızım o'lim to'seginde jatır. Sen kelip, onın' u'stine qolın'dı qoy, ol shıpa tawıp, tiri qalsın! – dep qattı jalındı.
24 İysa onın' menen birge ketti. İzine ko'p xalıq erip, tıg'ılıstırıp ju'rdi.
25 Sol jerde on eki jıl boyı qan ketip awırg'an bir hayal bar edi.
26 Ol talay shıpakerlerden ko'p azap shekken edi ha'm pu'tkil mal-mu'lkin sarplag'an bolsa da hesh shıpa tappay, awhalı burıng'ısınan beter bolg'an edi.
27 Hayal İysa haqqında esitip, adamlardın' arası menen Onın' arqa betinen keldi de, kiyimine qolın tiygizdi.
28 O'ytkeni ol ishinen: «Onın' kiyimine g'ana qol tiygizsem, shıpa tabaman», – degen edi.
29 Sol waqıtta-aq hayaldın' qan ketiwi toqtadı ha'm ol denesinin' shıpa tapqanın sezdi.
30 Sonda İysa O'zinen ku'sh shıqqanın da'rriw bilip, xalıqqa burıldı da: – Menin' kiyimime kim qolın tiygizdi? – dep soradı.
31 Sha'kirtleri Og'an: – Xalıqtın' Seni tıg'ılıstırıp kiyatırg'anın ko'rip turıp, nege: «Menin' kiyimime kim qol tiygizdi», – dep soraysan'? – dedi.
32 Biraq İysa bunı kim islegenin ko'riw ushın, a'tirapına qaray basladı.
33 Sonda o'zine ne bolg'anın bilgen hayal qorqıp ha'm qaltırap, Onın' aldına keldi de, ayag'ına jıg'ılıp, bar haqıyqattı aytıp berdi.
34 4 İysa og'an: – Qızım! İsenimin' seni qutqardı. Tınıshlıq penen bara ber, endi da'rtin'nen azap shekpeysen', – dedi.
35 Ol ele usılardı aytıp turg'anda, ma'jilisxana basshısının' u'yinen adamlar kelip: – Qızın'ız o'ldi. Endi nege Ustazdın' tınıshın alıp tursız? – dedi.
36 Biraq İysa bul so'zlerdi esitse de, ma'jilisxana basshısına: – Qorqpa, tek isen, – dedi.
37 İysa O'zine Petr, Yaqıp ha'm onın' inisi Yuxannan basqa hesh kimnin' eriwine ruxsat etpedi.
38 Olar ma'jilisxana basshısının' u'yine kelgende, dawıs shıg'arıp qattı jılasıp turg'an adamlardı ko'rdi.
39 İysa ishke kirip: – Nege qayg'ırıp, jılap tursızlar? Qız o'lgen joq, ol tek uyıqlap atır, – dedi.
40 Olar İysanın' u'stinen ku'ldi. Biraq Ol ha'mmeni shıg'arıp jiberip, O'zi menen birge qızdın' ata-anasın ha'm sha'kirtlerin alıp, qız jatırg'an bo'lmege kirdi.
41 Qızdın' qolınan uslap, og'an: – Talita kumi! – dedi. Bul: «Qızım, sag'an aytaman, tu'rgel», – degendi bildiredi.
42 Qız da'rriw ornınan turıp, ju're basladı: onın' jası on ekide edi. Bunı ko'rgenler qattı tan' qalıstı.
43 İysa olarg'a bul haqqında hesh kimge aytpawların qatan' buyırıp, qızg'a awqat beriwdi tapsırdı.
