Matta 27 bob
1 Tan' atqanda, barlıq bas ruwxaniyler menen xalıq aqsaqalları İysanı o'ltiriw tuwralı ken'esti de,
2 Onı baylatıp, rimli ha'kim Pontiy Pilatqa aparıp tapsırdı.
3 Sonda İysag'a satqınlıq qılg'an Yahuda Onın' jazag'a hu'kim etilgenin ko'rip o'kindi de, alg'an otız gu'mis ten'geni bas ruwxaniyler menen xalıq aqsaqallarına qaytarıp berip:
4 – Men satqınlıq qıldım. Ayıpsız qandı to'ktirip, gu'na isledim, – dedi. Olar og'an: – Bizlerge ne? O'zin' bil, – dedi.
5 Sonda Yahuda gu'misti İbadatxananın' ishine ılaqtırıp tasladı da, sırtqa shıg'ıp ketip, asılıp o'ldi+.
6 Bas ruwxaniyler gu'misti alıp: – Bunı İbadatxana qaznasına salıwg'a bolmaydı, sebebi bul qannın' qunı-g'o, – dedi.
7 Olar o'z ara oylasıp, sol aqshag'a gu'lalshının' egislik jerin satıp aldı da, onı jat jerden kelgenlerdi jerlewge arnadı.
8 Sonlıqtan sol jer usı ku'nge deyin «Qan jeri» dep ataladı.
9 Solay etip, Eremiya payg'ambardın' aldın ala aytqan mına so'zleri orınlandı: «Olar otız gu'mis ten'geni, yag'nıy İzraildın' urpaqları bahalag'an Onın' qunın alıp,
10 Jaratqan İyemnin' mag'an aytqanınday, gu'lalshının' egislik jeri ushın berdi».
11 İysa rimli ha'kimnin' aldında turg'anda, ha'kim Onnan: – Sen Yahudiylerdin' Patshasımısan'? – dep soradı. İysa og'an: – Sol ekenimdi o'zin' ayttın', – dep juwap berdi.
12 Al bas ruwxaniyler menen xalıq aqsaqalları Onı ayıplag'anda, Ol hesh juwap bermedi.
13 Sonda Pilat Og'an: – Sag'an qarsı qanshama gu'walıqlar aytıp atırg'anın esitip turg'an joqsan' ba? – dedi.
14 Biraq İysanın' o'zinin' birde bir so'zine juwap qaytarmag'anına ha'kim qattı hayran qaldı.
15 Qutqarılıw bayramında xalıq sorag'an bir tutqındı bosatıp beriw – ha'kimnin' a'deti edi.
16 Sol waqıtta qamaqta Baraba degen belgili bir jınayatshı bar edi.
17 Xalıq jıynalıp bolg'anda, Pilat olarg'a bılay dedi: – Sizler kimdi bosatıp beriwimdi qa'leysizler? Barabanı ma yamasa Masix dep atalatug'ın İysanı ma?
18 O'ytkeni ol olardın' İysanı o'zine ku'nshillik penen uslap bergenin biletug'ın edi.
19 Pilat hu'kim gu'rsisinde otırg'anda, hayalı og'an mınaday xabar jiberdi: «Sol haq Adamg'a hesh na'rse isleme. Men bu'gin tu'simde Ol sebepli ko'p azap shektim».
20 Bas ruwxaniyler menen xalıq aqsaqalları xalıqtı u'gitlep: – Barabanı bosatıp berip, İysanı o'ltiriwdi talap etin'ler, – dedi.
21 Ha'kim olardan ja'ne: – Sizlerge ekewinin' qaysısın bosatıp beriwimdi qa'leysizler? – dep soradı. Olar: – Barabanı, – dedi.
22 Pilat olarg'a: – Al Masix dep atalatug'ın İysag'a ne isleyin? – dep soradı. Olardın' ha'mmesi de:– Onı atanaq ag'ashqa shegeletip tasla! – dedi.
23 Al Pilat olardan: – Ol qanday jamanlıq isledi, aqırı? – dep soradı. Biraq olar burıng'ısınan beter: – Onı atanaq ag'ashqa shegeletip tasla! – dep baqırıstı.
24 Pilat hesh na'rse isley almaytug'ının ha'm qozg'alan' baslanajag'ın sezip, suw aldı da, xalıqtın' ko'z aldında qolın juwıp: – Bul Adamnın' qanının' to'giliwine men ayıplı emespen, sizler juwapkersiz, – dedi.
25 Pu'tkil xalıq: – Onın' qanı ushın bizler ha'm bizlerdin' balalarımız juwapker bolg'aymız! – dep juwap qaytardı.
26 Sonda Pilat olarg'a Barabanı bosatıp berdi. Al İysanı qamshılatqannan son', atanaq ag'ashqa shegelewge tapsırdı.
27 Sonda ha'kimnin' a'skerleri İysanı ha'kimnin' ha'wlisine alıp barıp, onın' aldına pu'tkil a'skerlerdi jıynadı.
28 Onın' kiyimlerin sheship, u'stine shım qızıl shapan kiygizdi de,
29 tikenli shıbıqlardan taj o'rip, Onın' basına saldı. On' qolına qamıs tayaqtı uslattı da, Onın' aldında dizelerin bu'gip: – Jasasın, Yahudiylerdin' Patshası! – dep mazaq etti.
30 Og'an tu'kirip, qamıstı alıp, Onın' basına urdı.
31 Onı mazaq qılıp bolg'annan son', u'stindegi shım qızıl kiyimdi sheship alıp, Og'an O'z kiyimin kiygizdi de, atanaq ag'ashqa shegelew ushın alıp ketti.
32 A'skerler shıg'ıp baratırg'anda Simon atlı bir kireneli adamdı ushıratıp, onı İysanın' atanaq ag'ashın arqalap alıp ju'riwge ma'jbu'rledi.
33 Golgota dep atalg'an, yag'nıy «Bas su'yek ornı» degendi an'latatug'ın jerge kelgende,
34 olar İysag'a o't qosılg'an sharaptı ishiwge berdi, biraq Ol tatıp ko'rip, ishiwden bas tarttı.
35 Onı atanaq ag'ashqa shegelep bolg'annan son' shek taslasıp, kiyimlerin o'z ara bo'listi,
36 son'ınan otırıp, Onı qarawılladı.
37 Onın' ayıbın ko'rsetetug'ın: «BUL – YAHUDİYLERDİN' PATSHASI İYSA» degen jazıwdı bas betindegi ag'ashqa qag'ıp qoydı.
38 İysa menen birge eki qaraqshını da, birewin on' ta'repine, ekinshisin sol ta'repine atanaq ag'ashlarg'a shegeledi.
39 İysanın' janınan o'tip baratırg'anlar basların shayqadı ha'm Onı mazaq etip:
40 – Ha'y, İbadatxananı buzıp, Onı u'sh ku'nnin' ishinde qayta tikleyjaq bolg'an, Sen! Eger Sen Qudaydın' Ulı bolsan', qa'nekey, O'zin'di O'zin' qutqar! Atanaq ag'ashtan tu'sip ko'rshi! – desti.
41 Bas ruwxaniyler, diniy mug'allimler ha'm aqsaqallar da Onın' u'stinen ku'lip bılay dedi:
42 – Bul basqalardı qutqarıp, O'zin O'zi qutqara almaydı. Eger Ol İzraildın' Patshası bolsa, ha'zir atanaq ag'ashtan tu'ssin. Sonda bizler Og'an isenermiz.
43 Ol Qudayg'a arqa su'yep tur. Eger Quday qa'lese, ha'zir Onı qutqarsın. Sebebi Ol: «Men Qudaydın' Ulıman», – degen edi-g'o.
44 İysa menen birge atanaq ag'ashqa shegelengen qaraqshılar da Onı usılay mazaq etti.
45 Tu'ski saat on ekiden baslap, tu'sten keyin saat u'shke deyin, pu'tkil jerdi qaran'g'ılıq qaplap turdı.
46 Saat u'shler shamasında İysa qattı dawıs penen: – Eli, Eli! Lama sabaxtani? (Yag'nıy: «Qudayım, Qudayım! Nege Meni taslap kettin'?») – dep baqırdı.
47 Sol jerde turg'anlardın' geybirewleri bunı esitip: – Ol İliyastı shaqırıp atır, – desti.
48 Da'rriw olardın' birewi juwırıp barıp, bir sorg'ıshtı sirke suwına sin'dirdi de, onı tayaqqa qadap, Og'an ishiwge berdi.
49 Al basqaları: – Toqtay tur, İliyas kelip, Onı qutqarar ma eken, ko'reyik, – desti.
50 İysa ja'ne qattı dawıslap baqırdı da, jan tapsırdı.
51 Sol waqıtta-aq İbadatxananın' Muxaddesxanasındag'ı perde joqarıdan to'menge deyin qaq ayırılıp, ekige bo'lindi. Jer silkinip, jartaslar jarıldı.
52 Qa'birler ashılıp, jatırg'an muxaddes adamlardın' ko'bisi qayta tirildi.
53 İysa qayta tirilgennen keyin, olar qa'birlerinen shıg'ıp, muxaddes qalag'a bardı ha'm ko'p adamlarg'a ko'rindi.
54 Jer silkiniwdin' ha'm basqa waqıyalardın' bolg'anın ko'rgen ju'zbası ha'm onın' menen birge İysanı qarawıllag'anlar qattı qorqısıp: – Bul haqıyqattan da, Qudaydın' Ulı eken! – desti.
55 Sol jerde uzaqtan qarap turg'an ko'p hayallar da bar edi, olar İysanın' izine Galiladan erip kelip, Og'an xızmet etken edi.
56 Olardın' arasında magdalalı Ma'riyam, Yaqıp penen Yusuptın' anası Ma'riyam ha'm Zebedeydin' ullarının' anası da bar edi.
57 Kesh bolg'anda, Arimatiyadan Yusup atlı bir bay adam keldi. Ol da İysanın' sha'kirti edi.
58 Ol Pilatqa barıp, İysanın' denesin soradı. Pilat og'an beriwdi buyırdı.
59 Yusup deneni alıp, onı taza kepinlikke oradı da,
60 o'zinin' jartasta oyılg'an jan'a qa'birine aparıp qoydı. Son'ınan u'lken bir tastı domalatıp, qa'birdin' awzına qoydı da, sol jerden ketip qaldı.
61 Magdalalı Ma'riyam menen basqa Ma'riyam sol jerde, qa'birdin' qarsısında otırg'an edi.
62 Kelesi ku'ni, yag'nıy yahudiylerdin' tayarlıq ku'ninen keyingi dem alıs ku'ni bas ruwxaniyler menen pariseyler Pilattın' aldına jıynalıp,
63 og'an: – Taqsır! Ana o'tirikshinin' tiri waqtında: «Men u'sh ku'nnen keyin qayta tirilemen», – degeni esimizge tu'sti.
64 Sonlıqtan da, sha'kirtleri tu'nde kelip, Onı urlap alıp ketip, xalıqqa: «Ol o'limnen qayta tirildi», – dep aytpawı ushın, Onın' qa'birin u'sh ku'nge deyin qarawıllawg'a buyrıq berin'. Olay etpesek, son'g'ı jalg'an burıng'ısınan da beter boladı, – dedi.
65 Pilat olarg'a: – Saqshılar bar-g'o. Barıp, qa'birdi o'z bilgenlerin'izshe gu'zetin'ler, – dedi.
66 Olar barıp, tasqa mo'r bastı da, qa'birge saqshı qoydı.
