Matta 19 bob
1 İysa usı so'zlerdi aytıp bolg'annan son' Galiladan jolg'a shıg'ıp, İordannın' arg'ı jag'asındag'ı Yahudiya u'lkesine bardı.
2 Onın' izine ko'p xalıq erdi, Ol sol jerde olarg'a shıpa berdi.
3 İysanın' qasına pariseyler kelip, Onı sınap ko'riw ushın: – Er adamnın' ha'r qıylı sebep penen hayalınan ajırasıwı nızamg'a tuwrı kele me? – dep Onnan soradı.
4 İysa olarg'a juwap qaytarıp bılay dedi: – Jaratıwshı en' basta olardı erkek ha'm hayal qılıp jaratqanın* sizler oqımag'ansızlar ma?
5 Ja'ne Ol bılay degen: «Sonlıqtan er adam ata-anasın qaldırıp, o'z hayalına qosıladı ha'm ekewi bir dene boladı».
6 Solay etip, olar endi eki emes, al bir dene boladı. Sol sebepli, Quday qosqanlardı adam ajıratpasın.
7 Olar İysag'a: – Sonda nege Muwsa payg'ambar er adamnın' hayalına talaq xat berip ajırasıwın buyırg'an? – dedi.
8 İysa olarg'a: – Muwsa sizler tas bawır bolg'anlıqtan, hayalların'ız benen ajırasıwg'a ruxsat bergen. Biraq basta olay emes edi.
9 Menin' sizlerge aytatug'ınım: kim de kim o'z hayalı menen nekege hadalsızlıg'ınan basqa sebep penen ajırasıp, basqa hayal alsa, ol neke hadallıg'ın buzg'an boladı, – dedi.
10 Sonda İysanın' sha'kirtleri Og'an: – Eger er adamnın' hayalına degen wazıypası usınday bolsa, onda u'ylenbegennin' o'zi jaqsıraq-g'o, – dedi.
11 İysa olarg'a: – Bunı ha'r bir adam qabıl ete almaydı, biraq kimge Qudaydan berilse, sol g'ana qabıl ete aladı.
12 O'ytkeni u'ylenbeytug'ın ha'r tu'rli adamlar bar: geybirewleri aqta bolıp tuwıladı, geybirewlerin adamlar aqta qılıp taslaydı, al bazıları Aspan Patshalıg'ına xızmet etiw ushın o'z erki menen u'yleniwden bas tartadı. Kim bul so'zdi qabıl ete alsa, sol qabıl etsin, – dedi.
13 Sol waqıtta adamlar İysag'a olardın' u'stine qolın qoyıp duwa etsin dep, balaların alıp keldi. Al sha'kirtler olarg'a keyidi.
14 Biraq İysa: – Balalardın' Mag'an keliwine ruxsat berin'ler, olarg'a tosqınlıq jasaman'lar. Sebebi Aspan Patshalıg'ı usındaylardiki, – dedi.
15 Son'ınan Ol balalardın' u'stine qolın qoyıp duwa etti de, sol jerden ketip qaldı.
16 Sonda bir jigit İysadan: – Ustaz! Ma'n'gilik o'mirge iye bolıwım ushın qanday iygilikli isler islewim kerek? – dep soradı.
17 İysa og'an: – Sen nege Mennen iygilik haqqında soradın'? Tek Quday g'ana iygilikli-g'o. Al ma'n'gilik o'mirge eriskin' kelse, Onın' buyrıqların orınla, – dedi.
18 Jigit İysadan: – Qanday buyrıqlardı? – dep soradı. İysa: – «Adam o'ltirme, neke hadallıg'ın buzba, urlıq isleme, jalg'an gu'walıq berme,
19 ata-anan'dı hu'rmetleha'm o'zin'di su'ygenin' sıyaqlı, janın'dag'ı adamdı da su'y!», – dedi.
20 Jas jigit Og'an: – Men bulardın' ha'mmesin orınlap kiyatırman, ja'ne ne jetispeydi? – dedi.
21 İysa og'an: – Eger minsiz bolg'ın' kelse, barıp barlıq mal-mu'lkin'di satıp, aqshasın jarlılarg'a ber. Sonda senin' g'a'ziynen' aspanda boladı. Son'ınan kelip, Menin' izime er, – dedi.
22 Bul so'zlerdi esitken jas jigit qapa bolıp, sol jerden ketip qaldı. O'ytkeni onın' baylıg'ı ko'p edi.
23 İysa O'z sha'kirtlerine: – Sizlerge shının aytıp turman: bay adamnın' Aspan Patshalıg'ına kiriwi qıyın.
24 Tag'ı sizlerge aytatug'ınım: bay adamnın' Quday Patshalıg'ına kiriwinen go're, tu'yege iynenin' ko'zinen o'tiw an'satıraq, – dedi.
25 Bunı esitken sha'kirtleri qattı tan' qalısıp: – Olay bolsa, kim qutqarıla aladı? – dep soradı.
26 Al İysa olarg'a qarap: – Bul adamlardın' qolınan kelmeydi, biraq Quday ushın mu'mkin emes na'rse joq, – dedi.
27 Sonda Petr juwap qaytarıp, Og'an: – Minekey, bizler ha'mme na'rsemizdi taslap, Senin' izin'e erdik. Bizler nege erisemiz? – dedi.
28 İysa olarg'a: – Sizlerge shının aytıp turman: du'nya jan'alang'annan son', Adam Ulı O'zinin' saltanatlı taxtına otırg'anda, Menin' izime erip ju'rgen sizler de on eki taxtqa otırıp, İzrail xalqının' on eki urıwın hu'kim etesizler.
29 Sonda Menin' atım ushın o'z u'ylerin, ya ag'a-inilerin, ya apaqarındasların, ya ata-anasın, ya balaların, ya jer-mu'lkin taslap shıqqan ha'r kim ju'z ese artıg'ı menen aladı ha'm ma'n'gilik o'mirge iye boladı.
30 Biraq birinshilerdin' ko'bisi son'g'ılar, son'g'ılardın' ko'bisi birinshiler boladı, – dedi.
