Matta 18 bob

Aspan Patshalıg'ında en' ullı kim? (1-11), Joytılg'an qoy tuwralı tımsal (12-14),Joytılg'an qoy tuwralı tımsal  (15-20),Rehimsiz xızmetshi tuwralı tımsal(21-35).

1 Sol waqıtta sha'kirtleri İysanın' janına kelip: – Aspan Patshalıg'ında en' ullı kim? – dep soradı.
2 İysa bir balanı shaqırıp alıp, onı olardın' ortasına turg'ızıp qoyıp bılay dedi:
3 – Sizlerge shının aytıp turman: kewillerin'izdi o'zgertip, balalar sıyaqlı bolmasan'lar, Aspan Patshalıg'ına kire almaysızlar.
4 Solay etip, kim de kim o'zin usı bala sıyaqlı pa's tutsa, sol Aspan Patshalıg'ında en' ullı boladı.
5 Al kim de kim mınaday bir balanı Menin' atım ushın qabıl etse, onın' Meni qabıl etkeni boladı.
6 Biraq kim de kim Mag'an isenip turg'an mına kishkenelerdin' birewin azg'ırsa, onın' moynına u'lken digirman tası baylanıp, teren' ten'izdin' tu'bine batırılg'anı og'an jaqsıraq bolar edi.
7 Adamlardı azg'ırıwshı na'rseler sebepli, du'nya ha'siret shegedi! Azg'ırıwshı na'rselerdin' bolıwı so'zsiz, biraq azg'ırıw kim arqalı kelse, sol adam ha'siret shegedi!
8 Eger seni qolın' yamasa ayag'ın' azg'ırsa, onı shawıp tasla. Eki qolın' menen yamasa eki ayag'ın' menen ma'n'gilik otqa taslang'anın'nan go're, bir qolın' yamasa ayag'ın' menen o'mirge eriskenin' o'zin'e jaqsıraq.
9 Eger seni ko'zin' azg'ırsa, onı oyıp tasla. Eki ko'zin' menen dozaq otına taslang'anın'nan go're, jalg'ız ko'zin' menen o'mirge eriskenin' o'zin'e jaqsıraq.
10 Abaylan'lar, mına kishkenelerdin' hesh qaysısın da kemsitiwshi bolman'lar!
11 Sebebi sizlerge aytatug'ınım: olardın' aspandag'ı perishteleri aspandag'ı A'kemnin' ju'zin ha'mme waqıt ko'rip turadı.
12 – Sizler qalay oylaysızlar? Eger birewdin' ju'z qoyı bolıp, onın' birewi joytılıp ketse, ol toqsan tog'ız qoyın tawda qaldırıp, joytılg'an bir qoyın izlemes pe edi?
13 Sizlerge shının aytıp turman: eger onı tawıp alsa, joytılmag'an toqsan tog'ız qoyınan go're, tawıp alg'an jalg'ız qoyına ko'birek quwanadı.
14 Sol sıyaqlı, sizlerdin' aspandag'ı A'ken'iz mına kishkenelerdin' birewinin' de joytılıwın qa'lemeydi
15 – Eger tuwısqanın' sag'an qarsı gu'na islese, og'an bar da, awlaqta so'ylesip, ayıbın betine ashıq ayt. Eger ol so'zin'di tın'lasa, onda tuwısqanın'dı o'zin'e qaytarıp alg'anın' boladı.
16 Eger ol so'zin'di tın'lamasa, o'zin' menen birge bir yamasa eki adamdı ertip og'an bar, o'ytkeni aytılg'an barlıq so'zlerin'e eki yamasa u'sh gu'wa bolıwı tiyis.
17 Eger olardın' da so'zin tın'lag'ısı kelmese, onda iseniwshiler ja'ma'a'tine ayt. Al iseniwshiler ja'ma'a'tin de tın'lag'ısı kelmese, onda onı butqa tabınıwshı ha'm salıqshı dep sana.
18 Sizlerge shının aytıp turman: sizler jer betinde neni baylasan'ız, sol aspanda da baylanadı, ja'ne de, sizler jer betinde neni sheshsen'iz, sol aspanda da sheshiledi.
19 Sizlerge ja'ne shının aytaman: jer betinde sizlerdin' ekewin'iz kelisip ne sorasan'ız, aspandag'ı A'kem sonı beredi.
20 Sebebi qay jerde eki yamasa u'sh adam Menin' atım menen jıynalsa, Men olar menen birgemen.
21 Sonda Petr İysag'a kelip: – İyem, mag'an qarsı gu'na islegen tuwısqanıma neshe ret keshirim bersem boladı? Jeti retke deyin be? – dep soradı.
22 İysa og'an: – Sag'an jeti retke deyin emes, al jetpis jerdegi jeti retke deyin keshirim et, deymen.
23 Solay etip, Aspan Patshalıg'ı o'z xızmetshileri menen qarızın esaplasqısı kelgen bir patshag'a uqsaydı.
24 Ol esaplasa baslag'anda, onın' aldına onnan on mın' talant qarızdar bolg'an birewdi alıp kelipti.
25 Biraq ol qarızın to'ley almaytug'ın bolg'anlıqtan, patsha og'an onın' o'zi menen qosıp hayalın, balaların ha'm barlıq mal-mu'lkin satıp, qarızın to'lewdi buyırıptı.
26 Sonda xızmetshi onın' ayag'ına jıg'ılıp: «Taqsır, shıdap turın', men barlıq qarızımdı to'leymen!» – dep jalınıptı.
27 Xızmetshige janı ashıg'an patsha onı bosatıp, qarızınan keshipti.
28 Al xızmetshi sırtqa shıg'ıp, o'zine ju'z dinar qarızdar bolg'an bir xızmetshi joldasın ushıratıp: «Mag'an beretug'ın qarızın'dı ber», – dep onı buwındıra baslaptı.
29 Sonda onın' joldası ayag'ına jıg'ılıp: «Shıdap tur, men qarızımdı to'leymen», – dep jalınıptı.
30 Biraq ol joldasının' so'zin tın'lamay, o'zine beretug'ın qarızın to'lemegenshe, onı qamattırıp taslaptı.
31 Onın' basqa xızmetshi joldasları bul waqıyanı ko'rip, qattı qapa bolıptı ha'm patshag'a barıp, bolg'an istin' ba'rin aytıp beripti.
32 Sonda patsha onı shaqırtıp alıp, og'an: «Ha'y, jawız xızmetshi! Sen mag'an jalıng'anın' sebepli g'ana barlıq qarızın'nan keshken edim.
33 Menin' sag'an rehim etkenimdey, senin' de o'z joldasın'a rehim etiwin' tiyis emes pe edi?» – depti.
34 Patsha qa'ha'rlenip, o'zine beriletug'ın qarızdın' ba'rin to'lep bolmag'ansha, onı jazalawshılardın' qolına tapsırıptı.
35 Eger sizlerdin' ha'r birin'iz tuwısqanın'ızdın' gu'nasın shın kewlin'izden keshirmesen'ler, Menin' aspandag'ı A'kem de sizlerge solay isleydi, – dedi.



Muhaddes Kitap. Injil

Matto Muqaddas xushxabar  Mark Muqaddas xushxabar  Luqo Muqaddas xushxabar  Yuhanno Muqaddas xushxabar  Havoriylarning faoliyati  Yoqubning maktubi  Butrusning birinchi maktubi  Butrusning ikkinchi maktubi  Yuhannoning birinchi maktubi  Yuhannoning ikkinchi maktubi  Yuhannoning uchinchi maktubi  Yahudoning maktubi  Rimliklarga maktub  Korinfliklarga birinchi maktub  Korinfliklarga ikkinchi maktub  Galatiyaliklarga maktub  Efesliklarga maktub  Filippiliklarga maktub  Kolosaliklarga maktub  1-Salonikaliklarga  2-Salonikaliklarga  Timo'tiyga birinchi maktub  Timo'tiyga ikkinchi maktub  Titusga maktub  Filimo'nga maktub  Ibroniylarga maktub  Yuhannoga ko'rsatilgan vahiy

Sharhlar


Sebebi Quday bul du'nyanı sonshelli su'ygenlikten, O'zinin' jalg'ız Ulın berdi. Onın' Ulına isengen ha'r bir adam nabıt bolmay, ma'n'gilik o'mirge iye boladı
Юхан 3:16