Matta 12 bob
1 Sonda bir dem alıs ku'ni İysa biyday atızının' arasınan o'tip baratır edi. Sha'kirtleri ash bolıp, biydaydın' masaqların u'zip alıp jey basladı.
2 Bunı pariseyler ko'rip, Og'an: – Qara, Senin' sha'kirtlerin' dem alıs ku'ninde islewge bolmaytug'ın isti islep atır, – dedi.
3 İysa olarg'a: – O'zi de, qasındag'ılar da ash bolg'anda, Dawıttın' ne islegenin sizler oqımag'ansızlar ma?
4 Ol Qudaydın' U'yine kirip, ruwxaniylerden basqa o'zine de, qasındag'ılarg'a da jewge bolmaytug'ın, Qudayg'a arnalg'an nanlardı jegen emes pe?
5 Dem alıs ku'ninde ruwxaniyler İbadatxanada dem alıs ku'ni haqqında Muxaddes Nızamdı buzsa da gu'nasız bolatug'ınların Muxaddes Nızamda oqımag'ansızlar ma?
6 Sizlerge aytatug'ınım: bul jerde İbadatxanadan da ullı Birew bar.
7 Eger sizler: «Men qurbanlıq emes, al miyrim-sha'pa'a't tileymen», – degen so'zdin' ma'nisin tu'sinsen'ler, gu'nasızlardı ayıplamas edin'ler.
8 Adam Ulı dem alıs ku'ninin' de iyesi, – dedi.
9 İysa ol jerden ketip, olardın' ma'jilisxanasına kirdi.
10 Sol jerde bir qolı la'n' adam bar edi. Pariseyler İysanı ayıplamaqshı bolıp, Og'an bılay dep soraw qoydı: – Dem alıs ku'ninde awırıw adamg'a shıpa beriw nızamg'a tuwrı kele me?
11 İysa olarg'a: – Sizlerdin' aran'ızdag'ı birin'izdin' jalg'ız g'ana qoyı bolsa, ol dem alıs ku'ni bir shuqırg'a tu'sip ketkende, onı shıg'arıp almay ma?
12 Adam qoydan go're, anag'urlım artıq emes pe? Demek, dem alıs ku'ni jaqsılıq islew nızamg'a tuwrı keledi, – dedi.
13 Son'ınan Ol qolı la'n' adamg'a: – Qolın'dı soz! – dedi. Adam qolın sozg'anda, ekinshisindey sap-saw bolıp qaldı.
14 Sonda pariseyler sırtqa shıg'ıp, İysanı joq qılıw tuwralı til biriktire basladı.
15 Biraq İysa bunı bilip, sol jerden ketip qaldı. Onın' izine ko'p xalıq erip ju'rdi. Ol awırıwlardın' ha'mmesine shıpa berip,
16 O'zinin' kim ekenligin ashıq aytıwdı olarg'a qadag'an etetug'ın edi.
17 Bul Qudaydın' İyshaya payg'ambar arqalı aytqan so'zlerinin' orınlanıwı ushın boldı:
18 «Bul – tan'lap alg'an Xızmetshim, Kewlim unatqan Su'yiklim. Men O'z Ruwxımdı Og'an beremen. Ol ha'mme xalıqlarg'a a'dillikti ja'riyalaydı.
19 Tartıspaydı da, baqırmaydı da, Onın' dawısı ko'shelerde esitilmeydi.
20 A'dillik jen'iske erispegenshe, Ol bu'gilgen qamıstı sındırmaydı Ha'm pısqıp turg'an pilikti o'shirmeydi.
21 Xalıqlar Onın' atınan u'mit etip jasaydı».
22 Sol waqıtta adamlar İysag'a jin urıp, gu'n' ha'm soqır bolg'an adamdı alıp keldi. İysa og'an shıpa bergenlikten, gu'n'-soqırdın' ko'zi ashılıp, so'yley basladı.
23 Adamlardın' ha'mmesi qattı tan' qalısıp: – Dawıttın' Urpag'ı – Usı emes pe eken? – desti.
24 Bunı esitken pariseyler: – Ol jinlerdi tek jinlerdin' baslıg'ı Belzebu'l-shaytannın' ku'shi menen g'ana quwıp shıg'arıp ju'r, – desti.
25 Al İysa olardın' oyların bilip, bılay dedi: – O'z ara qarsı bolıp bo'lingen ha'r bir patshalıq joq boladı, o'z ara qarsı bolıp bo'lingen ha'r bir qala yamasa u'y qulaydı.
26 Al eger shaytan o'zin o'zi quwıp shıg'arsa, onda onın' o'z ara qarsı bolıp bo'lingeni boladı. Olay bolsa, onın' patshalıg'ı qalay saqlanadı?
27 Eger Men jinlerdi Belzebu'lshaytannın' ku'shi menen quwıp shıg'aratug'ın bolsam, onda sizlerdin' sha'kirtlerin'iz olardı kimnin' ku'shi menen quwıp shıg'arıp ju'r? Solay etip, olar sizlerdin' nadurıs ekenin'izdi a'shkaralaydı.
28 Biraq Men jinlerdi Qudaydın' Ruwxı menen quwıp shıg'aratug'ın bolsam, onda sizlerge Quday Patshalıg'ının' jetip kelgeni.
29 Kim da'slep ku'shli adamdı baylap taslamay turıp, onın' u'yine kirip, mal-mu'lkin tartıp a'kete aladı? Tek onı baylag'annan keyin g'ana onın' u'yin tonay aladı-g'o.
30 Kim de kim Menin' menen birge bolmasa, ol Mag'an qarsı. Kim de kim Menin' menen birge jıynamasa, ol shashadı.
31 Sonlıqtan sizlerge aytatug'ınım: adamlar ha'r qanday gu'na islese de, til tiygizse de keshiriledi, biraq Muxaddes Ruwxqa til tiygizse, keshirilmeydi.
32 Kim de kim Adam Ulına qarsı bir so'z aytsa, keshiriledi, biraq Muxaddes Ruwxqa qarsı so'ylegen ha'zir de, keleshekte de keshirilmeydi.
33 Terekti jaqsı dep sanasan'lar, miywesin de jaqsı dep sanan'lar, al terekti jaman dep sanasan'lar, miywesin de jaman dep sanan'lar. Sebebi terek miywesinen bilinedi.
34 Ha'y, uwlı jılanlardın' tuqımları! Sizler o'zlerin'iz jaman bola tura, qalay jaqsı so'zler so'yley alasızlar? Adamnın' kewli nege tolıp tassa, awzınan sol shıg'adı-g'o.
35 Jaqsı adam kewlindegi jaqsı g'a'ziynesinen jaqsılıq shıg'aradı, al jaman adam kewlindegi jaman g'a'ziynesinen jamanlıq shıg'aradı.
36 Sizlerge aytatug'ınım mınaw: adamlar aytqan ha'r bir bos so'zi ushın hu'kim shıg'arılatug'ın qıyametqayım ku'ninde juwap beriwleri sha'rt.
37 O'ytkeni sen o'z so'zlerin' menen aqlanasan' da, o'z so'zlerin' ushın ayıplanasan' da.
38 Sonda diniy mug'allimler menen pariseylerdin' geybirewleri İysag'a: – Ustaz! Seni Qudaydın' jibergenligin da'lilleytug'ın ka'ramatlı belgi ko'rsetiwin'di qa'leymiz, – dedi.
39 Biraq İysa olarg'a bılay dep juwap qaytardı: – Jaman ha'm opasız a'wlad ka'ramatlı belgi talap etpekte. Biraq og'an Yunus payg'ambardın' ka'ramatlı belgisinen basqası ko'rsetilmeydi.
40 Yunustın' u'lken balıqtın' ishinde u'sh ku'n, u'sh tu'n bolg'anınday, Adam Ulı da jer qoynında u'sh ku'n, u'sh tu'n boladı.
41 Nineviya turg'ınları hu'kim shıg'arılatug'ın qıyamet-qayım ku'ninde usı a'wlad penen birge turıp, onı ayıplaydı. Sebebi Yunus ja'riyalag'anda, olar ta'wbe etken-g'o. Biraq bul jerde Yunustan da ullı Birew bar.
42 Qubladag'ı hayal patsha da hu'kim shıg'arılatug'ın qıyamet-qayım ku'ninde usı a'wlad penen birge turıp, onı ayıplaydı. O'ytkeni ol Sulaymannın' danalıg'ın esitiw ushın jer betinin' arg'ı shetinen kelgen-g'o. Biraq bul jerde Sulaymannan da ullı Birew bar.
43 – Jawız ruwx adamnan shıqqannan keyin suwsız jerlerdi gezip, dem alıwg'a orın izleydi, biraq taba almaydı.
44 Sonda ol o'zine: «Shıqqan u'yime qaytayın», – deydi ha'm qaytıp kelgende, u'ydin' bos bolıp, tazalanıp ha'm jıynalıp turg'anın ko'redi.
45 Sonda ol barıp, o'zinen de jawız jeti ruwxtı ertip keledi de, kirip sol u'yde turadı. Solay etip, sol adamnın' son'g'ı awhalı burıng'ıdan da jaman boladı. Bul jaman a'wladqa da sonday boladı!
46 İysa xalıqqa so'ylep turg'anda, anası menen tuwısqanları keldi. Olar sırtta turıp, Onın' menen so'ylespekshi boldı.
47 Sonda birew Og'an: – Anan' menen tuwısqanların' Senin' menen so'ylespekshi bolıp, sırtta turıptı, – dedi.
48 Ol bunı aytqan adamg'a qarap: – Menin' anam kim, tuwısqanlarım kimler? – dedi de,
49 O'zinin' sha'kirtlerin qolı menen ko'rsetip bılay dedi: – Mine, Menin' anam ha'm tuwısqanlarım!
50 Sebebi kim de kim Menin' aspandag'ı A'kemnin' erkin orınlasa, Menin' tuwısqanım da, anam da – sol.
