Matta 11 bob
1 İysa on eki sha'kirtine usı tapsırmalardı berip bolg'annan keyin, sol jerden ketip, jaqın jaylasqan qalalarda ta'lim beriwge ha'm Xosh Xabardı ja'riyalawg'a bardı.
2 Yaqıya qamaqta otırıp, Masixtın' islegen isleri haqqında esitkende o'z sha'kirtlerin jiberip:
3 «Keletug'ın Qutqarıwshı Senbisen' yamasa basqa birewdi ku'tiwimiz kerek pe?» – dep Onnan sorattı.
4 İysa olarg'a juwap berip: – Barın'lar, esitip-ko'rgenlerin'izdi Yaqıyag'a bildirin'ler.
5 Soqırlardın' ko'rip, aqsaq bolg'anlardın' ju'rip, maqaw kesel bolg'anlardın' tazalanıp, geren'lerdin' esitip, o'lgenlerdin' tirilip, Xosh Xabardın' jarlılarg'a ja'riyalanıp atırg'anın aytıp berin'ler.
6 Mag'an gu'mansız isengenler baxıtlı, – dedi.
7 Olar ketkennen keyin, İysa xalıqqa Yaqıya tuwralı ayta basladı: – Sizler sho'l dalag'a neni ko'riwge bardın'lar? Samal terbetken qamıstı ma?
8 Aytın'lar, neni ko'riwge bardın'lar? Hasıl kiyim kiygen bir adamdı ma? Hasıl kiyim kiygenler patsha saraylarında boladı-g'o.
9 Solay etip, neni ko'riwge bardın'lar? Payg'ambardı ma? Awa, Menin' sizlerge aytatug'ınım: ol – payg'ambardan da ullı.
10 O'ytkeni Muxaddes Jazıwda: «Mine, Men Sennen burın O'z xabarshımdı jiberemen, ol Senin' baratug'ın jolın'dı aldın'nan tayarlap qoyadı», dep aytılg'an adam – usı.
11 Sizlerge shının aytıp turman: hayaldan tuwılg'anlardın' arasında Shomıldırıwshı Yaqıyadan ullı adam joq. Biraq Aspan Patshalıg'ındag'ı en' kishkene adam da onnan ullı.
12 Shomıldırıwshı Yaqıyanın' ku'nlerinen baslap ha'zirge deyin Aspan Patshalıg'ına zorlıq jasalıp, zorlıq jasawshılar Onı basıp alıp atır.
13 Barlıq payg'ambarlar ha'm Muxaddes Nızam Yaqıya keliwge deyin Aspan Patshalıg'ı haqqında boljap kelgen.
14 Eger bulardı qabıl etkin'iz kelse, keliwge tiyisli bolg'an İliyas payg'ambar – usı Yaqıya.
15 Qulag'ı bar jaqsılap esitip alsın!
16 Ha'zirgi a'wladtı kimge uqsatayın? Olar bazarda joldaslarına: «Sizlerge sıbızg'ı sherttik, biraq sizler oynamadın'lar!
17 Sizlerge joqlaw ayttıq, biraq sizler jılamadın'lar!» – dep baqırıp otırg'an balalarg'a uqsaydı.
18 Sebebi Yaqıya kelip, iship jemedi. Sonda olar: «Onı jin urg'an», – desti.
19 Adam Ulı kelip, iship jedi. Sonda olar: «Mine, tamaqsaw ha'm araqxor adam, Ol salıqshılar menen gu'nakarlardın' dostı», – dep aytısıp atır. Al Qudaydın' danalıg'ı isler arqalı aqlanadı.
20 Sonnan son', İysa ka'ramatların ko'birek islegen qalalardı ta'wbe etpegenligi ushın ayıplay basladı:
21 – Ha'siret shegesen', Xorazin! Ha'siret shegesen', Betsayda! Eger sizlerde islengen ka'ramatlar Tir ha'm Sidon qalalarında islengeninde, olar a'lle qashan betin tırnap, shashın julıp qayg'ırıp, ta'wbe eter edi.
22 Al Menin' sizlerge aytatug'ınım: hu'kim shıg'arılatug'ın qıyamet-qayım ku'ninde Tir menen Sidonnın' awhalı sizlerdin' awhalın'ızdan jen'ilirek boladı.
23 Ha'y sen, Kaparnahum, aspang'a ko'terilesen' be? Yaq, dozaqqa qulatılasan'. O'ytkeni sende bolg'an ka'ramat isler Sodomda islengeninde, ol bul ku'nge deyin saqlanar edi.
24 Al Menin' sag'an aytatug'ınım: hu'kim shıg'arılatug'ın qıyamet-qayım ku'ninde Sodom qalasının' awhalı senin' awhalın'nan jen'ilirek boladı.
25 Sol waqıtta İysa so'zin dawam etip: – O, A'kem, aspan menen jerdin' İyesi! Bulardı danalardan ha'm aqıllılardan jasırıp, na'restedey adamlarg'a ashıp bildirgenin' ushın Seni maqtayman!
26 Awa, A'ke! Sebebi Senin' qa'lewin' usınday edi.
27 Mag'an ha'mmesi A'kemnen berilgen. A'keden basqa hesh kim Ulın bilmeydi. A'keni de tek g'ana Ulı ha'm Ulı tan'lap ashıp bildirgisi kelgenler g'ana biledi.
28 Ha'y, sharshap, awır ju'k basqanlar, ha'mmen'iz Mag'an kelin'ler! Men sizlerdi ra'ha'tlendiremen.
29 Moyıntırıg'ımdı salıp, Mennen u'yrenin'ler: o'ytkeni Men mo'min ha'm kishipeyilmen. Solay etip, kewillerin'iz tınıshlıq tabadı.
30 Men bergen moyıntırıq ın'g'aylı, ju'gim jen'il, – dedi.
