Ezekiel 41 bob
1 Keyin ol meni Muxaddes bo'lmenin' qapısına alıp barıp, qapının' eki ta'repindegi diywallardı o'lshedi. Eki ta'reptegi diywaldın' da qalın'lıg'ı altı shıg'anaq edi.
2 Bosag'anın' o'zi on shıg'anaq, eki ta'repindegi diywallar bes shıg'anaqtan edi. Ol Muxaddes bo'lmeni de o'lshedi. Onın' uzınlıg'ı qırıq shıg'anaq, eni jigirma shıg'anaq shıqtı.
3 Keyin ol ishki bo'lmege kirip, onın' bosag'asının' jaqlaw diywalların o'lshedi. Diywallardın' qalın'lıg'ı eki shıg'anaqtan, bosag'anın' o'zi altı shıg'anaq, al eki ta'repten bosag'ag'a qosılg'an diywallardın' uzınlıg'ı jeti shıg'anaqtan edi.
4 Ol ishki bo'lmeni de o'lshedi. Onın' uzınlıg'ı da, eni de jigirma shıg'anaq edi. Ol mag'an: – Bul En' muxaddes bo'lme, – dedi.
5 Ol İbadatxana diywalın o'lshedi. Diywaldın' qalın'lıg'ı altı shıg'anaq shıqtı. İbadatxananın' sırtqı diywalına taqap, aylandırıp salıng'an bo'lmelerdin' eni to'rt shıg'anaq edi.
6 Bul bo'lmeler birinin' u'stine biri u'sh qabat etip salınıp, ha'r qabatta otız bo'lmeden bar edi. İbadatxana diywalları shıg'arılın'qırap tekshedey etip o'rilip, sol shıg'ın'qırag'an jeri pa'rdiywal xızmetin atqardı. Solay etip, bo'lmelerdi bastırg'an ag'ashlar İbadatxana diywalına kirmey turdı.
7 İbadatxana diywalının' to'mengi bo'legi joqarıdag'ı bo'legine qarag'anda qalın'ıraq bolg'anı ushın joqarıdag'ı bo'lmeler ken'irek edi. To'mengi qabattan ekinshi qabatqa, onnan u'shinshi qabatqa ko'teriletug'ın edi.
8 Men İbadatxana a'tirapına salıng'an usı bo'lmelerdin' tırnag'ın ko'rdim. Onın' biyikligi bir tayaq, yag'nıy altı shıg'anaq edi.
9 Bo'lmelerdin' sırtqı diywalının' qalın'lıg'ı bes shıg'anaq edi. İbadatxana aylanasında aylanıp turg'an bo'lmeler menen
10 ruwxaniylerdin' bo'lmelerinin' arasındag'ı aralıqtın' eni jigirma shıg'anaq edi.
11 Bo'lmelerdi qubla ha'm arqa ta'repinde ashıq maydang'a qarag'an esikleri bar edi. Bo'lmeler a'tirapındag'ı sırtqa shıg'ın'qırap turg'an tırnaqtın' eni bes shıg'anaq edi.
12 İbadatxananın' artındag'ı, yag'nıy batıs ta'repindegi ashıq maydanda eni jetpis shıg'anaq, uzınlıg'ı toqsan shıg'anaq, diywalının' qalın'lıg'ı bes shıg'anaq bolg'an u'lken bir imarat bar edi.
13 Keyin ol İbadatxananı o'lshedi. İbadatxananın' uzınlıg'ı ju'z shıg'anaq shıqtı. İbadatxananın' artındag'ı ashıq maydan, art bettegi imarat ha'm onın' diywalı ju'z shıg'anaq shıqtı.
14 İbadatxananın' aldıng'ı ta'repindegi, yag'nıy shıg'ıs ta'repindegi ashıq maydannın' eni ju'z shıg'anaq shıqtı.
15 Ol İbadatxananın' artındag'ı ashıq maydang'a qarap turg'an imarattın' uzınlıg'ın o'lshedi. İmarat penen onın' eki qaptalındag'ı da'lizlerdin' uzınlıg'ı ju'z shıg'anaq shıqtı.İbadatxananın' Muxaddes bo'lmesi ha'm onın' aywanı,
16 bosag'alar, ayna ta'rizli oyıqlar ha'm qosımsha islengen ernekler tabaldırıqtın' aldınan ha'm edennen ayna ta'rizli oyıqlarg'a shekem ag'ash penen qaplang'an edi. Ayna ta'rizli oyıqlarg'a da ag'ashtan islew berip qaplang'an edi.
17 İbadatxananın' ishindegi Muxaddes bo'lme menen En' muxaddes bo'lmenin' ha'mme diywalları, qapılardın' joqarısı,
18 kerublardın' ha'm palma ag'ashının' su'wretleri salıng'an taxtalar menen qaplang'an edi. Ha'r eki kerubtın' ortasında bir palma ag'ashının' su'wreti salıng'an bolıp, ha'r bir kerubtın' eki bet-a'lpeti bar edi.
19 Palma ag'ashına bir ta'repten kerubtın' adamnın' beta'lpetine uqsag'an ju'zi, ekinshi ta'repten arıslang'a uqsag'an ju'zi qarap turg'an edi. Bunday su'wretler İbadatxananın' ishki diywalların aylandırıp,
20 edennen qapılardın' u'stilerine shekem islengen edi.
21 Muxaddes bo'lmenin' qapısının' jaqlawları to'rt mu'yeshli edi. En' muxaddes bo'lmenin' qapısının' jaqlawları da sonday edi.
22 Uzınlıg'ı ha'm eni eki shıg'anaq, biyikligi u'sh shıg'anaq bolg'an ag'ashtan islengen bir qurbanlıq orın bar edi. Onın' mu'yeshleri, tiykarı ha'm qaptalları ag'ashtan islengen edi. Sol adam mag'an: – Bul Jaratqan İyenin' aldındag'ı stol, – dedi.
23 Muxaddes bo'lmenin' de, En' muxaddes bo'lmenin' de jarma qapısı bar edi.
24 Olardın' ha'r bir ta'repi eki taxtadan ibarat bolıp, jıynalmalı etip islengen edi.
25 Muxaddes bo'lmenin' qapılarına diywallardag'ıday kerublar menen palma ag'ashının' su'wretleri salıng'an edi. Aywannın' aldına ag'ash shertek qurılg'an edi.
26 Aywannın' eki ta'repindegi diywallarda ayna ta'rizli oyıqlar ha'm palma ag'ashının' su'wretleri bar edi. İbadatxananın' qosımsha bo'lmelerinde de shertekler bar edi.
