1 Sonda Jaratqan İye Eshuag'a bılay dedi: – Men Erixo qalasın, onın' patshasın ha'm jawıngerlerin sag'an ta'slim qılaman.
2 Sen pu'tkil a'skerlerin' menen birge altı ku'n dawamında qala do'geregin ku'nine bir ma'rtebe aylanıp shıg'ıwın' kerek.
3 Ka'rnay ko'tergen jeti ruwxaniy sandıqtın' aldında ju'rsin. Jetinshi ku'ni qalanın' do'geregin jeti ma'rtebe aylanın'lar ha'm sonda ruwxaniyler ka'rnayların shertsin.
4 Ruwxaniylerdin' ka'rnaylardı uzaq sozıp shertkenin esitkenin'izde, pu'tkil xalıq ba'lent dawıs penen baqırsın. Sonda qalanın' diywalları qulap tu'sedi ha'm ha'r bir adam turg'an jerinen tuwrı qalag'a kiredi.
5 Nun ulı Eshua ruwxaniylerdi shaqırıp alıp, olarg'a: – Kelisim sandıg'ın ko'terin'ler. Jeti ruwxaniy qollarına ka'rnaylardı alıp, Jaratqan İyenin' sandıg'ının' aldında ju'rsin, – dedi.
6 Son'ınan xalıqqa: – Alg'a ju'rin'ler, qalanın' do'geregin aylanıwdı baslan'lar. Qurallı adamlar Jaratqan İyenin' sandıg'ının' aldında ju'rsin, – dedi.
7 Eshua bul so'zlerdi xalıqqa aytıp bolg'annan son', ka'rnaylardı ko'tergen jeti ruwxaniy ka'rnaylardı shertip, Jaratqan İyenin' aldında alg'a ju're basladı. Olardın' izinen Jaratqan İyenin' Kelisim sandıg'ı alıp ju'rildi.
8 Qurallang'an adamlar ka'rnay shertken ruwxaniylerdin' aldında, al artta kiyatırg'anlar sandıqtın' izinen ju'rip kiyatır edi. Sol waqıtta ka'rnaylar da u'zliksiz shertilip turdı.
9 Sonda Eshua xalıqqa: – Baqırman'lar, seslerin'izdi shıg'arman'lar. Men: «Baqırın'lar», – demegenimshe, awzın'ızdan birde bir so'z shıqpasın. Buyrıg'ımdı esitken waqtın'ızda, baqırın'lar, – dep buyırdı.
10 Solay etip, olar Jaratqan İyenin' sandıg'ın ko'terip, qala a'tirapın bir ma'rtebe aylandı. Keyin ordag'a kelip, sol jerde tu'nedi.
11 Erten'ine azanda Eshua erte oyandı ha'm ruwxaniyler Jaratqan İyenin' sandıg'ın ko'terdi.
12 Ka'rnaylardı ko'tergen jeti ruwxaniy Jaratqan İyenin' sandıg'ının' aldında ka'rnaylardı shertip ju'rdi. Qurallang'an adamlar olardın' aldında, al artta kiyatırg'anlar sandıqtın' izinde ju'rdi. Sol waqıtta ka'rnaylar u'zliksiz shertilip turdı.
13 Solay etip, olar ekinshi ku'ni de qala a'tirapın bir ma'rtebe aylanıp, ordag'a qaytıp keldi. Olar bul isti altı ku'n ta'kirarladı.
14 Jetinshi ku'ni olar erte, jan'a tan' atqanda turıp, qala a'tirapın anıq sol ta'rizde jeti ma'rtebe aylanıp shıqtı. Olar tek sol ku'ni g'ana qala a'tirapın jeti ma'rtebe aylanıp shıqtı.
15 Ruwxaniyler jetinshi aylanbada ka'rnayların shertkende, Eshua xalıqqa bılay dedi: – Baqırın'lar! Jaratqan İye qalanı sizlerge berdi!
16 Qala ha'm onın' ishindegi ha'r bir na'rse Jaratqan İyege bag'ıshlanıp, joq qılınsın. Tek bizler jibergen jansızlardı jasırıp qalg'an buzıq hayal Raxab ha'm onın' u'yindegiler g'ana aman qaladı.
17 Abaylan'lar, bag'ıshlang'an na'rselerge qol tiygizben'ler. Sol na'rselerdi bag'ıshlap bolıp, keyin olardan alsan'ız, sizler İzraildın' ordasın qırg'ıng'a ushıratıp, ba'lege duwshar qılasız.
18 Pu'tkil gu'mis, altın, mıs ha'm temir na'rseler Jaratqan İyege bag'ıshlang'an bolıp, olar Jaratqan İyenin' qaznasına tu'sedi.
19 Solay etip, ruwxaniyler ka'rnayların shertti. Xalıq bul dawıstı esitiwden, qattı baqırıstı ha'm diywallar qulap tu'sti. Ha'r bir adam turg'an jerinen tuwrı qalag'a kirdi ha'm onı qolg'a kirgizdi.
20 Olar erkek ha'm hayallardı, jas ha'm g'arrılardı, iri ha'm mayda mallardı, esheklerdi, qaladag'ı ha'mme tiri jandı qılıshtan o'tkizip, qırıp tasladı.
21 Eshua usı jerge jansız bolıp kelgen eki adamg'a: – Sol buzıq hayaldın' u'yine barın'lar. Ant ishkenin'izdey, hayaldı ha'm onın' pu'tkil jaqınların sırtqa alıp shıg'ın'lar, – dedi.
22 U'yge kirgen jas jansızlar Raxabtı, onın' ata-anasın, ag'a-inilerin, ag'ayinlerin ha'm onın' u'yindegi ha'mme adamlardı alıp shıg'ıp, İzraildın' ordasının' janına a'keldi.
23 Son'ınan olar qalanı ishindegileri menen birlikte jag'ıp jiberdi. Tek gu'mis, altın, mıs ha'm temir na'rselerdi Jaratqan İyenin' U'yinin' qaznasına saldı.
24 Eshua buzıq hayal Raxabtı, onın' a'kesinin' u'y-ishin ha'm jaqınların tiri qaldırdı. Eshuanın' Erixonı ko'zden o'tkizip keliw ushın jibergen jansızların jasırıp qalg'an Raxab bu'gin de izraillılardın' arasında jasamaqta.
25 Bunnan son', Eshua bılay dep g'arg'ıs ja'riyaladı: – Bul qalanı, yag'nıy Erixo qalasın qaytadan tiklewge ha'reket etken adam Jaratqan İyenin' g'arg'ısına ushırasın. Sol adam qalanın' tiykarın o'zinin' tun'g'ısh ulının' u'stine saladı, al qala da'rwazasın genje ulının' u'stine quradı.
26 Jaratqan İye Eshua menen birge edi ha'm Eshuanın' dan'qı eldin' ha'mme jerine jayıldı.
