İyshaya 20 bob
1 Assiriya bas sa'rka'rdası Assiriya patshası Sargonnın' buyrıg'ı menen Ashdodqa hu'jim jasap, qalanı qolg'a kirgizgen jılı,
2 Jaratqan İye Amos ulı İyshaya arqalı so'yledi. Ol İyshayag'a: «Barıp, u'stin'degi aza kiyimin ha'm ayag'ın'dag'ı sandaldı sheship tasla», – dedi. Ol solay islep, jalan'ash ha'm jalan' ayaq ju'rdi.
3 Sonda Jaratqan İye bılay dedi: «Qulım İyshayanın' u'sh jıl jalan'ash ha'm jalan' ayaq ju'rgeni Mısır ha'm Kush ushın belgi ha'm nıshan boladı.
4 Mısırdı shermende qılıw ushın Assiriya patshası Mısır tutqınların, Kushtan su'rgin bolg'anlardı, olardın' jasın ha'm g'arrısın jalan'ash, jalan' ayaq, uyatlı jerleri ashıq halda aydap ketedi.
5 Kushqa u'mit baylap, Mısır menen maqtang'anlar qorqıp, uyatqa qaladı.
6 Sol ku'ni bul ten'iz jag'asının' turg'ınları bılay deydi: „Qara, Assiriya patshasınan qutılıw ushın ja'rdem ku'tip, u'mit baylag'anımız ne boldı?! Endi bizler qalay qashıp qutılamız?“»
