Ester 5 bob
1 U'shinshi ku'ni Ester patshalıq kiyimlerin kiyip, saraydın' ishki ha'wlisine, patshanın' taxtı turg'an bo'lmenin' aldına kelip turdı. Sol waqıtta patsha ha'wlinin' kirer awzına tuwrı qarap turg'an o'z taxtında otırg'an edi.
2 Patsha ha'wlide turg'an xanbiyke Esterdi ko'rgende, og'an miyrimi tu'sti ha'm qolındag'ı altın hasanı Esterge qaray sozdı. Ester patshag'a jaqınlap kelip, altın hasanın' ushına qolın tiygizdi.
3 Patsha og'an: – Xanbiyke Ester, ne qa'leysen'? Qanday tilegin' bar? Ha'tte, patshalıqtın' yarımın sorasan' da, beriledi, – dedi.
4 Ester og'an: – Eger patshamız maqul ko'rse, bu'gin menin' ol ushın tayarlag'an zıyapatıma Haman menen birge kelsin, – dedi.
5 Patsha: – Esterdin' o'tinishin orınlaw ushın tez barıp, Hamandı tawıp kelin'ler, – dep buyırdı. Solay etip, patsha ha'm Haman Ester tayarlag'an zıyapatqa keldi.
6 Patsha sharap iship otırıp Esterge ja'ne: – Ayt, qanday tilegin' bar? Tilegin' orınlanadı. Qanday o'tinishin' bar? Patshalıqtın' yarımın sorasan' da beriledi, – dedi.
7 Ester juwap berip: – Menin' tilegim ha'm o'tinishim mınaday:
8 eger patshamızdın' mag'an kewli tolg'an bolsa, patshamız menin' tilegimdi orınlap, o'tinishimdi qanaatlandırıwdı maqul ko'rse, erten' menin' olar ushın tayarlaytug'ın zıyapatıma Haman menen birge kelsin. Sonda patshamızdın' sorawına juwap beremen, – dedi.
9 Sol ku'ni Haman zıyapattan kewli ko'terilip, shad bolıp qayttı. Biraq ol patsha sarayında Mordoxaydı ko'rgende, Mordoxay ornınan da turmadı, og'an hu'rmet te ko'rsetpedi. Sonda Haman ashıwdan tu'tep ketti.
10 Degen menen, ol o'zin tutıp, u'yine ketti. Ol u'yine kelip, dosların ha'm hayalı Zereshti shaqırttı.
11 Olarg'a o'zinin' sheksiz baylıg'ı, ullarının' ko'pligi, patshanın' o'zin qanshelli hu'rmet etetug'ınlıg'ı ha'm barlıq wa'zirler menen xızmetshilerden u'stin qoyg'anı haqqında aytıp berdi.
12 Keyin Haman so'zin dawam etip: «Xanbiyke Ester zıyapat tayarlap, patsha menen tek meni g'ana mira't etti. Erten' de men patsha menen birge shaqırılg'anman.
13 Biraq sarayda yahudiy Mordoxaydı ko'rgenimde, bulardın' ha'mmesi men ushın shıbın shelli ko'rinbeydi», – dedi.
14 Sonda hayalı Zeresh ha'm barlıq dosları Hamang'a bılay dedi: «Biyikligi eliw shıg'anaq* bolg'an dar qurdır. Azanda patshadan Mordoxaydı sol darg'a asıwdı soran. Son'ınan shad bolıp, patsha menen zıyapatqa bar». Bul ken'es Hamang'a unadı ha'm ol dar qurdırıp qoydı.
