2 Jılnama 25 bob
1 Amasiya patsha bolg'anda, jigirma bes jasında edi, ol Erusalimde jigirma tog'ız jıl patshalıq etti. Onın' anası erusalimli bolıp, atı Ehoaddan edi.
2 Amasiya Jaratqan İyenin' na'zerinde tuwrı bolg'an islerdi islese de, olardı shın ju'rekten islemedi.
3 Amasiya o'zinin' patshalıq biyligin bekkemlep alg'annan son', a'kesi İoash patshanı o'ltirgen xızmetshilerdi o'ltirdi.
4 Biraq Muwsanın' Nızam kitabında jazılg'anına say is tutıp, olardın' balaların o'ltirmedi. Onda Jaratqan İye: «Balalar ushın a'keler, a'keler ushın balalar o'ltirilmesin. Ha'r bir adam o'z gu'nası ushın o'ltirilsin», – dep buyırg'an edi.
5 Amasiya Yahuda xalqın toplap, pu'tkil yahudalılar menen benyaminlilerge a'wladları boyınsha mın'basılar ha'm ju'zbasılar qoydı. Keyin jigirma ha'm onnan joqarı jastag'ılardı sanaqtan o'tkerip, a'skeriy xızmetke jaramlı ha'm nayza menen u'lken qalqandı islete alatug'ın u'sh ju'z mın' ag'la a'skerdin' bar ekenin bildi.
6 Bulardan tısqarı, ju'z talant gu'miske İzraildan ju'z mın' bahadır jawıngerdi jallap aldı.
7 Sol arada Qudaydın' bir adamı Amasiyag'a kelip bılay dedi: – Taqsır! İzrail a'skerleri siz benen birge barmasın, sebebi Jaratqan İye izraillılar, yag'nıy pu'tkil efrayımlılar menen birge emes.
8 Jaqsısı, o'zin'iz barıp, iske kirisin' ha'm ma'rtlershe urısın'. Bolmasa, Quday sizdi jen'iliske ushıratadı. O'ytkeni Qudaydın' qollap-quwatlawg'a da, jen'iliske ushıratıwg'a da ku'shi jetedi.
9 Amasiya Qudaydın' adamınan: – Onda İzrail a'skerleri ushın to'lengen ju'z talant ne boladı? – dep soradı. Qudaydın' adamı og'an: – Jaratqan İye sizge onnan da ko'biregin beriwi mu'mkin, – dep juwap berdi.
10 Sonda Amasiya Efrayımnan kelgen a'skerlerdi u'ylerine qaytarıp jiberdi. Olardın' Yahuda xalqına degen g'a'zebi lawladı ha'm g'a'zepke tolıwı menen u'ylerine qaytıp ketti.
11 Amasiya ma'rtlik etip, o'z a'skerlerin Duz oypatlıg'ına alıp bardı ha'm ol jerde Seirdin' adamlarınan on mın'ın o'ltirdi.
12 Yahuda a'skerleri olardın' ja'ne on mın'ın tutqıng'a alıp, olardı jartastın' to'besine alıp shıqtı ha'm ol jerden to'menge iyterip jiberdi. Olardın' ha'mmesi bo'lek-bo'lek boldı.
13 Sol arada Amasiya o'zi menen urısqa barıwg'a ruxsat bermey izine qaytarıp jibergen a'skerler Samariya menen Beyt-Xoron aralıg'ındag'ı Yahuda qalalarına hu'jim qıldı. Olar u'sh mın' adamdı o'ltirip, ko'p olja alıp ketti.
14 Amasiya edomlılardı qırıp qaytıp kelgende, Seir xalqının' butların o'zi menen birge alıp keldi. Ol bul butlardı o'zine quday etip qoydı ha'm olarg'a tabınıp, qurbanlıqlar berdi.
15 Sonda Amasiyag'a Jaratqan İyenin' g'a'zebi lawladı ha'm og'an bir payg'ambardı jiberdi. Payg'ambar patshag'a: – O'z xalqın senin' qolın'nan qutqara almag'an sol xalıqtın' qudaylarına ne ushın ju'z burdın'ız? – dey bergende,
16 Amasiya onın' ga'pin bo'lip: – Qashannan beri sen patshanın' ma'sla'ha'tshisi bolıp qaldın'?! Bas qıl, bolmasa janın'dı alaman, – dedi. Payg'ambardın' so'zi awzında qaldı, biraq son'ınan: – Siz usılay etip, menin' so'zlerime qulaq salmag'anın'ız ushın, Qudaydın' sizdi joq qılıwdı qarar etkenin bilemen, – dedi.
17 Yahuda patshası Amasiya ken'esgo'yleri menen ma'sla'ha'tleskennen son', Ehudın' aqlıg'ı Ehoaxazdın' ulı İzrail patshası Ehoashqa xabarshılar jiberip: «Kel, jekpe-jek alısayıq», – dep shaqırıq tasladı.
18 zrail patshası Ehoash ta Yahuda patshası Amasiyag'a mınaday juwap jiberdi: «Lebanon tawlarındag'ı shat tiken sol jerdegi kedrge: „Qızın'dı menin' ulıma hayallıqqa ber“, – dep xabar jiberipti. Biraq Lebanon tawlarındag'ı bir jabayı haywan sol jerden o'tip baratırıp, shat tikendi jenship ketipti.
19 Edomlılardı jen'dim dep, maqtanıp, ko'kiregin' ko'terilip ketipti. Jaqsısı, u'yin'de otır! Ja'njel baslawdın' ne keregi bar? O'zin'nin' de, Yahudanın' da basın ba'lege qaldırajaqsan'».
20 Degen menen, Amasiya qulaq aspadı. Bul Qudaydın' isi edi. Amasiyanın' Edomnın' qudaylarına tabıng'anı ushın, Quday olardı dushpannın' qolına beriwge qarar qılg'an edi.
21 İzrail patshası Ehoash Yahuda patshası Amasiyag'a qarsı ju'ris qılıp, olar Yahudanın' BeytShemesh qalasında ju'zbe-ju'z keldi.
22 Yahudalılar izraillılar ta'repinen qıyratılıp, u'ylerine qaray qashtı.
23 İzrail patshası Ehoash Ehoaxazdın' aqlıg'ı İoashtın' ulı Yahuda patshası Amasiyanı Beyt-Shemeshte tutqıng'a alıp, onı Erusalimge alıp keldi. Ehoash Erusalim diywalının' Efrayım da'rwazasınan Mu'yesh da'rwazasına shekemgi to'rt ju'z shıg'anaq aralıg'ın qulatıp tasladı.
24 Ol Qudaydın' İbadatxanasındag'ı Obed-Edomnın' juwapkershiligi astındag'ı ha'mme altın ha'm gu'mislerdi, ha'mme buyımlardı, patsha sarayındag'ı qaznanı, ja'ne de, kepilge qoyılatug'ın tutqınlardı alıp, Samariyag'a qaytıp ketti.
25 Yahuda patshası İoash ulı Amasiya İzrail patshası Ehoaxaz ulı Ehoashtın' o'liminen son', on bes jıl o'mir su'rdi.
26 Amasiyanın' basqa isleri, basınan aqırına shekem Yahuda ha'm İzrail patshalarının' jılnama kitabında jazılg'an.
27 Amasiya Jaratqan İyeden bas keshken ku'nnen baslap, Erusalimde og'an qarsı til biriktirile basladı. Ol Laxishke qashtı. Biraq til biriktiriwshiler Amasiyanın' izinen Laxishke adam jiberip, onı sol jerde o'ltirtti.
28 Olar Amasiyanın' denesin atqa artıp, alıp keldi ha'm ol Dawıttın' qalasına, ata-babalarının' janına jerlendi.
