4 Patshalar 9 bob
1 Sol ku'nleri payg'ambar Elisha payg'ambarlar toparındag'ılardan birin shaqırıp, og'an bılay dedi: «Belin'di buwıp, mına za'ytu'n mayı quyılg'an ıdıstı al da, Giladtag'ı Ramotqa bar.
2 Sol jerge barıwdan Nimshiydin' aqlıg'ı Ehoshafattın' ulı Ehudı tap. Onı joldaslarının' arasınan shaqırıp alıp, ishki bo'lmege alıp bar.
3 Keyin za'ytu'n mayı quyılg'an ıdıstı alıp, maydı onın' basına quy ha'm og'an bılay dep ayt: Jaratqan İye bılay deydi: „Seni maylap, İzrail u'stinen patsha etip qoydım“. Son'ınan irkilmey, qapını ash ta qash».
4 Solay etip, payg'ambardın' xızmetshi jigiti Giladtag'ı Ramotqa ketti.
5 Jigit sol jerge jetip barg'anda, a'skerbasılardın' bir jerge jıynalıp otırg'anın ko'rdi. Ol: – Ha'y a'skerbası, sizge aytar ga'pim bar, – dedi. Ehu onnan: – Qaysı birimizge? – dep soradı. Jigit og'an: – Sizge, a'skerbası, – dedi.
6 Ehu ornınan turıp, u'yge kirdi. Jigit za'ytu'n mayın Ehudın' basına quydı da bılay dedi: «İzraildın' Qudayı Jaratqan İye bılay deydi: „Seni maylap, xalqım İzrail u'stinen patsha etip qoydım.
7 Sen mırzan' Axabtın' urpag'ın qırıp taslaysan'. Menin' qullarım bolg'an payg'ambarlarımnın' ha'm barlıq qullarımnın' to'gilgen qanı ushın Men İzabelden o'sh alaman.
8 Axabtın' pu'tkil urpag'ı joq boladı. İzrailda Axabtın' urpag'ınan bolg'an ha'r bir erkek zatın, azat bolsın, qul bolsın ha'mmesin joq qılaman.
9 Nabat ulı Yarobam menen Axiya ulı Baashanın' urpag'ına ne qılg'an bolsam, Axabtın' urpag'ına da sonı isleymen.
10 İzabeldin' denesin İzreel jerinde iytlerge jem qılaman ha'm onın' denesi ko'miwsiz qaladı“». Jigit usılardı aytıp bola sala, qapını ashıp, qashıp ketti.
11 Ehu shıg'ıp, patshanın' a'skerbasılarının' janına kelgende, olardan biri Ehudan: – Tınıshlıq pa? Ana telbe sag'an nege kelipti? – dep soradı. Ehu og'an: – Sizler onın' kim ekenin de, ne aytatug'ının da bilesiz-g'o, – dep juwap berdi.
12 Olar: – Sen aldap tursan', bizlerge de aytshı, – dedi. Ehu olarg'a bılay dedi: – Ol mag'an mına na'rselerdi ayttı: «Jaratqan İye bılay deydi: „Seni maylap, İzrail u'stinen patsha etip qoydım“».
13 Sonda olar asıg'ıs tu'rde shapanların sheship, olardı Ehu turg'an tekshege to'sedi ha'm ka'rnay shalıp: «Ehu patsha boldı!» – dep jar sala basladı.
14 Solay etip, Nimshiydin' aqlıg'ı Ehoshafat ulı Ehu İoramg'a qarsı til biriktirdi. Sol waqıtları İoram İzrail xalqı menen birge Giladtag'ı Ramottı Aram patshası Xazaelden qorg'ap turg'an edi.
15 Biraq patsha İoram Aram patshası Xazael menen bolg'an urısta jaraqatlanıp, emleniw ushın İzreelge qaytqan edi. Ehu qasındag'ılarg'a bılay dedi: «Eger sizler men ta'repte bolsan'ız, onda hesh bir adamnın' bul qaladan shıg'ıp ketip, İzreelge xabar jetkeriwine jol qoyman'lar».
16 Son'ınan Ehu sawash arbasına minip, İoram jatırg'an jerge, İzreelge keldi. Yahuda patshası Axaziya da İoramdı ko'riw ushın sol jerge kelgen edi.
17 İzreeldegi minara u'stinde turg'an gu'zetshi Ehudın' a'skerleri menen jaqınlasıp kiyatırg'anın ko'rip: «A'skerler toparın ko'rip turman», – dep baqırdı. İoram: «Olardı qarsı alıp, ne ushın kiyatırg'anın bilip keliw ushın bir atlını jiber», – dedi.
18 Atlı Ehudı qarsı alıw ushın ketti ha'm og'an: – Patshamız: «Tınıshlıq pa?» – dep sorap atır, – dedi. Ehu og'an: – Tınıshlıq pa, joq pa, sag'an ne? Onnansha menin' izime er, – dedi. Gu'zetshi: «Atlı olardın' janına jetip bardı, biraq izine qaytpadı», – dep xabarladı.
19 Sonda ekinshi bir atlı jiberildi. Atlı olarg'a barıp: – Patshamız: «Tınıshlıq pa?» – dep sorap atır, – dedi. Ehu og'an: – Tınıshlıq pa, joq pa, sag'an ne? Onnansha menin' izime er, – dedi.
20 Gu'zetshi: «Atlı olardın' janına jetip bardı, biraq izine qaytpadı. Kiyatırg'an adamnın' arbasının' ju'risi Nimshiy ulı Ehudikine uqsaydı. Sebebi ol qutırıp shawıp kiyatır», – dep xabarladı.
21 Sonda İoram: «Arbanı jegin'ler!» – dep buyırdı. Onın' arbasın jekti. İzrail patshası İoram ha'm Yahuda patshası Axaziya ha'r biri o'z arbasına minip, Ehudı qarsı alıwg'a shıqtı ha'm olar izreelli Nabottın' atızında ushırastı.
22 İoram Ehudı ko'rgende, onnan: – Ehu, tınıshlıq pa? – dep soradı. Ehu og'an: – Anan' İzabel baslag'an butparazlıq ha'm sıyqırshılıqlar dawam eter eken, qalay tınıshlıq bolsın? – dep juwap berdi.
23 Sonda İoram Axaziyag'a: «Satqınlıq bul, Axaziya, satqınlıq!» – dep baqırıwı menen arbasının' dizginin burıp, qasha jo'neldi.
24 Al Ehu oq jayın bar ku'shi menen kerip, İoramnın' jawırınına attı ha'm oq onın' ju'regin tesip o'tti. İoram arbasının' ishine quladı.
25 Sonda Ehu a'skerbası Bidqarg'a: «Onı alıp, izreelli Nabottın' atızına ılaqtırıp jiber. Sebebi yadın'a tu'sir, bizler ekewimiz birge İoramnın' a'kesi Axabtın' izinen barg'anımızda, Jaratqan İye Axabqa qarsı mına so'zlerdi aytqan edi:
26 „Keshe Nabottın' ha'm onın' ullarının' qanın ko'rdim. Sennen usı atızda o'sh alaman“. Endi Jaratqan İyenin' so'zi boyınsha onın' denesin alıp, atızg'a ılaqtır», – dedi.
27 Yahuda patshası Axaziya bunı ko'rgende, Beyt-Haggang'a qaray qashtı. Ehu onı quwıp baratırıp: «Onı da o'ltirin'», – dep baqırdı. Axaziyanı İbleam janındag'ı Gur jolında, arbasında turg'an jerinde oq jay menen attı. Ol Megiddog'a qashıp barıp, sol jerde jan tapsırdı.
28 Adamları onın' denesin arba menen Erusalimge alıp keldi ha'm Dawıttın' qalasındag'ı atababalarının' qasına, o'z qa'birine qoydı.
29 Axaziya Axab ulı İoramnın' patshalıg'ının' on birinshi jılında Yahudag'a patsha bolg'an edi.
30 Keyin Ehu İzreelge keldi. İzabel bolg'an waqıyalardı esitip, ko'zlerine su'rme jag'ıp, shashların sulıwlap, terezeden qarap turg'an edi.
31 Ehu da'rwazadan kirgende, İzabel og'an: «Ha'y, o'z hu'kimdarın o'ltirgen Zimriy, tınıshlıq pa?» – dedi.
32 Ehu terezege qarap: «Kim men ta'repte, kim?» – dedi. Sonda eki-u'sh saray xızmetshisi Ehug'a boy ko'rsetti.
33 Ehu olarg'a: «Onı to'menge ılaqtırın'lar!» – dedi. Xızmetshiler İzabeldi jerge ılaqtırdı. Onın' qanı diywalg'a ha'm atlarg'a shashırap, atlar onın' denesin basqılap tasladı.
34 Ehu ishke kirip iship-jedi ha'm son'ınan: «Bul g'arg'ıs urg'an hayaldı tawıp, jerlen'ler. O'ytkeni ol patsha tuqımınan g'oy», – dedi.
35 Biraq İzabeldi jerlew ushın ketkenler onın' bas su'yegi ha'm ayaq-qollarınan basqa hesh na'rsesin tappadı.
36 Olar qaytıp kelip, bunı Ehug'a xabarladı. Sonda Ehu bılay dedi: «Jaratqan İyenin' qulı tishbeli İliyas arqalı aytqan so'zi orınlandı. Jaratqan İye: „İzabeldin' denesi İzreel atızlarında iytlerge jem boladı.
37 Awa, İzabeldin' denesi İzreel atızlarına to'gilgen to'ginge uqsap qaladı ha'm hesh kim onı bul İzabel-g'o dep aytpaydı“, – degen edi».
