Baltanın' basının' suw betine qalqıp shıg'ıwı (1-7), Aram a'skerleri ha'm Elisha (8-23), Samariyadag'ı ashlıq (24-33).
4 Patshalar 6 bob
1 Bir ku'ni payg'ambarlar toparındag'ılar Elishag'a: – Qaran', sizin' janın'ızdag'ı bizler jasaytug'ın jer ju'da' tar.
2 Sonlıqtan İordan da'ryasının' boyına barayıq ha'm ha'r qaysısımız bir ag'ashtan kesip alıp, sol jerge baspana qurayıq, – dedi. Elisha olarg'a: – Barın'lar, – dedi.
3 Olardan biri: – İltimas, siz de bizler menen birge ju'rin', – dedi. Elisha og'an: – Yaqshı, baraman, – dedi de,
4 olar menen birge ketti. Olar İordang'a kelip, ag'ash kese basladı.
5 Olardan biri ag'ash shawıp atırg'anda, baltasının' bası suwg'a tu'sip ketti. Sonda ol: – Way, mırzam, baltanı az-maz waqıtqa sorap alg'an edim! – dep shırlap qoya berdi.
6 Qudaydın' adamı onnan: – Ol qay jerge tu'sti? – dep soradı. Sol adam baltanın' bası tu'sken jerdi ko'rsetti. Elisha bir shaqanı kesip alıp, sol jerge ılaqtırıp jibergende, baltanın' bası suwdın' betine qalqıp shıqtı.
7 Elisha: «Onı al», – dedi. Adam qolın sozıp, baltanın' basın aldı.
8 Aram patshası İzrailg'a qarsı urısqa atlandı. Ol o'z xızmetshileri menen ma'sla'ha'tleskennen son': «Men mına ha'm mına jerlerge orda quraman», – dedi.
9 Qudaydın' adamı İzrail patshasına: «Ol jerden o'tpen', sebebi aramlılar sol jerge buqqı taslap jatır», – degen xabar jiberdi.
10 Sonda İzrail patshası Qudaydın' adamının' aytqan jerin tekserip ko'rdi. Bir emes, bir neshe ma'rte Elisha patshag'a aldın ala eskertti. Solay etip, patsha sol jerlerge barg'anda saq boldı.
11 Bug'an Aram patshasının' qattı ashıwı keldi ha'm xızmetshilerin shaqırıp, olarg'a: – Mag'an aytın'lar, qaysı birin'iz İzrail patshasının' jansızısız? – dedi.
12 Sonda xızmetshilerden biri: – Taqsır, hesh birimiz. Bulardı İzrail patshasına bildirip turatug'ın İzrailda jasaytug'ın payg'ambar Elisha boladı. Ol ha'tte, jatatug'ın bo'lmen'izde aytılg'anlardı da og'an jetkizip turadı, – dedi.
13 Patsha: – Onda barıp, onın' qay jerde ekenin bilin'ler. Adam jiberip, onı qolg'a tu'sireyin, – dedi. Patshag'a: «Elisha Dotanda eken», – dep xabarladı.
14 Patsha ol jerge atlar, sawash arbaların ha'm la'shkerler toparın jiberdi. Olar tu'nde kelip, qalanı qorshap aldı.
15 Qudaydın' adamının' xızmetshisi azanda erte turıp, sırtqa shıqsa, qala a'tirapının' la'shkerler, atlar ha'm sawash arbaları menen qorshalg'anın ko'rdi. Ol Elishag'a: – Way mırzam, endi ne qılamız? – dedi.
16 Elisha og'an: – Qorqpa, sebebi bizlerdin' ta'repdarlarımız olardikinen ko'p, – dedi.
17 Son'ınan Elisha: «Jaratqan İye, ol ko'riwi ushın, onın' ko'zlerin asha go'r», – dep duwa etti. Jaratqan İye xızmetshinin' ko'zlerin ashtı. Sonda ol Elishanın' do'geregindegi tawlardın' otlı atlar menen sawash arbalarına tolıp turg'anın ko'rdi.
18 Aramlılar Elishag'a hu'jim qıla baslag'anda, Elisha Jaratqan İyege duwa etip: «Bul adamlardı soqır qılıp taslay go'r», – dedi. Elishanın' so'zine go're, Jaratqan İye olardı soqır qılıp tasladı.
19 Keyin Elisha olarg'a: «Joldan adasıpsız, sizler izlegen qala bul emes. Mag'an erin'ler, sizlerdi izlegen adamın'ızdın' aldına alıp baraman», – dedi de, olardı Samariyag'a baslap keldi.
20 Olar Samariyag'a kelgende, Elisha: «Jaratqan İye! Olar ko'riwi ushın olardın' ko'zlerin asha go'r», – dedi. Jaratqan İye olardın' ko'zlerin ashtı ha'm olar o'zlerinin' Samariyanın' ortasında turg'anın ko'rdi.
21 İzrail patshası olardı ko'rgende Elishag'a: – Mırzam, olardı qırıp taslayın ba? – dedi.
22 Elisha patshag'a: – Yaq, qırıp taslaman'. Olardı o'ltiretug'ınday, siz olardı o'z qılıshın'ız ha'm o'z oq jayın'ız benen qolg'a alıp pa edin'iz? Olarg'a nan ha'm suw berin', iship-jesin ha'm o'z hu'kimdarına qaytsın, – dedi.
23 Patsha aramlılar ushın u'lken zıyapat berdi ha'm iship-jep bolg'annan keyin, olardı o'z hu'kimdarına qaytarıp jiberdi. Bunnan son', aramlı basqınshılar İzrail jerine qaytıp kelmedi.
24 Keyinirek Aram patshası Ben-Hadad o'zinin' barlıq a'skerlerin jıynap kelip, Samariyanı qamal qıldı.
25 Olar qalanı qamal qılıp turg'anda, onda qattı ashlıq boldı. Solay etip bir eshektin' gellesi seksen shekel gu'miske, bir uwıs kepter qıyı bes shekel gu'miske satıldı.
26 Bir ku'ni İzrail patshası qala diywalı u'sti menen ketip baratırg'anda, bir hayal: – Taqsır, ja'rdem berin', – dep dad saldı.
27 Patsha og'an: – Eger Jaratqan İye sag'an ja'rdem bermese, men qalay ja'rdem bere alaman? Biyday da, sharap ta bere almayman, – dedi de,
28 son'ınan: – Ne demekshisen'? – dedi. Hayal bılay dedi: – Mına hayal mag'an: «Ulın'dı ber, onı bu'gin jeyik, al menikin erten' jeymiz», – degen edi.
29 So'ytip bizler ulımdı pisirip jedik. Erten'ine men og'an: «Ulın'dı ber, jeyik», – desem, ol ulın jasırıp tasladı.
30 Patsha hayaldın' so'zin esitkende, kiyimlerin jırtıp, diywaldın' u'sti boylap ju'rdi. Sonda xalıq onın' ishten aza kiyimin kiyip ju'rgenin ko'rdi.
31 Patsha: «Eger usı bu'gin Shafat ulı Elishanın' bası denesinen juda qılınbasa, Quday meni jazalag'an u'stine jazalasın», – dedi.
32 Elisha aqsaqallar menen o'z u'yinde otırg'an edi. Patsha bir adamdı Elishag'a jiberdi. Sol adam ele Elishag'a jetip kelmesten aldın Elisha aqsaqallarg'a: «Bul qanxordın' menin' basımdı kestiriw ushın adam jiberip atırg'anın ko'rip tursız ba? Sol adam kelgende, qapını ilip taslan', onı ishke kirgizben'. Onın' izinde mırzasının' da ayaq sesleri esitilip tur», – dedi.
33 Elisha ele olar menen so'ylesip otırg'anda, patsha onın' aldına kelip: «Mine, Jaratqan İye qanday apatshılıq jiberdi! Endi Jaratqan İyeden ne ku'te alaman?» – dedi.
