4 Patshalar 11 bob

Yahuda xanbiykesi Ataliya (1-3), Ataliyag'a qarsı bas ko'teriw (4-16), Ruwxaniy Ehoyada kirgizgen o'zgerisler (17-21).

¹ Yahuda patshası Axaziyanın' anası Ataliya ulının' o'ltirilgenin esitkende, patsha tuqımınan bolg'anlardın' ha'mmesin qırıp taslawdı sheshti.

² Biraq patsha İoramnın' qızı, Axaziyanın' qarındası Ehosheba Axaziya ulı İoashtı patshanın' o'ltiriliwi kerek bolg'an ulları arasınan alıp qashıp, ta'rbiyashısı menen birge jatatug'ın bo'lmege jasırıp tasladı. Onı Ataliyadan jasırıp, o'limnen aman alıp qaldı.

³ Ataliya el u'stinen patshalıq etip turg'anda, bala Jaratqan İyenin' İbadatxanasında o'z ta'rbiyashısı menen altı jıl jasırın tu'rde jasadı.

⁴ Jetinshi jılı ruwxaniy Ehoyada karlı saqshılar menen saray saqshılarının' ju'zbasılarına adam jiberip, olardı o'z janına, Jaratqan İyenin' İbadatxanasına aldırdı. Sol jerde bul adamlar menen kelisim du'zip, olarg'a ant ishkizgennen son', olarg'a patshanın' ulın ko'rsetti.

⁵ Keyin Ehoyada olarg'a buyrıq berip, bılay dedi: «Sizler bılay isleysizler: Shabbat ku'ni xızmetke kelgenin'izde, u'shten birin'iz patshanın' sarayın qorg'aysız.

⁶ U'shten birin'iz Sur da'rwazasın, al qalg'an u'shten birin'iz saray saqshılarının' artındag'ı da'rwazanı qorg'aysız. Usılayınsha saraydı qorg'aysız.

⁷ Shabbat ku'ni xızmetten shıqqan basqa eki topar saqshıların'ızdın' ha'mmesi Jaratqan İyenin' İbadatxanasının' janında patshanı qorg'aydı.

⁸ Ha'r bir adam quralların qolg'a alıp, patshanı qorshap tursın, kim de kim sapqa jaqınlassa, ol o'ltirilsin. Patsha ishke kirgende de, shıqqanda da onın' janında bolın'lar».

⁹ Ju'zbasılar ruwxaniy Ehoyadanın' ha'mme buyrıqların orınladı. Ha'r bir ju'zbası Shabbat ku'ni xızmetke tu'setug'ın ha'm xızmetten shıg'atug'ın o'zinin' qol astındag'ı adamların alıp, ruwxaniy Ehoyadag'a keldi.

¹⁰ Ruwxaniy Jaratqan İyenin' İbadatxanasındag'ı patsha Dawıttan qalg'an nayza ha'm qalqanlardı ju'zbasılarg'a tarattı.

¹¹ Patshanı qorg'aw ushın İbadatxananın' qublasınan arqasına deyin, qurbanlıq orınnın' ha'm İbadatxananın' a'tirapına qurallı saqshılar qoyıldı.

¹² Ehoyada patshanın' ulı İoashtı sırtqa alıp shıg'ıp, basına taj kiygizdi, qolına patshalıq nızamların berip, onı patsha dep ja'riyaladı. Onı maylap, patsha etip qoydı, al xalıq qol shappatlap: «Jasasın patsha!» – dep qıshqırıstı.

¹³ Ataliya saqshılardın' ha'm xalıqtın' baqırısqan dawısların esitip, Jaratqan İyenin' İbadatxanasındag'ı jıynalg'an xalıqtın' janına keldi.

¹⁴ Qarasa, da'stu'r boyınsha patsha Jaratqan İyenin' İbadatxanasının' kireberisindegi o'renin' janında, al a'skerbasılar ha'm ka'rnayshılar onın' a'tirapında turg'an eken. Al pu'tkil u'lke xalqı bolsa, quwanısh penen ka'rnay shalıp turg'an eken. Sonda Ataliya kiyimlerin jırtıp: «Qıyanet, qıyanet!» – dep baqırdı.

¹⁵ Ruwxaniy Ehoyada Ataliyanın' Jaratqan İyenin' İbadatxanasında o'ltiriliwin qa'lemedi. Sonlıqtan ju'zbasılarg'a: «Mına hayaldı bul jerden alıp shıg'ın'lar. Og'an ergenlerdi qılıshtan o'tkizin'ler», – dep buwrıq berdi.

¹⁶ Ataliya tutıp alındı ha'm saraydın' At da'rwazasına a'kelinip, sol jerde o'ltirildi.

¹⁷ Xalıqtın' Jaratqan İyenin' xalqı bolıwı ushın, Ehoyada patsha, xalıq ha'm Jaratqan İye arasında kelisim du'zdi. Ol patsha menen xalıq arasında da kelisim du'zdi.

¹⁸ U'lke xalqı Baaldın' butxanasına barıp, onı qıyrattı. Ondag'ı qurbanlıq orındı ha'm mu'sinlerdi buzıp tasladı, al Baaldın' ruwxaniyi Mattandı qurbanlıq orınlardın' aldında o'ltirdi. Ruwxaniy Ehoyada Jaratqan İyenin' İbadatxanasına qarawıllar qoydı.

¹⁹ Keyin ol ju'zbasılardı, karlı saqshılardı, saray saqshıların ha'm pu'tkil u'lke xalqın ertip, patshanı Jaratqan İyenin' İbadatxanasınan alıp shıqtı. Onı saqshılar da'rwazasının' jolı arqalı sarayg'a alıp keldi ha'm ol patshalar taxtına otırdı.

²⁰ Pu'tkil u'lke xalqı shadlıqqa bo'lenip, qala tınıshlanıp qaldı. Sebebi Ataliya patsha sarayında qılısh penen o'ltirilgen edi.

²¹ İoash taxtqa otırg'anda jeti jasta edi.