3 Patshalar 19 bob
1 Patsha Axab İliyastın' islegen ha'mme islerin, barlıq payg'ambarlardı qalay qılıshtan o'tkergenin xanbiyke İzabelge aytıp berdi.
2 Sonda İzabel İliyasqa: «Erten' anıq usınday waqıtqa shekem senin' payg'ambarlarg'a islegenin'di o'zin'e islemesem, qudaylar meni jazalag'an u'stine jazalasın», – dep xabar jiberdi.
3 İliyas bunı esitkende qorqıp, jan saqlaw ushın Yahudadag'ı BeerSheba qalasına qashıp barıp, xızmetshisin sol jerde qaldırdı.
4 Al o'zi bolsa, sho'lde bir ku'n jol ju'rdi. Aqırında, bir terektin' astına kelip otırdı da, o'zine o'lim sorap: «Jaratqan İyem, jeter endi! Janımdı al, menin' atababalarımnan artıq jerim joq», – dep duwa etti.
5 Son'ınan terektin' shaqaları astına jatıp, uyqıg'a ketti. Tosattan bir perishte onı tu'rtip: «Turıp, jep al», – dedi.
6 6 İliyas turıp qarasa, bas betinde tasqa qoyıp pisirilgen ıssı sho'rek penen bir gu'ze suw turg'an eken. Ol iship-jep bolıp, ja'ne uyqıg'a ketti.
7 Jaratqan İyenin' perishtesi ekinshi ret qaytıp keldi de, onı tu'rtip: «Turıp, jep al, aldın'da uzaq jol turıptı», – dedi.
8 liyas turıp, iship-jedi. Sol awqattan ku'sh alg'an İliyas Qudaydın' tawı bolg'an Xoreb* tawına shekem qırıq ku'n, qırıq tu'n jol ju'rdi.
9 Ol sol jerdegi bir u'n'girge kirip tu'nedi.Mine, Jaratqan İyeden İliyasqa so'z tu'sti. Ol İliyasqa: – İliyas, bul jerde ne qılıp atırsan'? – dep soradı.
10 İliyas Og'an: – A'lemnin' Qudayı, Jaratqan İye, men Sag'an shın ıqlas penen xızmet ettim. Biraq İzrail xalqı Senin' menen du'zgen kelisimnen ju'z burıp, qurbanlıq orınların'dı buzıp tasladı ha'm payg'ambarların'dı qılıshtan o'tkizdi. Jalg'ız men qaldım, olar o'ltiriw ushın meni de izlep atır, – dep juwap berdi.
11 Jaratqan İye İliyasqa: – Tawg'a shıg'ıp, ko'z aldımda tur. Men senin' janın'nan o'temen, – dedi. Jaratqan İyenin' aldında tawlardı jarıp, jartaslardı maydalag'an qattı ha'm ku'shli samal esti. Biraq Jaratqan İye samal ishinde emes edi. Samaldan keyin jer silkindi, biraq Jaratqan İye jer silkiniw ishinde de emes edi.
12 Jer silkiniwden keyin, ot tu'sti, biraq Jaratqan İye ottın' da ishinde emes edi. Ottan keyin o'lpen' dawıs esitildi.
13 İliyas bul dawıstı esitkende, betin shapanı menen jawıp aldı da, sırtqa shıg'ıp, u'n'girdin' awzında turdı. Sol waqıtta bir dawıs: – İliyas, bul jerde ne qılıp atırsan'? – dep soradı.
14 İliyas Og'an: – A'lemnin' Qudayı, Jaratqan İye, men Sag'an shın ıqlas penen xızmet ettim. Biraq İzrail xalqı Senin' menen du'zgen kelisimnen ju'z burıp, qurbanlıq orınların'dı buzıp tasladı ha'm payg'ambarların'dı qılıshtan o'tkizdi. Jalg'ız men qaldım, olar o'ltiriw ushın meni de izlep atır, – dep juwap berdi.
15 Sonda Jaratqan İye İliyasqa: – Kelgen jolın' menen izin'e qaytıp, sho'l arqalı Damaskke bar. Ol jerge barg'anın'da, Xazaeldi maylap, Aramg'a patsha etip qoy,
16 Nimshiy ulı Ehudı maylap, İzrailg'a patsha etip, al abel-mexolalı Shafat ulı Elishanı maylap, o'zin'nin' ornın'a payg'ambar etip qoy.
17 Xazaeldin' qılıshınan qashıp qutılg'andı Ehu, Ehudın' qılıshınan qashıp qutılg'andı Elisha o'ltiredi.
18 Degen menen, İzrailda Baalg'a ta'jim etip, onı su'ymegen jeti mın' adamdı tiri qaldıraman.
19 Solay etip, İliyas sol jerden ketip, Shafat ulı Elishanı tawıp aldı. Ol on eki jup o'giz benen jer aydap atırg'anlardın' on ekinshisi bolıp jer aydap atır eken. İliyas Elishanın' janına jaqınlap, shapanın onın' u'stine atıp jiberdi.
20 Elisha o'gizlerdi qaldırıp, İliyastın' izinen juwırdı ha'm og'an: – Ata-anamdı su'yip qaytıwıma ruxsat bersen'iz, son'ınan izin'izden jetip alaman, – dedi. – İliyas Elishag'a: – Yaqshı, kete ber, biraq sag'an ne qılg'anımdı umıtpa, – dedi.
21 Solay etip, Elisha izine qaytıp barıp, bir jup o'gizin soydı. Olardın' moyıntırıqların otın etip jag'ıp, go'shin pisirdi ha'm adamlarg'a tarqattı. Adamlar da jedi. Keyin Elisha İliyastın' izinen ketti ha'm og'an xızmet ete basladı.
