1 Patshalar 8 bob
1 Samuel qartayg'an shag'ında, o'zinin' ulların İzrailg'a biyler etip qoydı.
2 Tun'g'ısh ulının' atı İoel, ekinshisinin' atı Abiya bolıp, olar BeerShebada biylik etti.
3 Biraq ulları a'kesinin' jolınan ju'rmedi. Olar na'psiqawlıqqa berilip, para alatug'ın ha'm a'dillikti burmalaytug'ın edi.
4 Sonlıqtan pu'tkil İzrail aqsaqalları jıynalıp, Ramag'a, Samuelge bardı.
5 Olar Samuelge: «Mine, sen de qartaydın'. Ulların' da senin' jolın'nan ju'rmey atır. Sonın' ushın basqa xalıqlarda bolg'anı sıyaqlı, bizlerge biylik etetug'ın bir patsha qoyıp ber», – dedi.
6 Olardın': «Bizlerge biylik etetug'ın bir patsha qoyıp ber», – degen so'zleri Samuelge unamadı. Sol sebepli ol Jaratqan İyege duwa etti.
7 Sonda Jaratqan İye Samuelge bılay dep juwap berdi: «Xalıqtın' sag'an aytıp atırg'an so'zlerinin' ha'mmesin tın'la. Sebebi olar sennen emes, al o'zlerinin' patshası bolg'an Mennen waz keshti.
8 Olardı Mısırdan alıp shıqqan ku'nimnen baslap, usı ku'nge shekem Mag'an ne qılg'an bolsa, sag'an da sonı islep atır. Olar Meni taslap, basqa qudaylarg'a xızmet etken edi.
9 Endi olarg'a qulaq sal. Biraq olarg'a o'zlerinin' u'stinen patshalıq etetug'ın patshanın' huqıqları tuwralı bildirip, qatan' eskert».
10 Samuel o'zinen patsha talap etken xalıqqa Jaratqan İyenin' barlıq so'zlerin jetkerip,
11 1olarg'a bılay dedi: – Sizlerdin' u'stin'izden hu'kimdarlıq etetug'ın patshanın' huqıqları mınaday: ol sizlerdin' ulların'ızdı alıp, o'zinin' sawash arbalarında ha'm atlı a'skeriy toparlarında xızmet ettirip qoyadı. Ja'ne de, olar onın' arbasının' aldında juwırıp ju'retug'ın boladı.
12 Ol bazıların mın'basılar ha'm eliwbasılar etip qoyadı. Bazılarg'a jerin su'rdirip, eginin jıynatadı. Al bazılarg'a bolsa, urıs quralların ha'm sawash arbalarının' a'sbap-u'skenelerin soqtırıp qoyadı.
13 Qızların'ızdı iyis may islewshi, aspaz ha'm nanbay etip aladı
14 Jaqsı egislik jerlerin'izdi, ju'zim ha'm za'ytu'n bag'ların'ızdı alıp, o'z xızmetshilerine beredi.
15 Ol zu'ra'a'tin'izdin' ha'm ju'zimin'izdin' onnan birin alıp, o'z aqtalarına ha'm xızmetshilerine beredi.
16 Qul ha'm shorıların'ızdı, en' jaqsı o'giz ha'm esheklerin'izdi alıp, o'z jumıslarında paydalanadı.
17 Ol mayda malların'ızdın' da onnan birin aladı, al o'zlerin'iz onın' qulları bolasızlar.
18 Usılar orınlang'anda, o'zlerin'iz tan'lag'an patshan'ızdın' da'rtinen nala shegesizler. Biraq sol ku'ni Jaratqan İye sizlerge juwap bermeydi.
19 Degen menen, xalıq Samueldin' so'zin tın'lag'ısı kelmey: – Yaq, bizlerdi basqaratug'ın bir patsha bolsın.
20 Sonda bizler de basqa xalıqlar sıyaqlı bolamız. Patshamız bizlerge biylik etedi ha'm aldımızda ju'rip, sawashlarımızdı basqaradı, – dedi.
21 Samuel xalıqtın' barlıq so'zlerin tın'lag'annan son', olardı Jaratqan İyege aytıp berdi.
22 Sonda Jaratqan İye Samuelge: «Olardın' so'zine qulaq salıp, olarg'a bir patsha qoyıp ber», – dep juwap berdi. Sonnan keyin, Samuel izraillılarg'a: «Ha'r bir adam o'z qalasına qaytsın», – dedi.
