1 Patshalar 3 bob
1 O'spirim Samuel Eliydin' qolı astında Jaratqan İyege xızmet etetug'ın edi. Ol ku'nleri Jaratqan İyenin' so'zi siyrek, ayanları da az boldı.
2 Bir ku'ni tu'nde Eliy ornında jatırg'an edi. Onın' ko'zleri ju'da' a'zzilep qalg'an bolıp, zorg'a ko'retug'ın edi.
3 Al Samuel bolsa, Qudaydın' sandıg'ı turg'an Jaratqan İyenin' İbadatxanasında jatırg'an edi. Qudaydın' shırası ele so'nbegen edi.
4 Sonda Jaratqan İye Samueldi shaqırdı. Samuel Og'an: «La'bba'y», – dep juwap berdi.
5 Son'ınan Eliyge juwırıp barıp: – Shaqırdın'ız ba? Men keldim, – dedi. Biraq Eliy: – Men seni shaqırmadım. Barıp, ornın'a jat, – dedi. Samuel de barıp, ornına jattı.
6 Jaratqan İye ja'ne: «Samuel!» – dep shaqırdı. Samuel ornınan turdı da, Eliyge barıp: – Meni shaqırdın'ız ba? Men keldim, – dedi. Eliy og'an: – Shaqırmadım, balam. Barıp, ornın'a jat, – dedi.
7 Samuel Jaratqan İyenin' dawısın tanımaytug'ın edi. Sebebi Jaratqan İyenin' so'zi og'an ele ayan bolmag'an edi.
8 Jaratqan İye Samueldi u'shinshi ma'rte shaqırdı. Samuel ornınan turdı da, Eliyge barıp: – Meni shaqırdın'ız ba? Men keldim, – dedi. Sonda Eliy balanı Jaratqan İyenin' shaqırg'anın tu'sindi.
9 Ol Samuelge: – Barıp, ornın'a jat. Eger Ol seni ja'ne shaqırsa: «Jaratqan İye! Ayta ber, qulın' tın'lap tur», – dep ayt, – dedi. Samuel barıp, ornına jattı.
10 Jaratqan İye kelip, sol jerde turdı ha'm burıng'ıday etip: – Samuel, Samuel! – dep shaqırdı. Samuel Og'an: – Ayta ber, qulın' tın'lap tur, – dep juwap berdi.
11 Sonda Jaratqan İye Samuelge bılay dedi: – Men İzrailda esitken ha'r bir adamnın' hu'reyin ushıratug'ın bir na'rse isleyjaqpan.
12 Sol ku'ni Eliydin' xojalıg'ına qarsı aytqanlarımnın' ha'mmesin basınan ayag'ına shekem ju'zege asıraman.
13 Eliyge o'zi biletug'ın gu'na sebepli xojalıg'ın ma'n'gige jazalaytug'ınımdı xabarlag'an edim. Onın' ulları Qudayg'a til tiygizse de, ol ullarına tıyım salmadı.
14 Sonlıqtan Men: «Eliydin' xojalıg'ının' ayıbı hesh qashan hesh qanday qurbanlıq penen juwılmaydı», – dep onın' xojalıg'ı haqqında ant ishtim.
15 Samuel azang'a shekem jattı, son'ınan Jaratqan İyenin' U'yinin' qapıların ashtı. Ol ko'rgen ayanın Eliyge aytıwg'a qorqtı.
16 Biraq Eliy onı: – Balam, Samuel! – dep shaqırdı. Samuel og'an: – La'bba'y, – dep juwap berdi.
17 Eliy Samuelge: – Jaratqan İye sag'an nelerdi ayttı? Mennen hesh na'rseni jasırma. Eger Onın' sag'an aytqanlarınan birin jasırıp qalsan', Ol seni jazalag'an u'stine jazalasın, – dedi.
18 Samuel hesh na'rseni jasırmastan, og'an ha'mmesin aytıp berdi. Sonda Eliy: «Ol Jaratqan İye-g'o. Neni maqul ko'rse, sonı islesin», – dedi.
19 Samuel o'sip bardı. Jaratqan İye onın' menen birge edi. Jaratqan İyenin' og'an aytqan so'zlerinin' birewi de orınlanbay qalmadı.
20 Dannan BeerShebag'a shekemgi pu'tkil İzrail xalqı Samueldin' Jaratqan İyenin' payg'ambarı bolıp belgilengenin bildi.
21 Jaratqan İye Shiloda ko'riniwin dawam etti. Sol jerde Ol O'z so'zi arqalı Samuelge O'zin tanıtqan edi.
