1 Patshalar 25 bob
1 Sol arada Samuel du'nyadan o'tti. Pu'tkil İzrail xalqı jıynalıp, og'an joqlaw aytıp jılap, onı Ramadag'ı o'z u'yine jerledi. Bunnan son', Dawıt Paran sho'line ketti.
2 Maon qalasında ju'da' bay bir adam bar edi. Onın' jer iyeligi Karmel awılında bolıp, u'sh mın' qoyı ha'm mın' eshkisi bar edi. Ol sol waqıtta Karmelde qoylarının' ju'nin qırqıp atırg'an edi.
3 Bul adam Kaleb urpag'ınan bolıp, atı Nabal, hayalının' atı Abigayıl edi. Hayalı aqıllı ha'm sulıw, al ku'yewi turpayı ha'm jawız adam edi.
4 Dawıt sho'lde ju'rgende, Nabaldın' qoyların qırqıp atırg'anın esitti.
5 Sonda Dawıt on jigitti Nabalg'a jiberip atırıp, olarg'a bılay dep buyırdı: «Karmeldegi Nabalg'a barın'lar, og'an mennen sa'lem aytıp,
6 bılay den'ler: „O'mirin'iz uzaq bolsın! Sizge, u'y-ishin'izge ha'm o'zin'izge tiyislinin' ha'mmesine amanlıq bolsın!
7 Ha'zir qoyların'ızdı qırqıp atırg'anın'ızdı esittim. Shopanların'ız bizler menen birge bolg'anda, olardı qapa qılmadıq. Karmelde bolg'an waqıtta hesh na'rsesi de jog'almadı.
8 Xızmetshilerin'izden sorap ko'rsen'iz, olar sizge aytıp beredi. Sonlıqtan adamlarımdı jıllı ju'zlilik penen qarsı alsan'ız. Sebebi sizge bayram ku'ni kelip turmız. O'tinish, qulların'ızg'a ha'm ulın'ız Dawıtqa qolın'ızda barınan bersen'iz“».
9 Dawıttın' adamları barıp, bul so'zlerdi Dawıttın' atınan Nabalg'a jetkizip bolıp, juwap ku'te basladı.
10 Biraq Nabal olarg'a mına juwaptı qaytardı: «Dawıt degen kim o'zi? İshaydın' ulı kim bolıptı? Usı ku'nleri xojayınlarınan qashıp ju'rgen qullar ko'beyip ketti.
11 Men ne qoy qırqıp atırg'an adamlarıma arnap qoyg'an nanımdı, suwımdı ha'm soyg'an malımnın' go'shin qayaqtan kelgeni belgisiz bir adamlarg'a beriwim kerek pe?»
12 Dawıttın' adamları kelgen jolı menen qaytıp ketti. Olar Nabaldın' aytqanlarının' ha'mmesin Dawıtqa jetkizdi.
13 Dawıt adamlarına: «Ha'mme qılıshların'ızdı asının'lar!» – dep buyırdı. Dawıt ta, adamları da qılıshların asınıp aldı. To'rt ju'zge jaqın adam Dawıt penen birge ketti, al eki ju'z adam qural-saymanlar janında qaldı.
14 Sol arada Nabaldın' xızmetshilerinen biri onın' hayalı Abigayılg'a mınaday xabar jetkizdi: «Dawıt mırzamız Nabalg'a sho'lden o'z xabarshıların jiberip, sa'lem jollag'an edi. Biraq Nabal olarg'a turpayı qatnasta boldı.
15 Al ol adamlar bolsa, bizlerge ju'da' jaqsı qatnasta bolg'an edi. Olar bizlerdi renjitpedi. Jaylawda olar menen birge bolg'an waqtımızda, hesh na'rsemiz jog'almadı.
16 Olardın' qaslarında qoy baqqanımızda, olar bizlerdi ku'ni-tu'ni qorg'ap ju'retug'ın edi.
17 Endi ne islew kerekligin jaqsılap oylap ko'rin'. O'ytkeni mırzamızdın' ha'm onın' pu'tkil u'y-ishinin' basına apat do'nip tur. Mırzamız sonshelli zulım bolg'anlıqtan, hesh bir adam og'an bir awız so'z ayta almaydı».
18 Sonda Abigayıl waqıttı bos jibermey, eki ju'z nan, eki mes sharap, bes qoydın' go'shin, bes sea quwırmash, nıg'ızlang'an kishmishten ju'z dana ha'm keptirip nıg'ızlang'an a'njirden eki ju'z dana alıp, olardı eshekke arttı.
19 Son'ınan hayal xızmetshilerine: «Sizler menin' aldımnan ju'rin'ler, men sizlerdin' izin'izden baraman», – dedi. Biraq ol ku'yewi Nabalg'a hesh na'rse aytpadı.
20 Abigayıl eshekke minip, tawdın' soqpaq jolları arqalı to'menge tu'sip kiyatırg'anda, o'zine qarsı kiyatırg'an Dawıttı ha'm onın' adamların ushırattı.
21 Dawıt adamlarına mına so'zlerdi aytıp atırg'an eken: «Bul adamnın' sho'ldegi mal-mu'lkin biykarg'a qorıg'an ekenmen. Onın' hesh bir na'rsesi joytılıp ketpedi. Al ol bolsa, jaqsılıg'ıma jamanlıq penen juwap qaytardı.
22 Eger azang'a shekem Nabalg'a tiyisli erkek zatınan birewin tiri qaldırsam, Quday meni jazalag'an u'stine jazalasın!»
23 Abigayıl Dawıttı ko'riwden da'rhal eshekten tu'sti de, Dawıttın' aldında et-betinen jerge jıg'ılıp, ta'jim etti.
24 Onın' ayaqlarına bas urıp, bılay dep jalbarındı: «Mırzam, ayıptı men, jalg'ız men moynıma alaman. Shorın'ız bolg'an mag'an bir awız so'z aytıwg'a ruxsat etin'. Aytqanlarıma qulaq salın'.
25 Jalbarınaman, mırzam, sol Nabal degen on'bag'an adamg'a itibar bermen'iz. Atı aqılsız degendi bildiredi, sol sıyaqlı o'zi de aqılsızdın' biri. Tilekke qarsı shorın'ız bolg'an men mırzam, sizin' jibergen adamların'ızdı ko'rmey qaldım.
26 Endi, mırzam, Jaratqan İye sizdi qan to'giwden, o'z qolın'ız benen o'sh alıwdan saqlap qaldı. Tiri Jaratqan İye haqı aldın'ızda ant iship aytaman: dushpanların'ızdın' ha'm sizge jamanlıq tileytug'ınlardın' ha'mmesinin' basına Nabaldın' basına tu'setug'ın ku'n tu'ssin.
27 Mırzam, sizge alıp kelgen mına sıylarımdı izin'izge ergen adamlarg'a bersen'iz.
28 Shorın'ızdın' gu'nasın keshirin'. Jaratqan İye, a'lbette, urpag'ın'ızdı turaqlı qıladı. Sebebi mırzam, siz Jaratqan İye ushın urısıp ju'rsiz. O'mirin'izdin' aqırına shekem sizde hesh bir nahaqlıq bolmasın.
29 Eger birew sizdi o'ltiriw ushın quwıp ju'rse, Qudayın'ız Jaratqan İye o'mirin'izdi O'z panasında asıraydı. Ol dushpanların'ızdı saqpannan atılg'an tastay etip ılaqtırıp taslaydı.
30 Jaratqan İye sizge wa'de etken iygiliklerinin' ha'mmesin orınlap, sizdi İzrailg'a hu'kimdar etip qoyadı.
31 Sonda o'zim ushın o'sh alıp, jo'nsiz qan to'ktim dep azap shegip, pushayman bolmaysız. Jaratqan İye mırzama tabıs bergende, o'z shorın'ızdı eske alın'».
32 Dawıt Abigayılg'a bılay dedi: «Bu'gin seni mag'an ushırastırg'an İzraildın' Qudayı Jaratqan İyege alg'ıslar bolsın!
33 Bereket tapqaysan'! Jaqsı aqıl berip, bu'gin meni qan to'giwden ha'm o'z qolım menen o'shimdi alıwdan saqlap qalg'anın' ushın jarılqaw alg'aysan'.
34 Sag'an jamanlıq qılıwdan saqlap qalg'an İzraildın' Qudayı, tiri Jaratqan İye haqı ant ishemen: eger sen meni ushıratıw ushın, asıg'ıslıq penen jolg'a shıqpag'anın'da, tan' atqansha, Nabalg'a tiyisli er adamlardın' birewi de tiri qalmag'an bolar edi».
35 Dawıt Abigayıldın' sıyların qabıl etip: «Aman-esen u'yin'e qayt. So'zlerin'e qulaq salıp, tilegin'di qabıl ettim», – dedi.
36 Abigayıl Nabaldın' janına qaytıp kelgende, Nabal u'yinde patshalıq zıyapattay etip zıyapat berip atırg'an eken. Ol ju'da' ma's bolıp, kewli ko'terin'ki edi. Sonlıqtan azang'a shekem Abigayıl og'an hesh na'rse aytpadı.
37 Erten'ine azanda Nabal o'zine kelgennen son', hayalı og'an bolg'an waqıyalardı aytıp berdi. Sol waqıtta-aq Nabaldın' ju'regi muzlap, la'n' bolıp qaldı.
38 Onlag'an ku'nnen keyin, Jaratqan İye Nabaldı jazalap, onı o'ltirdi.
39 Dawıt Nabaldın' o'lgenin esitkende: «Meni masqaralag'an Nabalg'a qarsı dawımdı qarap shıg'ıp, qulın jamanlıq islewden saqlap qalg'an Jaratqan İyege alg'ıslar bolsın! Jaratqan İye onın' jamanlıg'ın o'zine qaytardı», – dedi. Son'ınan Dawıt Abigayılg'a u'ylenbekshiligin bildiriw ushın adam jiberdi.
40 Dawıttın' adamları Karmeldegi Abigayılg'a barıp: «Dawıt sag'an u'ylenbekshi. Sonı bildiriw ushın bizlerdi jiberdi», – dedi.
41 Abigayıl man'layı jerge tiygenshe iyilip: «Mine, men, ha'tte, Dawıttın' xızmetshilerinin' shorısı bolıwg'a da tayarman», – dedi.
42 Abigayıl tez ornınan turdı da, eshekke mindi. Qasına bes shorısın alıp, Dawıttın' xabarshılarının' izinen jolg'a tu'sti. Son'ınan ol Dawıttın' hayalı boldı.
43 Dawıt izreelli Axinoamg'a u'ylengen edi. Solay etip, Dawıttın' eki hayalı boldı.
44 Sol arada Shaul qızı Mixaldı, yag'nıy Dawıttın' hayalın gallimli Layıshtın' ulı Paltiyge berip jibergen edi.
