1 Patshalar 23 bob
1 Dawıtqa: «Filistler Keila qalasına hu'jim jasap, qırmandı talantaraj qılıp atır», – dep xabarladı.
2 Dawıt Jaratqan İyeden: – Barıp, sol filistlerge hu'jim jasayın ba? – dep soradı. Jaratqan İye og'an: – Bar da, filistlerge hu'jim jasap, Keilanı azat et, – dedi.
3 Biraq Dawıttın' adamları: «Mine, bizler bul jerde, Yahudada ju'rip qorqamız. Solay eken, Keilag'a barıp, filist a'skerlerine qarsı qalay urısamız?» – dedi.
4 Sonda Dawıt Jaratqan İyeden ja'ne sorag'anda, Jaratqan İye og'an: «Turıp, Keilag'a bar! O'ytkeni filistlerdi sag'an Men ta'slim etejaqpan», – dedi.
5 Solay etip, Dawıt adamları menen Keilag'a barıp, filistlerge qarsı urıstı ha'm olardın' malların qolg'a kirgizdi. Ol filistlerdi ku'shli qırg'ıng'a ushıratıp, Keila xalqın azat etti.
6 Aximelextin' ulı Abiyatar qashıp, Keilada turg'an Dawıttın' janına barg'anda, efodtı da o'zi menen birge alıp barg'an edi.
7 Shaul Dawıttın' Keila qalasına barg'anın esitip: «Quday Dawıttı qolıma uslap berdi. Dawıt da'rwazaları ta'mbilengen bir qalag'a kirip, o'zin o'zi tutıp berdi», – dedi.
8 Solay etip, Shaul Keilag'a barıp, Dawıttı ha'm onın' adamların qamalg'a alıw ushın, pu'tkil xalıqtı sawashqa shaqırdı.
9 Dawıt Shauldın' o'zine jamanlıq qılıwdı rejelestirgenin esitkende, ruwxaniy Abiyatarg'a: «Efodtı berman alıp kel», – dedi.
10 Son'ınan ol duwa etip bılay dedi: – İzraildın' Qudayı Jaratqan İye! Qulın' bolg'an men sebepli Shauldın' Keilag'a kelip, xalqın wayran etpekshi ekenin esittim.
11 Keilalılar meni Shauldın' qolına tutıp bere me? Qulın'nın' esitkenindey, Shaul usı jerge kelejaq pa? İzraildın' Qudayı Jaratqan İye, jalbarınaman, qulın'a ayan et. Jaratqan İye: – Shaul keledi, – dep juwap berdi.
12 Dawıt Jaratqan İyeden: – Keila xalqı meni ha'm adamlarımdı Shauldın' qolına tutıp bere me? – dep soradı. – Tutıp beredi, – dep juwap berdi Jaratqan İye.
13 Sonda Dawıt ha'm onın' janındag'ı altı ju'zdey adam Keiladan ketip, ha'r jerde orın o'zgertip ju're berdi. Dawıttın' Keiladan qashıp ketkenin esitken Shaul ol jerge barıw pikirinen qayttı.
14 Dawıt sho'ldegi adam bara almaytug'ın jerlerde, Zif sho'linin' tawlı bo'leginde jasap ju'rdi. Shaul Dawıttı ha'r ku'ni izlese de, Quday Dawıttı onın' qolına tutıp bermedi.
15 Dawıt Zif sho'linde, Xoresh tog'ayında ju'rgende, Shauldın' o'zin o'ltiriw ushın jolg'a shıqqanın bilip qaldı. 16Sol arada Shauldın' ulı İonatan Xoreshte jasap turg'an Dawıtqa bardı ha'm onı Qudaydın' atı menen ruwxlandırıp, og'an:
16 Sol arada Shauldın' ulı İonatan Xoreshte jasap turg'an Dawıtqa bardı ha'm onı Qudaydın' atı menen ruwxlandırıp, og'an:
17 «Qorqpa, sen a'kem Shauldın' qolına tu'speysen'. Sen İzrailg'a patsha bolasan', al men senin' ja'rdemshin' bolaman. A'kem Shaul da bunı biledi», – dedi.
18 Keyin ekewi Jaratqan İyenin' aldında o'zlerinin' arasındag'ı kelisimdi jan'aladı. Son'ınan İonatan u'yine qayttı, al Dawıt Xoreshte qaldı.
19 Zifliler Gibag'a barıp, Shaulg'a bılay dep xabarladı: «Dawıt bizlerde, Eshimonnın' qublasında, Xaxila to'beshigindegi Xoreshtin' adam bara almaytug'ın jerlerinde jasırınıp ju'r.
20 Ha'y patsha, sen qa'legen waqtın'da kele ber. Dawıttı patshanın' qolına tutıp beriwdi bizlerge qoyıp ber».
21 Shaul olarg'a bılay dedi: «Mag'an janın'ız ashıg'anı ushın Jaratqan İye sizlerdi jarılqasın!
22 Barıp, ja'ne bir ma'rte tekserip shıg'ın'. Dawıttın' qay jerlerde jasırınıp ju'rgenin, sol jerde onı kimlerdin' ko'rgenin jaqsılap bilip alın'lar. Sebebi xalıq onı ju'da' hiyleker demekte.
23 Onın' jasırınatug'ın jerlerinin' ha'mmesin bilip alıp, mag'an anıq xabar alıp kelin'ler. Sonda men de sizler menen birge baraman. Eger Dawıt sol u'lkede bolsa, onı pu'tkil Yahudanın' tiyreleri arasınan izlep tabaman».
24 Solay etip, zifliler jolg'a tu'sip, Shauldan aldın Zifke keldi. Sol waqıtta Dawıt ha'm onın' adamları Eshimonnın' qublasındag'ı dalan'lıqta, Maon sho'linde edi
25 Shaul adamları menen Dawıttı izlewge shıqtı. Dawıt Shauldın' kiyatırg'anın esitip, Maon sho'lindegi jartaslarg'a barıp jasırındı. Shaul bunı esitip, Dawıttın' izinen Maon sho'line ketti.
26 Shaul tawdın' bir ta'repinen, Dawıt penen onın' adamları tawdın' ekinshi ta'repinen alg'a qaray ju'rdi. Dawıt Shauldan qashıp qutılıwg'a asıqtı. Al Shaul ha'm onın' adamları bolsa, Dawıttı ha'm onın' adamların qolg'a tu'siriw ushın, qorshay basladı.
27 Sol waqıtta bir xabarshı kelip, Shaulg'a: «Tez ju'rin'! Filistler elimizge hu'jim jasap atır», – dedi.
28 Sonda Shaul Dawıttı quwıwın toqtatıp, filistler menen urısıwg'a ketti. Sonlıqtan sol jerge SelaHammaxleqot degen at berildi.
