1 Patshalar 13 bob
1 Shaul İzrailda eki jıl patshalıq etkennen son',
2 xalıqtan u'sh mın' adamdı tan'lap alıp, olardın' eki mın'ın Mixmas ha'm Beyt-Eldin' tawlı u'lkelerinde o'z janına alıp qaldı. Al bir mın'ın Benyamin urıwına tiyisli bolg'an Giba qalasındag'ı İonatannın' janına jiberdi. Xalıqtın' qalg'anın u'ylerine qaytardı.
3 İonatan filistlerdin' Gibadag'ı saqshılar toparın qıyrattı. Filistler bul tuwralı esitti. Al Shaul: «Evreyler bul xabardı esitsin», – dep pu'tkil el boylap ka'rnay sherttirdi.
4 Solay etip, izraillılardın' ha'mmesi Shauldın' filistlerdin' saqshılar toparın qırg'anı ha'm filistlerdin' izraillılardı jek ko'rip qalg'anlıg'ı tuwralı esitti. Sonlıqtan xalıq Gilgalg'a, Shauldın' janına jıynaldı.
5 Filistler izraillılar menen urısıw ushın toplandı. Olar u'sh mın' sawash arbası, altı mın' atlı a'skeri ha'm ten'iz qumınday sansız piyada a'skerleri menen kelip, Beyt-Awennin' shıg'ısındag'ı Mixmasqa orda qurdı.
6 İzraillılar o'zlerinin' qa'wipli jag'dayda ekenin ha'm a'skerlerinin' qısqıg'a alıng'anın ko'rgende, u'n'girlerge, shen'gelliklerge, jartaslardın' quwıslarına, shuqırlarg'a ha'm suw saqlag'ıshlarg'a jasırındı.
7 Evreylerdin' ayırımları bolsa, İordannan Gad ha'm Gilad jerlerine kesip o'tti. Biraq Shaul ele Gilgalda edi. Onın' izine ergen pu'tkil a'skerler qorqınıshtan qaltırastı.
8 Shaul Samuel ta'repinen belgilengen mu'ddetke boysınıp, jeti ku'n ku'tti. Biraq Samuel Gilgalg'a kelmey atırg'anlıqtan, xalıq Shauldın' janınan kete basladı.
9 Sonda Shaul: «Jandırılatug'ın qurbanlıq penen tatıwlıq qurbanlıg'ı ushın beriletug'ın mallardı mag'an alıp kelin'ler», – dedi de, jandırılatug'ın qurbanlıqtı usındı.
10 Shaul jandırılatug'ın qurbanlıqtı berip bolar bolmastan, Samuel keldi. Shaul sa'lem beriw ushın onın' aldına shıqtı.
11 1Samuel Shauldan: – Ne islep qoydın'? – dep soradı. Shaul og'an bılay juwap berdi: – Adamlarım janımnan kete basladı. Sen de belgilengen ku'ni kelmedin'. Bunın' u'stine, filistlerdin' Mixmasqa toplang'anın ko'rgenimde:
12 «Endi filistler Gilgalg'a, menin' u'stime bastırıp keledi, al men elege shekem Jaratqan İyeden ja'rdem soramadım», – dep oyladım. Sonlıqtan men jandırılatug'ın qurbanlıqtı beriwdi sheshtim.
13 Samuel Shaulg'a: – Sen aqılsızlarsha is tutıp, Qudayın' Jaratqan İyenin' o'zin'e bergen buyrıg'ın orınlamadın'. Bulay islemegenin'de, Ol senin' İzrail u'stinen patshalıg'ın'dı ma'n'gilik qılar edi.
14 Biraq endi senin' patshalıg'ın' uzaqqa barmaydı. Jaratqan İye O'zinin' kewline jaqqan birewdi tawıp, onı O'z xalqı u'stinen hu'kimdar etip qoydı. Sebebi sen Jaratqan İyenin' buyrıg'ına boysınbadın', – dedi.
15 Sonnan keyin, Samuel Gilgaldan shıg'ıp, Benyamin urıwının' Giba qalasına ketti. Shaul janında qalg'an adamlardı sanap shıqtı. Olar shama menen altı ju'z adam edi.
16 Shaul, onın' ulı İonatan ha'm olardın' adamları Benyamin urıwına tiyisli bolg'an Giba qalasına ornalastı. Al filistler bolsa, Mixmasqa orda qurg'an edi.
17 Filistlerdin' ordasınan u'sh topar a'sker eldi tonaw ushın bo'linip shıqtı. Toparlardın' biri Shuwal u'lkesindegi Ofrag'a,
18 ekinshisi Beyt-Xorong'a, u'shinshisi Seboim oypatlıg'ı u'stinen ko'terilip turg'an sho'lge baratug'ın jol arqalı shegaradag'ı jerlerge qaray jol aldı.
19 Pu'tkil İzrail elinde birde bir temirshi usta joq edi. O'ytkeni filistler: «Evreyler nayza ha'm qılısh sog'ıp almasın», – degen edi.
20 Sonlıqtan pu'tkil İzrail xalqı paznaların, ketpenlerin, baltaların ha'm oraqların egetiw ushın filistlerge barıwg'a ma'jbu'r edi.
21 Pazna ha'm ketpenlerdin' egew bahası gu'mis shekeldin' u'shten eki bo'legine shamalas bolıp, bel, balta ha'm ushlı qurallardı egew bahası gu'mis shekeldin' u'shten birine ten' edi.
22 Sol sebepli sawash waqtında Shaul menen İonatannın' qasındag'ılardın' hesh birinde qılısh ta, nayza da bolmadı. Olar tek Shaul menen İonatanda g'ana bar edi.
23 Sol arada filistlerdin' bir toparı Mixmas o'tkeline qaray shıqtı.
