1 Patshalar 1 bob
1 Efrayımnın' tawlı u'lkesinin' Rama qalasında Efrayım urıwının' Suf tiyresinen bolg'an Elqana degen bir adam jasaytug'ın edi. Ol Suftın' quwlıg'ı, Toxudın' shawlıg'ı, Elihudın' aqlıg'ı ha'm Eroxamnın' ulı edi.
2 Elqananın' Xanna ha'm Peninna atlı eki hayalı bar edi. Peninnanın' balaları boldı, al Xanna qursaq ko'termedi.
3 Elqana A'lemnin' Jaratqan İyesine sıyınıp, Og'an qurbanlıq beriw ushın ha'r jılı o'z qalasınan Shilog'a baratug'ın edi. Ol jerde Eliydin' eki ulı Xofniy ha'm Pinexas Jaratqan İyenin' ruwxaniyleri edi.
4 Elqana qurbanlıq shalg'an ku'ni hayalı Peninnag'a ha'm onın' ul-qızlarına payların bergende,
5 Xannag'a jaqsı jerinen pay beretug'ın edi. Sebebi Quday Xannanı na'silsiz qılıp qoyg'an bolsa da, Elqana onı su'yetug'ın edi.
6 Biraq Peninna Jaratqan İyenin' perzent bermegenin ku'ndesinin' betine basıp, og'an ba'rqulla azap beretug'ın edi.
7 Bul ha'r jılı dawam etti. Xanna Jaratqan İyenin' U'yine ha'r kelgende, ku'ndesi og'an azap beretug'ın edi. Al ol jılap, hesh na'rse jemeytug'ın edi.
8 Sonda ku'yewi Elqana og'an: «Xanna, nege jılaysan', nege awqat jemeysen'? Nege bunshama qayg'ılısan'? Men sen ushın on uldan artıq emespen be?» – deytug'ın edi.
9 Bir ku'ni olar Shiloda iship-jep bolg'annan keyin, Xanna ornınan turdı. Sonda ruwxaniy Eliy Jaratqan İyenin' İbadatxanasının' kirer awzındag'ı o'z orınlıg'ında otır edi.
10 Xannanın' ju'regi qayg'ıg'a tolıp, o'ksip jılawı menen Jaratqan İyege duwa etti.
11 Ol bılay dep wa'de berdi: «A'lemnin' Jaratqan İyesi! Eger Sen qulın'nın' qayg'ısına na'zer salıp, meni eske alsan' ha'm O'z qulın'dı umıtpay, og'an bir ul sıylasan', men onı pu'tkil o'mir boyı Sag'an bag'ıshlayman. Onın' basına hesh qashan pa'ki tiymeydi».
12 Xanna Jaratqan İyege usılay duwa etiwin dawam etip turg'anda, Eliy onın' awzın gu'zetip otırdı.
13 Xanna ishinen duwa etkenlikten, onın' tek erinleri jıbırlap turdı, al dawısı esitilmedi. Sol sebepten Eliy onı ma's dep oylap qaldı.
14 Eliy og'an: – Ma'sku'nemlikti qashang'a shekem dawam etesen'? İshkendi toqtat, – dedi.
15 Sonda Xanna Eliyge: – Yaq, mırzam, olay emes. Men bir qayg'ıg'a batqan hayalman. Men sharap ta, o'tkir ishimlik te ishken joqpan. Tek ju'regimdegi qayg'ımdı Jaratqan İyege to'gip atırman.
16 Qulın'ızdı uyatsız hayal dep oylaman'ız. Qayg'ı-ha'siretim ku'shli bolg'anlıqtan, usı waqıtqa deyin jalbarınıp turman, – dep juwap berdi.
17 Sonda Eliy og'an: – Aman-esen qayta ber. İzraildın' Qudayı tilegin'di orınlasın, – dedi.
18 Xanna og'an: – Mag'an kewlin'iz tolsın, – dedi de, o'z jolına tu'sti. Son'ınan ol awqatlandı, onın' ju'zi de burıng'ıday qayg'ılı bolmadı.
19 Olar erten'ine azanda erte turıp, Jaratqan İyege sıyıng'annan son', Ramadag'ı o'z u'yine qaytıp keldi. Elqana hayalı Xanna menen jaqınlastı ha'm Jaratqan İye Xannanı esine aldı.
20 Xanna ha'miledar bolıp, waqtı kelgende bir ul tuwdı. Xanna: «Men onı Jaratqan İyeden tilep alg'anman», – dep og'an Samuel dep at qoydı.
21 Elqana Jaratqan İyege jıllıq qurbanlıg'ın ha'm wa'de etip atag'an qurbanlıg'ın beriw ushın pu'tkil xojalıg'ı menen birge Shilog'a ketti.
22 Biraq Xanna olar menen birge ketpedi. Ol ku'yewine: – Bala emshekten shıqqannan keyin, onı Jaratqan İyege xızmet etiwge alıp baraman. Ol Jaratqan İyenin' aldında bolıp, ma'n'gige sol jerde qaladı, – dedi.
23 Ku'yewi Elqana og'an: – Neni maqul tapsan', sonı isle. Balanı emshekten shıg'arg'anın'sha, usı jerde bol. Jaratqan İye sag'an wa'den'de turıwg'a ja'rdem bersin, – dedi. Solay etip, Xanna ulın emshekten shıg'arg'ang'a shekem u'yde bolıp, onı emizdi.
24 Bala emshekten shıqqannan son', Xanna balanı, u'sh jasar bug'anı, bir efa* undı ha'm bir mes sharaptı alıp, Jaratqan İyenin' Shilodag'ı U'yine bardı. Bala ele jas edi. 25Olar bug'anı soyg'annan keyin, balanı Eliyge apardı.
25 Olar bug'anı soyg'annan keyin, balanı Eliyge apardı
26 Son'ınan Xanna Eliyge bılay dedi: «O, mırzam! Aldın'ızda ant iship aytaman: men usı jerde, sizin' janın'ızda turıp, Jaratqan İyege duwa etken hayalman.
27 Men Jaratqan İyeden mına balanı sorap, duwa etken edim. Ol menin' tilegimdi orınladı.
28 Men de onı Jaratqan İyege bag'ıshlayman. Ol bir o'mir Jaratqan İyege xızmet etedi». Son'ınan olar sol jerde Jaratqan İyege sıyındı.
