Rut 2 bob
1 Nag'ıymanın' ku'yewi Elimelextin' Boaz degen tiyreles ag'ayini bar edi. Ol abıraylı ha'm bay adam edi.
2 Bir ku'ni moablı Rut Nag'ıymag'a: – Men atızg'a barayın. Miyrimli birewdi ushıratsam, sonın' atızınan masaq terip keleyin, – dedi. – Yaqshı, qızım, bara g'oy, – dedi Nag'ıyma.
3 Rut atızg'a bardı da, oraqshılardın' izinen ju'rip, masaq tere basladı. Bul egislik maydan Elimelextin' tiyreles ag'ayini Boazdın' menshik jeri bolıp shıqtı.
4 Sol waqıtta Beytlehemnen Boaz kelip, oraqshılarg'a: – Harman'lar, Jaratqan İye sizlerge ku'sh-quwat bersin! – dedi. Oraqshılar og'an: – Bar bolın', sizdi Jaratqan İye jarılqasın! – dedi
5 Boaz olardın' basqarıwshısınan: – Bul jas kelinshek kim? – dep soradı.
6 Oraqshılardın' basqarıwshısı bılay dep juwap berdi: – Bul Moab elinen Nag'ıyma menen birge kelgen moablı jas kelinshek.
7 Ol mag'an: «Oraqshılardın' izinen ju'rip, bawlardın' arasına tu'sken masaqtı teriwime ruxsat etin'», – degen edi. Shertekte azg'antay g'ana dem alg'anı bolmasa, erte azannan usı waqıtqa deyin tınbay atızda islep atır
8 Boaz Rutqa qarap: – Qızım, so'zime qulaq sal. Masaq teriw ushın basqa atızg'a barmay-aq qoy. Usı jerde, menin' xızmetshi qızlarımnın' qasında ju'rip, tere ber.
9 Oraqshılar qaysı atızdı orsa, na'zerin' sol jerde bolıp, qızlardın' keyninen ju're ber. Jigitlerge sag'an tiymewge. buyrıq berdim. Eger sho'llesen' barıp, jigitler toltırıp qoyg'an ıdıstan suw ishe ber, – dedi.
10 Rut Boazdın' aldında et-betinen jıg'ılıp, ta'jim etti de: – Men bir jat jerli adam bolsam da, nege siz mag'an na'zer awdarıp, miyrimlilik ko'rsetip atırsız? – dedi.
11 Boaz og'an bılay dep juwap berdi: – Ku'yewin' qaytıs bolg'annan keyin, enen'e nelerdi islegenin'nin' ha'mmesin esittim. Sen ata-anan'dı ha'm o'z watanın'dı taslap, burın o'zin' tanımag'an xalıq arasına jasawg'a keldin'.
12 Bul jaqsı islerin' Jaratqan İyeden qaytsın! Sen İzraildın' Qudayı Jaratqan İyenin' qolı astınan pana izlegen ekensen', Onın' O'zi seni mol-mol etip sıylıqlasın.
13 Sonda Rut: – Endigiden bılay da, mag'an degen miyrimliligin'iz tawısılmasın, mırzam! Men sizin' shorıların'ızdın' birine de arzımayman. Biraq siz mendey qulın'ızg'a jubanısh berdin'iz ha'm jıllı so'yledin'iz, – dedi.
14 Tu'slik waqtı kelgende, Boaz og'an: – Berman kel, nannan alıp, sirke suwına batırıp je, – dedi. Rut oraqshılardın' janına barıp otırdı. Boaz og'an quwırmashtan uzattı. Rut jep toyıp aldı ha'm jegeninen awıstırıp alıp qoydı.
15 Sonnan keyin Rut masaq teriw ushın ornınan turıp ketkende, Boaz jigitlerge bılay dep buyırdı: «Rut bawlar qasınan da masaq tere bersin, onı qapa qılıwshı bolman'lar.
16 Ha'tteki, og'an da'stelerden shashıp qaldırıp ketin'ler. Ol terip alsın, onın' kewline tiymen'ler».
17 Solay etip, Rut keshke deyin atızda masaq terdi ha'm tergenlerin tu'yip, suwırg'anda bir efag'a shamalas biyday aldı.
18 Rut da'ndi ko'terip qalag'a qaray ju'rip ketti. Ol terip kelgen da'nin enesine ko'rsetti ha'm tu'ste o'zi jegen azıg'ınan awıstırıp qaldırg'anın og'an berdi.
19 Enesi Rutqa: – Bu'gin qay jerde masaq terdin', qay jerde isledin'? Sag'an na'zerin awdarg'an adamdı Quday jarılqasın! – dedi. Rut kimnin' atızında jumıs islegenin enesine aytıp: – Bu'gin men islegen egislik jerdin' iyesi Boaz degen adam, – dedi.
20 Nag'ıyma kelinine: – Tirilerden ha'm marhumlardan O'z miyrim-sha'pa'a'tin ayamag'an Jaratqan İye sol adamdı jarılqasın, – dedi. Nag'ıyma ja'ne dawam etip: – Ol kisi bizlerge jaqın adam, a'mengerlerimizdin' biri boladı, – dedi.
21 Moablı Rut bılay dedi: – Awa, ha'tteki, ol mag'an: «Xızmetshilerim jıyın-terim islerin tamamlag'ansha, olar menen birge ju're ber», – degen edi.
22 Nag'ıyma o'z kelini Rutqa: – Ju'da' jaqsı, qızım, sol adamnın' xızmetshi qızları menen birge ju're bergenin' jaqsıraq. Basqanın' atızına barsan', sag'an azar beriwi mu'mkin, – dedi.
23 Solay etip, Rut arpa ha'm biyday orag'ının' aqırına deyin Boazdın' xızmetshi qızlarınan ayırılmadı. Ol masaq terip, enesi menen birge jasay berdi.
