Rut 1 bob
1 İzraildı biyler basqarg'an da'wirde elde asharshılıq boldı. Yahudanın' Beytlehem qalasınan bir adam hayalı ha'm eki ulı menen birge bir qansha waqıt jasap turıw ushın Moab eline ko'ship ketti.
2 Ol adamnın' atı Elimelex, hayalının' atı Nag'ıyma, ullarının' atları bolsa Maxlon ha'm Kilyon edi. Efratlı bolg'an bul adamlar Yahudanın' Beytlehem qalasının' turg'ınları edi. Olar Moab eline jetip kelip, sol jerde jasap qaldı.
3 Aradan bir qansha waqıt o'tkennen keyin, Nag'ıymanın' ku'yewi Elimelex qaytıs boldı. Ol eki ulı menen jesir bolıp qaldı.
4 Onın' eki ulı moablı qızlarg'a u'ylendi: birinshi kelininin' atı Orpa, al ekinshi kelininin' atı Rut edi. Moabta jasag'anına on jılday bolg'anda,
5 Maxlon da, Kilyon da bul du'nyadan ko'z jumdı. Solay etip, Nag'ıyma ku'yewinen ha'm eki ulınan ayırılıp, jalg'ız qaldı.
6 Moab elinde ju'rgen Nag'ıyma: «Jaratqan İye O'z xalqına na'zerin tu'sirip, olarg'a nan berdi», – degen ga'pti esitip, kelinleri menen birge o'z eline qaytıwg'a bel bayladı.
7 Olar jasag'an jerin – Moab elin taslap, Yahudag'a qaray jolg'a shıqtı.
8 Jolda kiyatırıp, Nag'ıyma kelinlerine: – Barın'lar, ekewin'iz de to'rkinin'izge qaytın'lar. Sizler marhum ku'yewlerin'izge ha'm mag'an qanday jaqsılıq qılg'an bolsan'ız, Jaratqan İye de sizlerge sonday jaqsılıq qaytarsın.
9 aratqan İye sizlerdin' ha'r birin'izge ku'yew berip, u'yli-jaylı bolıp ketkeysiz! – dep, olardın' betlerinen su'ydi. Biraq olar zar jılasıp:
10 – Yaq, bizler senin' menen birge senin' xalqın'a barajaqpız, – dedi.
11 Sonda Nag'ıyma kelinlerine bılay dedi: – Qızlarım, u'ylerin'izge qaytın'lar! Menin' menen ketkenin'izden ne payda? Sizlerge ku'yew bolg'anday, qursag'ımda balam bar ma edi?
12 Barın'lar, keynin'izge qaytın'lar, qızlarım! Men endi qartaydım, ku'yewge shıg'a almayman. Eger de men ele de u'mit qılsam boladı, dep usı tu'ni ku'yewim menen qosılıp ullar tuwsam da,
13 olar erjetkenshe sizler ku'tip otırar ma edin'iz? Solarg'a qarap, turmısqa shıqpay ju'rer me edin'iz? Yaq, qızlarım, Jaratqan İye meni sonshama baxıtsızlıqlarg'a duwshar etti. Menin' qayg'ı-ha'siretim sizlerdikinen de ku'shlirek
14 Kelinler ja'ne zar jılastı. Aqırı Orpa enesi menen su'yisip xoshlastı. Al Rut bolsa enesinen ayırılg'ısı kelmey, onın' menen birge qaldı.
15 Nag'ıyma Rutqa: – Mine, abısının' o'z xalqına ha'm o'z qudayına* qaytıp baratır. Sen de onın' izine erip kete ber! – dedi
16 Biraq Rut bılay dedi: – Seni taslap ketiwge meni ma'jbu'r etpe! Sen qay jerge barsan', men de sol jerge baraman, sen qay jerde bolsan', men de sol jerde bolaman. Senin' xalqın' menin' xalqım, senin' Qudayın' menin' Qudayım boladı.
17 Sen qay jerde du'nyadan ko'z jumsan', men de sol jerde o'lip, jerlenemen. Eger de men o'limnen basqa bir sebep penen sennen ayırılsam, Jaratqan İye meni jazalag'an u'stine jazalasın.
18 Nag'ıyma Ruttın' o'zi menen birge ketiwge qatan' qarar etkenin ko'rip, onı qaytıp u'gitlemedi.
19 Solay etip, ekewi Beytlehemge qaray ju'rip ketti. Olar Beytlehemge jetip kelgende, barlıq qala xalqı janlanıp ketip, hayallar: – Haw, bul Nag'ıyma emes pe? – desti.
20 Nag'ıyma olarg'a bılay dedi: – Meni endi Nag'ıyma dep emes, al Mara dep atan'lar. Sebebi Qu'direti ku'shli Quday menin' basıma ko'p qayg'ı-ha'siret saldı.
21 Bul jerden ketkenimde men ha'mmesine iye edim, biraq Jaratqan İye meni qurı qol qaytardı. Nege meni Nag'ıyma dep atap atırsızlar? Qu'direti ku'shli Quday meni azap-aqıretlerge duwshar qılıp, baxıtsız etti-g'o.
22 Solay etip, Nag'ıyma Moab elinen kelini bolg'an moablı Rut penen birge qayttı. Olar Beytlehemge kelgen waqıtta arpa orag'ı baslang'an edi.
