Biyler 1 bob
1 Eshuanın' o'liminen keyin, İzrail xalqı Jaratqan İyeden: «Kenaanlılar menen urısıwg'a bizlerden birinshi bolıp kim baradı?» – dep soradı.
2 Jaratqan İye olarg'a: «Yahuda urıwı baradı, Kenaan u'lkesin og'an ta'slim qılaman», – dep juwap berdi.
3 Yahuda urıwı tuwısqanları Shimon urıwına: «Kenaanlılar menen urısıw ushın, bizlerdin' payımızg'a tiygen jerge bizler menen birge barın'. Son'ınan bizler de sizlerdin' payın'ızg'a tiygen jerge sizler menen birge baramız», – dedi. Solay etip, Shimon urıwı Yahuda urıwı menen birge ketti.
4 Yahuda urıwı urısqa shıqtı ha'm Jaratqan İye kenaanlılar menen perizlerdi olarg'a ta'slim qıldı. Yahuda urıwı Bezekte olardan on mın' adamdı o'ltirdi.
5 Sol jerde olar Adoniy-Bezek penen ushırasıp, onın' menen urıstı ha'm kenaanlılar menen perizlerdi jen'iliske ushırattı.
6 AdoniyBezek qashıp ketti, biraq olar onı quwıp jetip, uslap aldı da, qol ha'm ayaqlarının' bas barmaqların kesip tasladı.
7 Sonda Adoniy-Bezek: «Qol ha'm ayaqlarının' bas barmaqları kesilgen jetpis patsha menin' dasturxanımnan tu'sken usaqlardı terip jegen edi. Endi bolsa, menin' olarg'a islegenlerimdi Quday aldıma keltirdi», – dedi.Olar Adoniy-Bezekti Erusalimge alıp keldi ha'm ol sol jerde o'ldi.
8 Yahuda urıwı Erusalimge hu'jim jasap, qalanı basıp aldı ha'm xalqın qılıshtan o'tkerip, qalag'a ot berdi.
9 Sonnan keyin, olar tawlı u'lkede, Negebte ha'm batıstag'ı taw eteklerinde jasaytug'ın kenaanlılar menen urısıw ushın jolg'a tu'sti.
10 Eski atı Kiryat-Arba bolg'an Xebronda jasaytug'ın kenaanlılarg'a qarsı atlanıs jasap, Sheshay, Aximan ha'm Talmay degen tiyrelerdi jen'ip shıqtı.
11 Ol jerden olar eski atı Kiryat-Sefer bolg'an Debir qalasının' xalqına da qarsı urıs ashtı.
12 Sonda Kaleb: – Kiryat-Sefer xalqın jen'ip, ol jerdi qolg'a kirgizgen adamg'a qızım Axsanı hayallıqqa beremen, – dedi.
13 Qalanı Kalebtin' inisi, Kenazdın' ulı Otniel qolg'a kirgizdi. Sonlıqtan Kaleb qızı Axsanı og'an hayallıqqa berdi.
14 Qız Otnieldin' janına barg'anda, ol ku'yewin u'gitlep: – A'kemnen bir atız sora, – dedi. Kaleb eshekten tu'sip atırg'an qızınan: – Qanday tilegin' bar? – dep soradı.
15 Qız a'kesine: – Mag'an bir enshi bersen'. Meni Negeb sho'line uzatqan ekensen', endi mag'an suw bulaqların ber, – dedi. Solay etip, Kaleb qızına joqarg'ı ha'm to'mengi suw bulaqların berdi.
16 Muwsanın' qa'yin atasının' urpaqları bolg'an kenler Yahuda urıwı menen birge Palma qalasınan shıg'ıp, Aradtın' qublasındag'ı Yahuda sho'linde jasawg'a ketti ha'm sol jerdegi xalıqlar arasına ornalastı.
17 Sonnan keyin, Yahuda urıwı tuwısqanları Shimon urıwı menen birge barıp, Sefat qalasında jasap atırg'an kenaanlılardı qıyrattı ha'm olardın' qalasın tolıg'ı menen joq etti. Solay etip, ol jer Xorma dep ataldı.
18 Yahuda urıwı Gazanı, Ashkelondı, Ekrondı ha'm olarg'a tiyisli jerlerdi de basıp aldı.
19 Jaratqan İye Yahuda urıwı menen birge bolg'anlıqtan, olar tawlı u'lkeni qolg'a kirgizdi. Al oypatlıqta jasap atırg'an xalıqtın' temirden islengen sawash arbaları bolg'anlıqtan, olardı quwa almadı.
20 Olar Muwsanın' aytıp ketkenindey, Xebrondı Kalebke berdi. Kaleb ol jerden anaqlardın' u'sh tiyresin quwıp shıg'ardı.
21 Biraq Benyamin urıwı Erusalimde jasap atırg'an ebuslılardı quwmadı. Ebuslılar bu'gingi ku'nge deyin Benyamin urıwı menen birge jasap kiyatır.
22 Yusuptin' urpag'ı Beyt-Elge hu'jim jasadı. Jaratqan İye olar menen birge edi.
23 Yusuptin' urpag'ı burıng'ı atı Luz bolg'an Beyt-El qalasına jansızlardı jibergende,
24 olar qaladan shıg'ıp kiyatırg'an bir adamdı ko'rdi. Sonda olar: – Qalag'a kirer joldı ko'rsetsen', sag'an jaqsılıq isleymiz, – dedi.
25 Solay etip, sol adam olarg'a qalag'a kiretug'ın joldı ko'rsetti. Olar qala xalqın qılıshtan o'tkergende, og'an ha'm onın' ag'ayin-tuwg'anlarına tiymedi.
26 Sol adam xettlerdin' jerine ko'ship bardı ha'm sol jerge qala qurıp, onın' atın Luz dep atadı. Bul qala ha'zirge deyin usı at penen ataladı.
27 Menashshe urıwı Beyt-Shean, Taanax, Dor, İbleam, Megiddo ha'm bulardın' a'tirapındag'ı awıllarda jasaytug'ın xalıqtı quwa almadı. Sebebi kenaanlılar bekkem qorg'anıp, sol jerde jasawın dawam etti.
28 İzraillılar ku'shke tolısqan waqtında, kenaanlılardı erksiz xızmetshige aylandırdı, biraq olardı quwıp jibermedi.
29 Efrayım urıwı da Gezerde jasaytug'ın kenaanlılardı ol jerden quwıp jibermedi ha'm kenaanlılar Gezerde olardın' arasında jasadı.
30 Zebulon urıwı da Kitron ha'm Nahalal qalalarındag'ı xalıqlardı quwmadı. Zebulon urıwının' arasında qalg'an bul kenaanlılar olar ushın erksiz xızmetshige aylandı.
31 Asher urıwına kelsek, olar da Akko, Sidon, Axlab, Axzib, Xelba, Afek ha'm Rexob turg'ınların quwmadı.
32 Olar sol jerlerdegi kenaanlılardı quwıp shıg'armay, olar menen birge jasadı.
33 Naftaliy urıwı da Beyt-Shemesh ha'm Beyt-Anat xalqın quwmay, sol jerdin' xalqı bolg'an kenaanlılar menen birge jasadı ha'm kenaanlılar olar ushın erksiz xızmetshige aylandı.
34 Amorlar Dan urıwına oypatlıqqa tu'siwge jol qoymay, olardı tawlı u'lkelerde uslap turdı.
35 Amorlar Har-Xeresde, Ayyalonda ha'm Shaalbimde bekkem qorg'anıp, sol jerde qaldı. Biraq Yusup urıwı ku'shke tolısqanda, amorlar olar ushın erksiz xızmetshige aylandı.
36 Amorlardın' shegarası Aqrabbim biyikliginen baslap Selag'a, onnan da armanıraqqa deyin sozılg'an edi.
